[校園/愛情/勵志]中六個年 我鍾意左叫我起身個女仔(重修版)

我不想知道太多(五)
嗰日之後我都冇放棄，繼續諗、繼續搵。

講咁就講，但事實上我咩都諗唔到，咩都搵唔到。

今日係聖誕聯歡會，但我遲咗起身。

我換校服，將封信塞落褲袋就直接衝咗返去，但趕到返去已經十一點幾。

我一推開班房門，就見到班房中間有幾張空嘅長枱，而其他人就用櫈貼住泊咗埋牆嘅枱圍咗個正方形，感覺唔係好對路。

「喂，啊武你返嚟嗱？」班主任企咗喺門邊。

「係呀。」我指住啲長枱：「去到咩階段啊？」

冇嘢食唔緊要，冇得玩啲戇鳩Party Game都唔緊要，冇錯過交換禮物嗰Part就得。

「而家係咪交換禮物？」我問佢。

「係啊，你今年有帶禮物？」佢上下打量住我：「你應該知火機唔可以拎出嚟抽架嘛？」

「唔係啊，我今年真係有帶。」我喺褲袋拎咗封信出嚟：「係佢。」

「一封信？」佢眼裡帶住強烈嘅疑惑：「最後一年唔建議拎啲垃圾出嚟。」

「你又知係垃圾？」我決定大鳩佢。

因為佢唔可以開嚟睇，所以就算裡面放廢紙，佢都吹我唔脹。

「咁你拎嚟啦。」佢伸出右手。

我將封信交比佢，佢喺封書上面黐上一張寫住「30」嘅貼紙之後就將封信放咗喺枱面，而我都搵咗個位坐低。

雖然我唔知裡面寫咩，但我估龍哥都係想啊晴抽到封信，然而…

交換禮物係順住禮物嘅編號抽主人。

由第一份開始抽，而我嗰份係第三份、亦係最後一份。

啊晴要前二十九份都抽唔中佢，先會拎到我封信。

我用手機撳咗撳，好快就計到呢單嘢嘅機率係幾多。

一除三十，即係3.3%。

3.3%即係有幾難？Condom避孕喺正確使用嘅情況下，失敗嘅機率係2-5%。

基本上係…

無可能發生。

果然不出我所料，第五份禮物就抽咗比啊晴，我第十份禮物就抽咗比我。

佢冇抽中我嗰份，但係…

我抽中咗佢嗰份。

呢個都唔係重點，重點係…

佢嗰份都係一封信。

我收到封信之後，坐喺我對面嘅啊晴拎起擺喺教師枱上面嘅咪：「返到去先開。」

我不想知道太多(六)
返到去先開？入面又寫咗啲咩啊？

過咗一陣，所有禮物都抽曬出去，我封信落入一個完全唔關事嘅女仔手中。

「抽完禮物啦，大家可以走啦！」班主任宣佈：「放完假返嚟返多一日就Study leave啦！」

我坐喺原位，等拎咗我封信個女仔走我先走。

嗰個女仔喺我身邊走過，封信就比佢順手揼咗落垃圾桶。

睇嚟呢單嘢真係會變不解之謎，最後希望都比人揼咗落垃圾桶。

我嘆咗啖氣，將封信收落褲袋就行咗出去，臨走回頭望咗一眼，啊晴仲未走。

但係咁又點，唔通我喺垃圾桶執返封信出嚟比佢咩？咁咪即係自爆。

我都理唔到咁多，帶住佢封信衝咗返屋企。

我坐喺電腦枱前面拆開封信，但係…

裡面得兩張白紙。

我疑惑咁來回檢查呢張紙嘅兩面，但係無論如何都睇唔到有咩端倪。

我望住呢一張白紙，諗起我嗰封信。

我嗰封信裡面都係得白紙一張，因為用咗…

隱形筆。

等陣，唔通佢都係用隱形筆寫？

我衝落樓買咗枝隱形筆，返上去就即刻用嗰枝燈仔照住張紙。

「橋唔怕舊，最緊要受」呢句嘢果然冇錯，佢真係用咗隱形筆嚟寫。

我開始由上而下、由左至右咁慢慢郁枝燈仔同睇封信。

「致：啊武

你可以睇到呢封信，即係代表你抽中咗我嘅禮物，而你都發現咗呢封信係用隱形筆寫。

