[賀歲故]有咩癲得過年三十晚跌咗入搶頭炷香嘅輪迴

180 回覆
108 Like 3 Dislike
2023-02-01 01:35:50
阻人食糊燒⋯⋯
2023-02-01 10:07:38
自推一下, 今晚又出新Chapter
2023-02-01 10:32:40
cc
2023-02-01 12:02:10
2023-02-01 22:34:03
時間轉眼就過,廟祝已經出咗黃大仙廟,而距離搶頭炷香嘅時候已經不足十秒。

我見到胡師傅已經蓄勢待發,睇嚟佢打算用頭炷香嚟追女仔嘅計劃已經準備好。

只可惜,胡師傅對唔住,我絕對唔可以將頭炷香讓俾你。

不過,為咗補償你,我會幫你成功突破A0。

話口未完,距離敲鐘,仲有五秒。

呢個時候,我望向楊家朗,好認真咁叫咗佢一聲。

而楊家朗聽到我叫佢,抬起咗佢嗰塊忍屎忍到扭曲嘅臉,皺哂眉頭咁勉強講咗一句:「你……做…..咩……叫……我?」

「我想講……」我用真誠嘅眼神望住楊家朗,「我係真心支持香港運動員㗎!」

就喺楊家朗未及反應之際,我右手極速打咗落去佢嘅小腹。

呢一拳,就有如將裝滿一個浴缸嘅水嘅活塞一手拔走,令水「嘭嘭」聲咁流出嚟。

而我呢度所講「水」,相信大家都明白係啲咩。

除咗呢一拳之外,我同時將楊家朗一推令佢扒咗喺地下,令佢嘅屁股精準向住某個方向,然後順手將佢條褲一拉。
2023-02-01 22:34:32
「我要爆啦!」一時間,楊家朗再忍唔住,盡情咁嚟咗一個山洪暴發式嘅大解放。

一道朱古力噴泉,以拋物線向住我身後十點鐘方向直接噴出去!

「Oh Shit!」、
「屎啊!!!」、
「媽媽,個天有朱古力啊!」、
「我成身都係啊!」、
「救命…….(被噴中個口咩都講唔到)」

喺無數驚叫聲之中,「鐺」一聲,廟祝同時敲響鐘聲,我即刻無視身後一切咁向前跑。

而我眼角望到,胡師傅居然無向前衝,反而向住身後嘅重災區跑。

但係對於佢嘅行動,其實我一啲都唔覺得出奇,咁係因為呢啲都係我預算之中。

我知道,如果為胡師傅製造危機,佢未必會怯,所以就算楊家朗向前噴屎,我信胡師傅呢個運動怪人都會照衝過去。

所以唯一方法,就係威脅佢著重嘅嘢。

運動型女仔。

而最重要嘅係,我曾經聽人講過,愛情,從行動之中可以得到最好證明。

胡師傅一路以嚟都怕怕羞羞咁,即使內心再好身型再Fit,唔行動嘅話,始終都無可能可以同自己有興趣嘅人發展。

所以,我直接送個機會俾佢保護個女仔,話唔定係一個最好嘅方式去幫佢同個女仔破冰。

無論如何,楊家朗同胡師傅都俾我解決咗,今次頭炷香一定係我嘅!

點知就喺我準備將香插入咩都無嘅香爐,有兩枝香居然啱啱好快我一步同時插入香爐之中。

我望住呢兩枝突如其來嘅香,忍唔住呆咗。

雖然我好快重拾心情即刻睇準機會插入第六枝香,但係亦都忍唔住望下到底係邊兩個人搶咗我嘅頭炷香。

一望之下,不得了。

原來,今次兩個搶我頭炷香嘅都係女人。

而呢兩個插香嘅女人,絕對唔係碎料,甚至,比楊家朗更加出名。
2023-02-01 22:34:52
第一個,雖然又戴太陽眼鏡,又用頸巾包到實哂,但係因為佢有一個標誌性嘅地拖頭,加上佢一雙標誌性嘅白滑美腿,佢呢個咁出眾嘅人,我一眼就認出咗佢。

佢就係喺連登素有「港大白滑長腿美女」之稱,同時亦都俾傳媒稱為「政界殺人鯨」嘅葉蔣月琼。

作為議員嘅佢,向來以作風辛辣聞名,犀利事蹟包括喺立法會以一敵百,舌戰一眾議員都要堅持將小學音樂科考試增加至23條;

