[多圖][Live] 繼續700日環遊世界

高加索人真係唔太Nice
老一輩外冷內熱多
可能係前蘇聯國家嘅通病

但後生真係少閪
亞美尼亞啲靚仔同澳洲teenager有得揮

Stalin 個樣其實幾高加索
周圍都見到個樣類似既人 lol

其實交通都唔錯
去到當地 join 旅行團都方便
我都期待呀，不過可遇不可求

而家算唔算少人
烏茲別克可能已經唔算

原來唔單止我有呢個感覺，咁都好啲

淨用網上 (例如IG page推介 又或呢度有幾多人去過) 估算就唔多
高加索都未去到熱門程度反而東南歐 (巴爾幹地區 黑山阿爾巴尼亞嗰啲) 近年已經開始係

啲中坑都係Stalin咁款？

好鐘意睇樓主遊記，好似自己都去埋一份咁！同埋樓主影相好靚，係用咩機影呀？加油繼續寫落去

高加索幾多俄羅斯/大陸/印度人，個組合都幾特別
巴爾幹好彩上年去左

啲後生似 stalin 細個
大人就無咁似，始終 Stalin 有佢獨有髮型/鬚 xd

謝謝你呀
好耐無人讚我影相靚
都係用手機影

俄中多人去就正路嘅 俄制裁唔駛去歐美 中有免簽證
但印度就冇諗過

係呀，反而中亞無咩印度人
可能佢地覺得差唔多 lol

Day 417 烏茲別克

今日嚟到烏茲別克首都塔什干 Toshkent。

嚟烏茲別克既原因幾特別，話說我問 AI，如果我想花一個星期去中亞，睇啲歷史文化野，我應該去邊？

AI 就話，如果你鐘意歷史文化，咁就唔好去其他國家，全程去烏茲別克啦。

成個對話好似烏茲別克買咗廣告咁。

於是我就好聽話咁嚟到烏茲別克~


又去番伊斯坦堡轉機，今次見到夜景


市中心廣場，中間係帖木兒像，類似佢地既精神領袖


帖木兒博物館

塔什干係個典型既首都，以中央廣場為中心，成個城市既道路輻射出去。

有啲地方都做到好美輪美奐，明顯係烏茲別克達官貴人出沒既地方。

不過就唔算太好行，似比人車出車入多。


獨立廣場


戰爭紀念碑；本來喺蘇聯時期得個頭盔，獨立之後先搵番死難者既名稱，刻喺後面既紀念冊


食飯有得玩遊戲，送咗個陶罐比我，店主話我係阿拉丁 lol

Day 418 旅行哈碌

話說之前一路喺歐洲旅行，慣咗一卡通行，身邊無咩現金。

結果今日終於出事。

本來既行程，係中午搭火車由塔什干去撒馬爾罕。

張車飛得烏茲別克文同俄文，我已經用 google translate 睇過，知道要早半個鐘 check in。

點知我去到火車站，個職員同我講，班車係喺塔什干“南”站出發。

原來我掛住睇啲細字，睇唔到大大個“南”字。

由於我早到，當時仲有少少時間比我搭的士衝去南站。

但喺烏茲別克 call 的士要用俄羅斯既 app Yandex Go，我之前一路都登入唔到。

終於我用烏茲別克電話卡登入到，但係佢要我比現金。

我一睇銀包，得番啲散紙。

火車站其實有幾部 ATM，但係我試勻嗮都攞唔到錢。

呢個時候已經過嗮鐘，我唯有死死地氣取消 booking，番去火車站，買凌晨先到嗰班車。

結果我今日又係喺塔什干行嚟行去~


塔什干既地鐵站，都幾靚


中央市場


即場整麵包


到夜晚終於到撒馬爾罕，呢個感覺有啲似西伯利亞鐵路 lol

出咗中歐西歐已經會袋多啲現金
遠少少都唔知收唔收卡嘅

其實都收，連個俄佬 call 車 app 都收，係我咁啱一時㩒唔到
