喺非洲，每60秒就會過咗1分鐘(5)-波耳~波耳~波耳

第一集
喺非洲, 每60秒就過咗1分鐘(一)由一杯雞尾酒開始講起(上)
https://lih.kg/2886280

第二集
喺非洲, 每60秒就過咗1分鐘(二)由一杯雞尾酒開始講起(下)
https://lih.kg/3156157

第三集
喺非洲, 每60秒就過咗1分鐘(三)柏林盛宴(上)
https://lih.kg/3328686

第四集
喺非洲, 每60秒就過咗1分鐘(四)柏林盛宴(下)
- 分享自 LIHKG 討論區
https://lih.kg/3507410

你仲喺度

喺切餅大會後
非洲大陸被迅速瓜分
落入歐洲人手中嘅版圖
由1880年代嘅唔夠20%
到一戰爆發前夕急速增長到超過九成
整個非洲
除咗舊約時代已經有記載嘅千年古國埃塞俄比亞
同美國喺西非嗰塊自由黑奴放養地利比里亞外
其餘都成為歐洲人嘅勢力範圍

咁當然成個過程就唔會淨係喺地圖畫幾筆
又或者係啲探險隊喺嗰度插支旗仔就了事啦
事實上除咗極少數例子外
列強全面征服佢地所劃分得到土地嘅過程
都係相當漫長而又血腥嘅

唔漫長嘅例子有呢場英桑戰爭
英國海軍轟炸東非桑吉巴國宮殿
迫使蘇丹投降
人地打仗就最少都段日計吖
佢老味呢場係段分鐘計嘅
不過作為有紀錄以嚟最短嘅戰爭
都算喺歷史上留到個名嘅

另一個例子就有埃塞俄比亞
唔係征服過程短而係根本征服唔到
意大利不自量力
走去挑戰呢個位處藍尼羅河上游、物阜民豐嘅古國
無論軍力、戰略以至後勤都畀人撳住嚟屌
當然都唔怪得晒班意粉嘅
皆因當時埃塞俄比亞皇帝孟尼利克二世
的確係一個雄才偉略嘅當世梟雄
事實上埃塞俄比亞同桑吉巴
亦都係當時唯二意識到柏林會議背後陰謀嘅非洲勢力
而去信要求出席
當然俾斯麥就睬佢都生芒果啦
呢啲都喺可能會出現嘅埃塞俄比亞篇約略講講

不過非洲咁撚大咁柒多部族
以我嘅進度要逐個講嘅話
相信講得晒時大家都已經RAP
所以我揀咗個規模最大、維多利亞時代最後嘅大戰嚟講
睇吓啲殖民者係點應對呢啲典型嘅非洲勢力
順手睇吓呢個日不落帝國係點樣開始日落西山

你醫好你嘅拖延症未架

好明顯係未啦

呢篇最主要係想介紹吓柏林會議後列強征服非洲嘅過程
咁啱之前寫嘅嘢好似都啱使
橫掂本身都想整合呢個故仔
咁就借呢個機會做啲增潤修飾後攞嚟攝時間分享吓

波耳(Boer)荷蘭文解做農民
呢啲荷蘭移民喺南非嘅後裔
十八世紀初開始
為咗逃避荷蘭東印度公司嘅暴政
由南非南面嘅開普殖民地慢慢沿東岸向北遷移
逐漸喺奧蘭治河(Orange river)同佢最大嘅支流瓦爾河(Vaal river)附近定居
到咗1815年
英國佬喺維也納會議由荷蘭佬手上攞到開普殖民地後
佢開始喺南非逐步廢除奴隸制
嗰時啲波耳人多數都係開農場嘅(有名你叫啦)
解放咗黑奴嘅話搵阿水嚟做嘢呀
所以喺1834年
當開普殖民地政府完全廢止奴隸制後
大批波耳人由開普殖民地遷徙到嗰兩條河附近嘅城鎮
逐步建立起自己嘅政治制度
最後佢地喺1854年成立咗奧蘭治自由邦(Orange Free State)
跟住喺兩年後成立咗德蘭士瓦共和國(Transvaal Republic, Transvaal解橫越瓦爾河)

波耳人嘅大遷徙

佢地就係用呢啲馬車向住未知嘅國度進發

瓦爾河(Vaal荷蘭話解蠟黃色，呢個好易理解吖 )

奧蘭治河(Orange ,呢個名又點解釋呢)

