(Live) 一張單程機票 一路向北嘅故事

Irktusk - Lake Baikal 必經之地



35 小時後終於黎到Irkutsk，我哋計劃沿住世界最大嘅淡水湖 Lake Baikal 行山兼遊湖，預計會留呢度3日再坐火車上Moscow，黎到呢度亦係時候同紙筆哥講Bye Bye，佢話對啲山山水水好厭倦，佢會留一晚就直上Moscow！而係烏蘭巴托火車相遇嘅運動二人組將會加入我哋。





落車第一時間去售票處查下啲飛幾錢，每人15xxx盧布，大約二千蚊港幣，上網啲攻略明明話唔駛一千.... 為左避免比人昆，先去Hostel 放低行李，食左個早餐再查車飛，我哋發現係官網 Rzd.ru 買係13xxx盧布，比係火車站買係平，但都唔係平飛，幾經查証後唔係無個種飛而係賣曬，最平係三等座（環境同扎門烏德去烏蘭巴托個種差唔多），二等座就同由烏蘭巴托去 Irkutsk，有獨立房，一房4人。







最快都要去到7月10 先有平飛，但我哋7月11 要離境，因為特區護照免簽 只得14 日，28 29 30 1 2 3 4 5 6 7 8 9 10 11，而由Irkutsk 坐火車上Moscow 需時4日，時間非常緊逼，我哋開始嘗試搵下去到某個地方落車再轉車，沿途嘅選擇有....... 地方名，不過價錢唔係平好多，我、賴屎哥同運動二人組決定買直達Moscow，13xx一個人全部上層同卡，下層一早賣曬，要分開兩人一間， 唔要保險會平幾十蚊，全團唯一一個女團友就計劃出中亞，去哈薩克再入境。











紙筆哥離開個日無直達，需要轉上轉先到，要 14xxx盧布，比我哋直達嘅更貴，紙筆哥去意已決，無人可阻！

足足攪左成個下晏先解決火車飛嘅問題! 俄羅斯嘅巴士有部份係架大貨Van 黎，可以企但會屈住半個身體而且好櫈，落車先比錢個司機或服務員，唔會有個收銀箱或類似八達通嘅野！

由Hostel坐車去火車站要20-30分鐘，返去個程我哋以步行形式慢步走返去，順便睇下個城市，行左足足差唔多一個鐘，順路買埋材料返去煮食！晚餐有腸仔磨菇蕃茄汁意粉、幾隻失敗嘅溫泉蛋、椰菜同可樂，Hostel 個爐唔生性，5人份量攪左成個鐘先煮好，還好味道不錯，連埋第二朝早餐同行山需要嘅物料，每人都係廿零蚊港紙，好抵！





食完飯仲要赴約，同個係車上識嘅荷蘭仔去飲俄仔手工啤慶祝佢生日。價錢200-300 盧布一杯。

Lake Baikal巧遇騙案

大致行程如下：



由Irkutsk 坐車去Listvyanka，Listvyanka 行山去Bolshiye Koty 呢個小鎮住一晚！第二日坐船返去 Irkutsk 。

Lake Baikal 係全世界最深嘅淡水湖，面積比香港仲要大，假若全世界無曬水源供應，呢個湖可以夠50 億人飲用。 出發前先係Listvyanka 食個Turkish Kebab 做午餐，全場最抵最大份 150 盧布，最出名嘅煙燻魚都要大嘅100 細嘅200，解釋唔到點解細比大貴！細係條骨都食到。











路程約22km 預計6-7 個小時內，先上頂後面沿住海邊行，聽落好似幾容易咁，全段路都係山路同泥路，唔似香港個種石屎路咁，頭段還好，好似係森林遊走咁。差唔多去到湖邊遇到幾個著軍裝嘅人，阻住我哋去路，話咩火災季節唔知乜鬼，要比錢先可以過，個幾條友擺明昆錢黨，又無証件，全部又肥又老，所謂嘅軍服入面著住件好顯眼嘅Polo Shirt，軍人會唔會咁無紀律呀！








