［回帶］當地人帶路 土耳其遊記

大家好歡迎你撳入嚟睇！！

話說上年去咗土耳其探朋友(以下會用「土耳其人」稱呼佢)，呢幾日睇返啲相又好掛住段旅程，所以決定打返篇遊記

幾年前喺網上識咗土耳其人，發現又幾啱傾，上年就打算去土耳其跟住佢一齊周圍玩，成段旅程14日，但唔係去咗好多地方，淨係去咗伊斯坦堡、番紅花城、卡帕多奇亞，去睇吓景點之餘，又可以跟土耳其人體驗當地生活

Between之前出咗個南非po，有興趣嘅都可以去睇吓：
[回帶]南非exchange生活
https://lih.kg/3647636

Po返幾張相先



兩個唔同嘅地方，不過都有彩色屋仔


喺番紅花城遇到好多好人


最期待嘅熱氣球

lm

Day 0
正式出發今次會喺杜拜轉機，而家多數去伊斯坦堡嘅都會直接飛去歐洲岸嗰邊(IST)，但因為土耳其人屋企比較近亞洲岸，所以我就會去亞洲岸嘅機場(SAW)



第一次搭長途機，揀咗個走廊位，雖然唔係好瞓到覺，但都坐得舒服，杜拜見

朝早六點就到咗杜拜我喺T3落機，但要去T2轉機，第一次嚟呢個機場，落機之後即刻搵路 搭咗兩架無人車，又搭咗轉巴士，又上又落，都未去到T2 仲有人行嚟問我路，明明我都好徬徨 不過行行下，沿途嘅指示都清晰，去到過多次X光機就終於見到喺T2嘅閘口





坐喺度Hea咗陣，又周圍睇吓啲舖頭，跟住就準備上機去土耳其啦

喺杜拜飛去伊斯坦堡大概五個鐘，呢程機超好瞓，可能因為本身尋晚瞓得唔好，起身嗰陣見到隔籬左右喺度食嘢，先知原來我瞓到連派飛機餐都miss咗



見到好靚嘅雪山 就到伊斯坦堡啦，沿途天氣一路都好好，係之後開始多雲，不過都無阻興奮嘅心情

終於到埗啦，去攞返個篋先，本身上機之前發現個篋嘅拉鍊爛咗少少，本身仲驚啲嘢會唔會跌晒出嚟，點知而家攞返個篋發現完好無缺 本身爛咗嘅拉鏈都正常返




今日土耳其人要返intern，所以佢阿媽同細妹出咗嚟機場接我，超級感謝佢哋 我好迷惘咁喺門口等佢哋，一路就用WhatsApp溝通，之後佢細妹就搵到我，超好笑容咁同我打招呼，仲幫我攞行李跟住就上咗佢哋車返屋企

佢哋住喺距離機場大概半個鐘車程嘅地方，嗰度已經唔係伊斯坦堡，不過都成個小社區咁，有齊晒超市、銀行、便利店、仲有好多餐廳，所以佢哋話平時都唔會特登出伊斯坦堡



好快就去到佢哋屋企啦 形容吓我住嘅地方先，佢哋安排俾我間房喺3樓，有海景超正，仲見到樓下好多細路喺度玩，同埋有好多貓 跟住而家都冇咩特別嘢做，沖個涼就休息吓

黎緊6月都去卡帕多奇亞影pre wedding , 過黎取經先

之後土耳其人終於返嚟啦喺網上傾咗咁耐，之後喺現實見到對方嘅感覺好神奇 我哋坐喺度吹咗陣水，之後佢阿媽就敲門同我哋講有得食晚餐啦 今日佢哋啲親戚都嚟咗，話冇見過亞洲人，所以係咁望住我，又同我握手 之後隔籬鄰居都嚟埋，話聽講有亞洲人嚟咗，點都要過嚟睇吓 全部人都好友善！坐低食飯嗰陣係咁同我介紹每一碟餸係啲咩 喺我嚟之前，土耳其人都有特登問過我有冇咩食物敏感，之後同我講今餐飯煮啲嘢全部都應該啱我食

張相影得唔係好清楚因為本身影到啲人，所以我就直接cut咗啲嘢食出嚟

首先有大量麵包 佢哋真係好鍾意食麵包，每日都會買啲新鮮嘅麵包返屋企，之後再剪開佢，逐啲放落個盒度，到食飯嗰陣就會每人派一嚿，啲麵包超鬆軟 之後仲有啲芝士餅，新鮮整出嚟，所以超好食 同埋仲有土耳其米、醃製嘅沙律，好豐富

正呀卡帕多奇亞真係好靚 三日兩夜都覺得唔夠玩

食完嘢之後大家一齊收返啲碗碟，跟住土耳其人就提議不如出去行吓，我哋4個人(土耳其人、佢細妹、細佬、我)就上車出去兜個圈，其實都唔係去好遠，上面講過呢度離個海好近，所以我哋就揸車落咗去海邊

我完全低估咗土耳其喺五月嘅溫度，同埋因為今日陰天又大風，所以我着咗件褸都覺得好凍 不過海邊真係好正，呢度望出去就係Sea of Marmara，可能因為呢度唔係旅遊區，而且附近都冇乜人，海邊好靜好正