另外,佢又曾經以血肉之軀力抗麒麟,聽聞至此之後,麒麟就成為咗傳說中嘅生物,喺人間不再復見。

當然,講到佢最深入民心之處,當然係為咗振興旅遊業,提出要幫每一位去機場嘅年輕人「起機」,意思即係親力親為幫大家Check-in。

單單係一個性格硬朗嘅葉蔣月琼已經相當難搞,但係另一個對手亦都不遑多讓。

因為,另一個就係人稱「樂壇不死人」兼愛國歌手梁千嬋。

近年,佢靠多首愛國歌曲例如「原來國家很快樂」、「小區大灣」、「可惜我是關愛座」等等打入咗大灣區市場,而家已經成為深圳及珠海一帶巨星級嘅明星。

對住佢,我諗最難搞嘅地方係,如果我出手出得太明顯,到時好容易會俾啲娛樂新聞留意到,咁到時就大件事。

望住我呢兩個新嘅搶頭炷香對手,我唯有慢慢喺度盤算一下。
2023-02-01 22:35:19
而與此同時,我見到喺楊家朗噴到一地都係屎嘅亂局之中,胡師傅滿身都係啡色,但係另一隻手就拖住咗運動型女仔。

從佢哋兩個嘅動作,我大概估到應該係胡師傅奮力保護運動型女仔有功,而運動型女仔就帶雙眼都污糟哂嘅胡師傅去洗一洗面。

就咁睇,似乎事情都向咗好嘅方向發展吖。

正當我心中為胡師傅開心緊,我發現周圍突然冒出一片白光。

我當然知道,咁係因為我頭先插嘅第六枝香生效,而家,又係時候去見我老友。

「豈有此理!!!!」

黃大仙一見到我,怒氣匆匆咁一手拍冧咗麻雀枱,嚇到同枱嘅女媧同二郎神都呆咗。

而月老就細細聲問咗一句:「唔好意思,咁你頭先出銃俾我呢鋪應該點計呢?」

「我間廟俾人搞到一地都係屎,你仲好意思同我計番!」黃大仙咆哮一聲,嚇到其餘三個神仙唔敢出聲。

「黃大仙,牌品好即係人品好,稍安無燥。屎啫,有幾閒啫?邊個無呢?」我攤大手板咁講。

「我無。」女媧呢個時候舉高咗手,「女神係唔會痾屎㗎。」

「邊個問你啫,多事。」我睥咗女媧一眼,然後繼續同黃大仙講:「唔該你吖大仙,送我翻去跑多次。」
2023-02-01 22:35:49
黃大仙「伏」一聲企咗起身,一臉嚴厲咁望住我講:「年輕人,千奇唔好以為時光倒流樂趣無窮。天道循環,萬物皆有定理,逆時而行,必有其代價。」

「我知㗎啦,等價交換吖嘛。」我無啖好氣咁講。

「我派講求中庸之道,不強求,不執著,順其自然,方為中庸。你可曾想過,如今逆天而行,只不過係將自己綁於輪迴之中,再多嘗試,可能到頭來都係兩手空空呢?」黃大仙搖住頭對我苦苦勸勉。

「我讀得書少,唔識得咩中庸。我淨係知道,有啲嘢,既然仲有力氣就應該試落去。如果個個都中庸,個個都只係識得做到啱啱好,咁既然我想實現願望,就更應該比其他人付出更多努力!」我收起一直以嚟嘅嬉皮笑臉,改用好認真嘅表情望住黃大仙講。「所以,唔該你,幫我倒流時光,我要翻去搶、頭、炷、香!」

黃大仙望咗我一陣,呼出咗一口氣,然後點一點頭,慢慢舉起手打開掌心,將手中嘅八卦陣釋放咗出嚟。

就係咁,我又重新再一次翻咗去黃大仙廟。

時間,同樣係有十分鐘。

根據先前兩次經驗,我必須用三分鐘同楊家朗傾計同打好關係,然後胡師傅就唔洗傾,只要記得令佢發現運動型女仔在場,同埋撮合佢同運動型女仔就得。

所以,跟住落嚟,我將會有七分鐘時間,去搞掂葉蔣月琼同梁千嬋。

(故事待續)

2023-02-01 22:44:01
見到呢個4合1嘅名仲噁心過屎流成河
2023-02-02 06:40:45
睇嚟女媧娘娘上開連燈
2023-02-02 12:00:50
睇完呢個故之後要關注樓主嘅精神健康
2023-02-02 16:45:58
笑死
要唔要睇翻白滑長腿圖安慰心靈
2023-02-02 16:47:49
我要上半身夏蕙BB,下半身白滑長腿
2023-02-03 01:28:19
其實每個故都需要
2023-02-03 08:08:10
仲有你嘅肝臟健康
2023-02-03 23:12:47
肝早已爆
2023-02-03 23:13:10
論難搞程度,其實呢兩位女士都不遑多讓。