休息下補充體力後，決定原路向後走一小段硬爆叢林上山！因為我哋撞到幾個外國人都係行左上面條路，所以估計都係同一條路，爆左先講！上到去聽到開船聲，估計搵唔到水魚，決定散水。原來爆上山果段路係分叉路黎，而路牌指示我哋走海邊果條路，開頭都算幾易，中段開始有啲危險性，特別係我對波鞋個底差唔多磨蝕曬，完全咬唔到個地，全泥路個陣會 扇住去，真係步步驚心，泥路嘅另一邊就係幾高嘅懸崖，有幾次差啲釘蓋直飛出去，好彩山系男神多番請救！

山系男神黎緊會去瑞士行十日山，全程都係咩曬所有野，所以今次佢都咩左60磅野當做訓練，比著係我哋一早已經失平衡跌左落懸崖，由於我對鞋實在非我能控制，山系男神同我交換左對鞋，雖然尺寸上差小小，但咬地感覺實在差天共地，幾驚攪到男神有咩意外！出發前To do list 入面其中一項就係要係貝加爾湖游水，岩岩到Listvyanka果時，我哋試過啲水溫，應該10 度都無，超級冰凍。行山途中我哋去左個沙灘完成呢個Task，不過太凍嘅關係由游水變左浸水，果種凍係企多一陣都頂唔順！













幾經轉折足足攪到20:00 先到達目的地，到埗已經見到我哋個host 係碼頭等緊我哋，Bolshiye Koty 呢個地方好細，環境一流背山面海，只有水路或11 號車交通，而且亞洲遊客一隻手指都數得曬，就係得我地5 個，入夜後天氣開始愈黎愈冷，島上餐廳都無間，不過有間小商店賣材料同零食，但大家都好累，無力再攪，個host 煮埋野食比我哋，呢餐真係無比溫暖。住果度係一個小山頭，有幾間木屋仔，沿路入去兩邊都係花花草草感覺好寫意，好似過緊退休生活咁。

俄羅斯洗頭艇

倒塔咁早起身去坐洗頭艇！架船比想像中仲要細，本身我哋都預左會好凍，提前著曬防寒衣物，好彩船家一早準備左堆厚外套同救生衣比我哋，唔係一定中招！連埋船家前3 後3，所有行李放最後排！因為亂咁坐嘅關係，隻船有啲偏左去左邊！船家都盡量沿海岸慢駛，好彩風平浪靜，沿路睇返前日行去果條路，人行架咩！









35 分鐘到就到左Listvyanka，落船第一時間幫襯返呀叔嘅Turkish Kebab，想食埋炒飯但間鋪頭睇人開價，Chinese 收你150 盧布，戰鬥民族20🤦🏻‍♂️ 會唔會太過份！





返到去Irkutsk 第一時間要沖個靚涼換返套乾淨嘅衫！Pack好曬行李就去睇下Kazan Church，呢間野係St Petersburg 都有，好似7-11 咁！入面有好多用金打造嘅野，入到去頓時變得莊嚴同陣好濃烈嘅燒香燭味。









之後去超市預備下黎緊坐火車去Moscow 嘅食材，亦係西伯利亞鐘路嘅尾段！呢程車全長3日幾，82 小時16 分鐘，全長5043公里，今次預備嘅

3 號 早 午 晚
4 號 早 午 晚
5 號 早 午 晚
4 條友 Total 27餐

都係杯麵、薯片、餅乾、麵包、即食薯蓉、生果呢啲。無乜太多選擇，唔夠再係車上食餐車，因為呢架車會有餐卡。

之前去哈薩克果位團友又選擇返去Moscow，但已經買唔到即日，最快都要兩日後，預計會係聖彼得堡再見👋

出發前緊係要去食好西喇，去返第一日黎架餐廳食西餐，已經諗住唔食麵，食返餐飯點知都出事，個Risotto 係白飯加芝士，完全無肉🤦🏻‍♂️



完全唔夠飽點上路呀，叫多個甜品頂頂肚先！



去火車站嘅交通原來10 點已經無車，Call 的士要250-300 盧布！提早去到火車站等上車！呢張飛好貴，絕對不能Miss ，車箱環境同之前蒙古個種差唔多，都係一間房，有4 張床，獨立有門，有冷氣無得開窗，但豪華程度比蒙古個架263 差好遠！

