《我還是救護員的日子》[假人真事+你問我答]

三十男

1001 回覆
566 Like 6 Dislike
三十男 2018-10-28 11:44:23
最近電視播緊嗰套救護劇,令我有啲感觸,諗翻起唔少往事,所以決定喺度出翻個關於救護員既故。

「屬員如無適當權限而:
(i) 洩露任何他有責任保密的事宜;
(ii) 直接或間接向任何人傳達在執行公務時所獲悉的事宜;
(iii) 公開宣告有關消防處的事宜;」

以上係香港法例第95章《消防條例》(俗稱13 draw)既其中一條,若然觸犯,屬違反紀律行為,嚴重既可隨時被革職。

我用咗「還是」呢兩個字,即代表我已經唔係現職,所以我並無照顧之憂,可以盡情透露。

電視套救護劇,平心而論算係拍得唔錯,好多關於救護既嘢都跟得幾足,即使係細微細眼到外行人唔會察覺既嘢。不過,都有好多反映唔到現實既位。

例如做嘢既時候好少會戴帽,咁鬼熱焗住哂,邊個會想同你戴,除非遇到有大單嘢,知道自己有可能會見報。

例如唔會有藍色背囊,因為所有架生都會塞哂入同一個紅色背囊入面。帶多個背囊,做嘢只會更累贅。

例如Moving CPR既時候,張床邊會set到咁低。張床係有得調較幾種唔同既高度,通常會set翻高啲,做CPR嗰個會舒服啲,拉床嗰個又會輕鬆啲。(你睇吓每集片頭個MV入面,馬德鐘帶頭拉床嗰陣拉得幾辛苦,真實做嘢如果用咁既姿勢去拉床,條腰捱唔夠幾年就可以打柴。)

例如見習救護主任跟車,去到現場邊會好似個劇入面個譚sir咁識得指揮。佢地通常只係坐喺冷氣房入面做嘢,騎車做Call嗰陣,通常都係成碌鳩咁,乜都唔識做,要教埋佢點做,但講緊佢既人工係高你一倍。

數唔到咁多,或者喺故事入面同大家慢慢分享。

一句講哂,套救護劇只偽反映到「正常情況下」既一面。而我寫呢個故,主要係想分享自己既所見所聞之外,仲有想反映一啲鏡頭拍唔出既不正常情況,同時寄望救護員可以得到更多重視。

I PHONE 都已經出到第十代,講述關於消防員既烈火雄心,喺十幾年前就已經拍過,電影亦拍唔少,消防員一直深受市民愛戴。同樣係救人,但救護員去到今時今日先叫做有翻多少少人認識,最大既諷刺係,消防員同救護員係隸屬同一個部門之下。

