喺非洲，每60秒就會過咗1分鐘(5)-波耳~波耳~波耳

情況就當然唔係咁啦
事實係呢百幾年嚟
草原上嘅波耳人
都係過住啲離群索居嘅生活
突然間要佢地十幾個人一個帳幕咁迫埋一齊住
無論衛生習慣以至身體免疫力(尤其係細路)都適應唔到

而呢啲集中營嘅水源通常係營地附近嘅河流
啲河往往又係營地污水排放嘅地方
英軍亦冇提供足夠燃料畀啲波耳人煲水
啲波耳人就被迫要飲啲冇煲過嘅溪水喇
加上英軍喺營度實行分級糧食配給制度
遊擊隊嘅家屬食物會減半
仲要係啲狗都唔會屌嘅質素
(多數係啲發咗霉嘅麵粉同腐肉)
喺營養唔充足嘅情況下啲細路嘅抵抗力就更加差啦
麻疹、痢疾等傳染病迅速喺營中擴散
最大鑊係醫護人員同藥物嚴重短缺
喺冇支援下擠迫嘅醫院就成為屠殺波耳細路嘅屠場
病入膏肓嘅就唔使講啦
病情輕微嘅喺交叉感染下到最後都係出唔返嚟
平均每兩個入院嘅就有一個會提早見上帝
就算好得番出返嚟嗰個
好快又會因為其他病而入返去...
醫院成為咗英國版集中營嘅毒氣室喇

“可以由佢個肚摸到脊骨...”
介紹番呢個妹豬叫Lizzie van Zyl
因為佢老豆係遊擊隊成員
所以佢已經捱咗個幾月肚餓喇
另外因為佢唔識講英文
醫院啲醫生同護士個個當佢傻仔咁疏忽照顧
呢幅相係佢死前幾個鐘影嘅
攝影師淨係聽見佢不斷喺度叫“媽媽、媽媽... ”
呢張係成場仗最標誌性嘅相
每逢講起波耳戰爭就必然會提起佢嘅故事
諗諗吓某程度上呢位妹豬肉身雖死
但的確又因此變得永垂不朽

LIVE

經過一年嘅焦土政策
草原上波耳人嘅農莊已經所餘無幾
“暫住”喺集中營嘅波耳人超過15萬
一批又一批嘅波耳婦孺被扔入集中營等死
平均每個月死成2千幾人
大部分都係16歲以下嘅細路
到嗰年年尾
成個南非超過一半嘅波耳細路都死喺集中營入面
每個波耳家庭最少有一個細路出唔返嚟
對呢個總人口得四十幾萬嘅新興民族嚟講
無異於種族滅絕
自身無力反抗
各國又袖手旁觀
究竟有邊個可以解救到佢地

呢度就要吹奏吓民主制度嘅偉大喇
民主唔係萬能
有咗佢國家一樣係會行差踏錯
不過當執政者做出錯誤嘅決定時
啲反對派往往就可以揸住呢啲痛脚嚟大造文章“攪攪震”
爭取民意支持同競選籌碼
從而令國家作出自我修正
好似今次咁
波耳集中營呢個人道災難
就成為咗在野自由黨一舉翻盤嘅議題喇
本身民意喺親政府報章洗腦下
係一面倒支持戰爭嘅
不過憑藉一個女仔阿姑嘅努力
啲自由派喺短短一個月內就將之扭轉
變成要求煞停焦土政策甚至反戰喇

一個女人仔
單人匹馬搭成個月船山長水遠到南非
喺惡劣嘅衛生環境同游擊隊施襲嘅危險下
深入敵國腹地親身走訪各個集中營
去紀錄呢班同佢冇啦冇𠹌嘅敵國婦孺嘅慘況
再冒住叛國指控同畀老中青愛國憤青襲擊嘅威脅
巡迴全英國演講
隨住一張張投射喺布幕嘅幻燈片
英國人民意亦都一步步咁被扭轉
Emily Hobhouse至於波耳人
就如Oskar Schindler至於猶太人
而佢地歷史地位之間嘅距離
可能只係一座金像獎啫