奧蘭治河流域係全南非土地最肥沃嘅地區
波耳人靠啲奴隸喺嗰度開墾
種吓小麥養吓牛咁都叫搵到啲錢
日子都過得唔錯㗎
不過本身住喺呢兩個國家東邊嘅祖魯王國呢
就對呢班新鄰居相當唔滿意喇
奴役佢地啲黑鬼同胞事小
霸咗佢地笪靚地事大呀
所以波耳人同祖魯人之間成日都有武裝衝突
為求自保
差唔多每個成年波耳男人都會有槍同馬嘅
慢慢佢地發展出尚武嘅文化
閒時啲聚會都會燒吓槍呀咁
另外當時普遍嘅槍都仲未有彈匣
即係要射完入子彈再射
佢地知道無論係打獵定打人
都只係得一次機會
所以波耳人普遍都係騎術，埋伏同狙擊嘅高手

不過喺1860年代開始
祖魯人嘅侵擾變得越嚟越頻密同有規模
波耳人開始頂唔順
隨時有滅國嘅可能
英國佬亦都擔心冇咗波耳人嘅牽制
祖魯王國會變得過於強大
於是向波耳人提議共同對抗祖魯人
條件係要佢地接受英國嘅管治
雖然當初波耳人就係因為唔鐘意畀英國佬管
先山長水遠咁走難嚟呢度
不過兩害取其輕下
冇性格就冇性格啦
喺1877年波耳人決定食回頭草
接受咗英國佬提出嘅合拼方案喇
英國亦都履行承諾
喺1879年1月11日對祖魯王國宣戰

明珠台間唔中都會重播返
都相當熱血吓嘅

(花絮)

介紹番
呢個法國𡃁仔當年背負住家族嘅名譽
走去參與呢場英國嘅殖民戰爭
喺執行一次巡邏任務期間
因為到咗食晏時間
佢力排眾議
選擇喺一條荒廢咗嘅祖魯人村落度
坐低休息同煲咖啡
結果畀祖魯人發現咗
佢嘅隊員立刻四散
而佢想騎馬走時就畀隻馬抛咗落地
最後趕到嚟嘅祖魯人
就用長矛喺佢身上拮咗18個窿

佢個名叫拿破崙‧歐仁·波拿巴
拿破崙三世唯一個仔
波拿巴主義者復辟嘅最後希望
作為戰神拿破崙個侄孫
死喺戰場上都算死得其所嘅

祖魯戰爭同一般英國對土著嘅殖民戰爭一樣
一波又一波堅毅勇敢嘅祖魯戰士
仲有佢地支長矛同牛皮盾牌
都喺炮彈同格靈機槍嘅轟擊底下變成碎片

Gatling Gun
場仗用咗唔夠半年就搞掂
1879年7月4日祖魯王國嘅首都陷落
祖魯王國正式拼入南非聯邦
加埋已經臣服嘅波耳人
英國終於完成咗喺非洲大陸南端嘅部署喇
.
.
.
.
.
.
.
.
波耳人：...你就想喇

你可以話波耳人食回頭草好冇性格
甚至可以話佢地食完回頭草再過橋抽板好仆街
但係呢個正正就係小國嘅生存之道
1880年12月16日
波耳人趁大部分駐南非英軍撤回英國之際
同時突襲分散喺德蘭士瓦共和國境內嘅英軍
呢班耕田佬
憑住咁多年來累積落嚟嘅野戰經驗
成功重創大批英國職業軍人
連英軍喺南非嘅總指揮官都陣亡埋
是為第一次波耳戰爭

英國佬當然嬲到仆街啦
不過一諗起啱啱先同祖魯人打完
而家又要勞師動眾調動軍隊返去鎮壓
而得到嘅就只係呢啲內陸爛地
條數計唔掂喎
況且佢地都係想自己管自己啫
我畀個優厚啲嘅自治權佢
等兜友喺笪爛地度自生自滅
嗰度冇資源又冇出海口
遲早自己頂唔順㗎
到時先收佢地皮就慳水慳力啦
於是喺1881年8月3日
英國同波耳人簽署比勒陀利亞和約
波耳人得到全面嘅自治權
同時承認英女王為名義君主
而英國就保留番個外交權
兩國從此就相安無事和氣生財喇
...睇你兜友點死

英國佬嘅判斷其實係好正確
笪爛地真係唔值得花咁多資源去爭嘅
不過如果笪爛地下面有金呢
就唔同咁講法喇
喺1885年德蘭士瓦共和國境內發現一個巨大嘅金礦
從此波耳人就走上暴發戶之路喇

英國佬就梗係揼春喇
心諗點解之前咁撚笨柒
唔一次過收佢地皮呢
自此英國佬就一直搵機會覆桌
但係話晒佢地都仲係認維多利亞女王做事頭婆吖
總唔能夠無原無故咁塞佢地一鑊㗎
堂堂大英帝國食相唔可以咁難睇
出師無名嘅話國內民意亦都會有反彈
不過機會嘅嘢真係話唔埋㗎話嚟就嚟

