《只屬於我們的獨特戀愛關係》

19. 湯渣

三天之後，我主動找藍天。

經過和前男友的相處失敗，我認為相處不該一味死忍，遇到疑問應盡量坦誠溝通，因為事實未必如我們所鑽的牛角尖去實現。

當以為他因為我說的一句話感到冒犯而心情不好，其實只是未睡飽。

你以為自己煮的飯餸合乎他口味，他只是減肥才少吃飯。事實是，從前他嗜咸，可能他的早已偷偷戒鹽，口味變淡。追問他才不好意思地告訴你。

對方未必一樣坦誠是另一個問題，至少我曾嘗試。講過但沒有相應的回應，就算了。

我沒有任何前設，沒有說他若和移民女友仍在一起便會動怒，覺得他不尊重我。每人有其選擇的自由，更何況我不是他的誰。

我只是想要知道，希望他能告訴我他的想法。

我不想總鑽牛角尖，像小孩一樣耍什麼戀愛機心。

管他三天七天還是一樣，減少痛苦的時間。


我跟藍天說今天熬了冬菇雞腳湯，問他有沒有興趣嘗一下。

他欣然答應。

為了有藉口找藍天才特地準備的，平常懶得要死的我才不會有心思熬湯。

我略略收拾，好讓家裡變得整齊一點。

管理處替他開門，他自行上來。

藍天到了我的家後跟着我到廚房，看著我炒節瓜粉絲、蒸魚。

我們一直在說些不著邊際的無聊話。

說今天新出的電動車，說股市，說在海灘常常看到一個帶頭飾的可愛小女孩。

吃完飯後，我們各自躺在梳化的兩端看電視節目。

「天氣凍，飲唔飲啲酒暖下胃？」我問藍天。喝酒聊天人較放鬆。

「好呀。」

「靚紅酒我就唔識。」我說：「個客送咗支本地釀叫無名氏嘅氈酒話好飲，一齊試吓。」

藍天倒了一小酒杯，「杜松子味同辛香好出！」

客人送贈的酒似乎傳令他感到興奮：「嗒真啲先。仲有少少特別嘅after taste⋯」

「講到咁特別，我又試吓先。」我一嚐，那是一鼓清新又有層次感的味道，輕度的檸檬味道：「我好少飲Gin，唔識評價。不過同我以前試過嘅唔同，好易入口。」

他拿來氈酒瓶的成份研究：「龍井、壽眉、桂花都飲得出。但係陳皮、當歸、芫荽籽真係估唔到。」

「有內涵得嚟口感又唔會太厚實，好酒好酒。本地嘢都有寶藏。」藍天很滿意。

「我覺得有少少似日本隻漱口水。」

「咪睇少佢，溝啲檸茶呃到女仔飲唔少。」

「我呢啲呀嬸應該唔會。」

幾杯酒進肚子，氣氛又放鬆了一點。

我裝作不經意：「話時話，你個移民女點呀？」

「哦。無點呀。」他說：「佢仲有一個月就飛囉。」

我目不轉精地著藍天。

藍天說：「早幾日陪咗佢去塔門郊遊。」

我一方面很高興他對我誠實，另一方面心裡又少許不悅。

我心裡想，他不是說過不要見她嗎？而且藍天也沒和我出去遠遊過。

他這句說話像是在提醒我，他是一個有女朋友的人。

但明知道會分手又沒有名份的關係到底又算不算女朋友？

我還有可能嗎？

「你會唔會好唔開心？」我問。

「個感覺好奇怪，比起好唔開心，反而覺得似一個好熟嘅同事last day或者細個升唔同大學嘅感覺。」

「點可能拎女友同同事嚟比。」

「係，但又真係似。即係會有不捨，但你明白，會接受現實囉。」藍天說。

我說：「我明明地。咁樣做人好悶好無火，乜都要成熟，連離別都要成熟。」

「我地都有想做嘅事，要對自己負責，唔應該為他人而放棄。即使拍拖都係獨立嘅個體。」藍天說。

「你見另一半嘅頻率好疏？」

「唔一定嘅，想見咪見囉。」藍天說：「但都唔會好似以前咁日癡夜癡，咁樣個人會無進步。」

「聽起上嚟關係好疏離呢。」

「唔係呀，情感上好親密。因為我地都唔係因為關係先要定期見面，而係想見先至見面。」

可是這幾句說話又讓我覺得他對女友的感情很薄弱——正如他所說，他不需要她。

藍天說：「你明唔明，係想要同需要嘅分別。被需要係會為我帶嚟好大嘅壓力。」

「我對於你係一個點樣嘅存在？」我問。

「點解你咁問？」藍天說。

「⋯⋯⋯」我感覺自己問了一條自討沒趣的問題。

「我知而家唔係一個好嘅時間點去問你，但我真係想知。你唔覺得俾另一個女性長期出現喺自己間屋好令人誤會咩？」我用一個不會讓他以為我在開玩笑的語氣說。

