[賀歲故]有咩癲得過年三十晚跌咗入搶頭炷香嘅輪迴

回憶去到呢度要停一停，因為，的士已經嚟到醫院外面。

我好快手衝咗落車，然後直奔ICU。

喺升降機入面，我不停咁向所有我認識嘅滿天神佛祈禱，希望嘉盈吉人天相。

終於，我趕到嚟ICU病房前。

我一見到有個姑娘坐咗喺度，我就第一時間衝咗埋去問佢：「姑娘，我係曹嘉盈男朋友，有電話話佢入咗ICU，我想佢而家點啊？」

姑娘聽到，個樣有啲不知所措咁講：「曹小姐佢呢，喺ICU……」

就喺呢個時候，ICU道門打開咗，醫生走咗出嚟，我即刻衝埋去問佢：「病人點啊？」

醫生無奈咁嘆咗一口氣，搖一搖頭，講咗一句電視劇最常聽見嘅台詞：「我哋已經盡咗力。」

我一見到呢個情境，一手就推開醫生，直接衝入病房。

一直以嚟，我都無認真諗過，到底嘉盈死咗會係一件點嘅事。

直到而家我先發現，原來死亡真係可以同自己咁接近。

當我望入病房，見到病房上面有一塊白布蓋過咗一個訓喺床上嘅人形。

眼淚，終於都忍唔住。

做人最緊要有信念。

但係，原來信念都唔係絕對。

（故事待續）

呢章好感動
原來男主角係為咗女朋友先一次又一次穿越時空

剃光頭果段
睇到眼濕濕

一切皆有因
聽日結局 希望俾到Surprise大家

原來一切都係男豬幻想，個女仔一路都當佢係痴漢

諗起彿教嘅輪迴係為咗報前世嘅恩/ 業，一日未清零一日都要繼續loop （包括你食咗𠴱隻牛，你嘅貪嗔癡）
喺黃大仙嘅概念（其實我唔熟彿教，但拜神應該係道教），佢咁loop法應該會加重咗佢嘅業，仲要報埋葉劉、happy伯同跑手啲業
不過另一方面，咁loop法又令我諗起2月29

好有深度嘅討論

嘉盈喺黃大仙廣場，漫無目的咁行，突然間問我：「你知唔知咩係信念啊？」

「即係嗰啲好鬼死中二病嘅口號，類似咩『我要成為海賊王』、『我要做火影』、『我要搶人才』之類？」我漫不經心咁答。

「信念，係一個人，或者一班人，帶住一個明確目標，然後用盡一切努力去做事嘅心態。」嘉盈對我嘅求其回應反咗一個白眼，繼續認真咁講，「例如，黃大仙呢個地方，我哋都有一班好有信念嘅人，大家一齊拎住個鍋、拎住個煲，就唔再怕啲煙……」

一講到呢度，我即刻掩住佢個嘴：「嘩，呢啲嘢唔好公開講，又俾人話犯國安㗎啦。」

嘉盈皺眉頭拎開我隻手講：「你諗咩啊？我講緊我同黃大仙班街坊一齊煮團年飯喎，上年好多人一齊食，所以佢哋咁借咗幾個新煲俾我，煮起上嚟啲煙又無咁攻眼，所以我咪唔怕煙囉。你唔好咩都對號入座啦！」

「OK，咁講翻正題，其實你想講咩呢？」我好奇咁望住嘉盈。

嘉盈輕輕繞住我隻手，語重深長咁講：「我想講，我信，只要我有信念，我就一定會好翻。所以，你都要陪我，一齊有信念，知唔知啊光頭佬！」

「知喇，光頭婆！」我笑住摸一摸嘉盈頂冷帽，然後兩個人又繼續喺商場度行……

信念。

信念的確好重要，至少喺嘉盈離開之前，呢份信念一直都令佢保持樂觀。

我拖住沉重嘅腳步，慢慢走入病房，然後跪咗喺佢床邊，忍唔住扒咗喺床度大大聲喊：「點解你唔等埋我先走啊？我搶咗個頭炷香俾你啊！係信念啊，我明咗咩係信念啦！我嘅信念，就係要你好翻，所以我真係用盡一切努力，就係為咗你有信念堅持落去。點解，點解今次信念無用啊？你知唔知我好愛你啊？我好掛住你啊……」

