【pH值介乎於7飄浮的愛情故事】《一腳踏兩船》(6)

著埋對鞋，再喺全身鏡前照多照...出門口～

「你知點去㗎喇嘛？」

落到樓都係同Jeff傾住電話～

『同上次一樣咋嘛～』

今日都係我自己一個，冇叫Jeff陪我。

無謂要佢咁早就走過嚟，陪我過完去又要走咁麻煩啦～

我算唔算係好女朋友就見仁見智啦～但就一定冇公主病囉～

有電話陪住得㗎喇～

不過都唔傾得太耐...

『差唔多到喇～咁我得閒就Message你啦～』

因為呢...

「嗯嗯～等你吖～」

『嗯～Bye～』

我尋晚又唔記得叉電喇！

晚晚都係咁...明明瞓之前喺床都有睇IG...放好部電話...就係唔記得插線！

唔係要買返個無線充電會方便啲？

好快就行到嚟上次嗰一間中學。

我行入校門，望兩望...再行入啲...差唔多行到去操場...

「Joanne～」阿Da就同我揮揮手，行埋嚟我面前，「嚟咗喇？早咗喎～」

『係吖係吖～早咗啲啦～』過嚟嗰陣都諗會唔會未有人...

「咁嚟坐一坐先～」

『哦～好～』

我就跟住阿Da身後行。

一路行...一路望望...

幾個工作人員擺放緊啲器材去長檯...

再望兩望...都仲未見LB嘅蹤影...

可能係我太早...

「咁你坐陣先～」阿Da帶我坐埋一邊，「我去拎套衫俾你換咗先～」

『哦哦～好好唔該～』早到都應該冇乜所謂～仲多咗時間準備添～

我就坐一陣，睇住阿Da行去拎返套衫，再拎埋對鞋襪過嚟：「OK～呢邊～」

『係～』我就跟住阿Da身後行。

然後阿Da又帶到我去上次換衫嗰間房...

「你可以換咗衫先～」阿Da放好套衫，「啲個人物品都係放喺個箱裡面得㗎喇～好似上次咁姐～有咩問題就叫我啦～」

『哦哦好好唔該晒～』

「嗯～換完坐陣先～」

『嗯～』

阿Da出返去之後，我拎起套校服...

都係上次嗰條白色嘅校裙...紅色嘅領帶...紅色嘅膠腰帶...

就咁拎喺手都知有洗過仲有熨過添～（自己條校裙平時都有熨～所以一睇就知～）

白色學生襪都係新...婆仔鞋係上次嗰對...

咁都OK啦～

我就冇話潔唔潔癖嘅～不過都唔好太污糟又或者唔知有幾多手著過就得㗎喇～

喺換衫之前...都係睇睇間房先！

睇啲咩？睇有冇Cam囉！

唉講起嚟就失敗！上次都冇Check過！

第一次拍嘢吖嘛！未試過吖嘛！邊有呢啲意識姐？

咁點解我而家又會有？因為...睇到啲變態網民留言囉！

即係之前Marco都有Send返啲拍攝期間嘅相俾我Post返上IG做宣傳～

幫個MV又好～幫我自己又好啦～

咁有啲係偷影嘅～當然就冇啲咩奇怪嘅角度影到啲唔應該影到嘅部位啦！

不過啲變態網民嘅創造力量同幻想，真係會嚇你一跳嘅！

一睇到係偷拍，就問會唔會有偷拍換衫相！換校服好正！實J死人！話唔定好快就有工作人員流出！俾著佢哋係工作人員都Set定隻Cam喺便衣室！

CLS睇到真心驚咗囉！

搞到我嗰排都不停咁Mon住連登！睇有冇真係俾人偷拍咗換衫都唔知！

好彩～到而家都冇～

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～

三句預告

確保成間房都冇奇怪嘅鏡頭之後，都要換衫喇～

仲等我著得靚啲...諗住俾LB睇...點知就我早到咗...見唔到LB...

世上往往就係計劃追不上意外...

佢將Jeff放左去邊

一唔喺身邊就唔知放咗喺邊喇

垃圾桶

你點教人架

分分鐘去左堆填區添啦

晚

晚

條仆街一定係諗住偷食啦

好明顯唔係第一

喺身邊嗰時最多當抹布

Jeff唔可要做垃圾

唔關我事㗎

有冇得回收

揸𨋢晚

大王晚