覺得好睇,或者想繼續睇既話,請俾個正評或者留個言支持吓。

有任何關於救護呢行既問題,亦都可以隨便問,答得到既我盡量會答。
三十男 2018-10-28 11:45:17
01 我的職業

某早上。

「咦…嗰度好似有人暈咗喎!」

朦朦朧朧間,喺巴士上層閉目養神既我聽到其中一名乘客咁講。

我由窗口望落去,發現有個阿伯訓咗喺地,附近仲圍住咗好多人。有啲係上前睇吓個阿伯咩事,有啲係純粹圍埋黎湊吓熱鬧,有啲係揸住部手機喺度影…

有時真係唔明,唔明白點解香港人咩都要拎部手機出黎影一餐。

我翻工既地方就喺附近,但比平時早咗一個站落車,因為我打算去視察一下阿伯既情況,睇吓有咩可以幫到手。

「唔該借借!唔該借借!」我試圖擠入人群。

埋到去阿伯身邊,我發現佢佢軟臥喺地,雙眼係瞌埋。

我立即檢查一下佢既脈搏同呼吸…

脈搏強而有規律,呼吸則有啲急促。

雖然阿伯連眼都睜唔開,但起碼有生命跡象,未至於不省人事。

「阿伯!阿伯!」我嘗試喺阿伯耳邊嗌佢。

我留意到阿伯既眼皮跳動咗幾下,應該係聽到我叫佢。

我再嘗試用手輕輕向阿伯既肩膀捏幾下,而佢亦好似感覺到有人搞佢咁,上身縮一縮。

非常好,情況不至於太壞。

可能係血糖或者血壓問題,又可能係呢排天口熱,中暑都未定,真係要檢查過先知。

基於阿伯現時既情況,睇怕都要送院處理。

「係咪已經有人報咗警?」我詢問群眾。

呢個時候,有位女士舉手回應:「我啱啱報咗!」

嗯,很好。

現時都無咩可以做到,唯有等救護車到場,將阿伯送去醫院。

「大家散一散開先啦,咁多人圍住喺度,阿伯會唔夠空氣用。」我起身向大家呼籲。

呢句係真心說話,圍哂埋黎都幫唔到啲咩手,不如散開留翻啲氧氣俾阿伯好過。

然後人群逐漸散去,翻工既去翻工,買餸既去買餸。

而我則打算等埋救護車黎先走。

望望手錶,距離正式開工既時間仲有十五分鐘,雖然可能有啲趕,但絕對翻得切去。

救護車好快就黎到場,而我將阿伯交俾幾位救援人員之後,立即提步跑去翻工。

可能你會問,為咗幫個阿伯,搞到自己翻工趕頭趕命,仲身水身汗,值得嗎?

我覺得值,因為…

我既工作本身就係要去拯救生命。

提到拯救生命,各位一定會諗,我到底係咪醫生?抑或護士?定係消防員?

錯哂喇,全部都唔係。

我既職業同樣係需要穿上制服,但呢班人喺社會上好似一直都不太起眼,一般市民硬係會叫錯我地既職銜,甚至乎根本唔知道我地係咩人,剩係知我地係負責救人,身穿白色制服。

由今日開始,我希望大家記得,有一班身穿白色制服,走在最前線進行拯救工作既人,叫做救護員。

無錯,我係一名救護員。
喊是沒有用 2018-10-28 11:49:04
留名
大眼西米膠 2018-10-28 11:58:01
支持
棟你個篤 2018-10-28 11:58:59
希望樓主寫多啲平時冇乜機會睇到嘅細節位
豆沙包 2018-10-28 12:07:25
lm支持
三十男 2018-10-28 12:07:46
02 救護工作

「早晨阿寶!」翻到救護站,喺更衣室入面撞到某位同事。

「早晨呀益哥!」益哥喺呢行已經有三十年既年資。

扯一扯開話題先,我發現大部分人都唔知道,救護員其實係駐守救護站/消防局,而唔係
醫院。仲有,救護員係隸屬消防處,而唔係醫管局。

關於呢點,十個人裡面起碼有八九個都唔知。

「今日遲咗喎!」益哥過黎搭咗我一下膞頭,佢既笑容依舊係非常親切:「今日無阿sir喺度,唔使集隊喇。」

佢口中所講既阿sir,係局入面既救護主任。喺我地眼中,救護主任通常都係一名屎忽鬼,表面叫佢阿sir,心入面就屌緊佢老母。

「收到!」我對益哥都係一如以往般恭敬。

雖然唔使集隊,但我用比平時快一倍既速度換上制服,白色制服上貼有我既紅色名牌。

點解咁急?因為喺開工之前,我想拿拿聲屙翻個屎先,開工前唔屙,我驚開工之後搵唔到機會屙。

正常情況下,我地每一日翻工都要集隊同點名。職級比較低既同事會著好制服列隊,而職級比較高既同事就會進行點名,同埋編配車更。

至於我地係點樣分職級?

睇膊頭啦!兩邊膊頭上面會有個臂章,而臂章上面會有顯示…關於職級呢樣嘢,稍後有機會再同大家解釋。

屙完屎,我就正式開始投入工作。屬於日更既我會接替夜更,而經已當值十二小時既夜更同事可以收工。

救護員係需要輪班工作,簡單黎講,我地既翻工模式係「Day Day Night Off Off」,即翻兩日日頭,一日夜晚,然後放兩日假…

都係唔明?

咁我不如舉個例子。


1月1日(星期一) 1月2日(星期二) 1月3日(星期三) 1月4日(星期四) 1月5日(星期五)
Day Day Night Off Off

1月6日(星期六) 1月7日(星期日) 1月8日(星期一) 1月9日(星期二) 1月10日(星期三)

Day Day Night Off Off

(Day: 08:30 – 20:30 / 07:30 – 19:30, Night 係早晚時間掉翻轉。)


