賓穎女傭安心聘用
2020-01-21 22:24:10
就係咁,我好歹都叫跟咗人學半日劍。
理所當然,沅彤嘅實力比我高出好多,佢可以完美招架我每一下揮擊,又可以完美擊中我每一處部位。
「最緊要係集中。」佢提醒我。
「係...」
對劍期間,我向沅彤問咗個問題:
「你啱啱講嘅「紅神目」其實係咩嚟?重生會有句歌詞都好似有呢隻字,即係兔子人?」
「「紅神目」,即係吞下八赤勾玉嘅生物。總之凡係吞咗殘存喺體內嘅,無論係人定係動物,都可以統稱為紅神目。」沅彤就算講緊嘢,動作都依然流暢。
「你婆婆真係無講,成條村發出紅光之後發生嘅事?」
沅彤搖頭:「之後嘅事?之後佢落山嫁咗俾個香港人,即係我阿爺,然後做古董生意,再生咗我阿媽,阿媽又生咗我,最後我喺到教你用刀。」
時間好快到傍晚,我又不經意諗緊泉叔到底去咗邊。
「集中。」
「係!」
「喀喀──」房間傳嚟敲門聲,我哋嘅對劍亦短暫停止。
「下一位新信徒,到你接見主教。」一把陌生嘅聲音,但相信都係重生會信徒。
沅彤放低木枝,抹抹臉上嘅汗就行出去。鑑於自己一個喺房有少少恐怖,我又行出走廊抖抖氣,咁啱聽隔離房發出奇怪嘅聲音,出於好奇過去望望。
我貼住門去聽,聽到房入面係一個男人痛苦嘅呻吟聲,而且呼息越嚟越緊湊。驚發生緊咩事嘅我,輕輕咁推開佢道門,結果係個不斷用頭撞擊地面嘅男人。
佢做住跪拜姿勢,額頭一下又一下沉重咁打落塊冰冷冷嘅地到。
佢疑似聽到我開門,於是緩緩咁轉望住我,然後呈現出幸福嘅笑容......
「拋脫肉身束縛嘅最好方法......就係...不斷提煉自己精神......同意志......」佢成個頭,可謂係滲滿血:「痛楚......就係最佳嘅提煉品......」
「你流哂血......」我合理相信,佢今晚繼續撞肯定入院。
「只有昇華精神層面!!先係進入「樂園」嘅正道!!!」佢講完,又繼續將頭撞落地板到。
佢呢種俾邪教控制嘅人,我都顧唔得咁多。
香港有七百萬人,總有一、兩個相信宜一套歪理講法嘅人。由唔知幾時開始,三十分鐘後、四十分鐘後?嗰間房就再無傳嚟撞頭嘅聲音。
大約夜晚八點幾,沅彤仲未返,反而宋文德再次嚟到宿舍。
賓穎女傭安心聘用
2020-01-21 22:47:26
「我大致上查哂,成個教育營所有角落。」
「有冇搵到發現啲咩?」半日無見,佢眼睛又冇咁紅。
「無,但我遇到一個奇怪嘅求導者......」第一次見宋文德臉上掛住深深疑惑嘅表情。
「唔係個個都奇怪嘅咩?」
「嗰一個求導者,似乎知道我見過第二個世界。」
「唔通係之前我過第七關,要我交鏡嗰個......佢係會掩住對眼,又笑又喊咁喃喃自語?」諗嚟諗去,都係好似得嗰個有啲神秘。
「嗯,我追問咗佢好耐,佢話......」宋文德諗咗好耐,先決定講出嚟:「呢個係「紅神目」嘅恩賜。」
「咩意思......」
「紅神目,即係佢哋敬畏、跪拜嘅神明嘅名字,而我對眼最近成日望到唔屬於依一個世界嘅事物,係因為我直視過水井下嘅另一個世界,嗰個求導者曾經都發生過一樣嘅事情。」
「咁呢份「恩賜」......會有咩影響......?」喺邪教徒口中嘅恩賜,我會覺得係詛咒。