[講故仔][歷史] 名言與其背後故事 (2)

Hi，大家好

早幾個月喺講故台開post分享過三十則名言故事，今日再開post同大家分享 呢個post會由第三十一章開始，但每章都係獨立嘅故仔嚟，所以唔使刻意追post 隨心隨意隨緣即可

由於上個post近代史嘅篇幅佔比較多，所以呢個post會盡量平衡下古代同近代史，亦會盡量涉獵唔同國家、唔同範疇；至於文章內容就類似於上post，主要圍繞文史哲，希望大家多多支持 而post入面出現嘅翻譯（包括上post）都係出自我手 所以譯得唔好請勿見怪

但係都係果句，希望大家唔好吝嗇你哋嘅正皮同留言，呢啲係我寫文嘅動力嚟

上post：
https://lihkg.com/thread/189313/page/1
[講故仔][歷史] 名言與其背後故事

31. 「機關算盡太聰明，反算了卿卿性命。」

此句出自「中國四大名著」之一《紅樓夢》，寫主要人物王熙鳳一生嘅曲文《聰明累》：

「機關算盡太聰明，反算了卿卿性命。
　生前心已碎，死後性空靈。
　家富人寧，終有個，家亡人散各奔騰。
　枉費了，意懸懸半世心；好一似，蕩悠悠三更夢。
　忽喇喇如大廈傾，昏慘慘似燈將盡。
　呀！一場歡喜忽悲辛。
　嘆人世，終難定！」

《紅樓夢》入面嘅王熙鳳係典型嘅女強人，外表美艷、性情剛烈、為人聰穎、口才了得，不但處理家事井井有條；而且長袖善舞、巧言令色，擅用計謀平息紛爭、掃除阻礙。然而，王熙鳳則「聰明反被聰明誤」，因橫行霸道而眾叛親離、因家道中落而慘被拋棄；一生機關算盡，最終落得自食其果嘅下場。歷史上，唔少江山美人婀娜多姿、風華絕代，憑美貌、才智「引無數英雄競折腰」；不過，當中唔少紅顏美人晚年都相當淒涼、慘淡收場。要數中國歷史上名符其實「傾國傾城」嘅女子，明末清初嘅名妓陳圓圓可謂當之無愧。其中，當代詩人吳梅村亦以陳圓圓一生作大綱寫詩《圓圓曲》，內容借古諷今、戲謔味道十足。

陳圓圓生於1624年，當時大明政權已經搖搖欲墜、日暮途窮；陳圓圓自小能歌善舞、知書識禮，加上貌美如花；喺亂世期間，色藝雙絕嘅陳圓圓喺戲班可謂一枝獨秀，但由於當時環境底下貞操唔值錢，陳圓圓縱有國色天香都只好以色事人。一日，當時嘅大官田弘遇眼見陳圓圓美麗動人，即刻使人將其獻畀皇帝崇禎；不過當時既有內憂（闖王李自成兵變）、又有外患（清兵在外地盤踞），崇禎唔希望因兒女私情而耽誤政事，就將陳圓圓打入冷宮，不久退還田府。後來，明朝將軍吳三桂喺田府相遇陳圓圓，驚為天人；田弘遇亦成人之美（拍馬屁），將陳圓圓讓予吳三桂，成其妾侍。

　「相見初經田竇家，侯門歌舞出如花。
　　許將戚裏箜篌伎，等取將軍油壁車。
　　家本姑蘇浣花裏，圓圓小字嬌羅綺。
　　夢向夫差苑裏游，宮娥擁入君王起。」－《圓圓曲》吳梅村


．陳圓圓畫像。

1644年1月，闖王李自成喺西安稱王，建立「大順」；同年4月，李自成率五十萬大兵，劍指北京；崇禎急命身處關外嘅吳三桂班師回朝死守北京。不過，李自成軍隊兵貴神速、勢如破竹，喺吳三桂仲未趕到北京之前；於4月25日李自成就攻陷北京，崇禎自縊而亡，結束大明二百七十六年嘅統治；與此同時，李自成手下劉宗敏進京後亦將陳圓圓擄去。眼見皇帝已死，自己又手執一師精兵；吳三桂立即揮軍退回山海關，伺機而動。