一路喊，我一路記起開心伯。

我終於明白，原來失去一個重要嘅人，真係可以令一個人一沉不起。

就好似而家，我個心，都好似失去咗一個最重要嘅部份。

而我需要嘅，只不過嘉盈好似平時咁簡單摸一摸我塊面，然後同我講聲：「唔緊要㗎光頭仔。」

一諗到呢度，我忍唔住伸手落去白布下面，想嘗試將嘉盈隻手拎出嚟。

點知，一拎，咦，唔對路，點解深啡色嘅。

就係呢個時候，我背後傳嚟一把聲音：「你做乜愛我媽媽？你係乜水？」

我擰轉頭，見到差不多成個印度家族企咗喺我身後，全部都一臉愕然咁望住我。

我好快知道，似乎我搞錯咗啲嘢。

我即刻企翻起身，扮哂無嘢咁笑一笑然後對住班印度人講：「朋友～神愛世人，所以我都愛你哋，又愛你媽媽，愛埋你哋爸爸。God bless you！新年快樂，人人有蕉食！」

一講完，趁佢哋未有反應，我就第一時間狂奔離開病房，然後跑翻去個醫生前面。

「喂大佬，你又話盡咗力嘅，入面嗰個都唔係我女朋友！」我嬲住咁講。

「喂大佬，咁你淨係問我『病人點啊』，咁我頭先真係救完嗰個印度人，又真係盡咗力吖嘛，如實作答都有錯？」醫生一臉無奈咁答。

嗯，其實佢又幾有道理，所以我都唔好意思再講，唯有轉問：「咁我想問下，到底曹嘉盈去咗邊呢？」

醫生恍然大悟咁「哦」咗一聲，然後答：「做完手術之後，病人情況穩定，不過癌症嗰邊，都仲需要時間治療嘅。佢已經送咗翻原本間病房休息喇，你上去探下佢啦，唔好再搞人哋媽媽啦。」

一聽完醫生咁講，我立即起行去病房。

去到病房外面，我已經從玻璃窗見到嘉盈安然無恙咁瞓喺病床上面。

我成個人即刻安心過「安心出行」，二話不說就推門入房。

「你點啊？」我緊張咁走埋嘉盈身邊。

「醫生話手術順利，而家休養下就得。」嘉盈一見到我，即刻笑住從床上面撐咗起身，然後望一望我講：「你做咩嚟啊？又臭又污穢嘅？」

聽佢咁講，我望一望自己，呢個時候先發現自己件衫又爛、又有上香嘅灰塵，仲有楊家朗噴出嚟嘅…….

但係為咗令嘉盈唔好擔心，所以我即刻話：「哦，頭先有個阿婆跌咗隻戒指入垃圾站，我入咗去幫佢搵，所以咪整到成身塵囉。」

「吓，咁但係做咩件衫都爛埋嘅？」嘉盈眉頭一皺。

「哦，香港地好多好人，個個都爭住要幫個阿婆，所以咪爭到衫都爛埋囉。」我嘗試冷靜解釋。

「咪住，你件衫啲啡色又係咩嚟㗎？嘩，有屎味嘅？」嘉盈聞下我件衫，個樣超厭棄。

「無計啦，啲人為咗幫阿婆搵嘢連廁所都唔肯去，結果一搵到隻戒指嗰一刻就開心到瀨哂屎咁囉。」我兩手一攤咁解釋。

「光頭仔！你以為我會信咩？」嘉盈突然臉色一轉，然後一手指向我身後嘅電視。

我轉頭一望，發現播緊嘅係新聞報導。

「今年黃大仙廟重開，吸引咗大批善信提前到廟外排隊準備搶頭炷香。可能係因為多年已經無辦相關活動，所以今年嘅市民搶得相當激烈，有市民搶到肚瀉、有人被運走、甚至有市民身上沾滿糞便。而今年嘅頭炷香最後由一位伯伯搶得。伯伯表示，頭炷香係一位有心嘅光頭仔讓俾佢嘅，佢今年嘅新年願望係活得開心。希望，呢個願望亦都成為咁多位香港人嘅祝福……」

報導去到呢度，我已經發現新聞畫面之中影低咗我盡全力跑向香爐，最後將頭炷香讓俾開心伯嘅畫面。

咁即係話，嘉盈其實一早已經從新聞之中知道咗我去搶頭炷香嘅事。

「點啊？有咩解釋啊有心嘅光頭仔？」嘉盈陰陰嘴笑咁望住我，似乎並無因為我嘅隱瞞而嬲咗。

「咁，我本身係想有啲儀式感，搶個頭炷香俾啲信心你啫。做人最緊要有信念嘛。」我微微一笑咁解釋。

「咁你最後又將頭炷香讓咗俾人？」嘉盈用好奇嘅眼神望住我。

我伸出手，輕輕捉住嘉盈隻手，然後講：「當我搶到頭炷香之後，我聽到開心伯呼天搶地講佢有幾掛住佢老婆。佢令我諗起，假如有一日我失去咗你，我可能都會陷於人生低谷甚至想自殺，而喺嗰個時候，我都需要一個人嚟俾鼓勵我。所以，我最後覺得反正我本來都唔信黃大仙，倒不如將個許願交俾開心伯，於是就咁做咗。」

