【文學亂曰】點樣睇得明古典文學？詩詞散文有趣概念逐個講！

I love you

你也愛我嗎？

連登清泉 真係好耐無咁認真去每粒字讀出黎

簡介基本古典文學概念：登覽 悲讀辛稼軒水龍吟(登建康賞心亭)之欲進無路，欲退不甘

辛稼軒當弱宋末造，負管、樂之才，不能盡展其用，一腔忠憤，無處發洩，觀其陳同父抵掌談論，是何等人物，故其悲歌慷溉，抑鬱無聊之氣，一寄之於詞。
——清．徐釚

稼軒 水龍吟(登建康賞心亭)

楚天千里清秋，水隨天去秋無際。 遙岑遠目，獻愁供恨，玉簪螺髻。 落日樓頭，斷鴻聲裏，江南游子。 把吳鉤看了，欄干拍遍，無人會，登臨意。

休說鱸魚堪膾，盡西風，季鷹歸未？ 求田問舍，怕應羞見，劉郎才氣。 可惜流年，憂愁風雨，樹猶如此！ 倩何人、喚取紅巾翠袖， 搵英雄淚？

稼軒寫呢首詞嘅時間
同一剪梅(游蔣山，呈葉丞相)相近
但兩首詞表達嘅情緒好唔同
或者當稼軒唔需要寫比他人
自我抒情，往往係最為真摰嘅
好深刻表達佢自覺生命嘅困境
欲進無路，欲退不甘

詞題係「登建康賞心亭」
我地見到呢種登咩咩嘢嘅題目
其實即係中國古典詩詞「登覽」嘅類型書寫
咩係類型書寫？
即係相似題材、主題不斷咁被唔同嘅人創作
日積月累，係文學史成為一個類型
呢種類型往往係有共相，有相同之處
咁當然唔同作品，又有唔同嘅情感表達



最出名嘅莫過於：
杜甫〈登樓〉
花近高樓傷客心，萬方多難此登臨。
錦江春色來天地，玉壘浮雲變古今。
北極朝廷終不改，西山寇盜莫相侵。
可憐後主還祠廟，日暮聊為梁甫吟。
「登覽」嘅類型書寫
我地可以幻想自己係高處望風景
都難免因為壯麗嘅景色，有好多感慨
文學家都係人，同我地一樣
登高望遠，五內翻騰，由眼前景起興
對人事變遷之情感
對自身懷才不遇之悲憤
對家國歷史之關懷
都會係高處景象，一一呈現
稼軒此詞，正係「登覽」之詞


稼軒 水龍吟(登建康賞心亭)

楚天千里清秋，水隨天去秋無際。 遙岑遠目，獻愁供恨，玉簪螺髻。 落日樓頭，斷鴻聲裏，江南游子。 把吳鉤看了，欄干拍遍，無人會，登臨意。

楚天：舊時楚國之地
吳鉤：春秋時期流行嘅彎刀

上半片著力登賞心亭之景，抒發悲憤之情
稼軒登高遠眺，秋天無雲
彷彿河水嘅藍都隨住天空染上去
詞人睇見山之形狀如插著玉簪嘅螺髻
呢邊稼軒表達愁恨唔係心中而來
愁恨，係山景層層疊疊所獻供給詞人
借物起興，揭示：
心本非純主觀之物
必因外在事物而生出諸般情感

「 落日樓頭，斷鴻聲裏，江南游子」
時間推移，落日時分
稼軒睇見日薄西山嘅殘敗
聽見孤燕啼叫嘅悲涼
喚起自己江南游子之鄉情
即係話，我嘅故鄉唔係呢到
因為山東之地落係金人手中呀！
斷鴻即係離群嘅燕子
同離居在外嘅游子幾咁相似！

