喺非洲，每60秒就會過咗1分鐘(5)-波耳~波耳~波耳

見冇乜反應推吓先

避免樓豬走咗去
幫推

咁究竟英國佬勞師動眾搞咗兩年半
最後得到個點樣嘅南非呢
除咗個大金礦外
仲跟埋以下一系列“贈品” ：
1) 英國將無償提供3百萬鎊(大概而家42億港紙)畀南非作戰後重建
另預留同等金額作免息貸款
2)波耳人將可繼續用南非語作為教育及司法語言
3)波耳人獲承諾可以喺不久將來實現「波人治波，高度自治」
英國最後只會管有外交同終審權
4)土著黑鬼嘅投票權將會喺獲得自治後先會研究
（呢條係楊‧史末資建議加上去，可能因為咁所以早幾年先畀班左膠嘈話要拆咗佢座銅像）
5)一堆遊擊隊上繳嘅武器(大部份喺英軍手上搶嘅)
另加一大堆宣誓效忠愛德華七世嘅宣誓紙

啲戰俘同遊擊隊員不分階級
完全不計前嫌
真係簽咗呢張紙就走得

…
..
.
嗱唔只係你地呀
當時一般英國人睇完份和約後
心入面都係呢幅圖

…啲遊擊隊員肯棄械投降所以寬大處理
呢層可以理解吖
為咗方便管治所以畀佢地保留語言
呢樣都冇乜唔妥
賠成3百萬鎊
邊會有贏嗰個掉返轉頭賠錢畀人咁碌柒㗎
仲要承諾畀返個治權佢地
咁本質上同第一次波耳戰爭後簽嗰份有撚分別呀
軍費使咗2億
死傷軍人就過萬
堂堂大英帝國
對住兩個蕞爾小國都要磨足兩年幾
乜架都丟清晒啦
耗費咁多人力物力財力以至國際聲譽
你同我講話到頭來都係去番1881年嗰時嘅狀態
冇撚嘢呀

喺一般市民眼中
呢場失控嘅殖民地戰爭
的確係蝕晒大本
不過對英政府嚟講
呢份咁慷慨嘅和約
又確實係啞子食黃蓮式嘅無可奈何
波耳人嘅勇武同韌力完全出乎所有人意料
戰後嘅管治如果太嚴苛
再次激發佢地叛亂嘅話
就盞掘番起個氹畀自己踩多次㗎嘅啫
與其用2億換塊爛地加40萬隨時發作嘅刁民
不如使多3百萬扶植個可以信賴嘅自治政府
幫佢睇住班黑鬼好過啦
呢樣正正就係列強對待各殖民地嘅方程式
先武力征服
再扶植其中一個勢力幫佢做睇場
至於列強點樣選擇邊個做合作伙伴呢
就留番喺往後嘅篇章到講吓啦吓
而家就帶大家欣賞吓中午過後嘅日不落帝國啦

喺漫長而又和平嘅19世紀
英國憑藉強大嘅工業力量
支撐住絕對優勢嘅海軍
喺世界各地建立起一個又一個嘅殖民地
再由呢啲殖民地獲取各種廉價嘅工業原材料
令自己嘅產品喺世界市場上得到無可比擬嘅成本優勢
賺取更多嘅外匯
從而建造更多更強嘅戰艦
呢種正向回饋
就係呢個日不落帝國背後運作嘅齒輪喇

但係呢種發展模式
係要建基於獲取同維持殖民地嘅能力上
起初英軍對住嘅只係啲揸住長矛嘅土著
咁當然就易過食豆啦
不過隨住槍炮科技嘅發展同普及
英軍裝備嘅優勢
相對於各殖民地勢力嚟講
就變得越嚟越細喇
喺相對和平嘅19世紀
克里米亞戰爭中擊敗俄佬嘅呢塊金漆招牌
都仲可以畀英國佬喺列強面前攞嚟遮一遮醜嘅
之但係呢塊遮醜布
喺英國佬出盡矛招先贏到波耳人之後
就消失得無影無蹤喇