所以,我唔諗咁多,首先做翻好前兩次嘅嘢,輕鬆解決咗楊家朗同埋胡師傅嗰邊。

然後我同胡師傅講聲「唔好意思」,就攝咗去佢隔離個位,打算先向原來一直企喺佢身邊嘅葉蔣月琼埋手。

「Hello你好啊。」由於敵人嘅危險指數極高,所以我開口一刻都極為小心,以免對生命造成威脅。

葉蔣月琼聽到我叫佢,只係向我望咗一眼,然後又擰翻埋面,繼續望向前方。

嘩,我估唔到呢條女咁高傲,果然不愧為葉太。

但係為咗頭炷香我都無辦法,唯有再嗌多佢一次。

今次我再叫佢一次,佢終於擰咗個頭過嚟,然後微微拉低咗副太陽眼鏡望我一眼,然後又托翻副眼鏡上去,之後就講:「你知唔知道我係邊個?」

我呆咗一呆,然後點一點頭咁講:「當然知啦,你咪係葉蔣……」

我仲未講完,葉蔣月琼已經即刻插嘴講:「你知就好啦,我日理萬機,而家仲練緊一陣對傳媒發表嘅講話,唔該你有咩同翻我地區助理講啦。」

講完之後,我見到葉蔣月琼擰翻轉頭,望住佢手上面嗰張紙喺度念念有詞咁讀:「今年,我專登嚟到黃大仙廟為香港人祈福,希望香港風調雨順,國泰民安。我更希望市民多啲同我去講分享佢哋嘅需要,因為作為一個立法會議員,我嘅職責就係聽市民嘅聲音,然後帶入立法會……」

嘩,如果講大話會俾雷劈,咁我諗葉太呢一番講話,真係召喚十隻比卡超嚟都唔夠電。

首先,我唔明點解你一個人求嘅福要全香港人幫你受囉,香港人大個㗎喇,祈個福啫,洗唔洗你幫啊?

而且話唔定大家最大嘅願望係你離開立法會呢,你可唔可以代表我哋許埋呢個願啊?

其次,聽市民所需?明明聽嘅嗰個都係你啲地區助理,不如你派你個助理做你個位啦。
2023-02-03 23:13:26
曾經,香港有一個時代,議員會企喺市民身邊,同進同退,同笑同哭。

呢班議員,真係明白市民嘅需要,亦都真正聽到市民嘅願望。

但係,而家有啲議員,佢哋連區都唔敢落,偏偏又成日喺立法會度將「我聽到好多市民講」掛喺口邊。

諗到呢度,我諗我明白點解葉蔣月琼要用衫將自己包到實一實。

因為,佢根本就唔敢俾市民認得出佢。

一諗到呢樣嘢,我即刻望向黃大仙廟。

黃大仙。

嗯,呢個地方,歷史之中,唔簡單。

既然係咁,我知道我可以用咩方法對付葉蔣月琼喇。

「葉太。」我輕輕叫咗葉蔣月琼一聲。

葉蔣月琼好無耐性咁又擰咗個頭過嚟:「又咩事啊?我都話有咩事……」

佢未講完,今次到我插佢嘴:「你知唔知道我係邊個?」

「吓?」聽到葉蔣月琼把聲,我隔住佢副墨鏡都感受到佢鄙視緊我,「我點會知你係邊個?」

聽到呢個回答,我忍唔住揚起嘴角一笑:「唔知就好喇。」
2023-02-03 23:13:56
喺葉蔣月琼不明所以之際,我就喺人群之中大嗌一聲:「喂,你咪係葉蔣月琼葉太?」