既然你都睇到，咁我希望你會睇曬佢。

啊武，雖然你只係一個睡魔、酒鬼，但係有你陪住嘅時候，就算你只係瞓喺我隔離，我都會覺得好開心。

我都唔知點解，但我嘅直覺…又或者係其他因素話比我聽，你就係啱嘅人。

雖然你矮、樣衰、窮、成績差仲要傻更更咁，但係我知道你係一個細心嘅大暖男。

你成日問我點解鍾意你，我真係答唔到你，因為我覺得愛唔係講表面，亦唔係講內在，而係兩個人之間嘅化學作用。

當時我其實好想同你解釋，但我真係講唔出口，因為我驚你接受唔到。

我不想知道太多(七)
雖然佢跟住落嚟要講嘅嘢我有可能已經知道，但唔知點解我都係好緊張，調整咗一陣先集中到精神睇落去。

「我唔知你有冇留意，我從來冇提及過我啊爸。

你嗰次送我返屋企係打比我啊媽，仲有你嚟我屋企嘅時候我有同你講過我啊媽瞓上床，而我瞓下床。

你都知我咁大個女冇可能同啊爸一齊瞓，所以…」

佢冇寫出嚟，但我已經知道咁樣代表咩。

我捽咗捽眼，繼續睇落去。

「我啊媽幾十歲人，身體又唔好，搵返嚟根本唔多，又唔肯拎綜援咩嗰啲，話唔想要政府養。

嗰時我唔識諗，淨係想搵錢返嚟，就走咗去做PTGF。

雖然錢係搵到，但係而家諗返都覺得嗰段真係黑歷史。

後來我識到個男仔，佢話唔在意我以前係點，只係想同我一齊。

講就講得好聽，但我發現到最後佢都只係當咗我係PTGF，甚至只係一隻雞。

我同佢分手之後，就做咗你嘅叫床專員。

因為你生得好似佢，而我當時又未放低，所以我當咗你係佢咁對你好。

你記唔記得我同你去完酒吧之後，我有好輕描淡寫咁同你講過我當咗你係我前仔，而呢件事係真架。」

估唔到，嗰一句好似講笑嘅嘢竟然係真架。

我繼續睇落去，終於嚟到我最想知嘅部分。

「而你問我點解要扮醉嘅時候我冇答你，因為當時我扮醉…

其實係當咗你係我前仔。

我同你一齊嗰日啊澄過嚟講咗幾句，我知道佢好有可能係鳩吹，但我諗返起以前個男仔點呃我，加埋你運動會嗰日同佢一齊返，我先會信曬。

我見你瞓著咗，諗住唔理你，但我發現我根本做唔做。

盒飯同枝哮喘藥都係我比你，但係我唔想認，因為我唔想輸比你，或者更準確啲嚟講，係對佢嘅放唔低。

我以為，我鍾意嘅係佢，但去到呢一刻我先發現…

我唔係。」

我不想知道太多(八)
我繼續聽你鳩吹，我唔信。

「我鍾意嘅唔係邊個，而係啊武你。

我只不過喺到同自己鬥氣，因為我每一刻都想搵你，但我又唔知應該要點同你講，都唔知點樣面對你。

所以，我決定將呢一切交比緣份。

所以，我寫低咗呢封信。

如果你睇到呢到，我想講最後一句嘢。

我好掛住你，你返嚟啦好冇啊？」

睇完呢封信，我陷入沉思，同時開始腦閉塞。

所以…

我決定打比龍哥。

「喂，龍哥？」

「做咩啊武仔？」佢背景有車聲，應該開緊工。

「唔會阻住你啊嘛？」

「唔會，咩事啊？」

「我啱啱睇咗啊晴比我嘅信，我應該點做？」

「佢用咩寫嗰封信？」

「筆囉，咩啊？」

「係咪隱形筆？」

「係呀，你點知架？」

「呢啲老橋，用到爛曬啦。」

「好似又係，咁所以我應該點？」

「咁你點睇呢封信？」

「用嗰枝燈仔囉。」

都唔知佢今日做咩，係咁問埋啲戇鳩問題。

「你都識講啦，你仲唔知你內心想點咩？」

