同現時女友一齊四年
由大學到而家出嚟做緊嘢
依家plan緊移民，兩年後就離開呢個一齊相識嘅地方
離開呢個決定都係幾經考慮先作出
係未識佢之前已經對呢個地方有好深嘅感情
依家選擇離開都係想下一代喺一個正常嘅環境下成長
本來冇打算會生，不過未來事唔定
呢刻冇呢個諗法，下秒又可能想
所以為咗將來，都係決定離開
講返同女友
初初一齊會覺得佢非常痴身，成日都會想見面
而我卻希望有時可以有自己私人時間
我哋初初都經常因為呢件事而嗌交
不過經過多翻溝通後，我漸漸明白佢嘅諗法
亦都明白「愛一個人」嘅心理狀態
更加明白「愛」係真係需要表現出嚟
所以喺之後我都會刻意安排時間陪佢同佢出街
有時更會佢都冇expect我會出現嘅時刻出現
佢係一個好搞笑同多嘢講嘅女仔
有時冇人應佢都可以自己講不停
而我就係偏獨、唔多講嘢一個人，好多時鍾意自己一個
我哋嘅相遇就好似係我嘅黑白世界入面添加咗一道彩虹
出嚟做嘢後，事緣因為做audit，生活大部分時間都係工作上
好多時都會因為做嘢而成日都唔出聲，屋企人同你講一句說話都會覺得煩，朋友搵就覆都費事
唯獨是佢，一嚟因為不得不覆，二嚟就係回想肯主動搵一個人都係其中「愛一個人」嘅表現
每次一同佢傾埋傾埋，就會慢慢從工作模式中抽離出嚟，其後先諗返人生唔係淨係得工作
工作就係想身邊人同自己生活更好，而一味埋頭苦幹只會反其道而行
四年落嚟，我唔知幾時已經習慣身邊隨時都有佢存在，已經覺得佢就係我生命中一部分
時不時佢唔喺我身邊嘅時候都會諗起佢平時嘅搞笑樣，遇著一啲事情就會想像佢會有咩表情或者反應
閑時返睇同佢嘅合照，回想翻佢當時嘅樣，又會會心一笑
下年佢就隻身先離開，我就過多一年先去
因為佢早我一年畢業，根據救生艇計劃佢嘅申請會早一年deadline
而我又想考埋牌先去
咁中間就會有一年long D
一年嘅long D對於痴纏嘅我哋嚟講可以話係非常大嘅挑戰
一年可能好順利過到，可能過到但再見時已經淡咗，亦都可能一年間已經分開咗
對於此刻嘅我，當然想呢一年相安無事，再見時感情更加會昇華
不過未來唔知未來事，依家只可以祝福自己同佢，抱持堅毅嘅信念向前行
此時此刻，經過四年嘅磨鍊，我已經認定佢就係我廝守終生個一位
如若一年後完好如初，必定與佢攜手到老。
最後，祝好人有好報
選擇留低嘅各位珍重，加油！