手抱嗰個已經

影呢幅相時
個女人啱啱死埋佢五個仔女裡面最後一個

滿手波耳婦孺鮮血嘅基奇納將軍

一戰後三條阿叔行緊去鏡廳簽凡爾賽條約
最右手邊係美國總統伍德羅‧威爾遜(Woodrow Wilson)
中間指指貢嘅 係法國總理喬治·克里蒙梭(Georges Clemenceau)
而左邊嗰個就係憑藉當年喺波耳集中營問題上大造文章，繼而喺政壇上嶄露頭角嘅大衛‧勞合‧佐治(David Lloyd George)

同荷蘭隊係橙色衫有冇關係呢

今次你打定一大篇先出 好好

唔好讚佢

其實今次呢個系列大多數情況（好似係）都係寫好晒先po嘅
所以正常嚟講po得出嚟嘅都係已經完成

焦土政策同集中營被煞停後
戰爭就進入膠著狀態
實力被大幅削弱嘅波耳遊擊隊固之然冇辦法趕英國佬走啦
但係對於佢地咁樣喺草原度走嚟走去
英國佬亦都冇哂符
要短期內喺戰場上令波耳人屈服已經係冇可能㗎喇
而英軍制衡遊擊隊嘅措施亦都花費甚鉅
開戰兩年軍費開支已經攀升到2億英鎊
要知道嗰時約翰內斯堡個金礦
年產黃金都係千幾萬英鎊左右
咁搞法真係有排先回到本

呢度我會用個例子簡單咁講吓
2億英鎊究竟係一個咩概念
喺波耳戰爭嘅同一個時期
清國發生咗義和團之亂
大量外國人同傳教士畀啲刀槍不入嘅暴徒殺害
咁英美等國嘅聯軍就開入北京去保護自己嘅國民啦
之後慈禧為咗請走呢班大帝
總共賠咗4億5千萬両白銀
1両大概等於1.2金衡安士
4億5千萬両即係5億4千萬安士
喺1900年1英鎊大概換到8安士白銀度啦
換句話講
呢筆令大清帝國傷筋動骨、步向土崩瓦解嘅庚子賠款
其實都只係7千萬英鎊左右啫
而英國投入喺波耳戰爭嘅錢係三倍於呢個數...
為咗個大金礦
大英帝國都可以話係拼咗血本㗎喇

與其話喪權辱國
不如話自取其辱會貼切啲

之但係軍費開銷呀政治壓力呀嗰啲都係其次
最攞膽嘅其實係啲黑鬼
本來英國佬同波耳人之間係有默契
盡量唔畀啲黑鬼介入呢場戰爭
以免佢地藉住戰爭擴張自己嘅勢力
不過隨住戰事發展
雙方人手不足嘅情況就越嚟越明顯喇
於是無論係英軍招募去負責喺碉堡巡邏嘅祖魯人守衛
抑或係畀啲波耳農場主夾咗上前線嘅黑奴
越嚟越多嘅黑鬼被武裝起來參與戰鬥
高峰期有成3萬個唔同種族嘅黑鬼係有槍喺手嘅
只不過嗰時啲黑鬼仲未有一個强而有力嘅政治領袖將佢地聯合起嚟
先至未有構成實質威脅

但係而家因為焦土政策嘅關係
南非草原上同祖魯人對抗咗幾廿年嘅波耳人被掃蕩得七七八八
波耳人防衛祖魯人嘅架構因而被瓦解
原本畀波耳人趕咗去南非東邊貧瘠山地嘅黑鬼
就開始往西向中部肥沃嘅草原遷徙喇

由幾座海拔三千幾米高山峰組成嘅龍山山脈
沿住南非海岸延綿千幾公里

再係咁落去嘅話
喺南非內陸嘅大金礦同主要港口之間嘅草原地帶
就會有數倍於波耳人口嘅黑鬼聚居
有人聚居就自然會發展出自己嘅政治架構㗎啦
到時如果畀祖魯王國喺呢度復到辟嘅話
作為佢地世仇嘅波耳人當然就會灰飛湮滅啦
而英國佬亦冇可能由得啲生蕃咁接近金礦嘅運輸命脈
到時鐵路嘅保安費用將會係天文數字
黑鬼崛起呢件事係冇白人想見到嘅
忽然間
英國佬同波耳人就有咗個共同嘅敵人喇
早喺1901年頭
部分意識到呢點嘅波耳遊擊隊將領
已經開始同英軍展開秘密談判
呢班以德蘭士瓦共和國代總統為首嘅遊擊隊隊長
就係所謂嘅“議和派”
(Hendsopper,舉手投降咁解 )

