[賀歲故]有咩癲得過年三十晚跌咗入搶頭炷香嘅輪迴
黑犬風易
180
回覆
108 Like
3 Dislike
第 1 頁
第 2 頁
第 3 頁
第 4 頁
第 5 頁
第 6 頁
第 7 頁
第 8 頁
寧靜海
2023-02-04 10:42:04
永世都搶唔到
Cavani
2023-02-04 10:55:58
Lm
花生友01
2023-02-04 11:10:46
happy伯嘅心願係咪同娜娜結婚
痴足火腩飯
2023-02-04 11:18:27
男主搶到頭炷香先, 定黃大仙食到糊先
你呀媽個波罩你呀
2023-02-04 15:19:26
Push!
黑犬風易
2023-02-04 23:55:41
笑死 今次真係要唱阿牛
大西北姿粉客
2023-02-05 03:48:16
開心伯
黑犬風易
2023-02-05 22:34:44
準確嘅第六枝香,令我成功再一次進入光芒之中,轉眼又去到熟悉嘅虛空入面。
我本來以為黃大仙見到我又會鬧我一餐,點知,今次佢竟然好冷靜咁坐定定喺度等我。
當然,其實我麻煩咗佢咁多次都有啲唔好意思,所以就粒聲唔出咁坐埋去佢隔離,求其講咗句:「唔洗打牌咩?」
「我叫咗車公幫我打住先,佢最叻用風車吹走哂人哋啲運,有佢打應該一夫當關,問題不大。」黃大仙嘅表情,令人睇唔出佢呢刻到底係咩心情。
正當我仲喺度猜度緊嘅時候,黃大仙反而自己開口講:「剛才你走咗之後,我轉程去咗地府一趟睇你嘅生死冊,了解下你到底發生過什麼事。」
「咁……即係你咩都知道哂。」我總算係恍然大悟。
「嗯,我明白你嘅執著,亦都欣賞你嘅堅持,所以我先會心平氣和咁等你嚟。只不過,我都有個壞消息要話你知。」黃大仙用手執起長鬚,「因為你已經時光倒流幾次,玉皇大帝覺得成個穿越界俾你搞禍哂,再俾你咁樣穿越只會玩壞個制度,所以佢下令你只可以穿越埋今次,下不為例。」
聽完之後,我不以為然咁笑咗一笑:「無問題,我本身都只係打算穿越多一次。」
「此話何解?」黃大仙好奇一問。
「我第一次搶頭炷香嘅時候,就係因為只係搶到第六,所以先會見到你。換言之,我嘅潛在對手其實應該有五位。數下手指,我之前已經解決咗楊家朗、胡師傳、葉蔣月琼同梁千嬋,咁即係話,開心伯應該就係我最後一個要對付嘅人。贏到佢,我應該就可以搶到頭炷香。」我信心十足咁講。
黑犬風易
2023-02-05 22:35:00
「擁有信心,當然係好,只不過唔好怪我嘮叨提醒,即使上到頭炷香,亦不一定代表願望達成。你苦苦執著,只怕到頭來依然係一場空,失望而回啊。」黃大仙拍一拍我膊頭。
「我唔怕失望,反而怕自己未試到盡就放棄。」我眼神堅定咁講。
「既然你心意已決,老夫亦不必多言。」黃大仙點一點頭企起身,「祝願你馬到功成。」
「多謝大仙。」我向黃大仙拱一拱手。
呢個時候,黃大仙細細聲挨埋嚟去我耳邊講:「不過,今次搞還搞,可唔可以唔好將啲屎噴得太誇張呢?前兩次噴到連我個像塊面都有,咁真係唔太俾面喎。」
「得,無問題,今次我會將個炮台較低少少。」我點一點頭,然後就喺黃大仙嘅幫手之下,再一次,亦都係最後一次翻到去黃大仙廟。
23:50:03。
人潮湧湧。