「我知道你鐘意我。」藍天像是說著一件事不關己的事：「我都鐘意你。」

「我同你可以形容為一種獨特嘅關係。」他說。

「咁係邊一種關係？」

「你可以理解為戀愛。我會想你一路喺我身邊陪伴住我。」

「⋯⋯⋯」

「但唔係拍拖。」

「其實你知唔知自己講緊乜？」我無語。

「通俗坦白啲去講，係我鐘意戀愛嘅感覺，但我唔想負男朋友嘅責任。我會期望大家各自為自己嘅人生負責。」

「我唔明。」

「即係以大家最正能量開心嘅一面去相處，但唔好期望我會處理你嘅情緒，幫你解決你嘅煩惱，過時過節送禮物，見家長朋友，管接管送，或者我會同其他異性保持距離。」

「我未來嘅藍圖都未必會有你。可能突然我會去環遊世界唔返香港。No promise.」

「可能係我個人保守，覺得咁嘅關係無咩意思。」我說。

「唔係嘅。」

被拒絕的我卻尷尬得只想找個洞穴躲起來。

「起碼你話俾我知，等我唔洗再咁煩惱。」

我站起身到處張望，想要離開，又霎時想起這是我的家，不知道要逃去何處。

「喂。」藍天自在地說：「你都唔洗咁尷尬。」

「大佬，點樣唔尷尬。」我說。

「就係坦率先至唔尷尬。」藍天說：「我只係誠實咁講出我對你嘅感受，唔影響我地本來嘅相處㗎喎。」

「但係好影響我對你。我以為你想同我發展先會有同我見得咁頻密、表現得咁close。」

「咁你係想要一段關係，而唔係想要同我close姐。」藍天說。

「咁樣好咩，正常人都想互相對大家好。」

「傻。」藍天笑了一下：「我相信你會明白我講咩嘅。」

說罷，藍天伸手握住我的手。

這是他第一次向我做出如此「親密」的接觸。

他盯著我雙眼，沒有言語 —— 既不是情侶熱烈的愛，也不是漠不關心的冷漠。

那是一種微妙的感情，我解讀不了他的眼神。

但我感覺到此刻的藍天眼中只有我，很專心，腦海中沒有想其他事。

「杞子永遠都唔會係紅桑子。」我語帶平淡的說。

我唯一能解讀的是，他不討厭我，但沒有喜歡到要把我據為己有，而且也不怕我們的關係隨時完結。

「飲杯。」他講完後鬆手，給我倒了一杯顫酒。

我一言不發地乾掉。

他坐在我旁邊，時而玩手機，時而偷瞧我的表情。

藍天是扯線玩偶的主人，與我之間就道無形的絲線連繫著，我被他從下而上牽著走。

而他卻不知道自己挑撥著別人心中的齒輪。

「……」

沒有特別的話語。

感受著的寧靜。

「我走先啦。」藍天跟以往一樣，留到晚上十一時便離開了。

『唔肯確定關係嘅人就係渣！咩叫渣呀？就好似呢煲湯渣咁呀！呢舊乾曬嘅瘦肉，難食又無曬營養呀！』我想起心妍的話。

突然有咁多comment嘅
原來有人追，早啲Post文啦咁～

大仆街藍天

藍天真係好撚自私

會唔會有藍天嘅前傳

藍天講嘅嘢其實又唔難明wor
想要同呢個人close 但又唔係想要一段關係或者名份

20. 夢中浪

我夢到自己身處於陌生的地方。

房間中有一塊落地大玻璃。

窗外一隻巨鷹向玻璃猛地一撞，玻璃竟出現裂痕。

不知從何處天上襲來一波海浪，玻璃外都被水掩蓋。

水壓替玻璃開了個洞，玻璃碎裂，水不停湧進房間。

我在密閉的房間被困，簡直就是一架掉進海裡進海裡的車子。

我未能反應過來，甚至整個人站在房間中央一動不動。

沒有反抗，沒有試圖逃脫，我竟抱著緊張地又期待的心情——等待自己被活生生淹死。

就在房間被淹了三份四的高度，我在迎接淹沒的死亡時刻，爸爸破開木門出現了。

被破開的位置成為了洩洪去水位，整個房間的水瞬間被排走。

「嗯——」

夢醒了。

深呼吸。

壓力。

清醒。


我明白這個夢境對於我的意義。

我渴望生命能找到一個出口，能有個跟爸爸一樣可靠、能信任的人來拯救我。

藍天突如其來的出現侵襲了我的心，海嘯打來亂成一片。

分手後再也沒有一個人能與我分享生活大小事，即使先前的生活有多冷淡，有人相伴總是好的。

孤單無助的我想找尋一個寄託和強加的人生意義。