「把吳鉤看了，欄干拍遍，無人會，登臨意」
稼軒抽出吳鉤彎刀細望
只因無用武之地，得個睇字
再三拍遍欄干
因為好多嘢都係語言講唔出
不如用行動抒發

此處化用北宋劉概嘅典故：
劉概乃有才學，不得志之人，常懷想世事，曾憤然手拍欄干之記載。
無人能領會登高嘅沈鬱深意
又何必講出黎呢？

詞人悲憤之情，不以直說
反用一連串嘅動作表達出黎
我地可以稱為：行動意象
電視戲劇嘅示現，好有畫面


休說鱸魚堪膾，盡西風，季鷹歸未？ 求田問舍，怕應羞見，劉郎才氣。 可惜流年，憂愁風雨，樹猶如此！ 倩何人、喚取紅巾翠袖， 搵英雄淚？

下半片著重於情感抒發，唔直接講
以兩個進、退嘅典故為句
接連上半片「無人會，登臨意」
用典本係才學嘅呈現
重點在於拋書包能否表現自己嘅情志

「休說鱸魚堪膾，盡西風，季鷹歸未」之句
出自《世說新語·識鑒》：
「張季鷹辟齊王東曹掾，在洛見秋風起，因思吳中菰菜羹、鱸魚膾，曰：『人生貴得適意爾，何能羈宦數千里以要名爵！』遂命駕便歸。俄而齊王敗，時人皆謂為見機。」
季鷹係齊王手下
有日掛住屋企嘅菰菜羹、鱸魚膾
突然話返去啦，最緊要開心
做咩要比名利官位局限太多呢！

稼軒化用此典，係到反問：
唔好再提呢種搞到人退隱嘅食物啦
西風盡處，季鷹真係返去嗱？
季鷹象徵「退」
但我地都知，稼軒係欲退不甘
稼軒放唔低家國故土
不甘於此，故云「休說」

「求田問舍，怕應羞見，劉郎才氣」
出自《三國志·魏書·陳登傳》：
汜曰：「昔遭亂過下邳，見元龍。元龍無客主之意，久不相與語，自上大床臥，使客臥下床。」備曰：「君有國士之名，今天下大亂，帝主失所，望君憂國忘家，有救世之意，而君求田問舍，言無可采，是元龍所諱也，何緣當與君語？如小人，欲臥百尺樓上，臥君於地，何但上下床之間邪？」表大笑。
漢末，天下大亂，許汜只係識置地買房
劉備批評佢剩係識求田問舍
簡直影衰祖宗十八代

稼軒對於此典
又有別出心裁嘅挪用
「羞」之一字
盡見其不甘退隱之意
稼軒都驚比有志氣嘅人睇唔起架

呢兩個典故嘅句法充滿起伏衝突
詞人先以「休」、「求」似否定「退」
但又徘徊在無法抉擇嘅苦惱，生出張力
稼軒面對家國危難
時間流逝，朝野昏庸
自己又無法一展所長
正係欲進無路


「可惜流年，憂愁風雨，樹猶如此」
焦慮、憂愁一如風雨之連綿不休
詞人講：
可惜浪費晒咁多年用呀！
稼軒此處再用典故
《世說新說·言語》：
「桓溫北伐經金城，見從前所植柳樹已長得十分粗大，慨然嘆道：『木猶如此，人何以堪！』」
桓溫係將軍，殺人無數
但係戰爭回國嘅一刻感到生命嘅局限
大將軍，都無法反抗時光流逝之悲痛
稼軒對「人何以堪」嘅存在悲痛，深有同感

「倩何人、喚取紅巾翠袖， 搵英雄淚？」
自古以來，英雄悲涼
往往只能靠美人聊慰己心
半點柔情，成就淒美
詞人面對這些壯志難酬嘅掙扎
家國將亡嘅苦難
唯有講：
邊個有個可以安撫我嘅人呢？
就比呢位美女，抽出絲巾
輕輕擦拭我默默流下的嘅眼淚
柔柔慰藉我難以言表嘅悲情

呢首詞非常精彩，沈鬱頓挫
用典雖多，實為詩文化結晶之呈現
我地可以由呢首詞引出後面嘅主題：
稼軒係人生困境
欲進無路，欲退不甘嘅狀況
點樣嘗試為自己生命尋找出路呢？

問世間，情是何物？直教生死相許。 天南地北雙飛客，老翅幾回寒暑。 歡樂趣，離別苦，就中更有痴兒女。 君應有語，渺萬里層雲， 千山暮雪，隻影向誰去！

橫汾路，寂寞當年簫鼓， 荒煙依舊平楚。 招魂楚些何嗟及，山鬼暗啼風雨。 天也妒，未信與，鶯兒燕子俱黃土。 千秋萬古，為留待騷人， 狂歌痛飲，來訪雁丘處。

來回縱橫
氣魄

【德尼思化，2017年回顧與展望】

先預祝各位巴絲打，happy new year！
時間嘅里程碑，總係以一年又一年作為結算。
德尼思化，係2017年3月誕生，數數手指，原來已經搞咗9個月……
9個月以前，探長啱啱正係人生低潮，講文藝，本身係唔對現實低頭嘅姿態。
出文，雖然係無償嘅義務工作，但無形嘅回饋好多：

