[開左 po 先][遊記-真係慢慢打] 東北道東冬日之旅

唔同活動唔同收費。
例如夜晚巴士團就 ¥1500；雪地行果啲大概 ¥3000-¥4000左右；日頭巴士團就免費

師兄，我都有去網走駅呀

跟住就慢慢搖巴士入知床斜里啦。如果識得揸車就唔使受制於巴士班次，咁就可以玩得爽啲啦。

咁開箱左起斜里町會住嘅酒店先。起斜里町呢度唔算太多酒店，而且都幾搶手，所以如果有行程係知床斜里呢邊嘅，就要早啲去預約啦。


咁今次就住北辛夷酒店。呢間嘅裝飾就無星野奧入瀨果間咁 wow 啦，不過住起上黎都係好舒服嘅。


酒店就有個 lounge 嘅地方，入面都係俾唔同嘅飲品，例如酒啊果汁啊咖啡之類，同小食自由享用。同埋佢每一日都會有啲當日限定嘅飲品。 我記得佢個mocha，同有一日有蜜桃酒同酒梅酒幾好飲 ！


有一個叫未來郵政局，不過只限於日本國內地址。所以我就寄唔到一封信俾將來嘅我啦


有個圖書角


連 Gym Room 同 兒童遊樂設施都有

佢間酒店入面有間叫 Peter Beier 嘅店舖，入面係一間朱古力鋪頭同小小地嘅 cafe 黎嘅。而入住呢間酒店嘅住客每一晚就可以黎呢度免費食一個雪糕。





呢間酒店我覺得個餐飲反而幾正。呢間都係自助餐形式，不過佢好多款都係排到你嘅時候就即刻整俾你食嘅。咁不過又唔係話等得耐嘅。壽司刺身啊肉啊米線啊等等都有，而有啲都係當日限定嘅菜式。太多款啦，我都係貼少少就算。碟碟都好好食 而好就好在起每一個 counter 隔離都會擺一個模型，等你知道大概會係啲乜野。

圖片來自官網。


張房卡都印左啲人入知床斜里想睇嘅野-流冰！

咁今次就住入面露台有私人溫泉果款房型。有私人溫泉真係好正，可以隨時都走去浸，好方便。

圖片來自官網。


而呢種房型，除左個溫泉之外，就仲有個電子火爐 其實我就諗緊其實係咪真係火爐，定佢個裝飾搞到好似火爐咁咋。不過佢操控上又真係唔同冷氣機果類嘅，而佢又自己燒一個鐘之後又有自動停機嘅功能嘅。

而個露台就係望住海一帶嘅景色，可惜就係兩晚天色都麻麻，如果唔係影下星星都幾好。

待續。

非冬天個樣真係好唔同

註：應該叫呢邊做 宇登呂地區好似適合啲。

天氣不似預期、試過住阿寒湖諗住有星空睇、點知遇低氣壓打大風咁乜鬼都睇唔到
間旅館有個大浴場係天台、踩住雪冰行去浸真係難忘

風雪下赤身行過去應該幾刺激

我上個月去都唔知係好彩定唔好彩 啲大馬路全部冇雪所以都揸得幾輕鬆

咁應該係好彩起碼無封路

應該無橫手咁通勤feel 橫手果度係差啲要人逼你入車廂

但就冇乜冬天氣氛

我未有想法打起知床果度，咁就等我 skip 左去到釧路先啦。釧路都係住 route inn，起正車站對面，好方便。


夜晚去到釧路站。今次無好好去研究呢個城市，應該最旺果度係幣武橋果邊？車站呢邊好似都無野好食嘅，去到七點左右車站啲鋪頭都關門啦。結果懶得行都係去食便利店就算數



今次黎釧路，都多野搞。咁就主要book左釧路濕地獨木舟，釧路SL冬季濕原號，同埋book車去道東一啲地方嘅一日遊咁。首先今日一早去左釧路濕地獨木舟先。唔記得呢度係 JR 北海道地頭，結果就 book 左濕地獨木舟個時間唔係好夾到個時間，結果就要搭頭班車去到塘路然後等運到等一粒幾鐘






釧路呢邊天氣好似好多時候都幾好咁，結果起程車上面都已經影到好多幾好嘅雪景！


去到塘路站。因為釧網本線都係單軌雙程，去到呢個站啲車好似都會停耐啲，除左我之外都有其他乘客走去落車影下相咁。不過當架車走嘅時候就淨得返我一個咁濟啦


個站就有個候車室，候車室對面有一間小店嘅。不過由於時間太早都係未開嘅。而個候車室入面雖然有瓦遮頭，不過係無暖爐之類嘅，當然啦鄉郊小站你想有啲乜設施同服務 結果啪左個早餐之後越坐越寒，我都係走去車站附近行下好過