喺搵到金礦嘅消息傳開之後
歐洲尤其喺英國嘅資本家同冒險家都瘋湧而至
參與呢場非洲歷來最大嘅淘金熱
對於波耳人呢隻冇錢冇人又冇器材嘅蜑家雞嚟講
當然就如魚得水啦
憑住黃金貿易帶嚟嘅稅收
加上大量外來人(Uitlander) 所帶嚟嘅生活同服務需求
德蘭士瓦共和國得以大肆發展佢地嘅經濟
一個靠近個金礦嘅破落小鎮
亦都一舉取代開普敦
成為全南非最繁盛嘅大都會

1899年約翰內斯堡街境

呢個時候波耳人同外來人一齊合作發財
個個都搵到食
(除咗喺礦坑做苦工嘅祖魯人)
英國同德蘭士瓦共和國都過咗幾年相安無事嘅日子嘅
不過快樂嘅日子過得特別快
英國佬期待已久嘅機會終於嚟喇

自從1885年發現咗個金礦後
全世界嘅淘金者都紛紛湧入約翰內斯堡
不過佢地好快就發現要掘呢個礦並唔係咁簡單
皆因呢個金礦絕大部份嘅黃金都蘊藏喺地底深處
嗰啲礦石就唔係啲淨係揸住鋤頭鐵鏟嘅淘金者可以掘得到㗎喇
隨住淺層金礦喺兩三年間畀佢地掘得七七八八後
擁有專業機械,技術同人材嘅英國礦業巨頭就掌握住絕對優勢
經過幾年淘汰同併購後
大部份礦井都畀幾間英國巨企擸晒
隨住掘礦企業化
礦井規模就愈嚟愈大
但同時礦工短缺情況亦都愈嚟愈明顯
因為語言關係
啲英國礦業公司多數都唔會請本土嘅波耳人做礦工
佢地寧願山長水遠喺英國請啲膽正命平嘅爛鬼過嚟
就係咁愈嚟愈多英國麻甩佬嚟到約翰內斯堡搵食喇

咁大堆單身寡佬就自然有好“旺盛”嘅消遣需求啦
呢度冇酒飲冇錢賭又冇雞叫唔通叫佢地捉飛行棋咩
於是緊隨住班麻甩佬嚟到嘅就係酒吧、賭場、雞竇嘅老闆同埋啲雞
市中心開始出現一間又一間“娛樂場所”

好似呢個嚟自紐約嘅波蘭裔英國人
就係其中一個最大嘅雞竇老闆
呢啲外地嚟嘅雞頭
大量引進法國女人嚟約翰內斯堡做雞
全盛時期成個市每10個女人就有一個係雞
當中超過三成係嚟自法國嘅
所以當時波耳人叫呢個紅燈區做“Frenchfontein”
“French”就解法國啦至於“Fontein”喇喎大家可以想像吓點解嗰度會叫做噴泉

一路過住與世無爭生活嘅波耳人
睇見自己嘅地方畀班爛鬼搞到烏煙瘴氣
梗係㷫過火屎啦
好快語言同文化嘅隔閡
令本土同外來人(絕大部分係英國人) 之間不斷發生衝突
波耳人開始感到生存空間越嚟越受壓逼
較窮嘅波耳人處處受到財大氣粗嘅英國人歧視
佢地嘅母語南非語(Afrikaan, 由荷蘭語演化出嚟嘅分支) 被視為粗俗嘅語言
一般商業活動都逐漸以英文做主導
而隨住波耳人嘅人口比例越溝越淡
選舉出嚟嘅議會一定會越嚟越偏向英國人嘅利益
再係咁落去
英國唔使做任何嘢
都可以吞拼到德蘭士瓦共和國啦
呢樣相信大家都身同感受
呢啲小學生都識計嘅數
身為總統當然明白啦

時任德蘭士瓦共和國總統保羅·克魯格
細個經歷過波耳人大遷徙嘅苦難後
令佢成為堅定不移嘅波耳本土派

同楓葉幣、袋鼠幣齊名嘅克魯格幣

為咗保護波耳人嘅利益
克魯格制定咗一系列嘅政策
其中對外來人影響最大嘅就係炸藥稅喇
喺1890年議會通過對外來人徵收炸藥稅
因為開礦一定要用到炸藥嘅
咁樣就增加咗波耳本土採礦公司嘅優勢
啲外來人條氣就梗係唔順啦
佢地意識到冇政治影響力嘅話
就只會一路畀揸住個膥袋嘅啫
所以佢地諗住通過選舉嚟攞返啲政治影響力