不過之後都係急急腳換錢 lol

Day 419 撒馬爾罕

撒馬爾罕 Samarkand 係烏茲別克第二大城市，已經有超過二千年歷史。

作為絲綢之路一個重要中轉站，撒馬爾罕曾經做過唔同帝國既都城。

不過隨住大航海時代興起，絲綢之路既重要性日益下降。

到咗近代，撒馬爾罕已經破敗不堪，好多建築係到現代先開始重建。


撒馬爾罕最出名既 Registan 廣場，我原本睇字根以為係王家廣場，點知原來係沙地既意思，三座建築亦唔係王宮，而係學校



經學院裡面宏偉既拱頂


有當地人喺度 fing 住裙影相，效果都幾好

撒馬爾罕曾經係帖木兒大帝既都城，現存有佢既家族墳墓。

有傳說話佢既陵墓上刻住“我若蘇醒，必令世界顫抖”，之後有蘇聯科學家唔信邪，起佢既屍骨化驗（網上有圖片），結果幾日後希特拉進攻莫斯科。

帖木兒係典型既遊牧領袖，死後帝國已經四分五裂。

不過佢有子孫之後攻入印度，成立蒙兀兒帝國，所以泰姬陵既風格同佢既陵墓都有啲相似。



帖木兒陵墓


同樣華麗既拱頂

Day 420 古都

比帖木兒陵墓更早既，係粟特人 Sogdians 遺跡。

粟特人屬於古老民族，喺中亞以農耕經商為生。

喺唐朝前後，好多粟特人嚟到中國，以故土為姓，例如撒馬爾罕以前叫康居國，佢地既後人就姓康，其他地方既後人就分別姓安、史、石等等。

粟特人之中最出名既，大概係安祿山。

傳聞粟特人擅於經商，把口啷過油，安祿山亦因而 tum 掂唐玄宗，比佢手握軍權，之後同同鄉史思明一齊造反。

順帶一提，向契丹割讓燕雲十六州既石敬瑭都係粟特後人，所以中史書成日話佢係漢奸，可能佢心諗，我都唔係漢人，都係搵食啫。


粟特博物館



宮殿壁畫，有描繪唐朝皇后（懷疑係武則天）既情景

喺粟特遺跡既附近，亦都有一大陵墓群。

原來當年先知穆罕默德有親戚走嚟粟特地頭宣教，點知比當地人殺咗，埋咗喺附近。

之後撒馬爾罕伊斯蘭化，本地人就覺得嗰度係聖地，喺附近起咗好多陵墓。

到咗而家，仍然會有好多人由唔同國家走嚟朝聖。



陵墓群


終於學識影拱頂


同當地人合照

Day 421 本地市集

今日行一個市場，本來覺得有啲悶，因為都係手信、乾果、香料之類；

點知穿過一間唔起眼既飲品店既後門，竟然會好似誤闖秘境咁去到一個本地市集。

雖然市集賣既係衫褲鞋襪，生活用品之類，但係反而覺得更開心，尤其見到周圍無乜遊客既時候。

當地人見到我都會望多兩眼，好似心諗點解會比個外人入咗嚟哈哈。


本地市集




市集景象：麵包、餅乾、零食


喺遊客區賣藝既老人

中亞食物


手抓飯 plov，用湯料煮飯，收乾水，再加入南瓜、提子、馬肉等等


拉麵 lagman，用香料煮湯，加入牛肉，有啲似五香牛肉麵


曼特 manti，個名似饅頭，個樣似餃子，加入洋蔥羊肉做餡

//有傳說話佢既陵墓上刻住“我若蘇醒，必令世界顫抖”，之後有蘇聯科學家唔信邪，起佢既屍骨化驗（網上有圖片），結果幾日後希特拉進攻莫斯科//

個科學家係嗰個時勢 (納粹已經打緊蘇聯) 仲咁得閒做啲咁嘅嘢

馬肉係咩味

啲野食好重口味....
咁以你所見，烏茲別克最多係邊度既遊客？俄羅斯人定係西歐人多？

分工合作啩
不過自己記錯咗，係開棺之後幾日希特拉開始攻入蘇聯

鹹味 lol
同牛肉有啲似