一、直到2017年12月31日，德尼思化一共出咗205篇文，保守估計平均一篇1500字，307705字，計完我都嚇咗一跳！
二、德尼思化目前出咗嘅四個領域，九個主題：
中國文學：《世說新語》(竹林七賢) 、李商隱、蘇東坡、辛棄疾、陶淵明
中國思想：荀子、韓非子
日本文學：日本俳句
西方藝術：Van Gogh 梵谷
三、九個主題入面，已經有七個主題正式完結，真係好頭好尾（仲有兩個未完係比德尼思化進步嘅）。
四、有幸請得講者若瞳講日本俳句，開始咗德尼思化嘅最大目標，建立一個文藝入門平台。
五、已經請得另一位講者子陵，即將會係2018年，開講外國詩，好正呀！
六、最後緊係要感謝各位巴絲打，係零資金零人脈仲要係用粵語嘅情況，德尼思化，由零開始，而家竟然有六百幾個追蹤，而且增長愈黎愈快，萬分感謝你地嘅支持。
七、探長渡過最忙嘅年尾，2018好快會開講李清照詞，歡迎大家到時再黎吹水。（Van Gogh 梵谷都會盡快出返，好似係。）

〈陶淵明讀山海經十三首其一〉
孟夏草木長，繞屋樹扶疏。
衆鳥欣有託，吾亦愛吾廬。
既耕亦已種，時還讀我書。
窮巷隔深轍，頗回故人車。
歡言酌春酒，摘我園中蔬。
微雨從東來，好風與之俱。
泛覽《周王傳》，流觀《山海》圖。
俯仰終宇宙，不樂復何如？

由陶淵明開始嘅德尼思化，最後都用陶淵明嘅句子總結2017，大家新年快樂！

歡迎大家課Like，感謝：
https://www.facebook.com/%E5%BE%B7%E5%B0%BC%E6%80%9D%E5%8C%96-1410350102358414/

祝 2018心想事成
希望你既文藝精神發揚光大
btw講李清照好波 期待
透過呢幾個post我係2017裡面都學到好多嘢，不單係文藝本身亦都參透咗背後嘅人文精神

特別多謝張巴打支持咁耐
2018，平安如意！

如果巴打對呢種寫法有興趣
幾推薦陳滅本《抗世詩話》
寫得幾深入淺山，初學者睇唔錯
其餘好似楊牧《一首詩的完成》都正

探長你 講到陳滅呢本詩集，rthk電台節目有講，聽緊！

http://podcast.rthk.hk/podcast/item_epi.php?pid=671&lang=zh-CN&id=99612

「吾生也有涯，而知也無涯。 以有涯隨無涯，殆已。」

莊子讀咗好多書先講到呢句
唔好做學究，做有智慧嘅人

正解
真理只有一途
其實好簡單

呢個節目唔錯
兩位主持人有料又有心

寧可我助天下人 不負天下人助我

寧可我助天下人 不負天下人助我

好句

簡介基本古典文學概念：書壁 解讀辛稼軒念奴嬌(書東流村壁)之此情不復
斂雄心，抗高調，變溫婉，成悲涼。
——清．周濟《宋四家詞選目錄序論》

稼軒 念奴嬌(書東流村壁)

野棠花落，又匆匆過了，清明時節。剗地東風欺客夢，一夜雲屏寒怯。曲岸持觴，垂楊繫馬，此地曾輕別。樓空人去，舊遊飛燕能說。

聞道綺陌東頭，行人曾見，簾底纖纖月。舊恨春江流未斷，新恨雲山千疊。料得明朝，尊前重見，鏡裏花難折。也應驚問，近來多少華髮？

呢首詞寫作嘅確實時間，難以斷定
好似讀李商隱「無題」詩咁
詞題無法提供我地解讀嘅方向
只知道稼軒係東流村呢個地方書壁

「書東流村壁」
咩係書壁呢？
簡單黎講，即係係牆壁留下句子
好似唔少人會係名勝寫到此一遊咁
其實同古人書壁嘅文化，幾有關連
所不同者，大文學家增添美感
而觀光客破壞風景

