由於紫雲出山去唔成,但高屋神社我哋係諗住影大太陽-日落-夜景呢三樣一次過,咁太早上去無乜意義,所以就諗緊中下午呢段時間去邊好。
咁嗰兩母女就話佢哋尋日去咗一個叫不動之滝嘅地方,啱啱盛開緊,超多櫻花。
我查一查地方,發現就喺高屋神社前一個站,反正諗唔到做咩好就決定聽佢哋去玩下。
我哋喺「本山」落咗車,發現有啲肚餓,見車站隔離有間叫「冬椿」嘅日式咖喱餐廳好似幾得意,就行咗入去食。
嘢食我覺得係ok嘅,好好食講唔上,但唔錯。
個老闆娘好好人,可能地方隔涉,平時無乜人嚟(因為呢個車站附近除咗有段距離嘅不動之滝之外就無任何景點,四國人又少),所以都幾健談,同我哋吹咗陣水,仲捧埋隻貓出嚟任我哋影,又分享埋自己啲黑膠碟。
黑膠碟無影到相,但係收藏咗超多,又beatles又乜又盛。
食完飯就行去不動之滝,都有段路途,但好快就見到漫山都係櫻花。
雖然話就話係瀑布,但好似已經停咗無出水咁,而且好明顯呢個地方嘅賣點已經變咗隔離呢個盛放櫻花嘅公園仔。
個公園側邊停咗一堆車,全部都係專登過嚟賞櫻嘅人,我哋喺嗰度影咗差唔多兩個鐘,真係無見過任何外國人
(真係唔知嗰兩母女點搵到呢個地方出嚟)