[開左 po 先][遊記-真係慢慢打] 東北道東冬日之旅

好，飲飽食醉都夠鐘上機，今次係 1A 位！



Gate 69 果度係轉角位，好容易同隔離gate 嘅人龍mix埋，所以地勤都要不停咁提呢條係去羽田嘅隊。






有張welcome drink，welcome card，menu 就有兩本。


繼續係陳年一樣個早餐 menu，個點心有啲唔夠熱，不過算，其實都有啲眼訓，無食曬所有野。同埋佢會唔會頹得濟啊，無menu入面所謂嘅籽仁鮮果紅桑子乳酪，跟住就搵超市都搵到嘅一盒乳酪代替 。不過個粥又算幾好食嘅。有機會都係想試下下午飛羽田果班會點樣。


所以中間都係善用個位嘅躺平功能，訓住咁飛羽田好過。




臨降落見到富士山！

第一日就都係起東京果度補給，例如搵下啲雪鞋啊之類，所以就唔多特別啦。咁我就唔多著墨啦。不過搭山手線果時候聽到啲月台音樂變曬，真係有啲唔習慣。

然後就去下一日啦，一開始都研究緊搭飛機好定搭新幹線好，最後新幹線班次密啲就都係搭新幹線上弘前啦。


個人最鍾意嘅E5系列車。外型真係好型。


搭到咁上下窗外都開始黎見到白色嘅雪。


每次去日本要食便當嘅話都會選擇呢一款，應該就係311之後復興東北而生嘅一款便當。入面都係選擇東北唔同縣嘅食材，張紙仲圖文並茂咁寫清楚邊樣打邊樣，都真係幾有心機 。


話咁快就去到新青森站啦。然後再轉多程，就到弘前。


櫻花果時候大家見慣見熟嘅弘前站裝飾。


弘前站前個裝飾都被雪覆蓋住。

呢次去到弘前，咁都係以弘前公園為目標。不過見仲有少少時間，咁早入去弘前公園又好似會悶得濟。所以去埋起弘前公園附近嘅 金剛山光明寺最勝院 行下先。其實佔地唔大，不過就包見到雪同寺廟嘅配搭。



走果時候仲見到兩隻貓！佢地都幾強wor，咁都唔怕凍！

之後就開始入弘前公園啦。成個公園同起春天黎簡直係兩個世界。


就當然要影返幾張弘前城嘅相啦！而隔離個觀景台就早已經起雪入面啦。



春天逼爆曬人嘅春陽橋，兩邊就應該係櫻花滿滿嘅西濠，可以俾人撐船仔嘅，依家就係結曬冰。兩個月之後應該個畫面唔同曬，大自然個變化真係好大 。


咁冬天弘前公園有乜特別呢？咁佢有一個位係有個攤位，限時咁派啲蠟燭燈台俾遊客，許願咁樣。不過好大風，我都要去個 counter 度幾次先成功送到支蠟燭去安放起樹隔離


咁又有一個位會有好多雪屋，入面點滿蠟燭。


咁都有一個位係有青森嘅津輕錦繪大回廊，入面都有好多當地嘅藝術畫作，附近播埋音樂，睇住啲畫都有啲夏祭嘅感覺。


當然就唔少得小朋友最愛嘅雪滑梯啦。隔離都有個弘前站雪雕，定時定候都會有投影上去睇。


雪祭都會有攤檔。落住雪行到咁上下之下，有返個類似關東煮落下肚都覺得溫暖 。

悲哀嘅事就黎啦。始終弘前公園呢度多人行，有啲位已經唔係雪而係冰。而咁多人行就啲冰都實一實。已經減慢曬車速啦，就係行緊上面個津輕錦繪大回廊果時候就係起入面有個位P左。感覺係俾普通嘅扭傷激烈啲啲。然後起青森站行行下都可以再P一野 。到依家都仲係未好返曬，老啦老啦，以前P都唔會咁難好。不過都行到嘅，咁我就漫步咁去埋弘前公園冬天夜櫻先走啦。其實係，然後用燈光射上去，咁成個畫面就好似夜櫻咁啦。





返到青森，都係住返最近車站果間 route inn，整理下行李，食下便利店嘅甜品，同埋開始搵冰敷下，好彩係起日本，起便利店都應該會有冰，酒店又都有製冰機可以搵黎用，咁就完左第一日啦。

待續

其實P係點解？
PK個P?

係我自創左 sor

即刻去買支藥酒嗎

扭親果陣都係夜晚，所以都無啦
然後都係冰敷，第二朝都繼續冰敷，第二朝好彩青森站都開左間松本清，可以俾我搵啲扭傷果啲藥或者貼去頂住先

之後仲要咁既行程 邊隻牌子咁勁

我記得係呢款。塗完之後好似比預期快唔痛 不過上落樓梯都係要就住就住

依隻真係好野黎，用左好多年

巴打咁大膽po 浴照

得隻腳應該無事嘅

btw 反而一開始講話呢一年唔會飛，都研究緊生日嘅時候快閃阿蘇得唔得

po新浴照？

飛 FUK 無 first class

黎到冬天嘅青森，究竟可以有乜搞作？咁之前見過網上有人貼過冬天嘅奧入瀨相，都將呢個地方擺左去wishlist 度。咁夾埋道東都叫順路，所以就擺埋呢個trip 去啦。去冬天嘅奧入瀨，如果唔係join團，對於一啲唔識渣車嘅人黎講就應該搞唔掂，所以就唯有去住星野奧入瀨啦，入面都有啲活動可以 join，帶你去睇冬天奧入瀨嘅一面。