本來都幾嘈雜嘅場面,因為我呢句說話而靜咗。

現場嘅大家其實各自各做緊唔同嘢,只不過而家全部都將目光集中哂嚟呢一邊。

而葉蔣月琼都好明顯感受到大家都注視緊自己,所以,佢都好似一尊石像咁定咗喺度。

「走啦,呢度唔歡迎你啊!」

一把雄壯嘅男聲,打破咗現場嘅安靜。

就係呢一聲叫聲之後,現場即刻爆起一重又一重嘅叫囂聲。

「大仙姓黃㗎!」、
「走啊,大仙都唔會理你啊!」、
「上香俾自己先啦!」……

眾怒難犯,我本來以為會嚇到葉蔣月琼,點知佢果然不愧為從政多年嘅政客,身上有具備作為政客最重要嘅身體部位,厚臉皮。

「大家靜一靜!」葉蔣月琼舉高手,一時間令在場鼓譟嘅群眾靜咗一靜。

「我覺得,我哋唔應該將政治帶到上香嘅層面。政治,係應該留喺立法會嘅,而家大家應該專心上香。」葉蔣月琼見大家都認得佢,索性除埋眼鏡咁講。

呢怡說話一出,在場嘅人即刻靜哂,而我個心都怯咗一怯,心諗大家唔係咁樣俾葉蔣月琼說服到下話。

「好!」一聲響亮嘅叫聲打破沉默,有一個睇落四十幾歲、有啤酒肚嘅男人舉起手發言,「既然要將政治留喺立法會,我哋就送葉太翻立法會!」

睇唔出呢個啤酒肚大叔居然孔武有力,一手就將葉蔣月琼抬起咗,然後其他人一呼百應,一齊好似運輸帶咁將葉蔣月琼傳走。

睇住大家同心協力嘅樣,我突然記翻起一啲從前嘅片段。

嗰段一齊呼叫,目標一致嘅時候,呢種我諗就係「獅子山精神」。

將政治留喺立法會?呢種講法,只係適合一啲唔關心,或者想逃避政治嘅人。

政治,從來都係生活嘅一部份,亦係每個人應該認識、思考同參與嘅事。

而作為政客,應該做嘅係提升大眾對政治嘅了解,而唔係叫市民遠離政治。
2023-02-03 23:14:46
學梁千嬋講,「帶旺廣東歌」唔係一個歌手可以做到。

「帶旺廣東歌」,首先需要嘅係大眾願意去支持。

所以,梁千嬋以為自己仲喺昔日嘅光輝年代就錯啦,因為,今日嘅香港人已經有得揀自己想聽嘅音樂類型。

而且最重要,係香港人有得揀自己想要嘅歌手,一啲真正有心為香港樂壇努力嘅歌手。

講起昔日嘅光輝年代,我望到梁千嬋一頭青色嘅頭髮。

青頭,係梁千嬋曾經嘅標誌,佢甚至講到大眾一講起青頭就會諗起佢。

而望住佢個青頭,再加上現場混亂嘅場景,我突然諗起一句說話。

而呢句說話,令我知道可以點樣對付梁千嬋。

由於「運送葉蔣月琼」行動依然進行中,唔少人都係喺度推擁緊,場面非常擠迫。

而唔好忘記,在場每個人手上都拎住咗幾枝香,所以啲人一邊推,一邊又拎住枝香揮下揮下,場面都幾混亂。

但係,我就係要借住呢種混亂,去達到我嘅目的。
2023-02-03 23:15:17
就喺梁千嬋專心眼望前方嘅時候,我將後排一個被人推撞緊嘅師奶嗰幾枝香稍為向前微微一按。

由於師奶努力避開緊人群,佢完全唔察覺自己手中嘅香已經掂住咗梁千嬋嘅青色頭髮。

不出幾秒,梁千嬋個頭已經開始傳出一陣燒焦味。

「千嬋!」我拍一拍佢膊頭。

「做咩啊光頭仔?」梁千嬋似乎有啲不滿我打擾到佢,用一個高姿態望住我。

「你……你個青頭著火啊,我建議你去廁所搞搞先。」我拎出手機俾張相佢睇,梁千嬋即刻嚇咗一跳,因為佢個頭後面已經燒出咗一個面積唔細嘅窿。

「點解會咁㗎!」梁千嬋大驚失色,諗都唔諗就即刻從隊列之中跑走咗。

望住佢嘅背影,我不期然諗起一句歌詞:「給我一團態火試煉我。」

好,如是者,葉蔣月琼同梁千嬋都解決咗。

跟住落嚟,喺敲鐘前嘅十秒,我亦都一如之前,拳打楊家朗,再用佢嘅「腹瀉噴泉」引走胡師傅。

目標完成,鐘聲一響,我立即拔腿狂奔。

今次,我一定一定要搶到頭炷香。

果然,我起步超快,左右都已經毫無對手。

眼見我準備將香插入香爐,我突然感到從後有一股力量衝過嚟,一下將我撞開。

我跌開幾步,回望過去,已經有一個人喺香爐前面,輕輕鬆鬆插入咗佢枝香。

一見到佢以一隻手撐地,一隻腳踢出仿如黃狗射尿嘅姿勢,我就知道自己頭先係俾佢一腳踢走咗。

能夠有咁出眾嘅腳法,咁強力嘅臂彎,我一眼就認得出,呢個人,就係屯門公園舞林之王,開心伯。

(故事待續)

2023-02-04 00:26:10
D對手一個比一個勁
2023-02-04 07:35:53
Happy伯都嚟埋,係咪要出動屯門娜娜
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