[恐怖、搞笑] 不連續人生

但係佢嗰種九唔搭七，真係…好難令人接受，種感覺係怪異到…我一望，就覺得一定…又係佢！！！

「點解呀？」

佢一定係周詩靈！睇吓佢個死人頭！件衫又衰過人，白雪雪好似喺片場出嚟咁！點會認唔到佢呀！

「佢樣衰咪打佢囉。」我答得有啲窘迫。

周詩靈︰「聽講，你好鐘意周圍打人喎，成間青青醫院都知道有個叫周海問嘅人成日都打人。」

我︰「關你咩事啫！我好似唔識你架喎！」

周詩靈︰「想打女人？」

如果你唔係女人，我一定打殘你！等你入廁所，熄燈先入去中黑你！

「你哋識架？」見我哋兩個咁好傾，保安問。

我︰「我唔識佢架。」

「你唔識我？我識你喎。」周詩靈嘴角上揚。「我會控制住佢架喇，等我同佢獨處，唔係一陣又打人。」

佢又想搞邊科？

保安退場，剩番我同周詩靈喺女病房門口。我想順勢轉個身番去男房楝，跟住保安一齊落樓，番去瞓吓，好過對住周詩靈個死人樣，名副其實，「死」人樣。求先一見到佢，我諗起嗰日佢跳落樓之後瞓喺草叢嘅樣。一個人死咗嘅回憶，佢又重新企喺你面前，即使唔係同一個「人」，種毛骨悚然都咪話唔心寒。

「周海問？」我正想離開嘅時候，周詩靈截住我。「做咩走得咁急呀？」

我︰「攰，想番去瞓。反正我哋病人嘅職責就係瞓覺等康復，我而家去『開工』喇。」

周詩靈︰「你見到我，你唔想知道我知道你啲咩咩？」

你…你個八婆。

周詩靈︰「我知你好想知嘅。」

推

如果讀者喜歡，希望可以點入去俾啲讀數我 (bookmark / like / read都得)，等我有得統計吓，方便日後改進之用

Penana: https://www.penana.com/story/110477/不連續人生
紙言: https://www.shikoto.com/articles/258948.html

多謝各位嘅支持

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

10章 - 我知道你嘅知道，而你唔知道我嘅知道

周詩靈︰「所以話，我覺得呢度真係好舒服。」

周詩靈坐喺中庭嘅木凳上面，伸咗一個大懶腰，身材撐起白素衣，迫爆成件衫，視覺享受滿分。呢個八婆仲靚過求先個老夫子女人一百倍，如果佢去剪頭髮，可能我會有示愛嘅衝動。

周詩靈︰「周海問，你平時唔係好多嘢講架咩？點解突然咁靜嘅？」

屌，因為你囉。

周詩靈︰「唔通…因為我…求先伸咗個懶腰？」

屌你…我真係好想屌死你！任何意義都係！