《住咗間有入無出嘅酒店》

女朋友一年一日嘅生日又到，最麻煩莫過於要諗去邊到慶祝。

好彩嘅係，唔知邊個發明咗喺酒店癡氣球慶祝生日呢回事，令到我嘅腦細胞得以保存。成個流程好簡單：帶上酒店、打卡、食蛋糕、飲香檳、上床搞嘢，訓覺，聽朝十二點鐘前退房，完成。

為咗預先準備好，我特登早一日訂定房。

地點係康得思酒店，即係朗豪坊嗰一間。

記得嗰日返工要ＯＴ，我到夜晚先有時間去酒店到搞，就決定索性喺嗰到訓一晚先，聽朝直接帶女朋友阿華過嚟。

嗰晚落好大雨，成個朗豪坊乃至到行去酒店嘅路上都好靜，靜得我只係聽到玻璃外的狂風暴雨，商場幾乎可以講係一個人都無。

直至我入到酒店大堂範圍，見到唯一企喺櫃檯嘅酒店職員，先稍為有啲放心。

「先生有咩幫到你？」酒店職員嘅目光全程都望住我。

「訂咗房，我叫杜明。」

「遲咗好多喎。」

「係啊，有少少麻煩事。」

「唔緊要，我照幫你。」

搞完一大輪手續之後，個酒店職員終於俾張匙卡我。

「有任何需要，可以打電話落嚟。」

「唔該你。」

我拎住匙卡，就去撳升降機。

「叮」到咗。

我行入去，拎條匙卡插一插部升降機，然後撳二十四樓。

一開始無反應，我以為自己用錯，不過撳多幾下就成功咗，部升降機終於合上咗門，我望住道門反射嘅自己，默默等待上去。

但我點估到，入咗去之後......

因為入面發生嘅一啲怪事，

就出唔到呢間酒店。

好似幾好睇

升降機一直上到五樓，突然間「叮」咗聲。

門一打開，入面企住個披頭散髮嘅女人。

老實講，我真係俾佢嚇親。

我同佢對望咗幾秒，佢嘅眼神稍為瞪大咗，就好似見到啲咩嘢咁。

佢低住頭咁行入嚟，呢個情況恐怖到我以為拍緊惡作劇。

道門閂埋之後，升降機如常上升。

部升降機越係上升，佢精神就好似越係失常咁。

我偷偷哋喺後鏡望下佢個樣，結果竟然發現佢喺到咧嘴偷笑......

我曾經聽過講咩升降機殺手，對方會特登低一層出去，然後轉身同你講一陣見，好彩呢種事無發生到，佢只係一直陪我搭到去二十四樓。

嗯，一齊......

「叮」終於到咗二十四樓。

經歷漫長等待，我迫不及待就要出去，邊個知道個女人身上會唔會收埋把刀，突然就插過嚟。

門一開，我急步行出升降機，但走廊嘅情況令我有點訝異......

因為出面居然係昏暗一片，僅僅係依靠住升降機入面自身亮住嘅光，我先睇到出面環境。

因為咁嘅無光情況，令我行咗兩步就停低，結果後面突然發出「嗒嗒嗒嗒嗒......」嘅聲音，更加令我錯愕同一涼！

我慢慢轉頭望向後面，發現嗰個精神有少少失常嘅女人，喺到不停撳緊閂門嗰個掣。就喺道門合上之前，佢對住我詭異咁笑，講咗句：

「多謝你嘻嘿嘿......」

我完全唔知發生咩事，只係知身體暴露喺黑暗之中，令我畏懼感幾何級咁上升。

如果呢個係酒店懲罰我遲入住嘅惡作劇，咁佢哋十分之成功，但我對呢間酒店將會永不錄用。

最好笑嘅係，我居然可以俾到以上嘅籍口自己。

喺無聲又無人嘅走廊到，我打開咗手機嘅電筒，白刺刺的光照住昏暗的長廊，我快速咁跑去自己嘅「2408」號房。

酒店嘅走廊一般都會掛住啲畫，都不外乎係風景或者水果畫，但呢一間極之怪異，佢哋掛住啲好陰森嘅畫風作品，就例如成個背景都係暗紅色，中間企住個條頸好長嘅女人喺到笑，又或者係面色蒼白嘅畸形人喺到大笑。