Check list:楊家朗Red Bull、胡師傅發現運動型女仔、群眾抬走葉蔣月琼、用香燒著梁千嬋頭髮。
行雲流水式完成任務嘅一刻,時間嚟到23:55:03。
距離搶頭炷香,仲有不足五分鐘。
而我,準備接近我最後一個對手,開心伯。
開心伯,聞名於屯門公園,除咗出名出手闊綽豪爽派錢俾同佢跳貼身舞嘅娜娜之外,另一絕學就係非一般人可以跳得出嘅「黃狗射尿式開心舞」。
黑犬風易
2023-02-05 22:35:16
「開心伯!」
我殷勤咁叫咗開心伯一聲,我見開心伯除低咗耳筒,向我望咗過嚟。
「你老人家點解會嚟爭上頭炷香嘅?你想許咩願啊?」我決定單刀直入。
「我想要……鏈。」開心伯講嘢有少少口音,再加上班群眾運走緊葉蔣月琼,所以我唔太聽得清佢講咩。
但係我聽到佢話想要條鏈都好合理嘅,話哂近年佢都俾咗唔少錢屯門娜娜,係時候要幫補下自己。
於是我從頸上面除咗自己條銀鏈落嚟,呢條鏈係我阿媽話咩保平安買嘅,雖然唔係咩貴嘢,不過亦都值幾百蚊,我將佢遞俾開心伯講:「嗱,你要鏈,我俾你吖,無謂咁辛苦喺度迫啦,一陣啲人好狼死咁跑,到時撞傷你你就跳唔到開心舞㗎喇。」
開心伯搖一搖頭,將條鏈推翻俾我,再講:「我要『搓鏈』。」
「條鏈我送俾你㗎,你搓又好,戴又好,攞嚟通渠都好,你拎咗條鏈翻屋企慢慢玩啦!」我不明所以咁答佢。
開心伯「唉」咗一聲,然後將佢本身睇緊嘅手機遞埋我面前。
我一睇見到Netflix嘅畫面,終於明白開心伯到底講緊啲咩。
原來,佢想要嘅「搓鏈」,係「初戀」,First Love。
我不期然諗,唔通係因為最近佢嘅舞伴娜娜嫁咗人,所以開心伯覺得空虛寂寞凍,於是先會諗到嚟呢度再求個初戀,等佢可以搵到另一個人陪佢跳開心舞?
當我仲喺度假設嘅時候,開心伯又開聲:「唉,呢套初戀雖然老套,但係真係夭心夭肺,每次聽親首主題曲,我都忍唔住諗翻起我初戀,即係我老婆啊……」
黑犬風易
2023-02-05 22:35:30
咦,咪住先,乜開心伯有老婆嘅咩?
我仲驚訝緊嘅時候,開心伯自己就開始講嘢:「我老婆呢,十幾年前過咗身喇。當年係1999,佢走之前呢,我仲趁佢有精神,同佢去咗一次日本。嗰時日本呢,周街都係播住First Love呢首歌,聽講話係好hit㗎喎。嗰陣時我哋去到邊都聽到呢首歌,明明唔知佢唱咩,但係我哋最後聽到識得跟住佢唱。估唔到咁多年之後,居然有套劇可以聽得翻呢首歌。唉,搞到我,次次套劇一出首歌就會諗翻起我老婆,然後就忍唔住喊,真係醜死怪……」
聽住開心伯咁講,我感覺到自己有啲心悒,估唔到原來開心伯背後有個咁嘅故事。
如果要大膽推測,話唔定佢之所以會亂咁喺女人身上用錢同消遣跳舞,可能都係想幫自己忘記喪妻嘅事。
難過,從來都唔係一種容易放低嘅情緒。
所以好多人都會選擇用盡各種方法,務求令自己可以逃避佢,亦都令自己嘅內心舒服少少。
「所以呢,我本身都諗住,搶到頭炷香之後,願望就係可以快啲遇到翻我『初戀』。」開心伯講完之後,無奈咁搖一搖頭,就將手機收好,準備迎接頭炷香嘅賽跑。
而我因為見廟祝已經走咗出嚟,所以都知道係時候要先去處理咗楊家朗嘅「噴射裝置」先,於是就決定先離開開心伯。
反正,我已經諗好應對開心伯嘅方法。
黑犬風易
2023-02-05 22:35:49
