其實愛情嘅嘢,如果淨係得個諗字,唔試下相處又邊度可能會成到事啊?
只不過,胡師傅又啱,怕羞,咁又點呢,就算我知道咗,都幫唔到我諗辦法解決佢。
就喺我東張西望,諗緊有咩辦法嘅時候,我突然喺人群之中搵到一線曙光。
「大隻佬,你望下嗰度!」我一手指向後面人群之中嘅十點鐘方向。
胡師傅回頭一望,臉上出現咗一個極度驚嚇嘅表情,連手上嘅啞鈴都「砰」一聲直接跌咗落地。
一刻嘅驚訝之後,胡師傅即刻擰翻過嚟,好緊張咁問我:「點解,點解佢會喺度㗎?」
胡師傅口中嘅「佢」,就係佢交友Apps入面傾咗三個月嘅運動女仔。
「可能係啊,不如你行過去同佢傾下計,關心下佢啦。」我見有機可乘,即刻出口術。
「我諗到啦!」胡師傅又大喝一聲,搞到我耳仔即刻塞咗,「我一於搶個頭炷香翻嚟,然後到時同佢相認,再將個許願機會送俾佢,咁咪得囉!」
望住胡師傅嘅鬥志比頭先更高,我開始覺得有啲唔對路。
雖然胡師傅個諗法好啱,但係絕對對我不利。
偏偏,我又完全諗唔到辦法點樣阻止到佢。
就喺一切進入咗瓶頸嘅時候,我眼角望到右邊嘅楊家朗已經進入咗面青口唇白嘅狀態,相信洪濤一樣嘅湧流已經去到佢嘅臨界點。
望住楊家朗呢個樣,一個惡計浮現喺我腦海之中。
我一邊諗,一邊回頭望清楚現場嘅環境。
嗯,睇嚟,呢個方法有用。
一個,可以一招內解決楊家朗同胡師傅,而且仲有可能幫到胡師傅出Pool嘅方法。
(故事待續)