1901年2月28號基奇納將軍(第一排右二)同部分波耳嘅議和派會面
留意番因為維多利亞女皇啱啱喺一個月前駕崩
所以英方人員手纏黑紗以作悼念

但停戰呢家嘢唔係你話想停就停到㗎
喺呢個時候
呢兩個波耳共和國嘅政治同軍事決策機構都已經瓦解
遊擊隊之間再冇從屬關係
真正係冇大台
只有少數喺戰爭中建立咗軍功嘅將領
先有足夠嘅個人威望去指揮其他遊擊隊
但當涉及到停唔停戰呢啲咁重大嘅問題嘅話呢
就唔係單單某一派可以話到事㗎喇
一切都要由各遊擊隊領袖投票決定
而正如之前所講
大部分遊擊隊員都係啲㒼塞到爆，唔識咩叫妥協嘅耕田佬
佢地係唔會明白咩叫“留得青山在”
未到最後一刻佢地都係唔會放棄

Bittereinder, 解fight till the bitter endrip

呢班以奧蘭治自由邦總統斯泰恩為首嘅“死硬派”
自恃騎術比英軍優勝
透過不斷偷襲英軍嘅巡邏同運輸小隊嚟奪取佢地嘅糧草彈藥
只要草原上有草
佢地嘅馬就可以提供到足夠嘅機動力
畀佢地繼續同英軍周旋到底
所以雖然喺局外人眼中波耳人已經大勢已去冇得玩
但係焦土政策其實對佢地嘅生存能力都仲未有好大影響
成個草原仲有成2萬2千個遊擊隊員
對於佢地嚟講“最後一刻”仲未來臨
佢地仲可以玩落去



撕開中間嘅封條後一邊係咸牛肉另一邊係朱古力醬
呢種聽到都覺得腬嘅組合
所含嘅熱量足夠一個軍人36個鐘嘅需要
每個英軍都會有一罐喺身
作為一旦被圍困時嘅緊急糧食
冇長官嘅命令嘅話係唔可以開嚟食嘅


呢款有菜有肉營養均衡啲嘅就係佢地平時食嘅正餐喇
英軍自波耳戰爭開始大批應用呢類罐頭口糧後
大大提高咗單兵喺野外嘅生存能力
但亦都意外咁解決咗波耳遊擊隊嘅糧食需要
一架牛車嘅罐頭已經夠成隊遊擊隊食成個月㗎喇

英軍用嘅Lee-Enfield步槍
雖然波耳人用嘅德製毛瑟步槍射程更遠威力更大
但係到後來當彈藥補給停頓咗之後
佢地就開始搶英軍啲槍嚟用喇

撕開中間嘅封條後一邊係咸牛肉另一邊係朱古力醬

哇屌
點撚樣食

據啲英兵嘅家書所講
啲罐頭難食到癲
以至士氣低落
應該要將供應商問吊或者活埋以儆效尤

多謝巴打嘅補充

不過古語有云：“好景不常 天氣轉涼”
再硬頸嘅遊擊隊員都係敵唔過個天嘅
喺1902年嘅秋天
草原上面嘅草開始枯萎
正常嚟講係冇問題嘅
因為每年呢個時候
啲牲口就會開始轉食積存喺倉庫嘅禾稈草
但係而家啲農莊都差唔多畀英國佬燒乾燒淨喇
加上嗰年南非旱季嘅氣溫又比往常更加寒冷
有啲地區仲落起南非平原上罕見嘅大暴雪
就係咁遊擊隊嘅馬就因為長期暴露喺野外飢寒交迫
而開始大批死亡喇
失去咗機動性嘅遊擊隊
再冇辦法維持呢種山賊式嘅戰爭喇