一如之前,楊家朗肚痛,我一拳打開咗佢嘅「噴射器」令佢盡情解放。
當然,今次我有嘗試將佢條腰壓低少少,令佢唔好再噴到黃大仙個像。
「鐺」一聲,起跑開始。
胡師傅跑翻轉頭,即刻跑去保護運動型女仔。
然後,跑道上,只係剩翻我同開心伯領先。
而開心伯憑住佢精練舞步,強而有力嘅腳瓜大步踏前,稍為領先我半個手位。
而家距離香爐,只有十步之遙。
就係呢一刻,我深呼吸一口氣,一邊繼續跑,一邊大聲唱出:
「You’re always gonna be my love。姨住卡,打喱卡多麻他,蓋移呢鍋切爹磨,I’ll remember to love you taught my how……」
無錯,多謝張敬軒嘅粵語拼音版,令我學識咗唱「First Love」。
就喺我字正腔圓咁唱出「First Love」嘅時候,一如我預期之中,開心伯已經企喺原地雙眼流淚。
就喺開心伯傷心倒地之際,我終於一個人跑到香爐前面。
而我手上枝香,亦都終於成功成為兔年嘅頭炷香,順順利利咁插入香爐。
黑犬風易
2023-02-05 22:36:05
就喺我準備立即祈禱許願之際,我聽身後傳嚟開心伯嘅叫聲:「老婆,我好掛住你啊!」
我回頭一望,我見到開心伯老淚縱橫,甚至跪低咗喺地下大聲咁嗌。
望到佢呢個樣,我突然諗翻起頭先佢講過嘅一句說話:「搶到頭炷香之後,願望就係可以快啲遇到翻我『初戀』。」
頭先因為時間緊迫,其實我無消化過呢句說話。
但而家望到開心伯傷心欲絕,我再細心一諗,我先明白開心伯所指嘅「遇翻初戀」,其實就係想自己快啲死。
我望住自己嗰枝已經插好嘅頭炷香,再望向開心伯。
不過片刻,我內心已經做好咗一個決定。
「開心伯!過嚟啊!」我大聲叫開心伯,揮手叫佢行過嚟。
開心伯一邊抹住眼淚,一邊行到嚟我面前:「咩事啊光頭仔?我好掛住我老婆啊!」
「我個頭炷香嘅願仲未許,俾你許啦。」我對開心伯笑咗一笑,喺佢仲未有反應之前再補多一句,「黃大仙份人好小氣,如果個願望太消極佢唔會聽㗎。所以,你記得許一個連你老婆都會鍾意嘅願望。」
開心伯難以置信咁望住我,好似唔信我將頭炷香嘅希望俾咗佢。
只見佢兩眼通紅,低頭諗咗一陣之後伸出雙手捉住咗我隻手同埋我插上嘅頭炷香,然後一邊流住眼淚,一邊慢慢講:「我嘅願望係,每日都可以繼續開心,繼續跳舞。」
黑犬風易
2023-02-05 22:36:29
望住呢個畫面,我不期然都感動到流咗兩滴眼淚。
點知就係呢個時候,我感受到自己嘅手機震起上嚟。
我一睇電話號碼,心知不妙咁即刻接聽。
「陳生,曹小姐送咗入ICU,你最好快啲過一過嚟醫院。」
電話嗰邊匆匆忙忙交代咗呢一句,然後就已經收咗線。
而拎住電話嘅我,亦都二話不說,立即想起步離開黃大仙廟。
點知我先行出一步,我就發現自己郁唔到,而且全間廟內突然所有人都唔見哂。
一把聲音,喺我身後傳起:「萬法自然,報應早到晚到,我都決定唔到。所以,可惜嘅係,此刻就係你必須接受後果嘅時候。」
(故事待續)
大西北姿粉客
2023-02-05 23:28:17
係咪男主角女朋友?
黑犬風易
2023-02-06 15:43:54
下回會分解
比次機會啊!
2023-02-07 12:19:31
說好的下回呢?
黃大仙又出嚟搞事?
