［回帶］當地人帶路 土耳其遊記

食完嘢繼續行街呢度嘅建築物好靚，而人流都特別多，嚟呢度行街記住小心財物！




由於我超鍾意買Postcard ，所以嚟到呢度基本上係癲咗唔需要特別搵，成條街都可以見到Postcard嘅蹤影，書店嘅Postcard真係好靚，但有啲小店都有賣啲好特別嘅款，例如呢個伊斯坦堡貓



之後嚟到好出名嘅galata tower 但原來要入場都唔平，啱啱上網check見到而家嘅價錢係港幣$254，所以我就冇上到去，淨係喺樓下影相

之後我哋就出發去睇清真寺，搭電車去都係幾得意嘅體驗



沿途可以一睹伊斯坦堡嘅景色




去咗Hagia Sophia，望上去真係好壯觀，入到去仲有人衝過嚟問使唔使幫我哋影相



入面都有貓行得好快



影到你啦
之後行咗去出面個花園，土耳其人話平時呢度啲花開得好靚，佢有時放學都會行入去公園坐吓，不過我哋去到嘅時候啲花已經謝晒 所以就唔po相啦

發現喺土耳其人屋企食嘅餸，我都影得唔係好清楚，所以決定喺呢度再介紹吓 土耳其人阿媽會負責每日嘅早餐同晚餐，每日都有唔同菜式，好犀利 呢度介紹吓土耳其人屋企嘅家常便飯



網上搵咗啲影得更清晰嘅圖 首先每次食晚飯前，每人都會有碗湯，個質地比較稠，佢哋會一路搣麵包，一路飲湯，飲到最後就會將啲麵包索埋啲湯嚟食



之後呢個望落好似蕃茄炒蛋嘅餸，好重青椒味，我本身唔太鍾意食青椒，但原來青椒配蕃茄炒蛋都幾正



然後呢個我第一次食嗰陣唔知點食 本身以為要搣開塊葉先食到入面啲餡，點知土耳其人同我講唔使㗎，成嚿可以直接食，原本以為食落會好奇怪，但又幾得意



呢個喺早餐同晚餐嘅時間都可以見到佢，食落就係好酸嘅蔬菜，呢個應該係我唯一唔鍾意食嘅嘢，因為真係太酸，不過佢哋好鍾意食 見到雪櫃入面仲有好多罐

總括嚟講，土耳其嘅家常便飯都幾啱口味 尤其是有唔同種類嘅麵包簡直係天堂 喺香港嘅土耳其餐廳好多都淨係賣kebab，搵唔返其他食過嘅嘢 我最念念不忘係隻芝士麵包(唔知佢正式嘅名)，新鮮出爐已經贏咗一半，之後佢外層係脆卜卜，入面就超級鬆軟，淋得嚟配埋入面啲可以拉絲嘅芝士，又好煙靭 好想食返呢隻麵包呀！！！

土耳其人男定女

女

土耳其真係貓奴地獄
啲野貓唔使餵 摸兩摸就擒上你身搞到成朝去左撚貓 無行景點

為咗貓改吓行程都值得

Day 5 經過咗咁多日陰天，今日一起身終於見到萬里無雲 終於等到晴天今日跟佢哋自駕遊，第一站去咗Arnavutköy，超推介呢個地方，首先佢啲彩色屋仔勁靚，而且成個區都好靜，好啱喺度靜靜地食個早餐先開始今日行程



揀咗間Cafe入去食早餐




Cafe入邊坐得好舒服，加埋陽光照入嚟，成件事勁chill 我哋嗌咗呢個土耳其早餐，四個人share嚟食都夠食，又係有唔同種類嘅麵包，可以點唔同醬，配埋啲超好食嘅薯條 原來食早餐可以咁幸福