1901年1月22號維多利亞女皇駕崩
嗰時英軍都仲係深陷喺波耳泥沼之中...
同Pax Romana一樣
Pax Britannica都係衰喺帝國過於龐大
歷史學家普遍將波耳戰爭視為大英帝國衰落嘅開端
女皇陛下當然無力阻止日不落帝國日暮西沉啦
不過佢嘅謝幕
的確為帝國殞落呢段歷史提供咗一個相當唔錯嘅注腳

喺見到英國佬柒得咁應後
各列強都有自己嘅盤算
喺1900年6月14號
德國藉口以英國喺戰爭期間無理扣押德國喺東非沿岸嘅商船為由
通過海軍擴張法
計劃建造多一倍嘅戰艦
準備帶領德意志民族去“曬到太陽嘅地方”(Platz an der Sonne)
而喺歐亞大陸同英國佬玩咗幾十年大博弈嘅俄佬
亦都趁義和團之亂
出兵“保護”俄國喺滿州嘅利益
順便擸多幾個喺渤海嘅不凍港...
…嘩班仆街咁搞法
我要造多幾多隊艦隊
先夠睇住北海同遠東個場呀
眼見自己由傲視群雄嘅英倫雄獅
逐漸變成grad din毒撚時
英國佬意識到
佢嘅孤立
已經變得一啲都唔光榮喇
大英帝國最引以為傲嘅皇家海軍
再冇辦法同時保證本土同各殖民地嘅安全
佢必須放棄唔主動結盟嘅傳統
...係時候招fd子嚟幫拖喇

1902年1月30號英國同日本簽訂英日同盟條約
藉此牽制沙俄喺遠東嘅擴張
1904年4月8號英國同法國簽署摯誠協定(Entente Cordiale)
呢啲條約標誌住大英帝國嘅擴張正式告一段落
英國佬嘅注意力將重新放番喺歐洲
加上喺1890年6月18號俄佬因應威廉二世拒絕簽署再保險條約
而喺1894年同法國締結法俄同盟
眼見英國埋咗法國佬同北極熊堆
夾喺法俄之間嘅德國佬自然就騰騰震啦
以德國為首嘅三國同盟自此被推向英法俄協約嘅對立面
歐陸勢力開始失衡
各國逐漸捲入戰爭嘅旋渦
當然喺嗰時啲人係唔會諗到後來會搞到咁大煲嘅

英倫女神同大和撫子共同保護弱小嘅泡菜同清國

威廉二世:仆你個街吖乜唔係廢紙嚟㗎咩

喺呢一片山雨欲來嘅歐陸風雲之下
其實一般英國市民係仲未嚟得切有咩反應嘅
對於佢地嚟講
呢啲外交角力實在太遙遠喇
雖然波耳戰爭改變咗英國嘅基本國策
不過佢地更加確切感受到嘅
其實係戰爭帶嚟嘅另一個後遺症:
左膠之崛起
喺波耳戰爭初期
當英軍喺前線失利嘅消息傳番去英國時
大批英國人響應政府嘅號召湧到各個募兵站
準備參軍報國啦
不過咁樣竟然暴露咗一個政府一路都忽視咗嘅社會現象:
平均每三個志願者入面
就有一個係營養不良唔適合作戰嘅
呢個係一個好嚴重嘅問題
因為咁即係代表喺英國本土
係冇辦法動員到足夠健壯嘅士兵
去應付一場全面嘅戰爭
咁亦都代表普遍勞動階層身體都係唔多掂嘅
生產力又點會高吖
單靠呢啲咁潺弱嘅零件
英國又點應付嚟自美國同德國呢啲新興工業國嘅挑戰呢
長遠嚟講呢啲問題都係需要解決嘅
不過嗰時成個英國都畀場仗搞到㷫熻熻
個個都咁亢奮
自然就冇人有咁嘅閒情逸致去諗呢個問題啦
所以個問題就擺埋咗一邊

迎頭趕上嘅美國同緊隨其後嘅德國

20世紀初英國“零件”合照

之但係場仗贏得咁肉酸嘅話
就唔同講法喇
作為大英帝國嘅子民當然就面目無光啦
而喺普遍低下階層都係三餐不繼營養不良嘅情況下
貿貿然發動一場勞民傷財嘅殖民地遠征
呢樣更加係民意毒藥
喺英國嘅議會制度下
執政黨嘅柒事必然會畀在野黨無限放大
當硝煙漸散時
戰爭喺民間所引發嘅愛國熱情
好快就畀戰後蕭條帶嚟嘅徬徨所取代
而每當人心虛怯時
就係政棍出嚟撈政治資本嘅時候喇
以黨魁亨利·甘貝爾-班納曼
同佢隻鬥牛㹴勞合·佐治為首嘅在野自由黨人
見到對家咁鬆章法
自然就食住個勢發圍兼起啤啦