對外有清兵、對內有闖王，吳三桂知道自己並非雙方嘅對手，佢嘅目的只係希望手執籌碼，去換取最大嘅利益。一開始，由於李自成以其家人作為人質，吳三桂只好同意受降大順；然而喺返京途中，當吳三桂得知連愛妾陳圓圓都落入李自成手中時，一時怒不可遏、憤然棄降，帶兵折返山海關。
李自成得知吳三桂毀約，即刻派兵進攻山海關，討伐吳三桂。吳三桂初頭大敗，只好向清軍大將多爾袞求救；正當李自成自以為大獲全勝之際，四方八面突然湧嚟大批清兵。喺清兵同吳三桂合流之下，於「一片石之戰」中大敗李自成軍隊，逼其倉皇撤退回京。然而，清兵亦已逼近京師，自知氣數已盡嘅李自成一怒之下將吳三桂一家統統殺害；呢個時侯，陳圓圓喺生死關頭，試圖說服李自成：「假如你將我殺害，吳三桂必定追你到天腳底，倒不如放我一馬。」李自成聽罷就真係放過陳圓圓，帶殘兵脫逃。未幾，清兵入京正式建政；吳三桂與紅顏知己陳圓圓重圓之餘，更獲封為平西王，名成利就。

　「鼎湖當日棄人間，破敵收京下玉關。
　　慟哭六軍俱縞素，沖冠一怒為紅顏。
　　紅顏流落非吾戀，逆賊天亡自荒宴。
　　電掃黃巾定黑山，哭罷君親再相見。」－《圓圓曲》吳梅村


．「闖王」李自成雕像。

輾轉流落於戲班、皇宮、田家、李自成，陳圓圓一生可謂「一雙玉臂千人枕」；正當佢以為能夠投靠一戶好人家、「飛上枝頭變鳳凰」之際，原來吳三桂亦係一個負心漢，昔日「寧要美人，不要家人」嘅吳三桂，好快就拋棄咗陳圓圓另覓新歡；自此以後，陳圓圓就鬱鬱不得終日。後來，康熙十二年、即1673年下令削藩；吳三桂不甘利益受損，聯同兩位藩王起兵造反，史稱「三藩之亂」；但起事連番遭逢挫敗，吳三桂更喺戰亂中期病逝；事變不久就被清廷所平定。

　「嘗聞傾國與傾城，翻使周郎受重名。
　　妻子豈應關大計，英雄無奈是多情。
　　全家白骨成灰土，一代紅妝照汗青。」－《圓圓曲》吳梅村


．平西王吳三桂。《圓圓曲》稱吳三桂年青時英明神武、俊俏非常；「白晢通侯最少年，揀取花枝屢回顧」。

吳梅村喺《圓圓曲》借因寵愛西施而亡國嘅吳王夫差，去諷刺當時仍然不可一世嘅吳三桂。詩中末段：「君不見，館娃初起鴛鴦宿，越女如花看不足。香徑塵生鳥自啼，屧廊人去苔空綠。」，寫吳王夫差昔日溺寵西施，建館娃宮金屋藏嬌，朝夕相對仍猶有不足；但今日事過境遷，宮中小徑已佈滿塵埃、輝煌宮殿亦已人去樓空；直指吳三桂「一剎那光輝唔代表永恆」。豈料吳梅村果然一語成讖：吳三桂昔日手握籌碼，放清兵入關以為能夠平步青雲，結果貪得無厭作反清廷，起事不果連累孫兒吳世璠自殺收場；陳圓圓晚年坎坷、獨守空房，後來更因戰亂而下落成謎。時來運到、一朝得志就意氣風發，隨時朝不保晚。

正皮 LM

夜D再出一篇

lm

32. 「諸行無常，盛者必衰。」

此句摘錄自日本古籍《平家物語》開頭一首點題詩。《平家物語》於十三世紀成書，記載日本於「平安時代」末年日本氏族「平氏」同「源氏」兩大勢力之間嘅政權鬥爭。

原文：
「祇園精舎の鐘の声
　諸行無常の響きあり
　娑羅双樹の花の色
　盛者必衰の理を顕す
　驕れる人も久しからず
　唯春の夜の夢の如し
　猛き者も終には亡びぬ
　偏に風の前の塵に同じ」

譯文：
「祇園精舍之鐘聲，
　包含諸行無常之迴響；
　娑羅雙樹之花色，
　彰顯盛者必衰之天理。
　驕恣者不得長久，
　猶如春天午夜之酣夢；
　跋扈者終將湮滅，
　仿似凜烈風中之塵埃。」