每望一幅，理智都好似被抽走一分咁，令我不敢直視，快快咁行到去自己間房到。我用匙卡入到房之後，就即刻鎖開燈同鎖門，好彩嘅係呢間房有燈光，成個人即刻安定唔少。

本來我諗住打俾酒店禮賓部，問下發生咩事，點不知打過去係無人聽，我有一刻懷疑過呢到係咪斷電。

直至我拎埋手機出嚟撳，見到無哂訊號wifi之類，我就越係覺得唔尋常。

就算入到房之後，都令我渾身不安。

我以為自己返工返到攰咗，就諗都唔諗蓋被訓。

係，人面對恐怖嘅事情時，

第一時間係會否定自己面對嘅事實。

多謝支持 我p牌 大家得閒可以幫手推

見今晚咁多怪事，我上床合埋眼就訓，希望所有嘢等聽日朝早再處理。

奇怪嘅係，我從來都係唔夠訓嘅代表，但今日我竟然訓到頸都痛埋。

我打開手機，見到時間已經係朝早十點幾，但係窗外面好似都未光過咁。

於是我行過去打開窗簾，結果眼前一黑。

真係眼前一片漆黑。

窗外面完完全全係漆黑嘅畫面，無任何應該見到嘅香港建築、無任何藍天白雲、無光線同任何嘢，就係得一片黑色，就好似虛空咁。

「咩事......」我摸下塊玻璃，玻璃凍得驚人。

去到呢步，我思緒開始有啲混亂，因為我好確定自己瀨咗嘢。

但瀨咗咩嘢，我完全唔知。

鬼撞牆？

最易解釋嘅答案，就係酒店有鬼。

但我感覺上，又覺得唔係咁簡單......

我再一次嘗試用手機，發現都係無訊號。

正當我萬分徬徨，諗緊發生咩事嘅時候，房間內配備嘅電話響起。

「嘟嘟嘟嘟......」

我即刻就接咗電話，放喺耳邊聽，我宜家好急切需要知道發生咩事。

俗語有話，人最大畏懼係未知。

「喂！」我出聲先。

「請你打開門......」聲音有啲細嘅女人，應該係酒店職員？

「我想問下發生咩事？出面做咩黑哂？琴日走廊又無電......」我繼續講自己遇到嘅事。

「開門......」

個女人繼續陰聲咁講。

推

開真名咁勇

其實我個肉身好想去開門，嚟證明呢個世界根本唔存在古怪事，出面可能只係個正常嘅酒店姐姐，但係我內心又極度抗拒。

個人就企喺門口前，隻手就一直放喺木柄到，諗緊開唔開佢好。

就喺呢個時候，有把聲好似喺對面房傳出：

「唔好開門俾佢。」係個女仔嚟。

「啪」

拍門嘅聲音。

「啪」

越嚟越大力。

「啪！」

到呢一下拍門，嚇到我退後咗幾步。

「啪啪啪啪啪啪！」緊接係密集而瘋狂嘅拍門聲。

我不自覺咁用雙手掩住耳朵，因為實在太恐怖，完全唔知門外係啲咩嚟。

過咗好一陣，門聲先終於停低。

我好似經歷完一場劫難咁呆住咗，然後隔住兩道門向對面問：「係咪有人啊！？」

「係。」對面房回答，聽聲個女仔應該二十歲左右。

「呢到係咩事？萬聖節派對啊？」

我到宜家都係唔肯接受現實。

「我都唔知......我只係知，千奇唔好開門俾出面嗰啲嘢。」

「佢哋係咩嚟！？」

「我都話唔知。」

我聽佢都有啲心煩意亂，就問：「你嚟咗幾耐......」

「幾日......我諗有三日。」

「唔......點稱呼你？」

「Elisa。」

「我叫杜明。」知道有同自己一樣嘅人類，我稍為安心咗啲。

「你有冇出過去睇咩事，或者用唔用到電話。」Elisa問我。

「電話無訊號，出面太黑我諗都出唔到去。」

「你個由窗望出去，係咪都係好黑，咩建築物都見唔到。」

「係啊！」

「咁睇嚟我哋情況一樣......」Elisa說。

突然，我發現一個盲點：「Elisa，你宜三日唔餓咩？」

「間房入面有酒店提供嘅零食，都夠頂三日......」講講下，Elisa又轉換話題：「其實我係同男朋友嚟，佢喺第一日就發現到，呢到有少少唔正常，所以出咗去睇下咩事，結果就無再返嚟......」