由於時間尚早，啲樹枝上面啲雪都未融，所以見到棵棵樹上面都係白白地色嘅。
其實應該有路去釧路濕地啲展望台，不過我試過去，去到個入口果度未上去已經放棄，因為條大斜路都結曬冰咁，對腳又唔靈活點行上去啊

終於就去到獨木舟 tour 個時間啦！咁就個 tour 就起返塘路站度等，然後司機會車去遊舟嘅起點塘路湖隔離。





如果book得再早啲，就應該會容易啲見到河上面有浸晨霧嘅。不過我就遲左book，所以 book 到九點左右個session，所以就遊舟嘅時候就見唔到果一浸晨霧啦。希望有機會會有機會再黎然後book到早啲嘅時段啦。同埋網上睇好似有啲公司會包埋由釧路到塘路站嘅接送服務，下次有機會都搵清楚先！


一開始影返張相先！


首艇其實導遊都會上船嘅， 一開始都會講下點樣操控架野。同埋你都可以一路撐一路影相嘅，只要將隻掌收起擺入首船上面就得啦。。咁一開始就唔使好似上次起弘前撐船仔咁玩左十分鐘都未出發咁樣衰


撐船仔嘅視覺就係咁。如果再早啲有浸晨霧，個畫面應該會再正啲

起上面泛舟其實個感覺好平靜 ，因為附近都真係無屋無路咁，聽唔到任何嘅車聲同人聲，只係聽到撐船嘅聲音。而又細風，連風聲都無。偶然就有雀仔聲。唔記得錄低果一下，唯有都係起腦海入面靠睇相回味返啦。


偶然見到鹿起河邊！即刻靜曬咁去影低佢地 其實都見到其他雀仔，不過影唔切。


同埋有個位都係會去到鐵路軌道附近嘅。然後就都停左一輪去等火車黎到。

大概總共撐左四公里左右，真係幾舒服。有機會都想再黎呢一度！希望下次有機會可以見到更多嘅動物啦。然後返返去塘路湖，導遊都會車返去塘路站度。

待續。

好靚

起塘路站繼續等運到等左一粒鐘左右，就到下一個行程啦。

本來就唔會去搭SL冬季濕原號嘅，不過排行程嘅時候就見有半日空左，咁就順便加埋呢個行程啦！起網上順利買到來回兩程飛，而兩程飛都買到第一卡啲面向外面嘅位


第一程就係由塘路搭去標茶。


車黎啦，個個都想影低佢。

原來呢款車起 2000 年開始營運，計返今年就係 25 年，所以今次黎到會見到有比較多 25 週年嘅元素。




第一同第五卡係咁嘅。而我兩程都買到右手邊果款位，咁就更加舒適咁享受呢兩程火車啦。


而當中有個位個車窗特別大。


其他卡嘅設計大概係咁。而中間有幾卡就有煤炭爐，都見到有人烤魷魚食。


車入面都有個位係俾人 cup 印仔。


當然就唔少得車入面個售賣處啦。不過呢度就只收現金。同埋都幾多人去買紀念品，結果有啲都已經賣曬啦。


咁我都買左啲筆啊，貼紙啊，徽章，鎖匙扣啊之類。而個郵票就係起標茶站當地居民果啲店舖度買嘅。


飲住咖啡去望住窗外嘅景色都幾寫意。雖然程車上面又要排隊買紀念品又要去其他卡參觀下都有啲忙

Lm

去到標茶站就有當地嘅居民黎歡迎。



咁都去左標茶當地居民嘅鋪頭度食返個 lunch 先。而當日好似有特別嘅居民活動，起鋪頭入面都有當地居民去彈琴之類。個氣氛都唔錯。食野嘅時候都同一個從札幌黎嘅遊客講左幾句。佢地都係專程過黎搭SL。最後仲請左我食一半嘅甜蕃薯


標茶站都有一個位擺左 SL 嘅模型。


月台上有個位去俾人敲下鐘咁。


標茶站就有一條行人天橋俾人去其他月台搭車嘅。咁起呢個時候呢條橋都逼滿曬人。從高處睇SL架車。


車上面見到一部分嘅景色。


返返去釧路站，大家都繼續瘋狂咁去參觀部車。咁睇住部車走之後就去埋釧路嘅和商市場食返個海鮮飯。 下次有機會都應該去買返隻蟹去食！




之後其實行左去幣舞橋睇日落。不過我覺得呢個位好似吹大左咁 唔係太明白個特別點係起邊，所以都無睇曬個日落就走人返返去酒店就算

待續。

天氣好真係唔同啲
不過天氣呢啲真係靠運

lm

LM。相好靚

剩餘應該主要就有道東包車一日遊，如果其他片段無想法點樣打都未必會打起呢度。
研究下快閃先得。

釧路一入黑有d恐怖、條街好似一個人都無
食完爐端燒婆婆、再行好Q遠先有間超市仲營業