黑犬風易
2023-02-07 18:16:14
隔日更新
今晚就知
矢久保美緒
2023-02-07 21:36:46
如果每個做第6都想時光倒流去搶頭炷香
黑犬風易
2023-02-08 00:10:01
咁就好玩
黑犬風易
2023-02-08 00:10:17
我轉身一望,毫不意外咁見到黃大仙。
「有咩報應遲下先嚟啦,我趕時間啊。」我緊張咁講,但係成個身依然係郁都郁唔到。
「我之前都提及過,順其自然,乃道之本意。時光倒流既逆天而行,違反『無為』之道,最後必起波瀾。波瀾已至,已無推卸可選,所以,唯有請你順其自然咁接受啦。」黃大仙表示歉意咁向我一拱手,然後就消失咗喺光芒之中。
「喂喂喂,俾次機會吖,大仙……」而我一邊大嗌,一邊就被呢束光包圍咗,準備迎接未知嘅報應……
光芒退去,我發現我依然喺黃大仙廟內嘅香爐,唔似之前時光倒流咁會去咗黃大仙廟外。
我反而發現廟內人人排隊有致,本來嘅爭先恐後、打哂蛇餅嘅場面已經無哂。
而最特別嘅係,我望到本來漆黑嘅夜空,呢一刻竟然有少少晨光。
我心知不妙,拎起手機一睇,然後即刻嚇到心震。
因為我見到呢刻嘅時間,居然係「04:00:23」。
四個鐘,我嘅時間白白過咗四個鐘。
「四」,我即刻諗到係因為我自己時光倒流咗四次,所以每次倒數嘅代價都係一個鐘。
我每次倒數十分鐘,黃大仙居然收我六倍利息,簡直就係比大耳窿更過份。
但係而家唔借都借咗,我可以做嘅,就係第一時間趕去醫院先。
黑犬風易
2023-02-08 00:12:07
於是,我衝過黃大仙廟內嘅重重人群,直接走咗出去截的士。
好唔容易上到的士之後,我講低咗要去嘅醫院名,然後呼出咗長長一口氣。
因為之前時光倒流每次都忙到不得了,又號召群眾又噴屎又唱歌,所以呢刻坐低咗,我先終於有一種稍為放鬆嘅感覺。
人一放鬆,大腦好自然就會諗翻起重要嘅事。
而我諗起嘅,當然係曹嘉盈,亦都即係我女朋友。
佢有啲特別,因為,佢係一個有大腸癌三期嘅病人。
呢個病,大概係喺我同佢拍拖一年之後出現嘅。
佢當時因為有一段長時間便秘,仲成日俾我笑佢唔食菜搞到去唔到廁所,於是就去睇醫生。
點知慢慢檢查,居然發現佢有大腸癌。
而為咗令佢可以順利排到便,醫生用咗好多方法幫佢,而作為佢身邊人,我嘅生活入面亦都多咗好多新習慣,例如陪佢複診,見佢嘔嘅處理步驟,仲有隨身幫佢帶藥……
「B,我想食炸雞啊!」嘉盈扁哂嘴講。
「唔得啊,呢啲咁難消化,你實便秘。」我堅決咁搖頭。
「你有帶瀉藥㗎嘛!我已經兩個月無食過炸雞喇!」嘉盈眼紅紅咁講。
「乖啦,為身體好,最多我陪你一齊唔食。咁喇,如果你戒炸雞,我直頭戒哂所有雞都唔食,咁算公平啦。」我拍一拍心口講,其實我要阻止佢,係因為我知佢每次用瀉藥排便嘅過程都好辛苦。
每次見到佢去廁所之後個樣,我都會心痛。
「咁偉大?」聽到我嘅提議嘉盈笑咗一笑,「咪住先,你咁鍾意食雞蛋,我先唔信你啊!」
我一本正經咁答:「嗱,咁就要界定下咩係雞先喇!從哲學上嚟講呢,……」
大腸癌,最直接影響嘅當然係食嘢。
黑犬風易
2023-02-08 00:12:52
而可惜嘅,嘉盈本身係一個好鍾意食嘢嘅人,蔬菜另計。
所以每次拍拖行程去邊其實對佢嚟講係完全唔重要,最緊要就係搵到一間好味嘅餐廳。
我仲記得,喺拍拖嘅初期,我就曾經因為無好好搵餐廳而俾佢訓話過。
「咁我諗住我哋去尖沙咀,點都會有好餐廳㗎嘛。」當時拍拖經驗尚淺嘅我企喺街頭,有啲唔好意思咁摸住個頭,同時另一隻手不斷喺Openrice搵餐廳希望可以補鑊。
「個問題唔係有冇好餐廳,而係你有冇著緊我鍾意嘅嘢,然後為我去搵啊。」嘉盈扁哂嘴咁講。
「咁我梗係著緊你啦!」唔太懂得愛情嘅我第一時間攬實咗嘉盈,希望可以補數。
