《正義迴廊》討論區（4）已過1600萬票房

公仔生猛
https://zh-hk.facebook.com/2014mangaworld/

《正義迴廊》
玫瑰：睇《正義迴廊》，見到香港人貪心，想兩邊盡舐嘅民族性。又玩亞視「紀實」奇案，又要深度法庭片，結果兩頭唔到岸，觀後感極唔暢快。
戲內律師有種話人未審先判，但其實電影一開始已經「人格謀殺」緊大角咀肢解父母案個犯，唔止事先鋪陳犯案動機，而且大力強調主角嘅鹹片試鏡經驗，參與素人演出扮希特拉呢啲細節，作大肆醜化，兼重複放大，無非都係師奶上身，想大家未上庭先公審。既然都唔撚想紀實，何苦要揾真實奇案講故事？當電影只係得個俾你哋玩到醜陋猥褻，動機平面，難以移情嘅濕鳩兇手，觀眾如我對「奇案」嘅案情如何，其實早就失去興趣。
呢單案又係咪適合做法庭片？兇手上庭前經已認罪自白，案情大致清晰，庭上已無真正意義嘅大是大非，大篇幅關注嘅暗瘡幫兇有冇定罪，成功贏得觀眾嘅漠不關心。律師陪審團各行其是，陪審團典型小市民有港台FEEL，律師就非常TVB《壹號皇庭》，人人鳩噏二四六完全講唔出咩大道理，「踎低噴飯」做自己嘅林海峰就尤其難睇。法庭上所有事件彷如流水帳，即使流水帳呢個設計有批判性，想講道理，但觀眾已無奈成為場邊鳩坐等收工嘅法庭書記，唔知聽唔聽得入耳。
此片最突兀處，莫過於搵個「未來警察」返2013年跪頸「I can't breathe」博取市民罵聲，政治媚俗來講手段唔高，除咗黃衛兵之外諗唔到咩人見到會開心。令人不齒嘅係，如果你夠膽坐時光機批評「未來警察」，點解唔講下「未來法庭」？戲內行禮如儀嘅法庭，仲有陪審團㗎，有票㗎，法官莊重，律師「西化」，除咗區徽，一切依「舊」。2022年都仲喺銀幕上感受到呢股「英式司法」嘅餘波，前／現「司法迷信」信徒見到，大概會春心蕩漾。
法庭片嚟講，想睇毒撚肥仔法庭翻身，Clint Eastwood 早幾年套《Richard Jewell》無得輸；至於陪審團大戰，始終要J返《12 Angry Men》，簡約設計拳拳到肉，直擊制度嘅精神核心。未睇過嘅介紹返，希望中和到睇完《正義迴廊》嘅感受。
玫瑰影評