如果係好似標題咁諗嘅 請睇埋落去 希望6.9都見到你地
老實講句 自從佔中後我一直都係咁諗
你有你上街 佢有佢照過惡法
覺得條路好孤單 好難行 原來真正嘅自由同民主
係咁難爭取 同時都真正意識到
自由逐漸遠離緊我地 無力感好重
原來正義 唔一定會獲勝 自由同民主都唔係必然
細細個開始就好自豪自己係香港人
咁細嘅地方 一方面保留到咁多傳統野
同時仲係金融中心 又有民主同言論自由
簡直係完美 好慶幸可以係呢個地方出生 係呢個城市成長
慢慢大個 開始明白同接觸到政治
一開始可能覺得好遙遠 邊到自己話事架
但係睇住香港呢個屋企 逐少逐少咁俾大陸同化
覺得好心痛 要正視問題 諗下作為一個香港人
有咩可以為香港做到
佔中事件正好出現 我覺得係時候要做返d野
我唔係日日訓係街個個 更加唔係有衝突時企最前個個
但係個陣時覺得 只要個人係度 個心係度
就會有希望 有貢獻 只要我仲係香港人 我就要企係雞蛋個邊
可惜現實又點會咁好 政府又點會咁好 最後係點大家都知
的確激發左好多人對政治嘅注意 但無可否認 同時都打沉左好多香港人 我係其中一個
開始就諗 好多野都可能真係改變唔到
慢慢向現實妥協 低頭 就咁改變左自己嘅心態
開始好似標題咁諗 不如搵多個錢 走去其他國家算啦
香港真係無得救架啦 無謂搞到自己啦
由唔知幾時開始 香港人呢個身分變左個重擔
好想擺脫佢 想放棄佢 望住DQ 望住班人因為政治而坐監 望住有人被坐洗頭艇
更加無力 更令自己諗 帶頭嘅人都無埋 仲搞鬼搞馬咩
好想離開香港 好想唔理政治 好想做港豬
直到今次引渡條例殺到埋身
原來政治就係咁貼身 你唔搵佢 佢都自然會搵你
我一開始都諗 香港應該氣數已盡 玩撚完架啦
做咩都無用架啦 放棄啦
但係事實唔係咁 遊行可唔可以阻到條例過？
我唔知 無人知 不過我知道 遊行一定唔係徒勞無功
呢個世界唔係非黑即白 遊行過後可能政府依舊懶理
但係個意志係會承傳落去 種子係會發芽
我到呢一刻都相信 香港人係會覺醒
其實就算大家出黎 都未必會成功 但係必定會有人睇到 必定會感染到其他人 星星之火 足以燎原
而家唔得唔緊要 堅持 最後一定得
點解我肯定會得？因為至少我已經被感染到 我唔想再做港豬 更加唔想再有人做港豬
老實講 無力感都仲係好重 但係我知道 今次再唔企出黎 唔只香港玩撚完 我更加會內疚一世
我知好多人覺得一個人行多一步 唔會有野改變
我同你講 你行出第一步 會鼓勵到其他人行出佢地嘅第一步 一傳十 十傳百
我一直覺得無左帶頭嘅人 根本唔會成事
但其實諗深一層 槍打出頭鳥 點解佢地仲要企最前？
就係因為想改變我地 令呢班沈默大多數行出第一步
帶頭係邊個從來都唔重要 又或者咁講 根本就無帶頭嘅人
因為最重要嘅 一直都唔係某一個人 係個精神 係意志
感染同鼓勵到其他人 其實已經贏左
我已經下定決心 要企出黎 我相信你地都可以
希望大家日後可以繼續為身為香港人感到自豪
戴返頭盔先 如果排版差我自膠 因為用緊電話打
歡迎負皮我標題黨