一路食嘢一路吹吓水，我哋一坐就坐咗兩粒鐘，個氣氛太舒服 張梳化又夠淋 同場加映呢度嘅貓令到個氣氛更加正

藍天白雲真係好靚 沿途望住個景心情已經好好




見今日咁好天，所以決定去親親大自然 我哋去咗一個室外嘅植物博物館，雖然我對植物冇乜興趣，不過入去散步 曬吓太陽都幾正

入面都幾大，可以跟住指示牌行，或者鳩行，我哋揀咗後者 其實個感覺似行咗入森林，人影都冇個，好正



有啲牌介紹木頭





越嚟越似森林探險 之後仲見到有隻烏龜自己行咗入坑渠度

支持 一路想去土耳其同好鍾意食kebab 睇完好想去

多謝支持！
去啦 我都好想去多次

我哋兜咗個圈，去返湖邊嘅時候終於見到前面有人




喺湖邊行吓





原來呢度有兔仔



跟住我哋參觀完就出返嚟，出嚟嘅時候見到開始多人排隊入去

下一站我哋去睇black sea 天氣咁好要去海邊坐吓




落車之後我哋唔知行邊個方向，但見到有隻狗仔行咗出嚟，所以決定跟住佢行 之後佢就帶咗我哋去一間Cafe




因為今朝個早餐份量都幾多，而家大家都未肚餓，所以我哋淨係坐喺度飲杯茶 喺土耳其真係飲咗好多茶 仲要對住呢個海景，勁正 之後有個老人家行咗埋嚟，見到我係亞洲人樣，所以好好奇咁坐低傾偈，佢唔識講英文，所以我要靠土耳其人翻譯俾我聽，佢問我喺邊度嚟，又問我點同土耳其人識，再問我點解嚟，之後個老人家就問我叫咩名，土耳其人知我個中文名，但佢話好驚讀錯，所以叫我自己答 個畫面好好笑 between喺旅途上遇到可以一齊吹水嘅陌生人真係好正！！

飲完茶，同老人家傾完偈之後，我哋就打算喺呢度行吓 見到有條路可以行上山，上到去就可以一覽black sea 座山又唔係太高，所以我哋點都要行上去睇吓



雖然係斜路同樓梯，但唔算難行 呢度望返落去就係我哋啱啱飲完茶嘅Cafe




上到去山頂一個人都冇，我哋可以坐喺度慢慢欣賞個景 一望無際嘅海 雖然好好陽光，但又唔熱，仲有啲涼風，諗起都覺得好正

好多貓貓

之後就去食晚餐今晚都係喺海邊食




其實喺海邊有好多間餐廳，我哋求其揀咗間，呢間真係好好食 餐前送嘅麵包好鬆軟 之後我嗌咗炸雞扒同薯條，塊雞扒超好食，雖然睇落去個樣好似好乾咁，但其實外脆入面又多汁，啲肉又唔嚡，已經好耐冇食過咁正嘅炸雞扒之後薯條又好高質 炸雞扒配薯條冇得輸 呢餐飯超正！！！仲要因為呢度唔係旅遊區，所以價錢再平啲，我呢個餐只係港幣$20，仲要係對住海景




食完之後去附近散步 終於第一次睇到伊斯坦堡嘅日落晴天下嘅日子真係好正呀 之後因為第二日係母親節，所以我就跟住佢哋一齊去花店買花，返到去就送俾土耳其人阿媽

每個角落都有

樓主打得好生動

好奇問下，你去到土耳其有冇水土不服肚屙？
因為我，我細佬，同埋一個朋友，係唔同時間去土耳其唔同地方，不約而同都屙到仆街

右邊酸菜睇相都想食

d入場費好貴 上個塔都要200幾
Istanbul museum pass好似要成千蚊?

多謝你！
咁大鑊 我冇水土不服，我哋揀嗰啲餐廳睇落都叫做衛生，同埋冇食啲好地道嘅街邊嘢，唔知關唔關事

呢個比我食過嘅酸菜酸好多倍真係食唔落

Museum pass好似要1750TL，真係好貴 所以我哋盡量揀啲平同埋免費嘅景點