1902年一場大雪過後嘅集中營

要知道當時南非境內集中營同境外嘅戰俘營
(英國佬將2萬幾個戰俘拖晒去印度同斯里蘭卡等地嘅戰俘營)
加加埋埋有成3份1波耳人口喺英國佬手上
戰爭再拖落去嘅話
難保英國佬會將佢地流放去帝國其他地方㗎喎
咁到時波耳人作為一個民族就一定玩撚完
為咗佢地嘅福祉
為咗整個波耳民族嘅未來
兩害取其輕下低低哋都要摜一鋪㗎喇唯有
喺4月頭
一路堅持要奮戰到最後一刻嘅斯泰恩
終於都同意同啲議和派傾停戰嘅問題喇
於是波耳人喺4月9號向英軍伸出橄欖枝
而同樣急於求和嘅英國佬
亦都釋出善意宣布暫時停火
等分散喺唔同地區嘅波耳遊擊隊領袖
可以齊集喺約翰內斯堡附近嘅弗里尼欣舉行會議

呢幅係布魯塞爾市民喺克魯格流亡歐洲時所製作嘅海報
以示民間對兩個波耳人共和國嘅支持
左邊嗰個就係奧蘭治自由邦總統斯泰恩

其中一個戰俘營就係喺大西洋嘅聖海倫娜島（當年戰神拿破崙葬身之地）
同囚禁波耳婦孺嘅集中營完全唔同
嗰度其實似度假營多啲
啲戰俘基本上可以喺島上自由行動
甚至喺當地工廠或者住家打工
看守嘅英軍有時會請教佢地騎術
又舉辦啲文娛活動、工藝品展覽等等
情況似乎都幾歡樂
有時都會諗
軍服入面嘅軍人
其實都係人一個嚟嘅啫


喺當地木廠做嘢嘅戰俘
戰後有少部份留咗喺島度落地生根

波耳戰俘參觀拿破崙墓

喺5月頭
兩個波耳人共和國各自選出嘅30個代表
加埋1個法律顧問總共61人
齊集喺弗里尼欣一個大帳篷度
準備自己圍內傾個方案同英國佬談判喇
話就話嚟得嘅都係想停戰啫
不過每個人嘅眼界同政治觸覺都不盡相同
想輸幾多自然就每個人都有唔同嘅諗法啦
呢類談判往往都會變成唔同派別圍爐取暖再互相攻擊嘅口水戰
好似今次咁
對於斯泰恩呢啲尊嚴重於一切嘅死硬派嚟講
岌頭肯傾唔代表肯跪低㗎喎
喺會上佢堅持要保留兩個波耳人共和國嘅獨立地位
佢主張以開放投票權同礦場嘅利益畀外來人
嚟作為停戰嘅條件
其餘一切回復番開戰前嘅狀態...
…班議和派就你眼望我眼
心諗“咪撚癲啦佢”×12
佢戇尻啫唔好當啲英國佬都係先得㗎
以呢個條件去傾嘅話
基本上同反枱唔使傾冇分別
但條友作為奧蘭治自由邦嘅總統
憑住佢嘅個人威望
投起票上嚟
佢背後嗰堆鄉下佬一定會睇佢頭嚟投㗎喎
如果畀佢岔禍咗呢次議和機會嘅話
就要被迫同英國佬繼續打落去
到時鷸蚌相爭就只會黑人得利
咁點搞呢

現實往往比TVB啲膠劇更加曲折離奇
喺呢一刻
上面條契弟又開始擲骰喇
話說呢位正值壯年嘅鐵血總統
早喺兩三個月前已經察覺身體有啲唔妥
據佢嗰個後來做醫生嘅孫所記載
當時佢雙眼皮下垂、睇嘢有重影
最大鑊係雙腳不由自主咁震
連馬都唔係好騎到
咁嗰時佢帶住隊遊擊隊喺荒山野嶺同英軍玩緊伏匿匿
當然就唔會有醫生睇啦
於是佢就襯和談呢個機會去睇醫生喇
嗰時醫療水平當然冇而家咁好啦
個醫生舞咗一輪都斷唔到症
淨係話佢係過度疲勞
叫佢休息多啲同浸吓熱水浴就算
點知阿總統大人照做後非但冇好轉
病情仲急轉直下
到5月尾直頭全身癱瘓淨係郁到個頭同講到嘢
嗰時佢神志仍然清醒嘅
不過佢深知佢再冇可能亦唔應該繼續左右和談進程喇
喺5月28號佢辭任奧蘭治自由邦總統並由佢副官代行