起初我以為我愛的是藍天帶給我的心動，夢卻提醒我這只是對自己的一種精神上的救贖。

我也是想要借「關係」用來情緒勒索別人，保障自己的人。

而這個人並不一定是藍天，隨便一個稍有好感的人也能取代他的角色。

自私的人最差勁了。

不過故事都差唔多尾聲了

咁快就尾聲

一個夢就醒好叻
幾多人沉船無限loop

未睇夠喎

太快喇

咁快 係咪即係佢哋最後都係行唔到落去

21. 主動止蝕與被動分手

我稍微逃避藍天。

理由是覺得表白心聲卻被拒絕很尷尬。

然而他又跟平常一樣找我，相約我見面。

藍天到底在想什麼？

我拖慢了回覆，有時候一整天晚上才回覆幾句必要的短訊。

現實又跟他對不上線。他最近常在晚上表演，日間我又在工作。

當然，這只是我的藉口，不想見面總有千萬個理由。


「思考題——喺感情上，到咗邊個位置，你會決定止蝕離場？」晚上電視播著愛情清談節目。

「鐘意咗個對你無感覺嘅人，你會選擇自動棄權疏遠對方，定係死chur培養感情直至被開口拒絕？」

「知道大家有唔同而且改變唔到嘅價值觀同習慣，例如一個無辣不歡又好鐘意煙酒、同好多朋友一齊玩嘅人，同一個自律、健康、鐘意兩個人靜靜地喺屋企拍拖嘅人。你會努力嘗試磨合到頂唔順，定係早啲分手？」

「單方面愛到死去活來，而你知道對方永遠唔會咁愛自己，對你冷淡，可能到有一日對方會因為無晒新鮮感而同你分手。你會等到被分手，定係早啲分手？」

「由細個開始拍咗拖好多年，對方唔嗲唔吊，廿幾歲人都未搵到一份正職，又好似唔想結婚。你會幾時先分手？到人老珠黃嘅時候換來對方一句分手？定係當搵到下一隻馬嘅時候先講分手？」

「你地終於結咗婚，但因為一次忍唔到手偷睇咗另一半嘅電話，知道對方未玩夠，出面有好多sp，但佢把口話好錫你。你會唔會仲生bb，定係止蝕離婚？」

「到生咗bb，對方無因為咁而變得有責任感，依然繼續玩，亦都唔太幫手打點屋企嘅事，淨係識打卡呃like扮到好家庭樂，連點換片都唔識，外人睇你地好Sweet。你又會唔會考慮離婚？」

「對方愛上咗第三者要求同你離婚，你會用盡力去補救，扭曲改變自己，唔想衰俾人睇，定係果斷轉身離場？」

我只覺得，越遲離場的人，受的傷越重。

「身體係最誠實。就算你幾想分手，當你真心愛上一個人嘅時候，所有嘅理智都會拋諸腦後，會做好多傻事。」女嘉賓一號說。

「聽落以上嘅情節到最後都會分手，所以我嘅感情問題一律建議分手，而且係早少少，唔好拖浪費時間，我想搵一個對的人同我結婚。」女嘉賓二號說。

「我反而覺得上面係一個個關係嘅進程，唔經歷上一個stage，點會進步到下一個？我會堅持落去唔會分手。」女嘉賓三號說。

「啱啱拍拖時嘅心態係想享受快樂，但如果理由已經唔再存在，就應該離場。」女嘉賓二號說。

我的進場理由是什麼？想要一段穩定的關係？

知道藍天不是一個可以托付終身的對象，但又喜歡想和他變親近？

若只是想親近，目的經已達到，為何我仍悶悶不樂，不滿足？

是因為我貪心嗎？人總是得一想二，得到更多。


我就是在賭場中不認清現實又貪心的輸家，既想要他的愛，又想要他的關注。

我的愛是帶有條件的商品，總在吝嗇計較自己的「愛」。

若他喜歡我五分，我便不多不少付出五分。

我害怕蝕底。

若我的想法是二號，行動就不要變成一號。

只要藍天不在我的視線範圍出現還好。

不要試圖幻想能真正在一起的可能，也不要有任何多餘的期盼，否則受傷的是自己，他卻不損一分一毫。

獨自飾演想念的戲份，也不至於自取其辱。

單戀也是正常。

#本人認為以上係燒腦哲學的一篇

可怕是你 一早看透真相...
愛情問題到頭來都係哲學問題...

其實我覺得如果對方冇打算同你確認關係，就係代表住其實佢冇鍾意你到想擁有你嘅地步。
既然你同佢都唔係男女朋友，亦都冇乜必要將自己嘅全部話俾對方聽，反正對方又唔係你邊個，亦冇咩需要知道自己咁多

LM
之前一直有追live

都係睇大家想係一段關係裏面得到D咩
只要大家都一樣就可以

Lm
以前冇ac