．位於印度嘅祇園精舍，為當年釋迦牟尼傳法之場所；堪稱佛教之根源地。


．位於日本兵庫縣之娑羅雙樹，乃佛教聖樹之一。傳說釋迦牟尼於古印度拘尸那揭羅（Kuśinagara）城外之娑羅雙樹下涅槃時；整個樹林花色變白、猶如白鶴降世。

「諸行無常」、「盛者必衰」皆為佛教用語。「諸行無常」為佛教三法印之一，指世事萬變、滄海桑田、人生無常；「盛者必衰」則指再強橫嘅勢力最終都逃唔過衰落嘅命運。

平安時代（794年－1192年），堪稱為日本文化之根源；因時任日本天皇桓武天皇遷都平安京（今京都）而得名。依據日本文化，日本天皇會為當時嘅名門望族「賜姓」，即所謂「氏族」；至於喺平安時代末年，「平氏」同「源氏」則為當時兩大勢力。

1156年，時任天皇鳥羽天皇駕崩導致權力懸空，結果引嚟兩子顯仁、雅仁衝突；顥仁首先繼位，是為崇德天皇；雅仁後來依仗其支持者：源氏家族嘅源義朝、同平氏家族嘅平清盛出兵討伐崇德天皇，並成功取而代之，繼位是為後白河天皇；至於崇德天皇則被流放讚岐。後世稱是次動亂為「保元之亂」。

去到1159年，因「保元之亂」立功嘅源義朝同平清盛分別獲封獎賞，但源義潮不滿後白河天皇厚此薄彼、偏袒平氏；「一出不能藏二虎」，故起兵挾持當時已遜位嘅後白河天皇及時任天皇、後白河天皇之子二條天皇守仁，發動政變。平清盛得悉此事後馬上出兵戡亂，結果大敗源義朝軍隊。平清盛軍隊除咗喺戰事中殺死源義朝之外，平清盛更下令將源氏加以驅逐、削弱，源義朝三子源賴朝亦被流放伊豆國；事件史稱「平治之亂」。


．描繪「平治之亂」之畫像；「平治之亂」開啟平源兩氏往後之鬥爭。

擊敗源氏嘅平清盛，風頭一時無兩；即使二條天皇復位，聲望、權力都不及平清盛。勢力高於一國之君嘅平清盛，漸漸變得躊躇滿志、專橫跋扈；直到1165年二條天皇因重病去世、尚在襁褓嘅皇子順仁喺一歲時繼位，是為六條天皇後，平清盛就更加有恃無恐，喺1167年躍升為太政大臣（類似宰相，負責輔佐天皇），可謂「挾天子以令諸侯」。原本早已遜位於後代、身為太上天皇嘅後白河天皇，立場上都一直支持平清盛；但佢眼見平清盛勢力愈壯愈大，所以意圖制衡其勢力。1168年，後白河天皇下令將四歲嘅六條天皇退位，並扶植兒子憲仁繼位，是為高倉天皇，自己就喺背後號令朝政。

平清盛先係不為所動、故作同意，但就偷偷使計攫取更大權力。首先將次女平德子下嫁高倉天皇，成為皇后，進一步鞏固平氏勢力；1178年，當平德子生下皇子言仁後，平氏勢力更係穩如泰山。平清盛眼見將後白河天皇勢力連根拔起、取而代之嘅時機已經成熟；1179年率領大軍發動「治承政變」，罷黜所有後白河天皇勢力嘅朝臣，更幽禁後白河天皇。喺翌年，平清盛立嫡孫言仁為安德天皇；平氏勢力正式掃除所有強敵、一統天下。此時，十四歲被流放伊豆國，今已三十四歲、繼承父親源義朝衣缽嘅源賴朝，開始帶兵討伐平氏，但都無功而還。

然而，「盛者必衰」；平清盛喺得到天下嘅翌年、即1181年，就因熱病去世，終年六十三歲。平氏面對平清盛猝逝，一時群龍無首、陷入大亂；倉卒由平清盛三子、平宗盛繼承平家。眼見平氏內亂，源賴朝之堂弟，武將源義仲首先崛起，喺1183年揮軍攻打平安京；軟弱無能嘅平宗盛不得人心、腹背受敵，不久棄甲曳兵、落荒而逃，為平氏之衰落埋下伏線。

