好冇安全感...
我同女朋友都係26歲，
大學畢業3年。
女朋友出身小康之家，
父母都係專業人士。
由細到大佢都係生活無憂，
亦都練到一口流利嘅英文，
雖然唔算靚女但口才好、又presentable。
佢都好叻，搵成12萬一個月，
都仲未計bonus。
佢著西裝出入中環甲級商廈，
成日凌晨先收工。
相反我只係個廢柴，
都算係私樓仔但只係最入門嘅私樓，
屋企人手頭緊，計錢計到好盡。
我僥倖中學入到傳統名校，
但擺明唔係讀書材料，成績麻麻，
最後都係勉強入到CU水泡科，
又勉勉強強畢到業。
我個人冇乜專長，
讀書又唔叻，轉數又慢，
又冇乜興趣，
講嘢又口窒窒，講英文更加唔得，
矮、柒、毒樣樣齊。
而家畢咗業3年都仲係浮浮沉沉，
未搵到自己條路，行又轉過，
而家仲係搵緊萬幾蚊一個月，過緊月月清嘅生活，
而且份工都冇乜前途，
不過好在work life balance，每日都係返9:00-6:30，
唔會遲收工。
雖然女朋友冇講過嫌我搵得少，
仲成日請我食飯，
但佢身邊嘅同事、舊同學都事業有成，
難免會將我同佢哋比較，
令到我好冇安全感。
我應該點樣維持同佢嘅關係？
我又可以做啲乜嘢收窄同佢之間嘅差距？
定係其實呢種女強人唔會介意男朋友搵幾多錢？
我同佢未見家長，可以點樣令佢屋企人對我印象好啲？
