樓主嘗試提出一個假設,假如無接受過人類社會文化影響,知識受限,應該就會唔知道自身不自由。
不過我偏向人類崇尚自由係天生
而我覺得人類有幾大程度感受到自由,好多時都係當自己面對一個問題需要解決,而自己可採取嘅行動受到幾大掣肘,個方法解決到個問題嘅幾大比重而定,所以亦有講法係自由就好似呼吸空氣,當無咗時你先會感受到
舉例你朝早肚餓想食早餐
市面有好多餐廳,好多食物俾你揀,而你有一定金錢去買嚟充飢,你會覺得自己有選擇食咩嘅自由,同時唔會覺得無得食五星級酒店自助早餐就叫唔自由,因為對你嚟講可行嘅解決方法係解決到你面對嘅問題嘅大部分;
同一個情況,換係一個生活拮据食完個包會無錢食下餐嘅人,就算喺同一個大環境下,佢就會覺得唔自由,因為根本唔到佢揀。
再舉另一個例,如果有個社會只有一間餐廳只賣一樣餸,每個人只可以食喱樣餸,就算你有錢餐餐幫襯,但如果你食滯咗,唔食又會餓,就算你從來無試過其他食物,你都會覺得唔自由,因為你無其他可行方法去解決食滯同時又要醫肚喱個問題。
即使後來你知道原來個社會出面仲有另一個新世界,但要付好大代價或風險先去到得到其他食物,你同樣唔會覺得係自由。
而我覺得人類天生崇尚自由一來係基於人類嘅基因保證到有一定智力發展
二來你睇下啲bb仔,就算佢咩都唔識,但佢出世後好自然會探索佢周圍嘅世界,就算係踢下腳,轉個身,都係一種探索,想知自己做到啲咩做唔到啲咩
當佢哋行動受阻或者唔舒服,佢哋自己解決唔到就會喊,我會覺得都係對不自由嘅一種感受
而回應返井底蛙自唔自由嘅問題,我覺得就係取決於佢日後會唔會遇到行動受掣肘解決唔到某個問題。
最後不如我又提出多個論述俾樓主諗下
參考下物理嘅觀測者效應
井底蛙本身係自由嘅
不過到知道井外世界嘅樓主觀察嗰隻井底蛙時,佢就變得不自由了