我係一個好普通嘅大學生，一直都渾渾噩噩，亦都唔知出到嚟社會做咩好。有次睇咗Guns, Germs, and Steel，裏面提及非洲大陸係人類嘅起源。於是我就去咗南非開普敦啦。
哈哈有啲隨性，其實一直都想睇下地球嘅另一端，完全唔同嘅文化、人種、環境係點嘅，係我嘅人生checklist之一。我諗南非唔算係一個熱門嘅旅遊國家，所以就諗住出post同大家介紹一下，亦都當比自己寫下旅行遊記。依邊好少用中文，我都好耐冇寫嘢啦，希望文筆可以保持到尚算流暢啦哈哈。
今次係我第一次踏足非洲大陸，由香港去Cape Town喺埃塞俄比亞轉一程機，計埋轉機等咗一個鐘，總共搭咗19個鐘。長途機真係好辛苦！！！！！
題外話，喺埃塞俄比亞機場入面嘅吸煙室真係另一個世界級。我諗係因為宗教同埋文化嘅原因，我喺吸煙室裏面一個女性都見唔到。200平方米嘅吸煙室入面企咗、坐咗四、五十個男人。
老實講，如果我係女人、喺呢啲國家，俾咁多男人圍住望住一齊食煙都真係有啲驚。我就唔敢影相啦對住好多穆斯林。
仲有，去南非係唔洗打vaccine㗎 ！唔洗打vaccine ！唔洗打vaccine ！不過入境其他東非國家或者其他非洲國家就應該要打yellow fever嘅疫苗了。
Cape Town 位於南半球嘅南緯33度，屬於地中海氣候。簡單啲來講即係夏天溫暖乾燥，冬天落雨。而南半球嘅天氣同北半球嘅香港係相反嘅，所以當香港喺六月至八月係夏天嘅時候呢邊就係冬天。所以依家依邊係凍到不得了。無錯！非洲都係有冬天的！非洲嘅冬天都係凍嘅，平均溫度只有約7 °C左右。
南非嘅種族隔離政策係1995年先正式喺曼德拉嘅統治之下取消咗。而喺種族隔離之下，黑人係唔可以讀大學、要居住喺被隔離嘅區域Townships 。所以喺呢個歷史背景之下，南非好多嘅黑人教育程度同埋社經地位都好低。即使而家種族隔離政策取消咗，種族之間嘅差距一時三刻都冇辦法彌補到。白人仍然掌握南非大部份嘅財富。根據Wikipedia ，南非有色人有44%，白人35%，黑人20%，而印裔同亞裔就係最少，得2%唔夠。嚟咗一段時間，見過嘅亞洲人真係十個以內⋯⋯南非嘅official language 有11種，主要語言係英文同Zulu ，不過唔洗驚你識講英文就夠了。
近年嚟，Cape Town 面對經濟、社會同政治上嘅種種問題，例如貧富懸殊、種族歧視、失業率高企、犯罪問題等等。唔知大家有冇聽過轉型正義呢個term？呢個字嘅意思係指：民主國家對過去獨裁政府實施違法同唔公義行為嘅彌補，通常具有司法、歷史、行政、憲法、賠償等面向。
我哋港人比較熟悉嘅台灣喺白色恐怖時期戒嚴完結後，政府及民間組織亦極力希望達成轉型正義。但係追究前人嘅過失，彌補後人嘅地位又邊有咁易啊！而家喺南非社會亦都極力希望可以達成真正嘅種族平等。但始終歷史遺留落嚟嘅問題實在太多。
其實南非冇大家想像中咁落後，全部都係農地爛地，至少係開普敦唔係。
南非係依家全球唯一一個仲有三個首都嘅國家：行政首都普勒托利亞（Pretoria）、立法首都開普敦（Cape Town）同司法首都布隆泉（Bloemfontein）。而當中開普敦就比較係文化同立法嘅首都，比我嘅感覺似係澳洲嘅墨爾本Melbourne 。而Cape Town係三個首都入邊最有錢嘅。約翰尼斯堡（Johannesburg）係成個南非裏邊最有錢嘅城市，主要係商業為主，但係呢個城市嘅罪案率都係最高嘅。緊隨其後嘅就係Cape Town，第二高GDP嘅城市。因此開普敦算係南非裏面比較發展程度高同埋適合遊客嘅城市。南非係世界上犯罪率最高嘅國家之一，安全程度唔好同香港日本台灣呢啲比較。
夜晚出街唔好自己一個人、唔好行入township、相機手機收埋唔好俾人睇到，財不露白。
下面圖入面嘅scam我都遇過。喺星期日，正午時分左右，仲係日光日白，我行喺CBD嘅Long Street ，有個著到西裝革履嘅黑人用一樣嘅手法諗住呃我，仲帶咗我去附近油站嘅ATM度。好彩未算蠢得晒，同佢哋講話冇帶實體卡出街。
街道上主要都係歐陸式建築風格，好似行喺歐洲街頭嘅感覺。Cape Town 喺殖民時期曾經歷過荷蘭同英國統治，所以依度嘅白人大多數都係荷蘭裔同英裔。而佢哋祖先喺殖民時期大多都遺留咗好多財富，所以白人喺依度多數都係住富人區，有錢好多。Gini coefficient 係 0.63，貧富懸殊嚴重。
Cape Town同香港一樣，一個小小嘅地方有山有海。
Cape town係一個海港城市，世界各地嘅商船會停泊喺V&A Waterfront ，呢度嘅海港就係非洲最繁忙嘅海港之一。用香港人嘅角度黎睇V&A Waterfront 依個地方就好似香港嘅維港，附近有靚商場、酒店、娛樂，係遊客區。
同時依個城市亦有好多風景同山，出名啲嘅有Table mountain 桌山係世界七大奇蹟之一：上帝的餐桌。
Table mountain 可以搭cable car上去，亦可以預兩、三個鐘爬山上去。Cape Town亦有好多行山徑同森林。
真係失策揀咗冬天先嚟！ 唯有當避下暑啦。
期待後面有無痴線嘢
