與藍絲結盟！！屯門公園的啟發！！
https://lihkg.com/thread/1284296/page/1
對唔住咁多位，呢篇有啲長，但係一個中期計劃，需要巴絲們帶領，請耐心睇睇。
為方便討論，同迎合藍絲常用詞彙，以下會將所有支持反送中、抗拒赤化嘅連登巴絲同香港人統稱為「黃絲」，我知有啲 out 同柒，但希望大家唔好介意。
前言：
建制自從 2003 年開始大力分化香港人，梁振英治下更將港人分為藍色同黃色，令群眾忙於內鬥，大大削弱港人團結爭取港人利益嘅能力。本聯盟成立目的，係透過黃絲積極帶動藍絲參與民生議題，以：
1. 凸顯政府同建制派以大型基建浪費香港人資源，無好好改善民生，影響一眾藍絲同全部香港人嘅利益。
2. 向藍絲表達黃絲關心民生，更關心社會唔同階層嘅利益同種種不公。同時為「廢青」及「黃屍」改善形象，減少社會對立，建立全民共同議題，爭取雙方溝通機會、諒解同支持。
3. 抗衡建制以「黃／藍絲」、「廢青／老」分化香港人嘅禍害。關於呢啲標籤同分化，有興趣可睇我另外一個 post：
https://lihkg.com/thread/1281346/page/1
4.（呢點重要）軟性推廣黃絲嘅意識型態，例如公民意識、抗爭意志、公民參與、口號、反專政、以遊行示威方式表達訴求等。呢啲都係令藍絲「一見黃屍就火滾」、覺得黃絲「只係識搞事」嘅原素。如果透過藍絲關心嘅議題嚟表達呢啲意識型態，相信可以起到潛移默化嘅效果。
5. 呢點係我嘅私心，我其實想用呢個計劃打下一個大佬：萬億人工島。下下都要巴打去衝立法會，我真係唔想再係咁，巴打再少一個都唔可以。
簡單講，我哋係以黃絲嘅意識型態、同藍絲關心嘅民生議題來號召、團結人民、凸顯政府施政失誤同社會不公！
最後，呢個係聯盟，係用嚟達到「團結社會最大公因數」，所以所有同政治有關嘅議題唔會直接喺度攪，就好似我哋唔會要求民陣去衝一樣。另外，我覺得暫時唔好用綠色代表呢個計劃，因為有好多藍絲對台灣綠營反感，而且太強調「轉色」佢哋會有戒心，無人想被人同化／分化，所以唔好用綠色／「綠絲」，只需要表達「黃色向藍色示好」就夠。
定位、表達手法要點：
1. 盡量避免觸及有關政治嘅字眼同議題（例如「港共政權可恥」、反送中等），而事實上，呢個政府太不堪，淨係用民生議題已經足以達到以上目的。
2. 因為要為「黃絲」洗底，所以唔使怕保留「黃絲」呢個身份，字裡行間甚至可以有點黃絲「知錯」、「反省完，唔搞政治啦」嘅意味。亦都可以「釋出善意」，誠意邀請藍絲加入行動。
3. 基於 (2)，我覺得可以唔使成立新政黨（或「真建設派」），以避免用多一個標籤，搞到兩邊都分化嘅風險。
4. 同理，我覺得唔好邀請建制議員參加。我哋係黃絲，我哋 at some point 要實踐第一個目標（即凸顯建制係仆街）。
5. 文宣主要以長輩圖同類似「幫港出聲」嘅形式呈現。如有實質行動（例如遊行），針對黃絲同藍絲嘅文宣要唔同，否則調轉可能無黃絲參加。
6. 中老年人其實好簡單，佢哋唔鐘意「反」或者「鬧」，鐘意「理性」。所以文宣、口號要夠正面，如果要反，都只係反對單一「死物」，例如：「改善長者醫療福利，反對興建人工島！」（即係用「[藍絲嘅福利]，[反對嘅政策]」呢個格式）。
7. 中老年人亦覺得自己好重要，鐘意年輕人尊重佢哋。所以文宣用字可以謙虛啲，例如「懇求對方諒解／支持」、尊稱對方為「前輩、老友記、朋友」等。
8. 同理，開始時為咗易啲入屋，可以避免攻擊建制派。我哋又唔係泛民議員，唔需要攻擊政敵。入到屋，打開到個話題已經好好。調轉講，如果我哋成功，相信投建制嘅藍絲都會少啲。
9. 呢個計劃主要係針對藍絲，亦想佢哋參與，所以只可以係和理非，如果有遊行，衣著最好係同撐警遊行一樣（白色或淺藍色），唔可以帶口罩、衝擊等。
10. 有巴打建議如果遊行，可以透過一啲小舉動，例如︰派下水、退熱貼之類比班平時無咩去遊行嘅人感受下我地年青人嘅友善。
具體行動討論：
1. 首先，我覺得搞咩都得，最重要係「以黃絲嘅意識型態、同藍絲關心嘅民生議題來號召、團結人民、凸顯政府施政失誤同社會不公」。
2. 嚟緊嘅屯門公園行動一定要支持，亦係一個嘗試，甚至可以出文宣邀請佢哋參加，搞完如果多藍絲參加要大做文宣，「成功爭取真和諧」！
3. 有巴打提醒五點訴求仲未爭取到，我理解同支持。所以，呢個 proposal 可以大家傾吓先、沉澱一吓都唔遲。
4. 但係，如果又有巴絲覺得而家運動有點膠著，就算和理非遊行，都未必能以五點訴求號召到足夠多嘅人參與，咁呢個藍黃聯盟計劃未嘗唔係一個突破點，可以趁雙方都仲「興洽洽」時試一試。我個人都唔知點先最好，巴絲們請出招。
5. 如果試，我覺得可以先搞一個 Facebook page（好似近來好成功嘅 Sing Majority 咁），做吓文宣、介紹，例如「我哋係一群有反省嘅「黃絲」，經歷種種風波後，希望重回理性、關心民生、少談政治。現誠意懇求社會各方諒解同支持，並邀請一眾愛香港嘅前輩、老友記、朋友帶領我哋建設美好家園。」。開頭或者做一個議題就夠，例如「改善醫療福利」，根本無人可以 challenge，又入到屋，又可以幫衝完立會嘅手足洗白，到多人 like 個 page 後（例如有五萬人），先用呢個議題打嚟緊嘅另一個大佬：人工島。
6. 大家都可以諗過一個好啲嘅名，「政治放兩旁、藍黃為香港」聯盟好似有啲長同柒，但我仍然覺得名稱最好緊扣「藍黃」兩字，咁可能較易達到上述目的。
7. 搞遊行當然可以，但要攞不反對通知書，連登可以做文宣。如果有一日真係有過 10 萬藍黃絲遊行，呢個政府唔使瞓。
8. 我上一個 post 巴打仲有好多建議，值得一看：https://lihkg.com/thread/1284296/page/1 。
9. 各位文宣巴絲如果覺得呢個 idea 可行，請自由發揮、直接去馬！
多謝大家，請「我無嘢講」及俾啲意見。