書壁，同題字題詩造碑文相似
都係中國古代嘅次文化現象
文人多情，係經過嘅地方書壁
留下見證昔日人事、如今己情嘅存在
好似東坡、子由
「曾為縣吏民知否？舊宿僧房壁共題。」
「老僧已死成新塔，壞壁無由見舊題。」
千古文人書壁無數詩詞
好多都隨住地方消失而流逝


稼軒 念奴嬌(書東流村壁)

野棠花落，又匆匆過了，清明時節。剗地東風欺客夢，一夜雲屏寒怯。曲岸持觴，垂楊繫馬，此地曾輕別。樓空人去，舊遊飛燕能說。

剗地：平白無故

上半片以今昔交錯嘅章法
交代男女之間嘅有緣無份
稼軒雖然食女無數
但背後都有唔少情傷架

「花落」，「又」、「東風」、「欺」、「寒怯」
讀詞必須捉緊情感顯露嘅字眼
「又」到清明時節
詞人暗示等候情人嘅心意
寒冷嘅「東風」吹落野棠花
係咪代表兩人之間嘅不可能呢？
更「欺」醒客居在外旅人嘅夢境
雲屏都擋唔住呢種冰冷
驚醒，係認清現實
而現實難免令詞人身心「寒怯」

「曲岸持觴，垂楊繫馬，此地曾輕別」
從今到昔，詞人回憶往事種種
佳人才子相會，終是輕別
留下日後追思嘅惆悵


稼軒化用李商隱〈無題〉：
斑騅只繫垂楊岸，何處西南待好風
韓翃《章臺柳·寄柳氏》：
章臺柳，章臺柳，昔日青青今在否？
呢個典故，係韓翃寫比一名娼妓
章臺柳亦都成為左妓女嘅比喻
暗示稼軒嘅舊情人好可能係妓女黎

「樓空人去，舊遊飛燕能說」
此情此景，對照今昔
稼軒從回憶走回當下，重遊舊地
飛燕鳴叫，叫出陣陣無奈
似乎係到訴說過去嘅故仔


聞道綺陌東頭，行人曾見，簾底纖纖月。舊恨春江流未斷，新恨雲山千疊。料得明朝，尊前重見，鏡裏花難折。也應驚問，近來多少華髮？

下半片乃詞人尋找女子嘅過程
甚至由當下連接未來嘅幻想
稼軒先黎獨白：
聽講係美麗嘅街道
有人曾經見過你
見過果對我曾經路過見到嘅
你果對纖纖如月色嘅手，輕掠簾底

呢位女子係咩人呢？
綺陌東頭似係妓院嘅街道
詞人歌女，相知輕別
但輕別留下嘅係追憶嘅重
稼軒刻意嘅尋找
甚至書壁，留下字句
可能都係希望舊情人有日見到

「舊恨春江流未斷，新恨雲山千疊」
舊恨，恨嘅係「此地曾經輕別」
新恨，恨嘅係尋覓不果嘅無奈
悔意以「春江」、「雲山」嘅自然意象呈現
「流不斷」、「千疊」強調此恨之連綿不絕
呢一句寫得非常有張力

「料得明朝，尊前重見，鏡裏花難折」
詞人呢邊奇思突起
假設若果真係見返呢位情人嘅情況
從昔至今，延伸至未來：
就算將來有緣再會
咪又係有緣無份！

鏡花水月，出自佛家禪宗
時空發生嘅一切事情都係因緣聚合
只係偶然嘅相會，真幻無常
變幻才是永恆
故佛家說：
如來所說實相，總屬鏡花水月，豈真有實相之可名哉？


https://www.youtube.com/watch?v=YrNqHZxAd9s
或者舊情人已經另有他屬
一如鏡裏之花，可望不可至
無法挽留之事皆成過去
只能待回憶中追思

「也應驚問，近來多少華髮？」
稼軒呢到好悲情咁FF
若果來日相遇
雖然好想親近但都要保持距離
等大家行近，扮哂驚訝咁認出對方
好有禮貌好客氣咁驚問：
哇，好耐無見啦！
點解你白髮同一樣我變得咁多？
短短一句，暗含多少年月的關心
多少悔恨無奈，不可挽回

返工一推

推