正啊
我下年都想去土耳其
係咪好多貓㗎
同埋治安點？

之後都開始天黑，所以我哋就返去，順便去咗屋企樓下嘅便利店，好鍾意睇吓當地有啲咩嘢食賣



呢個土耳其人推介話好好食




返翻屋企之後，原來土耳其人阿媽準備咗甜品 呢個食落有少少似木糠布甸，又唔算太甜，好正，配埋士多啤梨一齊食

LM,幾搞笑

周街都係貓！！！ 而且好多都唔驚人，之後會再繼續介紹吓啲貓

伊斯坦堡歐洲岸好多旅遊景點，所以遊客都特別多，要小心隨身物品，同埋要小心街上面有人會特登扮跌鞋刷，幫佢執咗之後，佢就會話多謝你，送你一次免費擦鞋服務，其實係呃人錢

Day 2 是日天氣，打開個窗發現都仲係幾凍



今日因為jet lag所以朝早6:00就起咗身 本身以為廳應該都未有人，點知原來土耳其人已經起咗身，佢今日都要返intern，而家準備緊早餐，所以我就坐低同佢一齊食 早餐當然都有麵包！仲有蜜糖、cream cheese可以搽，又係好啱食 同埋佢哋真係好鍾意飲茶，土耳其人話朝早唔食麵包都一定要飲茶，所以起身第一件事就係煲茶，之後再拎鬱金香杯出嚟裝茶，飲完一杯又一杯，佢哋啲茶好正 我本身都鍾意飲茶，但喺香港都冇飲得咁多



拎返房繼續飲

今日係土耳其人阿妹帶我出去玩 首先要過對面搭巴士去地鐵站，我買咗張İstanbulkart嘅卡，係可以用嚟搭地鐵同巴士，但因為而家仲未係伊斯坦堡範圍，所以搭巴士都唔可以用呢張卡住




大概搭15分鐘巴士就去咗最近嘅地鐵站，而家搭車就可以用嗰張卡啦



地鐵都好乾淨，呢度地鐵可以食嘢，對面一家人喺度食芝士波波食得好開心 雖然好多人食嘢，不過我見個地下又冇乜污糟

話說今日係去歐洲岸 呢度搭地鐵過去都要一粒鐘多啲，不過有位坐就冇問題

到咗歐洲岸啦，當自己衝出咗亞洲 呢度人流明顯多咗，本身尋日喺街度完全唔見有亞洲人面孔，今日即刻見返好多遊客




第一站嚟咗Grand Bazaar，因為要唱錢先，入面都有好多間有得唱錢，不過真係好似迷宮咁，好難搵到啲舖頭 土耳其人細妹話今次係佢第一次嚟呢度，佢話平時好少會過嚟歐洲岸，咁之後我哋就比較咗幾間嘅匯率，就拿拿聲唱咗錢 終於可以去買嘢啦



唱完錢出嚟見到有好多小食賣，見到一直好想試嘅simit 只係幾蚊一個，不過超大隻，食好耐都食唔完

之後下一站去行吓市集，買咗啲Postcard




沿途見到好多貓 真係呢頭見完，轉嗰頭又有幾隻，呢度啲舖頭都唔會趕走啲貓，仲會準備嘢食比佢哋，所以啲貓好多都唔驚人，仲會特登行埋嚟，我踎低之後就有隻貓坐咗上嚟 個心溶化咗 唔捨得起身

伊斯坦堡海邊呢度有好多樓上嘅cafe，可以飲住茶，一路望住分隔亞洲同歐洲嘅海 好壯觀，身處歐洲岸，呢度望出去嘅右邊就係亞洲，現場好大風，因為係露天座位，佢都有室內位，但個景就冇咁開陽

不過我嗌嘅嘢飲就中咗伏 佢係熱嘅檸檬紅茶，聽落都冇乜嘢，不過飲落隻味嘛嘛，有種我未食過嘅味，一杯嘢飲大概$40港紙，喺土耳其嚟講都唔平，但個景絕對值回票價

跟住去咗清真寺，之後有日會再去參觀清真寺，所以今日只係入去睇吓，雖然今日陰天，但喺清真寺出面望返伊斯坦堡全景都好靚

影咗啲相之後，我哋就行落斜路去海邊，呢度又係超多人，有好多紀念品賣，吊飾、postcard、磁石都可以喺呢度搵到




又有賣simit嘅車仔




行到海邊就更多人，仲可以搭船出海，不過我哋冇搭，因為好肚餓要去食嘢

原來因為太肚餓，所以冇影低食咗啲咩 冇圖但我盡量形容下 我哋去咗食土耳其嘢，去到門口會有好多嘢食俾你揀，有沙律、布丁、蛋糕，揀完食咩之後俾錢，再攞返位食，我嗌咗件朱古力蛋糕，不過太甜，食完好滯




跟住搭返車返屋企，土耳其人返完今日嘅intern啦 我哋一齊去咗樓下間便利店買貓糧，去附近餵吓貓，第一隻見到嘅係貓bb好得意仲衝咗嚟我哋度，即刻比咗嘢食佢



之後又有另一隻



食食下後面又走多兩隻出嚟

其實係咪少左好多
我想睇表演一個都撞唔到