根據以上規律,如此類推。

所以剛剛放工既夜更同事就可以享受兩日假期,而今日係放假後第一日開工既我就要捱多個Day Day Night先有得再放假。

「燈凳燉鄧~」

剛剛先將啲裝備拎上車擺好,條氣都未抖順,鐘聲就響起…

呢行其實真係好忙。

鐘聲一響起,就代表有市民報案求助,我地要出動救人。

「緊急輔助醫療救護服務,秋名山去123號救護車...」每次有行動,局內都會有呢種自動廣播,講述派邊一架車出動,救護車需要前去既地點,同埋係咩類型既案件。

我當然唔係駐守秋名山,個名只係作出黎,而救護車號碼都唔係真。

「女性長者,頭暈……緊急輔助醫療救護服務,秋名山去123號救護車...」然後自動廣播會重覆多次。

「我頂,一接更就要去車。」剛剛坐上車既益哥咁講。

佢係今日呢架救護車既主管,佢膊頭上面有三條柴。

「又係老人家…」我另一位年資比較淺,名字叫輝仔既同事抱怨。

佢似乎對又係做老人call感到有啲洩氣,而我就覺得無乜所謂,因為老人call通常都無乜嘢做。

益哥只係淡然回應:「有乜計?我地呢度聖誕老人村黎架嘛。」

「哈!」我笑咗一笑。

拍住益哥做嘢,當日既心情都特別舒暢,畢竟佢經驗豐富,為人友善又易相處,又好肯教啲新人。想申請假期,只要開聲,佢點都會幫你死掂佢,而唔會好似電視劇入面個三柴咁,講埋哂啲咩車更已經編好哂,好難調動人手之類既廢話。

作為一隊人之中既老大,請日假咁少事都阿支阿咗摩洛哥,你叫啲細既以後點樣順你?以後做嘢嗰陣點樣同你拍爛檔上心啲?

對於益哥,一句講哂,就係好拍。

等大家各就各位,安頓好哂之後,身為司機既我打開車身既閃爍藍燈,調較好響號,救護車正式出動。
三十男 2018-10-28 12:09:16
多謝支持!我會盡量分享多啲!
香港幾時收皮 2018-10-28 12:13:21
白車佬
回憶總是美好的 2018-10-28 12:28:10
車更係點編?係咪次次返工都part唔同人
三十男 2018-10-28 12:29:00
係救護員。
三十男 2018-10-28 12:31:41
一間局入面通常有五隊,一隊有十幾人。日更裡面有兩隊人翻工,通常拍黎拍去都係嗰十幾廿人,但每日既組合可以好唔同。
四月是你的謊言™ 2018-10-28 12:34:42
係咪真係咁講你
三十男 2018-10-28 12:42:56
市民通常嗡唔出我地係咩,仲衰過連白車佬都叫唔出。

見到警察,佢地陀住把鎗,都會知佢地係差人。

消防員就一定唔會認唔出添啦。

但救護員,拎住咁多急救架生,膊頭大大隻字印住消防處,可以被叫錯為護士哥哥...
香港幾時收皮 2018-10-28 12:52:09
其他政府部門點叫你地?
唔係叫白車佬
香港幾時收皮 2018-10-28 12:52:58
有冇真係有護士資格走左入去做救護員?
三十男 2018-10-28 12:57:07
通常最多同警察消防員合作,佢地都會叫聲師兄,或者白車師傅。

關於警察...某啲仆街野會喺故事入面分享到。
沖繩的狗. 2018-10-28 12:57:27
送病人去邊間醫院係邊個話事?
1.如果收到order去A醫院, 但你覺得B醫院係近好多, 都係要去A醫院? 都幾多爭議係關於呢樣
2.有時係街見到揸車嗰位通常都無落車, 佢地係咪唔洗點幫手, 揸車係咪有津貼
香港幾時收皮 2018-10-28 12:58:45
名牌綠牌同紅牌有乜分別?
三十男 2018-10-28 12:59:16
的確係有,因為佢地想做最前線,想再有挑戰性啲。但呢個例子好少。呢啲人一定係前世未捱過苦,今世想感受吓受難既滋味。
三十男 2018-10-28 13:00:11
呢樣野,故事入面好快會解釋到,到時睇吓明唔明,唔明我再解釋。
沖繩的狗. 2018-10-28 13:02:43
想知呀師兄
三十男 2018-10-28 13:05:18
一定係送最就近既公立醫院,無話邊個話事,救護員無得話事,病人亦無。呢點完全無爭議性,想去指定醫院,就call 聖約翰。

做司機係有津貼,但同樣係要需要幫手。至於司機無落到車,主要係主管吩附,知道呢轉係垃圾call,兩丁友都搞得掂,於是叫司機留喺車上面休息吓。

揸車好辛苦,咪以為好過癮。翻夜更揸車,眼都睜唔開,但要chur 住去。
富貴由天 2018-10-28 13:05:56
紅牌可以用既藥少d.
綠牌用既藥會多好撚多
回憶總是美好的 2018-10-28 13:06:14
3柴係隊長帶住十幾個靚仔?
會唔會識得曬局入面d人
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