離開高屋神社嗰陣大約19:15分,成個天都黑曬
咁同時間隔離有兩個日本仔都喺度影緊相,我就好厚臉皮咁走上去問可唔可以麻煩佢車埋我哋走,不過被婉拒咗,話架車淨係可以坐多兩個人(而家仲有四人車架咩
)
咁呢條就係我哋落山行返去觀音寺JR嘅路
由山腳行過去係3.5KM左右 GOOGLE話1個鐘行到當然係未計落山時間...
日本啲神社好興一條長長嘅樓梯直落 但由於兩邊無任何嘅扶手 而且之前都講過啲石級好似俾地震震鬆曬咁 行行下會踩到舊石浪下浪下咁 一個唔該你就可以直接落底
呢幾幅圖我係由OSMO POCKET度截出嚟 不過真係好危險 好快我就收起咗
然後就係瘋狂行呢啲搖搖欲墜嘅石級 之後會變返沙石山路 仲有十零個髮夾彎 但都係沙石路 跣到仆街
途中係一粒燈都無 我哋三個全程靠自己電話當電筒用 因為我斷後 有時候後面有聲都幾驚 不過因為喺山頂拜過入過一百YEN 所以應該有嘢照住我嘅
最後用咗1個鐘多啲終於落到山腳
上網睇啲台仔話搭巴士嚟呢度可以用50分鐘左右行上山頂
可能佢嚟嗰陣條路仲比較完整啦 如果以呢個路面狀態我相信都無乜可能
(當然都可能日頭易行好多嘅 同埋行開山都知係上山容易落山難)
然後查一查車期 下一班車係9點15左右開出 再之後就要等大半個鐘
因為我哋嗰陣好想試骨付鳥一鶴喺丸龜嗰間本店 間嘢寫10點關門 所以就想趕返去食 無得堂食拎返酒店都好
睇完時間就開始鳩奔 諗住如果路上有的士就即刻截
不過成段路都係荒蕪到痴線
鬼影都無隻
咁最後我哋都係壓哨趕到班車嘅 真心行到三個都散曬 一上車即瞓
不過好可惜一鶴個LAST ORDER係9點半 我哋嗰陣好似大概係搭九左右到 話連外賣都唔做
夜晚嗰餐都係求其喺酒店樓下食 係一對公公婆婆開嘅居酒屋 幾好食又唔貴 不過老人家可能味覺退化 啲嘢有少少咸
Day4 完