「咁人哋比信我，我禮貌上都係要睇架，有咩特別？」

「真係同你講都蹝鳩氣。」

「咁所以要點啫？」

「你係咪聖誕假之後就Last Day啊？」

「係啊，做咩？」

「乜鳩都唔好諗，等到嗰日就得架喇。」佢開始有啲躁。

「咁點得架？」

「得架喇。」

「唔得。」

「屌係老母成日諗諗諗，都唔知你諗乜撚嘢，個世界冇咁撚多嘢比你諗架大佬！」

「但係…」

未等我講落去，佢就打斷咗我。

「食屎啦你！」

講完，佢就Cut咗線。

我聽得出佢好撚忟，所以都冇再打返去追問。

比佢咁屌完一輪，我真係有努力去抑制自己諗嘢，但係我都係幻想咗好多畫面出嚟。

雖然畫面好多，但係所有畫面，冇一個係我同啊晴同框，因為我一定唔會同佢一齊返。

既然我咁肯定，我決定賭返鋪大嘅。

我拎起佢書封裡面其中一張紙，然後用筆大大隻字寫咗一句嘢。

「回覆

我同返你一齊嘅話

我就奶糖奶到糖尿病！」

不過，到底我會唔會炒車，真係到時先知。

結局篇-LastDay
我就咁打下機又一日，寫下嘢又一日，個聖誕假就咁過曬，嚟到Last Day呢個大日子。

我將兩張紙入返落書封封，然後將佢帶埋返學。

因為係Last Day，所以老師們都唔想再Chur啲學生，基本上玩下玩下就到放學。

放學之後好多人都留咗喺學校周圍影相，因為以後應該都冇咩機會再返嚟。

我喺操場兜咗幾個圈，終於喺其中一個人群中見到啊晴嘅身影，但佢冇發現我嘅存在。

既然我牌又上曬，文又打曬，我咁早返去都冇嘢做，咁就唔特登叫佢啦。

我坐喺一邊等咗一陣，人群終於散去，得返啊晴企喺操埸中間。

佢行到嚟我面前：「做咩啊？」

「我…冇啊。」我將手伸入褲袋，撳住封信。

明明我只係需要講一句拒絕嘅說話，但係我就緊張到一粒字都嘔唔出。

「你唔講，我走架喇。」佢轉身扮走。

佢好熟識我習性，知道我唔比人逼下係唔會郁。

「唔好走住先。」我本能反應咁講咗句咁嘅嘢。

呢個時候，啊澄行咗過嚟。

熟悉嘅三角形再一次出現，不過今次係等邊三角形。

「啊武，我有嘢想同你講。」啊澄好安分咁企喺原地。

我冇理佢，將封信從褲袋拎咗出嚟。

同一時間，啊晴都喺裙袋拎咗封信出嚟。

我望住佢封信，雖然上面有啲污漬，但都認得出係龍哥比我嗰封信。

我O曬嘴咁望住佢，正諗住開口問，但佢就好似有讀心術咁問咗我想問嘅問題。

「你係咪想問我點解會拎到你封信？」佢揚咗揚封信：「我執返出嚟架。」

我吞咗啖口水：「咁你有冇睇過裡面寫咗咩？」

我開始有啲驚佢問我裡面寫咗啲咩，因為我根本唔知裡面寫咗啲咩。

佢奸笑一聲：「你真係好老套啊，用埋啲死人隱形筆。」

「你咪又係一樣，仲要寫咁多！」我串返佢。

結局篇LastDay(二)
「你咁講，即係你有睇曬啦？」佢踏前一步。

「邊有。」我擰轉面，避免比佢Read face。

「好囉。」佢語帶失落。

我擰返嚟面向住佢，諗住睇下佢咩事，點知…

佢錫咗埋嚟，仲攬住咗我。

我推開佢，但唔成功。

我再一次推開佢，都係唔成功。

跟住…我攬住佢。

唔知點解，我個腦叫我推開佢，但我雙手攬住咗佢，而我心底有把聲話比我聽。

「攬實啲。」

莫非，呢個就係所謂嘅口不對心？

我望住佢，唔知點解有想錫落去嘅衝動。

「話時話，你做咩要帶我封信返嚟嘅？」佢問我。

