之前成日腸胃炎，足之排咗期今日去公立照胃鏡
。事前係咁易睇過下啲指引，話成個過程幾分鐘，又唔使留院，諗住應該都ok嘅。但原來件事真係完全唔係我諗嘅咁
入到去見醫生，首先會叫你瞓喺張床度，然後喺個口度噴幾下麻醉藥，之後咬實舊牙膠，再隊條軟管入個口度。
因為我唔係全身麻醉，成個過程係喺清醒下進行
，條管一入到喉嚨位果陣我已經想嘔。但因為琴晚12:00 後就禁食，我完全無野嘔到，只可以不停咁嘔啲口水出黎。條管掂到食道真係好難頂，啲眼流係咁流，個身不停旭。啲醫生護士個個淨係叫我唔好旭，頂你你試下你俾人插丫，點會控制到
？？我盡量都配合唔旭，但隻手已經大大力足實咗醫護隻手，捉到佢話好痛
，最後call 多咗個人入黎禁實我，當下我真係想講：「我可唔可以唔做啦」，但條管喺入面我講唔到野。落到胃，醫生要打啲氣入去，個胃脹晒。我又開始嘔口水流眼淚想掙扎，啲醫護更加用力捉實我，同我講：「你倒數2分鐘啦，好快完架啦，一半架啦」。呢兩分鐘好似係生命中最長最痛苦嘅兩分鐘
。做完之後，一起身就見到啲紙巾上面好多血絲，應該係食道定喉嚨俾條管刮損咗
。叫醫生開啲止痛藥俾我，起初佢話唔使，但我梗係堅持話要，最後佢都只係開咗喉糖俾我。依家一吞口水就好痛，瞓又瞓唔到，一打到呢度又好想喊，飲極水都好似無舒緩到，瞓咗成個晏晝都無乜用，到底幾時先好返 唉。
嘔口水