我由細鍾意打機，都鍾意畫畫，細個時夢想過做遊戲設計師，想可以整到啲自己理想中嘅遊戲出嚟。但因為唔識打code，搵唔到志同道合嘅人，又覺得自己由頭學起太過艱鉅，諗住話搵到個志同道合又識打code嘅朋友就再試吓啦。當然結果顯而易見，世上你想要嘅野基本上都唔會無啦啦就出現喺面前。就係咁不了了之，冇咗件事。
然後時光飛逝，轉眼去到大概一年前，突然驚覺自己原來已經就快三字頭，講真唔好彩的話其實可能已經過咗大半世。回想起咁多年，其實一路以嚟都係渾渾噩噩咁過，冇咩做到過，所有野都高不成低不就咁，係叫做餓唔死，但自問都唔覺過得好有意義。
反思一下，到底其實我係為咩而活？到底我有咩係真正想做？適逢嗰段時間玩咗一隻叫《Outer Wilds》嘅遊戲，我被佢大為感動同震撼，就係呢刻，我諗番起細個嘅自己，我好想做到一隻咁嘅遊戲出嚟，比到呢種感動其他人，話到比人知原來遊戲係可以咁有力量。
不過嗰個志同道合又識打code嘅朋友都係未出現，有時有啲野係真係冇得避，搵唔到就唯有自己嚟。就係咁，過去一年嚟一直自學coding同點用game engine，因為工作比較忙，同時又進修緊讀緊書，所以時間真係唔多，中間有小成時又經歷咗Unity單炎上事件，覺得佢前景堪憂，所以趁早跳船轉咗用open source 嘅 Godot engine一切重頭學過。
然後就去到今日。中間做咗唔少小項目，而今次係第一隻放出公海嘅小遊戲。唔係啲咩曠世奇作，玩法上照搬Jump King，程度同細個玩asiadog啲小遊戲差唔多，但終於叫踏出咗第一步。
講咗咁多，呢個就係我嘅第一步，不妨入去玩吓，慣咗操作後game長應該唔超過15分鐘。
建議開聲，broswer就玩到，手機/PC 都得，不過iphone可能有問題。
「蛙記佢因為啲好重要好重要嘅原因需要上去高處，拜託你，幫幫佢。順道，請探究一下點解佢會咁想上去？」
https://playwithspect.com/froggy-adventure-to-the-sky
我好想知你點睇，好玩、太難、唔明故事講咩、醜樣，咩都好，有時間的話請留個comment比我知你嘅意見，多謝你。
對整game有興趣嘅朋友都不妨喺度傾吓計，嚟緊我預每隔1-2個星期會好似咁，出吓唔同類型嘅小遊戲，用唔同機制練下手，有興趣的話可以繼續留意。
就係咁，希望你玩得開心。