「咩啊？」我擰轉頭扮咩都唔知。

然後…

佢一手搶走咗我封信，仲即刻轉身。

佢一手撳住我，一手揸住封信用口咬開個信封，然後用口擔住兩張紙。

我繼續嘗試搶返封信，但係點都搶唔到。

佢單手打開張紙，我寫嘅嗰句嘢大到連我隔住成個身位都睇到。

佢轉身望住我，而我呆咗咁企喺原地。

「咁…你要唔要做我男朋友？」佢問我。

「呢樣嘢…」我猶豫緊。

「你要唔要做我男朋友？」佢再問一次。

「要！」

雖然我答得急，但我急嘅時候都唔會亂嚟。

「你唔介意咩？」

「我都答咗你，點會介意？」

你都冇介意過我，我點會介意你？我在意你咋嘛！

佢轉身：「我行去小賣部買糖！」

我拉住佢，然後挨過去…

奶咗佢塊面一下。

「做…做咩啊？」佢面都紅曬咁。

「你咪我粒糖囉。」我喺佢耳邊用氣聲講。

呢個時候，我聽到有人喂咗一聲，然後電話響咗下。

我拎出嚟睇，係啊澄嘅Message。

「見你咁，我走先。」

識走咪好囉。

我收埋電話，然後再奶多嘢。

「死變態佬！」佢輕力咁打咗我心口一下。

「你唔鍾意咩？」我繼續喺佢耳邊用氣聲講嘢。

我得戚咁望住佢，然後…

我就比佢公主抱起咗。

我瞬間由野狼變成被野狼狩獵嘅鹿仔。

「你你你…做咩啊？」我嚇到有啲口窒窒。

「帶你去一個冇人嘅地方…慢慢奶我。」佢奸笑。

「救命啊~」

…

..

.

完

結語
其實愛情邊洗搞咁多嘢？

我曾經講過《我想和你好好的》呢首歌係主題曲，係因為裡面有幾句歌詞好啱男主角。

「何不好好的相信對方 何以要推測最壞結果」

「引力法則已生效 將你跟我吸進漩渦」

「任惡魔洗腦 沒法擺脫絕望 總想太糟」

「如果當初懂把愛看開如今應該不需要拍檯」

愛其實冇咁複雜，愛冇咁多尋根究底，因為愛嘅基礎係「信任」。

呢個世界存在吸引力法則，你永遠向住最壞嗰一邊諗，事情都會向住壞嗰邊發生。

另外，IG5個repo有個小番外睇。

都係嗰句啦，希望大家帶到啲嘢走。

番外篇-龍哥的信
「致：啊晴
啊晴，我知你而家覺得啊武呃咗你、佢已經唔鍾意你，但係你信我一次。
我識啊武咁耐，睇得出佢係受你架，只不過佢口不對心。
如果你睇到呢封信，而你都想同返佢一齊嘅話就唔好諗咁多，一嘢攬落去就啱架喇。
一嘢唔得就兩嘢，兩嘢唔得就三嘢。
三嘢唔得嘅話，咁就算啦。
其實愛呢家嘢，邊有啊武諗得咁撚複雜。
你愛我，我愛你，你信我，我信你。
就係咁簡單咋嘛！
啊武的好兄弟
龍哥
」

結局了。
幾好，我都係鐘意喜劇收場。
男女好自然一齊，唔會話去到後段不停扭橋，好似tvb膠劇咁。
雖然似前男友，橋好舊但最緊要受。
ｇｏｏｄｅｎｄｉｎｇ．男女主角最尾一齊，表達簡單自然得嚟又浪漫。
番外編都寫得幾有餘韻，交代各角色，唔會有甩漏。始終寫耐故事，讀者鐘意其他角色，都想佢哋有好結果。
最後，算大團圓結局。我都得到滿足。

另外，點解咁浪漫一封信，女主角要寫粗口，破壞晒成件事。

其實啊武喺龍哥朋友間吧到，佢回頭嗰下已經證明咗其實佢個心係鍾意啊晴（因為嗰陣時啊晴已經返咗屋企），只不過佢唔認。
而行出學校門口見到龍哥，其實代表龍哥喺暗中做咗啲嘢。
粗口就⋯手痕。
回歸簡單。
「何以要推測最壞結果？」

新作品再見

新作走起