咁唔係第一次去青森，所以頭半日都無太特別嘅行程。最特別都係去松本清搵下藥，執下啲行李去宅急便，繼續攤起酒店入面去冰敷返隻腳咁。呢個位其實都諗不如都係執包袱返香港算數啦，又唔知佢傷成點咁，咁樣老人家步速咁行路法又唔係辦法。不過都睇左啲資料，咁 self assess 完覺得應該唔係傷到骨嘅，要復原就算係點都係要用月計架啦，咁就算啦，都係繼續行程算數，最多咪將啲之後要行得好甘嘅行程 cut 鬼曬佢算數。

不過都叫用左老人家嘅步速 行左去黎到青森點都會想去嘅 青森魚菜中心 食返個早餐。雖然啲人話入面啲海鮮唔夠 wow，不過可以整到自己想食嘅海鮮飯做早餐都算係咁啦～





同埋再用老人家嘅速度去埋青森站隔離間 a-factory 行個圈，啪返杯蘋果茶食返個蘋果批。不過可惜雪糕舖無開。


咁起酒店入面冰敷到差唔多時間，咁就走返去搭新幹線落八戶啦。冬天路況充滿變數，當然都係善用酒店嘅接送車去解決交通問題啦。

首先就開箱下酒店先啦。

黎到星野奧入瀨，最吸引大家視線嘅當然係起酒店大堂嘅《森林神話》巨大青銅壁爐罩。夜晚真係會有人起下面點柴架。而某啲時候大堂都會有蘋果汁，蘋果酒同米酒任飲。望住雪景同藝術品，睇住個火，聽住大堂嘅音樂放空，真係好舒服，慢活嘅感覺真係好正。






佢都有另外一個大堂，入面都有另外一件藝術品叫做《河神》。不過呢個大堂就無咁多野飲，反而就有自助機，可以飲到蘋果茶，咖啡之類。



入面都有個位係比人整葫蘆燈。可以參加個活動就整一個專屬於自己嘅葫蘆燈攞返屋企。不過土地問題，我就無整到啦。但係呢個位都整得幾靚。



咁住得呢度，餐飲都多數去返酒店入面度處理啦。入面果間叫 青森蘋果廚房，一入門口就有蘋果為主題嘅裝飾。入面好多菜都有用到蘋果為元素，早餐同晚餐我都係起呢一度解決。佢個蘋果批，都建議大家混合埋隔離個雪糕黎食。






望住雪景慢慢食真係好正。

好掛住青森嘅蘋果食品

不過有兩日早餐就有啲特別。佢入面有另外一間法國餐廳，咁我見預約活動果度可以預約呢間餐廳嘅早餐，咁就試下啦。佢有個戶外區域嘅，你就會置身於一個包廂咁嘅地方，一度睇住雪景一路食呢個早餐。



而個早餐簡單啲黎講就係一個海鮮煲咁，入面就有青森啲海鮮，食到咁上下佢地會過黎打蛋加飯，好滿足。



望住個咁嘅景食早餐。

有一日早餐就食埋間套房包嘅早餐～



開箱埋間房啦。咁星野奧入瀨有幾款房型，有啲就有私人溫泉嘅。有款係起房入面都有個半露天溫泉，呢款房價唔算好貴，好似好熱門所以我就book唔到啦，據聞都係要早唔知幾多個月走去book。所以今次都係住兩款，一款係溪流和室，入面主要就係有個大窗望溪流果邊個景。


另外就豪一次住溪流套房啦 。


入面有個私人溫泉，可以一路浸溫泉一路望住雪景；


又有個空間可以俾你坐起度望雪景；


又有張檯都幾特別設計，好似話個靈感都係黎自奧入瀨溪流。成間房住上黎真係幾舒服。轉房都唔算太複雜，你啲行李擺去房嘅一個位，佢就會幫你去送去下一間房度。要做嘅都係去 counter 度攞過新房嘅鎖匙就得。

咁無私人溫泉嘅房型，都可以去間酒店個露天溫泉，叫冰瀑溫泉。望住雪景，飄住雪，由隨曬衫好凍好凍 變成浸度落去 咁嘅過程真係好刺激 。

圖片黎自官網。

待續

去啦！我都有啲掛住 尤其是起 A factory 度真係好多野都想買多次返香港食

下次去青森應該會plan 埋睡魔祭

東北夏祭我都想去睇！我反而最想睇竿燈祭，同埋煙花。不過應該都係下年先算～～～ 依家先 plan 好似已經遲左

可以嘅話想一次過睇晒三大祭典
不過真係要早一年plan 定
如果唔係要瞓街

酒店靚到
幾錢晚？

睇房型，溪流和室大概二千幾左右一晚。套房其實唔算太貴，未過萬嘅，