但係你諗到嘅阿總統大人都會諗到
喺1891年
克魯格頒布限制外來人投票權法案
要年滿40歲兼住滿14年先有得投票
...咁同禠奪外來人投票權冇咩分別
連政治問題政治解決呢條路都封埋
呢次真係辣到班外來人拍晒枱反面喇
喺外來人最集中嘅約翰內斯堡
佢地嘅工會開始組織起嚟準備革命
呢個時候英國佬就出手喇

唔係返高登咩

羅德士(Cecil Rhodes)作為英國喺南非利益嘅代理人
開普殖民地首相兼De Beers老闆
一早就對個金礦流晒口水喇
佢秘密聯絡嗰啲革命組織
計劃喺約翰內斯堡發動起義
佢嘅盤算係當波耳人鎮壓革命嘅時候
英國就可以以保護海外公民嘅名義
對波耳人宣戰
到時出兵有名
就唔驚國民以至國際社會反對啦
...諗起個大金礦都扯扯哋
於是喺1895年12月尾
趁波耳人慶祝聖誕節時
羅德士派佢嘅助手詹臣醫生
帶領住600個開普殖民地嘅警察
組成遠征隊
準備聯同約翰內斯堡內嘅革命黨
一齊發動武裝起義推番波耳人嘅統治

詹臣醫生(Dr. Leander Starr Jameson)

咁啱得咁橋
同一年10月喺遠東嘅一個腐朽嘅帝國
一個姓孫嘅醫生
喺廣州發動咗佢第一次失敗嘅起義
從此就開展咗佢嘴炮革命嘅一生

回家又再離家
示意圖

不過革命呢家嘢係好難保密嘅
同阿炮哥兩個月前嗰次起義一樣
都係衰喺走漏風聲度
喺詹臣醫生嘅隊伍出發後冇耐
約翰內斯堡入面準備接應嘅工會份子
已經畀總統派人捉晒喇
原來波耳人一早就收到線報
知道開普殖民地會派人嚟同啲外來人一齊造反
一早就喺詹臣醫生隊遠征隊嘅必經之路埋伏
當遠征隊越過邊界時
埋伏已久嘅波耳人不動聲色咁截斷佢地後路
再嚟個甕中捉鼈
跟住就係五花大綁啦

呢場被稱為“詹臣入侵”嘅武裝衝突
其實喺大英帝國嘅殖民史上
真係閒過立秋
衝突規模唔大死傷又唔多
死嘅仲要唔係英國本土嘅
所以詹臣醫生束手就擒嘅消息
對英國普遍國民嚟講
都只係另一單殖民地動亂嘅花邊新聞啫
但幾日後一封由柏林發去比勒陀利亞嘅電報
就徹底改變咗民意嘅走向
以至幾十萬波耳人嘅命運喇

1896年1月3日上午11點20分
德皇威廉二世喺柏林
向德蘭士瓦共和國總統克魯格
發出一封賀電
內容如下：
「本人喺度衷心恭喜閣下
喺冇友好勢力嘅協助下
能夠憑藉 貴國英勇果敢嘅人民
粉碎咗一次由外國組織策劃嘅侵略行為
並成功維護咗 貴國嘅和平同獨立自主」
就係咁樣
德國就喺完全唔顧及外交禮數
而自己又毫無益處嘅情況下
得罪咗全英國人喇

第二日呢份電報就畀英國嘅報紙大肆轉載喇...
...乜撚嘢“外國組織”呀
邊撚個“友好勢力”呀又
個德國佬憑咩干涉我大英嘅內政呀
條仆街擺到明做架樑啦
英倫絕對唔會屈服喺威脅之下...
喺各大報刊扇風點火下
全英國人都進入瘋狂排德狀態
倫敦街頭嘅德國人舖頭畀人搶劫一空
德國嘅水手亦都畀人追打
事件到最後要由佢阿婆維多利亞女王出面
叫佢個孫寫信澄清番
德國並唔係有心同英國作對嘅
先勉強打到個完場咋

但係英政府以至民間
已經形成咗對德國打緊南非主意嘅預期
英國開始喺佢全球嘅殖民地抽調軍隊駐紮喺南非
以防範德國佬真係同波耳人勾結
而波耳人喺威廉二世誤送秋波後
以為德國佬係真心撐佢嘅
佢地亦都開始大幅增購軍備
德國克虜伯制嘅速射野戰砲
仲有採用無煙火藥嘅德國毛瑟步槍
源源不絕咁運送到波耳人嘅武器庫

波耳戰爭時期波耳人使用嘅75mm克虜伯大炮

1895年出產嘅毛瑟步槍
去到呢一步
大家都冇得返轉頭喇
戰爭已經逼在眉睫

消化吓先
聽日繼續

早幾年睇到去有個女仔周圍宣傳英國人對波耳人嘅惡行
今次係咪接埋落去