Yazd既下一個會停低遊覽既城市就係Esfahan。
Esfahan,伊斯法罕,真係細細個就聽過呢個名,作為波斯古國既文化交匯點,我相信當地一定有佢獨特既吸引之處,我亦暗暗期待住。
而係Esfahan,我地同樣被執返屋企,但手法真係層出不窮,同之前果d比,今次有誠意好多。話說離開Yazd當晚,我地又再踩夜車搵住宿,又係有架貨車停低,司機自稱Mr. Hosseni,佢不斷叫我地上車,話直接車我地去Esfahan,仲可以住係佢屋企度,想住幾耐就幾耐。
每個城既入口都有個咁既地標
天寒地凍,又可以慳返三日腳程,加上小明仲未適應返,時不時腳痛,所以呢個提議相當吸引。可惜,我係最接近神既男人,除非生命受到威脅,一滴兩滴三滴,如果唔係我係唔會搭車。我同小明講:「你想搭可以搭,我地係Esfahan等。」
小明擰擰頭,答我:「我okay呀,繼續踩。」我都幾肯定佢係俾我既豪氣干雲感染左。認真,小明係唔會死頂果種人,佢話okay就係okay,所以我點點頭,再次婉拒Hosseni既好意。
Hosseni堅持幾次都不得要領,知道遇上左硬手,亦無謂糾纏。佢係車度拎左幾個生果俾我地,再用紙寫低佢電話,叫我地去到Esfahan務必要打電話俾佢,一撚定要住係佢屋企。見佢咁有誠意,我地亦懶得到時再花時間心機搵住宿,都好開心咁握一握佢手應承佢。
我地就係Aqda呢條小村過渡到2015年
香港時間2015年1月1號0時0分,我係呢度撩緊鼻屎,伊朗時間就訓到豬西咁
係度過2014年最後一晚,都唔錯丫?