一打開門就有個呀婆係度訓緊，過多無耐有個貌似中國大叔入埋黎。

借問聲你拎咩相機？

rx1r2

Rich
咩鏡？

請左幾耐假去backpack?

借問聲你拎咩相機？

rx1r2

Rich
咩鏡？

rx1r2 無得換鏡 35mm f2

請左幾耐假去backpack?

辭左職去 請假邊得

82小時16分鐘

大叔同呀婆都唔識英文，不過佢哋都表現得好有善，食飯時間都會叫我哋主動用下面張枱，基本溝通都係靠Google Translate，大叔打俄文轉英文，我哋打英文轉俄文，佢哋兩個都係坐到中途站就落車，架車都幾多床位吉左。



由頭坐到尾嘅人就好少！估計好多人都係坐一小段，所以不停會有過客出現，如果間房無曬人，我哋4 個就會霸左黎吹水同玩啤牌! 點樣係呢82 小時16 分鐘消磨時間真係一門好高深嘅學問，主要都係食、玩、訓同睇風景！





餐卡無英文Menu，不過無意中識左個做油、天然氣管道建設嘅俄仔，閒聊左一陣仲請我飲茶同食餅！仲約埋第二日一齊食早餐，本來都係諗住當吹下水，點知佢真係黎搵我食，仲請我食左個鐵版蕃茄煎蛋加奶茶，呢位同年紀嘅哥仔會唔會太好人！







沿途好多古靈精怪嘅人，夜晚晚飲醉酒亂入人地間房坐係度9 up、身上發出一陣怪味嘅老人家、上車訓到落車嘅戰鬥民族等等。
車箱入面會有曬所有站頭時間表，大站會停耐啲，細嘅1-5 分鐘，某啲大嘅會停45-70 分鐘，大站多數有野食賣！唔夠物資可以再補給！最抵食又飽肚係個種賣100-150 盧布有雞肉或漢堡+薯仔+青瓜+蕃茄。食杯面真係食到咀都變形！



瘋狂地跳時區攪到身理時鐘錯曬，早午晚3餐變左一日6-7餐！好興幸最後呢段係四條友一齊坐，自己一個應該會悶到嘔。











無驚無險順利到達莫斯科

戰鬥民族首都

莫斯科嘅天氣比想像中凍，天氣亦都變幻莫測，一時落雨一時陽光普照！單係買去St.Petersburg 嘅火車飛已經攪左個幾鐘，上網見到有飛，但係售票處又話無！

俄鐵飛可以上網買但你永遠唔知幾時得幾時唔得，正常成功比錢會有張E ticket ，而且佢個網好蠢，每次轉新一頁，佢個網都要再㩒上面果個Language Button，如果唔係全部都會顯示成俄文。

火車沿路經過嘅城市，環境都好荒涼，樹多過人，黎到Moscow 成個歐洲咁，要幾奢華有幾奢華，真係好大對比，感覺所有發展都集中係首都，其他城市仍然好似郊區咁，停溜不前！





大部份景點都係Red Square 附近，e.g. St. Basil's Cathedral, Gum, State historical museum etc. 可以花上一日嘅時間，係果度附近你會倍感親切，到處都係熟悉嘅面孔同語言，一街都係中國遊客！















比Trip Advisor 點左去食間係Gum 入面好似IKEA 嘅餐廳，盛惠600 蚊盧布！仲話Reasonable Price ...