「愛情,從行動之中可以得到最好證明。你自己反省下啦,今晚嗰餐罰你找數!」嘉盈用手指狂督我心口,但係,佢亦都無離開我嘅擁抱。
「點止今晚嗰餐,直頭今晚我都可以肉債肉償補數㗎!」一見嘉盈語氣鬆翻,我又回復翻無聊嘅常態。
嘉盈聽到我咁講,立即狡猾一笑,然後講:「係肉償又好啊,我要龍蝦肉、長腳蟹肉……」
愛情路上,嘉盈就好似一位導師,慢慢教識我點樣去愛人。
我慢慢從一個粗心大意嘅男仔,變成一個識得計劃行程,睇Openrice唔止睇一個留言嘅男朋友。
黑犬風易
2023-02-08 00:13:17
我承認,喺愛情入面,男仔通常都係需要學習去明白對方嘅一個,而好彩嘅係,嘉盈係一個好有耐性嘅導師。
可惜嘅係,當我開始學識點樣做好一個男朋友,佢就開始患病。
呢個病影響食嘢,咁就自然影響精神。
嘉盈喺半年之間,已經因病而瘦咗好多,終日臥病在床。
而佢最有精神、隻眼瞪得最大嘅時候,就係我陪佢一齊追劇嘅時候。
「喂,唱First Love俾我聽。」嘉盈一邊睇住Netflix,一邊因為套劇而感動到喊哂咁講。
見佢咁感動,我唯有立即照做開口唱歌:「愛戀沒經驗,今天初發現…….」
「呢首咩嚟㗎?」嘉盈一臉質疑。
「《初戀》囉,林志美喎,好出名㗎喎,《破壞之王》都有喎!」我理所當然咁答。
「邊個要林志美啫?我要宇多田光啊!」嘉盈眉頭一皺。
「日文喎嘉盈姐!點唱啊?」我無奈咁講。
嘉盈拎起Ipad,轉咗去張敬軒演唱會畫面,然後講:「人哋張敬軒咪整咗個廣東話拼音版囉,你照學咪得囉。嗱,逐句嚟……」
好彩嘉盈本身係一個樂觀嘅人,所以即使病咗,但係笑容依然不時掛喺佢嘅臉上。
有時候,反而係佢去鼓勵翻我要振作。
黑犬風易
2023-02-08 00:13:46
但係講到佢最傷心難過嘅時刻,咁就一定係化療佢要將所有頭髮剃哂嘅時候。
「我都唔明,好地地一把頭髮,點解要染到五顏六色整傷佢,如果俾我見到啲青色螢光黃色頭髮,我一定一把火燒咗佢!」嘉盈一邊講,一邊好唔捨得自己一頭保護得好好嘅烏黑頭髮。
正當佢好擔心要剃頭嘅時候,我一手就拎起咗剃髮器,然後粒聲唔出就剃哂自己啲頭髮。
嘉盈望到我轉眼間變咗光頭,成個樣都呆哂。
而我就笑住對佢講:「嗱,你都係驚剃頭唔靚啫。而家我都剃咗,我哋一齊唔靚,打和喇,係咪無咁驚呢?」
「但係我見到你個樣,真係好樣衰喎,我而家仲驚啊。」嘉盈個樣比之前更不情願。
「喂,唔好咁啦,我本身係想安撫你㗎,而家……咁…….」我發現自己呢個安慰行動好似有啲過咗火,但而家後悔又太遲,一時間尷尬到出唔到聲。
望到我嘅尷尬樣,嘉盈總算破涕為笑,而我,亦都跟住佢一齊笑咗聲。
剃頭之後,我哋一齊影咗一張光頭合照,而呢張相,放咗喺我銀包入面。
相當中嘅我哋,雖然面對緊好大嘅逆境,只不過,當時我哋依然笑得好開心。
我哋之所以有呢份樂觀,好大可能係因為,嘉盈成日都講,做人最緊要有信念。
只要有信念,就可以令自己相信一定會好翻。
就因為佢「信念」呢兩個字,所以我就無同佢講之下嚟咗搶頭炷香。
雖然其實我同佢本身都無信咩宗教,但係我只係想藉住搶到頭炷香呢件事去話俾嘉盈知,有信念,真係咩都可以做到。
想當初,嘉盈令我進步到成為今日呢一個識得拍拖嘅男朋友;今日,我都想佢可以有大把時間去享受翻佢對我嘅訓練成果。
第 1 頁
第 2 頁
第 3 頁
第 4 頁
第 5 頁
第 6 頁
第 7 頁
第 8 頁
吹水台
自選台
熱 門
最 新
手機台
時事台
政事台
World
體育台
娛樂台
動漫台
Apps台
遊戲台
影視台
講故台
健康台
感情台
家庭台
潮流台
美容台
上班台
財經台
房屋台
飲食台
旅遊台
學術台
校園台
汽車台
音樂台
創意台
硬件台
電器台
攝影台
玩具台
寵物台
軟件台
活動台
電訊台
直播台
站務台
黑 洞