「果然係有心嘅光頭仔啊！」嘉盈笑住摸一摸我個頭，然後認真咁望住我問，「咁我呢？而家我無咗頭炷香個願望點算啊？我個癌症仲未好翻喎！」

我笑咗一笑，將嘉盈嘅手再捉緊啲：「你仲有我做你嘅信念吖嘛。」

「嗯，算你啦。」嘉盈似乎接受我呢個答案，好甜咁笑咗出嚟。

喺呢個浪漫時刻，姑娘突然敲門巡房，巡完之後順便講咗句：「祝你哋兔年快樂啊！」

經佢一提，我同嘉盈先意識到，原來今日就係大年初一。

「光頭仔，祝你啲頭髮蒸蒸日上，成日笑口常開。」嘉盈再摸下我個光頭，好滿足咁講。

「光頭婆，咁我祝你身體健康，仲有，保持信念。」我學佢咁笑住摸下佢個光頭。

「嗯，保持信念最重要。」嘉盈望住我好甜咁笑咗一笑。

「既然講到呢度，係時候完成埋賀歲片指定動作喇！」我望住嘉盈，輕輕將佢從床嗰度扶起。

嘉盈會意，即刻露出燦爛笑容，對住所有讀者講：「新年，環境未必即刻變，但係心境可以變。新一年，祝大家保持信念！」

而我亦都即刻擺出拜年手，對住讀者，即係你講：「祝你逆流而上，笑對亂世，唔怕失禮！」

最後，我同嘉盈繞住手，一齊向住大家講聲：「兔年快樂，恭喜恭喜」

結尾播主題曲：https://www.youtube.com/watch?v=fI8WpOZ4Di0&ab_channel=Day_13y_Day

（全文完）

＝ ＝ ＝
作者的話：
大家好， 拜年故拜到年二十，終於都完咗。
呢個故事無咩特別意思，
純粹想放空大腦，
寫一個簡簡單單嘅故事，
俾大家笑下。

所以如果大家有笑過感動過，
咁我就目標達成啦～
當然，好歡迎大家留個言講下笑咗咩，
或者對呢個故嘅感受又得

呢個故其實不在計劃之中，
而之後如果有短故出，
好大可能都係出喺IG先，
所以歡迎大家一陣睇到最後，
Follow埋我ig就開心。

而我下一個故事呢，
都需要時間去準備下，
應該又要神隱一段時間，
希望過一排再見到大家，
為大家再送上精彩故事。

最後，多謝每一個睇到最後嘅讀者，
各位，字海中再見。

放低其他故嘅Link 俾新讀者慢慢追翻上個故
我放低link先 如果大家鍾意喺連登睇 起我底一樣搵到以前舊故㗎

【穿越/愛情】我同鍾意咗十一年嘅人表白，佢竟然跳海死咗
Penana：https://www.penana.com/story/63218
【寫實/愛情】（出咗實體書啦！）我專門幫人擺分手和頭酒
Penana：https://www.penana.com/story/66301
【科幻/懸疑】你以為Flycation呢件事真係咁簡單？
Penana：https://www.penana.com/story/76137
【初戀/愛情】《副校長發現我寫甜故，竟然送一段初戀俾我》
Penana：https://www.penana.com/article/635866
【暴走/搞笑】《求婚嗰日-我發現我女朋友鍾意食屎》
Penana：https://www.penana.com/story/90310
【人性/鬥智】《尖東遊戲//坐上尖沙咀開出嘅列車之後，我被送咗入一場死亡遊戲》（出咗實體書，可見於各大書局！）
Penana：https://www.penana.com/story/99588
【童年/二創】《我是出木杉，我要對大雄復仇》
Penana：https://www.penana.com/story/99588

最後留低埋樓主IG，大家有興趣可以去嗰邊催迫樓主加更，仲有得睇埋呢個故嘅「作者前言」同埋其他故事相關嘅嘢，IG限定㗎
IG : windblowssilently

默颺讀者交流TG group：https://t.me/+jD_eY63Yb5I0MmQ1

終於完故
做人最緊要有信念

多謝默巴陪我哋過新年

拜年拜到就嚟農曆二月

成個故都真係幾似賀歲片個feel，多謝樓主畀我哋嘅信念

終於完故，繼續支持樓主，期待你下一個故

諗返原來有啲位一早有伏線，例如點解主角無啦啦有瀉藥喺身，同埋比人嗌佢做光頭仔

我都多謝大家陪我

開心啊 無限新年

大家都要加油!!!

多謝連豬巴
我哋下個故見

Lm追晒所有故