32. 成功攻陷平安京嘅源義仲，當時只得廿九歲，難免年少氣盛、狂莽自大，但執政能力則比平宗盛更不堪，甚至縱容軍隊到處作惡，令百姓怨聲載道，可謂「少年得志大不幸」。眼見源義仲管治下禮崩樂壞；當時平氏敗走平安京，遭平清盛幽禁嘅後白河天皇復行視事，但無大權，只好暗令正四處攻克平氏勢力、盤踞於鎌倉嘅源賴朝討伐源義仲，並得其同意。源賴朝派其弟源義經起兵攻打平安京，其軍隊勢如破竹、直搗黃龍。

1184年，眼見源義經已經兵臨城下，後白河天皇意圖嚟個裡應外合，起兵進攻源義仲；但源義仲先下手為強，揮軍攻打後白河天皇所在處之法住寺，結果後白河天皇不敵源義仲，再次被俘；但此亦為源義仲一生中最後一場勝仗。

同年，源義經大敗源義仲軍隊；源義仲被當眾斬首，終年三十歲。源義仲稱霸平安京短短一年就英年早逝，崛起與滅亡猶如走馬燈、稍縱即逝。源義經攻占平安京時只得廿五歲，比當時源義仲接管平安京時年紀更細，但係，源義經並無重蹈前人覆轍，坐享榮華富貴，反而乘勢殲滅平氏勢力；於緊接嘅一之谷之戰、壇之浦之戰中大勝平氏軍，將平宗盛在內嘅平氏一家逐一處死；此亦意味著平氏至此徹底覆亡，時為1185年。由平清盛開創平氏盛世不出十年，就土崩瓦解。


．描繪源平合戰之屏風。

然而，屢立戰功嘅源義經，晚年卻異常坎坷；皆因人性醜惡、「鳥盡弓藏」（有關中國歷史之「鳥盡弓藏」故事，請睇舊post第十二章）。源義經攻陷平安京、消滅平氏後，聲望如日中天、名震天下，源義經嘅兄長源賴朝當時已喺鎌倉自立為王、成為源氏首領；眼見其弟戰績彪炳、聲名甚高，唯恐其功高蓋主，故下令諸殺源義經。源義經面對兄長追殺，只好倉皇逃命；但被其趨炎附勢、意欲討好源賴朝之戰友藤原泰衡所出賣，結果源義經被逼含憤自殺，終年三十歲。縱然性格與堂兄源義仲大相逕庭，但殊途同歸、下場悲慘、英年早逝；呢場形同「玄武門之變」嘅兄弟相殘，世人只能慨嘆「諸行無常」。

源賴朝眼中釘已除，得以隻手遮天。喺1192年，出任「征夷大將軍」，並喺源氏根據地鎌倉建立軍政府「幕府」；開創日本史上第一個幕府時代。


．後白河天皇像。生於1127年、卒於1192年，總共六十五年嘅人生，見盡平、源兩氏之興衰；亦為平源之爭中一位舉足輕重之人物。一生被幽禁三次（源義朝、平清盛、源義仲），歷盡風浪。

吳三桂陳圓圓呢個故事真是經典
細個唔識覺得好普通
對吳三貴刻版印象大漢奸
大個對歷史同呢個世界有d 認識之後
覺得如果佢地唔生係呢個時代就有情人終成眷屬
但一生於亂世好多野已經身不由己
本來一個大英雄最後竟然落一個漢奸駡名

吳三桂陳圓圓呢個故事真是經典
細個唔識覺得好普通
對吳三貴刻版印象大漢奸
大個對歷史同呢個世界有d 認識之後
覺得如果佢地唔生係呢個時代就有情人終成眷屬
但一生於亂世好多野已經身不由己
本來一個大英雄最後竟然落一個漢奸駡名

雖有智慧，不如乘勢；雖有鎡基，不如待時

33. 「是以君子為國，觀之上古，驗之當世，參之人事。察盛衰之理，審權勢之宜，去就有序，變化因時，故曠日長久，而社稷安矣。」

此句引自西漢政論家賈誼之名作《過秦論》下篇之末句；意指君子治國，要透過洞明歷史，以觀察當今局勢之走向、參考人事之變遷；從而明瞭興盛衰敗之真理、審視自身權力形勢之強弱；得以知所進退、因時制宜；乃至長治久安、國泰民安。《過秦論》係一篇評論秦朝速亡因由嘅史論文章，分上中下三篇，寫秦國由盛至衰嘅過程同原因；當中分析有理有據、見解獨到，故為後世所推崇。

