吳卓羲重返樂壇。
近年因內地真人騷《披荊斬棘》而爆紅的吳卓羲,近日到伍仲衡和周國豐主持的直播節目時表示,
準備重返樂壇,正計劃推出《別怪她》2.0,並談及自己的事業低潮。
吳卓羲直言自己「恨唱歌」,不過承認自己唱得唔好,他指「我唔係學唱歌出身,冇得呃,惟有不停練,以前監製會同我哋練咗歌先入錄音室,我錄一日8至10個鐘,嗰句唔好就返嚟補。」
並指自己正計劃與鄧智偉推出《別怪她》2.0。之後仲開金口唱首本名曲《別怪她》及《紅蝴蝶》等歌曲。
他又提到因緋聞及負面新聞而陷入事業低潮期,稱:「行過報紙檔份份封面都係你,有真真假假,緋聞嗰啲嘢,假嘅嘢我又好驚人哋會信,返到屋企自己喺度諗我聽日點面對呢?過咗下一個禮拜,封面可能全部都變咗林峯。」其中被提到問古天樂借錢一事,他即回﹕「根本就冇呢件事,你又唔可以講咁多嘢,又唔可以叫當事人出嚟幫我澄清,都幾無奈幾無辜,我喺屋企好低落。」不過,他又稱做呢行要睇開啲。