呢次佢未死得住
後世歷史學家認為佢係患咗重症肌無力症
戰爭嘅勞累、和談嘅壓力
再加上熱水浴所帶嚟嘅溫差
都會令病情短暫而又急劇咁轉壞
咁啱喺和談最關鍵嘅時刻先嚟病發
只可以話係冥冥中自有主宰啦
喺戰後佢去咗歐洲養病
幾年後重返南非繼續從政
要到1916年11月28號先喺演講中途爆血管釘蓋
享年59歲

喺得知情況變得有利後
上面講嗰個法律顧問
就開始鼓其如簧之舌
遊說斯泰恩總統嘅追隨者喇
「家業散盡、妻離子散
呢啲就唔係我地嘅“bitter end”喇咩
我地犧牲咗咁多
都係想保留自己嘅生活方式啫
德蘭士瓦嘅代表已經同英國佬達成初步共識
喺保證我地嘅自由、文化以及人身安全下
將會停戰同協助我地重建家園
各位同僚
擺喺枱面嘅選擇已經唔多喇
而最壞嘅協議
就係被迫喺冇協議下無條件投降
唔通為咗啖氣
我地就要將我地祖先用鮮血換返嚟嘅土地
拱手相讓畀啲祖魯人咩 」
會上嘅死硬派
個個心知肚明呢啲都係事實
之前礙於斯泰恩總統嘅情面
先唔妥協啫
而家佢人都唔喺度咯
為民族大義又好為自己打算都好
冇理由仲咁笨柒同英國佬反枱繼續打㗎嘛
於是喺5月31號嘅會議
以54票對6票
通過同英國簽和約喇

雖然份嘢叫《弗里尼欣和約》
不過實際嘅簽署地點係喺距離弗里尼欣一百公里嘅比勒陀利亞英軍臨時總部
為求快刀斬亂麻
31號下晝2點啲波耳代表呢邊投完票
轉個頭就趕火車去同英國佬傾埋啲細節
（主要係戰後賠償金額）
最後要傾到夜晚11點先落得筆簽和約

英國國會廣場其中三座銅像
最遠嘅係邱吉爾
中間係勞合‧佐治
而最近鏡嘅就係上面提到嗰個法律顧問喇
呢位楊‧史末資用佢80年嘅人生
證明人嘅可能性的確係無窮無盡
由九歲前盲字都唔識多隻、一腳牛屎嘅鄉下仔
到24歲法律系畢業時
被佢嘅導師評為劍橋大學最聰明嘅學生
再由律師搖身一變成為軍功顯赫嘅遊擊隊長
然後兩度以南非首相身份
成為唯一一個喺兩次世界大戰和約中簽署嘅人
一戰時英國戰時內閣嘅成員
二戰時英國陸軍元帥
皇家空軍嘅創立者
國際聯盟同聯合國憲章嘅草擬者
甚至自學成為植物學家並發現新嘅植物種類
再喺空閒時研究哲學寫咗本書
愛恩斯坦讀後驚嘆佢係少數真正了解相對論嘅人
喺人才輩出、紛亂不堪嘅二十世紀上半葉
佢都係一樣咁出類拔萃
以下呢條片我認為都可以幾形象化咁印證佢非凡嘅成就：
https://youtu.be/8fcQ5gD_7UA?si=kAt0Herd-pzPAlNo
當一個外國人可以獲邀為英國上下議院全體議員演講
再喺演講後全體站立鼓掌歡呼
再全員合唱“He’s a jolly good fellow”
你就知佢嘅成就係有幾高㗎喇
楊‧史末資的確係世上難得一見嘅奇才
至於點解佢今時今日嘅歷史地位（尤其喺南非）好似同佢嘅成就唔係咁匹配呢
呢樣就睇吓有冇高手可以指點吓喇
或者可能喺第日有機會出現嘅南非種族隔離篇講講啦吓