秦國，立國於前777年，為春秋時代中原大地一隅之小國，迄今已近二千八百年前。建國以來，一直都係普通不過嘅一個國家；直至前361年，第廿五任皇帝秦孝公即位，在位期間重用大臣商鞅，由經濟、政治、思想方面推行大改革，勵精圖治、雷厲風行，史稱「商鞅變法」；結果造就秦國成為一方之霸主。乃至戰國時代末年，中原只剩七大強國－即所謂韓、趙、魏、楚、燕、齊、秦時，秦國國力更係傲視群雄、脫穎而出。對此，其餘六國不惜「合縱」，聯手抗秦；結果秦國使出「連橫」，聯同幾個國家進攻某個國家，瓦解國與國之間嘅信任、致其不能合流。


．盤踞中原之「戰國七雄」與其餘國家。

直至前246年，嬴政繼位，是為秦始皇，更將祖訓發揮得淋漓盡致、以圖霸業；先「吞二周而亡諸侯」－滅東、西周與其諸侯國，再「履至尊而制六合」－將其餘六大強國逐一吞併。終於，喺前221年，秦國一統天下，建立「秦朝」。然而，秦始皇執政並非以百姓為依歸、為人民謀福祉，反而推行暴政；在位期間，修築長城、建阿房宮、焚書坑儒－人民生活於水深火熱之中。

不過，秦始皇在世驕奢淫逸、恃勢凌人，最終都敵唔過大自然之定律：「生老病死」。當秦始皇建立秦朝、權傾天下嘅第十一年，佢喺一次出巡期間暴斃而亡；一代始皇客死異鄉，終年五十歲。由於秦始皇死得突然，又因天氣關係，屍身開始發臭，丞相李斯為掩飾秦始皇死訊，命人將大量鮑魚放入裝有秦始皇屍身嘅大轎中，以掩蓋臭味；一代天驕秦始皇生前耀武揚威、死後「如入鮑魚之肆」，何其諷刺。

秦始皇死前曾立遺詔，命立長子扶蘇為帝；不過李斯老奸巨猾，竟聯同大臣趙高、始皇幼子胡亥篡改遺詔、並賜死扶蘇，立胡亥為帝，是為秦二世；史稱「沙丘之變」。胡亥掌權後，不但冇將先父倒行逆施嘅政策矯正過嚟；反而沉淪聲色犬馬、酒池肉林，任由李斯、趙高二人把持朝政、為害百姓，結果引致農民陳勝、吳廣揭竿起義；雖然動亂得以平息，但秦朝亦逐漸變得千瘡百孔、搖搖欲墜。


．陳勝、吳廣起義，又稱「大澤起義」，亦係中原歷史上第一次農民起義。雖然起義失敗，但仍成為農民起義之先驅；之後嘅劉邦，至明朝嘅朱元璋，乃至毛澤東，都係歷史上農民起義嘅表表者。

然而，李趙二人雖為一丘之貉，但其實都係面和心不和，兩個都想獨攬大權；因此，趙高先下手為強，不斷向秦二世進諫，離間胡亥同李斯嘅關係，令二人矛盾加劇。經趙高接連煽風點火，胡亥終於受趙高之唆擺，賜死李斯，更諸其三族。

當人民怨聲載道、四處都有起義之際，秦朝內部仍然互相內鬥，真係自取滅亡。趙高眼見政權日暮途窮、胡亥不得民心；為保大權，趙高聯同女婿閻樂起兵發動政變，逼令胡亥自殺，另立始皇嫡孫子嬰為帝。不過，趙高想故計重施，反被子嬰洞悉先機；子嬰即位五日就賜死趙高；「剃人頭者，人亦剃其頭」真係亙古不變嘅真理。

縱然讒臣趙高已死，但秦朝政權已經日落西山、無力回天。劉邦、項羽先後起義討伐暴秦；前207年，劉邦首先進入關中，逼令子嬰退位，秦朝至此覆亡；翌年，當項羽率軍長驅直入、闖進關中後，更斬殺子嬰，甚至將其子嗣統統殺清光；秦始皇祈秦朝千秋萬世之理想終成黃梁一夢。

秦朝國祚僅十四年，彰顯「暴政必亡」之道理。秦之所以能崛起，皆因時勢造英雄；到運勢走到盡頭，則「勢傾則絕，利窮則散」，最終下場有如商鞅，作繭自縛、作法自斃。

咁高質都咁少人睇

咁高質都咁少人睇

多謝巴打欣賞
我相信行遠自邇，登高自卑
但每一個正皮同留言都係我寫文嘅動力嚟