天氣時冷時熱，4 條友有3 條友中左招，未夠7 點已經全團進入昏迷狀態！

巴打去完莫斯科會去邊???

巴打去完莫斯科會去邊???

會向南走 我呢邊上網好差，想更新都好難

患有選擇困難症嘅女團友終於追趕上我哋，好久不見嘅紙筆哥亦都會同我哋一齊遊下呢個City，紙筆哥今次住得比較遠，以九龍做中心點，佢住係天水圍，一來一回市區都幾費時。

佢哋尋日出去游走個陣發現後街好多標價100 蚊 All Day Breakfast，倒塔咁早起身想食個靚早餐，點知全部都係10點先開，亂入左間又係Turkish Kebab 啲friend，食左個垃圾早餐，呢邊啲人好鐘意食呢啲野！周街都有。

出門口無耐，見到有堆人封左部份路段，過多無耐有幾個人著住有number 嘅背心跑緊過黎，後黎沿住條賽道行，先知原來佢哋跑緊全馬，而且係頭個幾名，可能唔覺意影左幾個冠軍人馬！

呢個馬拉松差唔多封左半個City 嘅路，周圍都好塞車，轉入彌敦道後開始見到人群，兩邊都有好多大大小小嘅商店，如果你想買紀念品就可以免喇，啲價錢我覺得貴左啲。

















左睇右睇下行左差唔多成個鐘先去到拎車個度，拎車果度係一個謎黎，佢封Email寫 2/f，打電話過去又無人識講英文，初頭以為係民居2樓，點知攪完一輪先搵到係個商場2/f 黎，而且拉左2/3闡，好彩遇到對俄羅斯夫婦識講英文，幫手打左個電話問條友去左邊，條友話早啲時間曾經係度，但依家走左，再加上今日跑馬拉松，個活動會攪到3 點左右，叫我哋3 點再返黎，呢個故仔後黎有另一段故係話架車因為馬拉松嘅關係，塞左好耐先入到市區，anyway 最緊要拎到車！

係等拎個陣我去左間Pancake shop，佢menu 上有個剩Pancake 64 盧布，但Ham + Cheese 先59 盧布，咩玩法黎，唔駛諗喇係咪呀，正常無伏超抵食！



未夠鐘又無野攪，跟左人體旗扞哥（運動二人組成員，曾於澳洲多省景標做人體旗扞）沿路向海邊方向行，途經St. Issac Cathdral ，佢後面嘅Alexander Garden 環境真係一流，可以灘係草地hea 足一日，過左無耐賴屎哥渣左架車黎接埋我哋去位處於波蘭的海出口芬蘭灣嘅Grand Cascade（夏宮），別名俄羅斯凡爾賽宮，呢個地點亦係火車上請我食早餐嘅Alexey highly recommend 嘅景點！

上花園（Free Entry） + 下花園 （18:45 前700 後300 盧布) ，下花園佔地極誇張，應該係上花園嘅幾十倍，入面有好多個宮殿同噴水池，仲有好多用金打造嘅人仔！



呢個Peter 真識嘆，係波羅的海隔離起個宮殿同花園，成個下花園可以花一日時間行下坐下咁遊覽，我哋買18:45 分飛，大噴水池19:00 收工，岩岩執到個尾彩！花園內嘅宮殿同博物館係逐個收錢，不過我哋去到夏宮個陣已經晏，入到花園啲收費項目差唔多收曬。

如果坐公共交通工具建議巴士去坐船走，係下花園入面有個碼頭可以直達市區，船飛800 盧布，如果坐船入先遊下花園再遊上花園就入唔返去坐船！















自駕當然最方便，路面非常闊落，人多除返條心數仲好經濟添！沿住外圍返市區嘅風景真係一絕，High Way行到某啲路段會有人泊曬車係度鈎魚，我哋都有樣學樣落車影下風景。