「咁你無諗住出去睇下？」

「無......」Elisa緩緩講出唔出去嘅原因：「因為我喺間房張檯到，搵到張紙條，上面寫住：『唔好俾出面嘅生物誘騙出去』，然後我同你情況一樣，俾外面嘅人拍門，叫我打開道門，我當然唔出聲無理佢。」

「咁其實我哋係咪入咗異空間之類......」

「或者呢個係死後嘅世界？唔知，但盡量保持理智先。」Elisa意外地冷靜過我。

幫手推推各位如果覺得好睇

我轉身望下雪櫃同張檯，同Elisa講嘅一樣放咗少量零食同飲品。

原本呢啲係要俾錢嘅嘢，我係絕對唔會掂，不過事到如今，我都無可能安然咁行出房，落街買嘢食。

於是我開咗罐汽水，咬咗啖堅果棒，就繼續漫目無的咁等待。

好彩嘅係，我無租好大間嘅酒店房。

間房可以一眼望哂，都唔話好無安全感。

就喺我要飲啖可樂個陣，Elisa突然出聲問：

「你可唔可以分啖俾我？」

「吓？」

「我嗰邊嘅零食第二日已經食哂......」

「喔，得嘅......」我求其拎咗包朱古力，就諗住開門拎俾Elisa。

就喺我隻手放落門柄個一刻，我猶豫咗。

同我講緊嘢嗰個，真係一個人？

定係......只係引我出去？

正當我有宜個猶豫嘅時候，Elisa好似隔住個走廊都洞悉到我心意：「如果你唔信我嘅，咁就由佢。」

幾好睇

「信......」我慢慢咁扭開道門。

「喀」我只係將門開咗少少，睇下出面情況先。

同諗緊嘅一樣，仲係停電咁款，成個走廊都黑哂。

「我準備拎俾你，你開定門。」我同Elisa預先講定。

「好......」

奇怪嘅係，我間房嘅燈居然開始閃爍，好似撞鬼咁。

唔係連呢間房都要電力不足啊？過份驚恐嘅我，立即就閂上門。

點知門一閂，房入面盞燈就回復正常。

「咦？」我好似發現到少少嘢。

我重複來回咁將道開開閂閂幾次，終於發現一個事實。

就係如果我將門完全打開嘅話，咁間房嘅燈就會熄滅。

但如果閂好道門，咁房入面就會著燈。

道門就好似一個開關咁。

「有事？」Elisa聽到我開下閂下咁，就問。

我將呢件事，講咗俾佢知。

「可能.......係酒店嘅設計？」Elisa都係估估下。

「我未見過香港有酒店係咁設計.......點都好，一陣我數三聲，我哋同時打開道門，我即刻拋包朱古力去你到，咁我哋就唔洗行出走廊。」

我感覺係，好似企喺走廊一秒，就會俾女鬼捉走咁。

「好。」Elisa同意。

多謝支持

「三。」

「二。」

「一。」

我同Elisa同時扭開道門，嗰一瞬間我終於見到佢個樣。

佢著住紅色嘅上衣、淺藍色嘅牛仔褲，留有長頭髮，外貌算係幾可人。

拋！

我不偏不移地成功將朱古力拋入佢房，大家就閂埋道門。

「呯」

「呼......」做件咁簡單嘅事，都足以令我個心係咁跳。

「多謝你......杜明。」Elisa已經收到朱古力。

「咁我哋點？繼續喺到等？」

之後嘅時間，我又嘗試繼續報警，電話可以話係現代人唯一嘅求救方法。

但都係嗰一句，無任何訊號。

時間一耐咗，我就漸漸咁接受宜家所發生緊嘅事。

我真係住咗間有入無出嘅酒店。