1902年3月26號一生倡導縱斷非洲計劃嘅南非礦業大亨羅德斯逝世享年48歲
1903年8月22號三度拜相、主導英帝國擴張至最頂峰嘅梳士巴利侯爵病逝享年73歲
加埋維多利亞女皇嘅謝幕
標誌住維多利亞時代嘅帝國擴張正式告一段落
從對外放棄光榮孤立改為多邊合作
到國內基於平等立場而逐漸成形嘅福利主義
英國逐漸向左翼傾斜
喺勞合·佐治等嘅激進自由黨人帶領吓
保守黨政府毫無還擊之力
最終自由黨喺1906年大選取得山泥傾瀉式嘅勝利
可喜可賀可喜可賀

1906年自由黨嘅競選海報

至於係咪就係呢堆左膠玩到大英帝國日落西山呢
呢啲咁批判性嘅嘢就唔係我呢亭講故佬識講㗎喇
有興趣就自己研究吓啦
我都係講番啲好似非洲脫殖史呢類嘅輕鬆小品先
唔知幾時完成嘅下一章就會睇吓
喺呢啲殖民強國嘅帶領下
非洲係點樣由亂到痔，再由痔及Hang機

今時今日
英國佬仲未搞掂學校午餐狗食問題

係咪會連翻去爆比利時大鑊個記者到

Bonus track

英國國會廣場有12座銅像
其中有4座都同波耳戰爭有啲啦𠹌
上面就講咗三座啦
而家就講少少關於第四個嘅事喇

喺1899年10月
呢位早幾年先喺南非畀英國佬喺頭等車廂趕落火車嘅律師仔
不計前嫌咁組織咗支救護隊
同佢啲同鄉幫英軍喺槍林彈雨下運送傷兵

第二排右邊數起第三個

點解佢咁犯賤要以身犯險去參與呢埸同佢毫無瓜葛嘅殖民地戰爭呢
其實都係「身份認同」呢四個大字啫
同好多由宗主國陪養嘅土著精英一樣
佢嘅身份認同首先都係英國人
不過事實上唔係個個都認同佢個身份
佢今次冒呢個險
目的都係想為佢同佢嘅同胞爭取吓宗主嘅認同
不過除咗戰後嗰塊勳章外
就一切如舊
印度人嘅地位一啲都冇提升到
跟住喺1906年祖魯人叛亂嗰時
佢又重施故技做多次戰場咕喱
以凸顯印度人同佢口中呢啲未開化嘅黑鬼有所不同
不過到最後都只係換多塊荷蘭水蓋
咁多年嘅徒勞無功令佢意識到
順從合作嘅奴隸並唔會換到奴隸主嘅認同
武力反抗咩又只會血流成河得個桔兼違反印度教義
喺佢眼中要贏得尊重
唯一合理嘅方法就係全民和平不合作
而喺南非嘅印裔人口咁少
就算搞得起都冇嚟力水啦
要搞就不如喺佢鄉下呢粒大英帝國皇冠上嘅寶石度搞啦
就係咁
甘地就踏上咗令日不落帝國日落西山嘅道路喇

6月嘅南非正值隆冬
嗰晚喺車站餐風飲露
相信都真係改變人生嘅經歷嚟嘅
有時喺度諗
如果當初佢獲得好似楊‧史末資呢類殖民地精英嘅待遇嘅話
佢會唔會仲係以人權鬥士嘅身份喺歷史留名呢
佢、印度以至大英帝國嘅命運
又會唔會有所改寫呢

應該唔會喇
可能第日有機會心情靚嘅話就諗吓埋埋個尾佢啦

想了解吓有冇巴打已經成篇睇晒
今篇我都覺好似長咗少少

有
可唔可以再長d

電腦睇就無咩問題既

下集係咪又要下年

竟然冇爛尾