有official 停車區域睇風景，兩側公路嘅停車區域都可以係橋底轉換返方向！本來係右邊影緊相吹下海風，左邊開始緊日落而且火燒天，即刻渣去左邊望望，太陽落山後，右邊成個滿月走左出黎，即刻過返右邊睇。不知不覺間已經係22:xx，呢邊天黑情況更慢，去到凌晨2 3 點個天都仲係好似香港傍晚6 點咁，夜晚黎架咩？

本來計劃去一個超大型嘅超市同shopping mall買餸煮飯或搵飯食，點知日落呢單野真係攪左太耐，去到幾個mall 都到左關門時間，唯獨一個收24:00，既然一場黎到，大家個肚都打曬鼓！都要上去白撞下，點知上到去只有一間超大型嘅五金鋪，材料工具樣樣齊，野食只有啲朱古力條可以買黎充飢！

女團友問人廁所係邊，人地好熱情咁帶左佢去睇馬桶，洗手間配件🤦🏻‍♂ 究竟問左咩點解會變成咁！







一行五人帶住肌餓同急尿嘅狀態送紙筆哥回家，途經一間24 小時超市，大家都放棄左煮食嘅念頭，是但買啲飽肚嘅熱食（雞脾、薯仔等等）填飽個肚就算。
返到hostel 攪到黎上埋床訓已經係3 點。

恤髮記

出境限起已到，之後會沿住波羅的海落中歐西歐等地。不知不覺間已經過左廿幾日，又係時候恤個靚髮，尋日有睇過街邊要飛髮鋪要1200 盧布，差唔多HKD 150剪個頭，比想像中貴。

Hostel 個服務員話轉灣街角有間，250 盧布(HKD 3x) 呢個價就差唔多！落到去歐洲，物價應該會暴升到時二百蚊都唔知剪唔剪到個頭！ 去到見到基本250 咩有造型280 加洗好似多30！我主要都係想佢幫我剷下兩邊，修小小個頂。埋位唔夠30秒，準備係Google Translate Show 點剪比個俄國大媽個陣，條友突然發難，ee 哦哦左一堆俄文就跑左出去食煙，之後我用紙仔抄寫左一堆俄文比個receiption睇，佢再幫我同啲師父溝通！







最後安排左個後生仔幫我，我一開始講話要洗加剪，點知佢拎個水泵噴濕個頭，再用風筒吹左個型比黎兼分埋界，小修左一輪個頂就開始剷兩邊同後面（我最需要就係呢樣）剷左一段時間又再修下個頂，差唔多攪左35分鐘，最後仲幫我gel 左個同佢一樣嘅頭 Why? 不得不讚佢剪得幾有心機，不過把刀就鈍鈍地，剪嘅時候唔多順暢，盛惠280 盧布！但又由頭到尾都無幫我洗過頭.... 好彩近hostel，返去洗個頭再會合佢地食早餐。

之前講過啲100 盧布嘅All Day Breakfast 原來係假嘅，左加右加下會變左幾百蚊。食早餐同時搵下今日有咩景點去，Hermitage Museum 冬宮今日休館，佢、法國羅浮宮、大英博物館同位處NewYork嘅大都會藝術博物館，係世界4大博物館之一！















賴屎哥同女團友決定去完Estonia 再返去St. Petersburg，所以我同人體旗扞哥盡量睇多啲景點，比錢入左Church of the Savior on Blood，入場費：250盧布，以俄羅斯啲博物館黎講價錢算平，值得入場睇！

離開俄羅斯再即一定要食返餐大餐！因為歐洲物價指數問題，黎緊餐餐都會係Pasta + 麵包！Pizza + Salad + Chocolate Brownie + Beer 900 盧布 （約HKD120) 食到嘔電！





執埋行李等夠鐘坐過夜巴士去Estonia，車程需時8 個幾鐘，車票可以上網訂，提早好多訂應該會好平，我哋坐要20歐 而且係Lux同其他巴士公司合作！ 紙筆哥坐Lux 要25 歐但係豪華好多，我哋個架除左有個不給力嘅wifi 就乜都無，不過好彩架車無乜人可以霸曬兩個位黎訓，之前上網睇話過關好煩，而且攪好耐！









成件事比預計中順利，放左係行李箱嘅大背囊都唔駛拎出黎！都係循例問下你去邊留幾耐。







幾個小時後，We have arrived Tallinn. The Capital of Estonia!

分別

出發前上網睇過 Tallinn 係一個比較細嘅City，大部份野都集中係Old Town，半日或一日都可以遊曬，女團友、賴屎哥同紙筆哥都會留一晚休息下同hea 下，而我同旗扞哥選擇即晚坐大巴直落Lithuania 立陶宛！

本來有諗過坐車去Latvijas 拉脫維亞，車程4個鐘，好似無乜景點，都係一日內攪掂，坐落去又唔算平，去到仲要住宿一晚，之後再坐4 個鐘可以去到Lithuania 立陶宛，咁不如直接坐8 個鐘落去，慳返晚過夜！



出入可以坐Tram or Bus ，落車間士多有One day Pass （24 hours 無限任坐） 賣 5 歐一張有2蚊係deposit。退卡只有大巴站、機場同碼頭，要留意辦工時間。





黎到呢到即刻見到物價提升左好多倍，好彩超市有麵包賣最平低見0.19 歐，一個麵包加埋共享嘅膠袋包裝牛奶都唔駛1 歐，要平真係有好多種方法，豐儉由人！包奶0.49 歐 1.5L 會唔會平得太過份！香港閒閒地買盒都廿幾蚊！





可惜天公不造美，天灰灰灰仲要落雨添，上網啲人話周街wifi，昆人嘅！大家嚴重失聯，只能保持有限度聯絡。景點大多坐巴士或電車去到，無意中免費參觀左個要比錢嘅潛艇博物館！Old Town 內有好多大媽，建築都係歐洲小城風格，但唔會去到西歐個啲咁華麗，半日都可以行曬。



















係Old Town 附近發現左間中餐廳，價錢還好，今晚餐Farewell Dinner 一於係呢度食，賴屎哥買左機票月中係Moscow 返香港，女團友先返St. Petersburg 玩多陣再返西歐，而紙筆哥都會落波蘭同德國，不過佢先去Latvijas 拉脫維亞再向下走！佢因為太眼訓嘅關係缺席。之後都應該再有機會見到佢！

呢四餸雖然唔算煮得好好，但對我哋4 個黎講真係好滿足，因為太耐無食過中餐！

特別感謝賴屎哥同女團友一路以黎嘅照顧，大家由香港開始話一齊出發，北京去蒙古，蒙古去俄羅斯，大家經歷左好多野，好多難忘嘅體驗同回憶，祝大家一路順風，香港見！

向西走

Lux Express 確實係幾豪華，不過太眼訓嘅關係，除左用左佢個充電頭外，完全無享過其他娛樂設施。





上車前識左個台仔，佢係直落Poland ，落車唔夠10 分鐘等下一班到，就即坐，坐程加埋要16 個鐘，我真係頂唔順咁樣坐，我哋已經係Estonia 坐即日車，咁樣連續剷落去3 個城市，個人會直接收皮。

落車地點有兩個，Shopping Mall 同巴士站，出發前睇地圖一上一下，千算萬算都無估計過係Shopping Mall 落車會有伏，商場個陣仲未開門，落住微雨又無得上網，好似孤兒仔咁比人扔左係街邊。沿停車場硬爆上商場，個時仲係7 點幾影都無隻，好彩入面有wifi 查到超市8 點開， Hea 住等到夠鐘買早餐u，搵hostel 時先發現大部份住宿都係車站附近，柒左!

下次都係做多啲資料搜集! 呢個教訓一程3 .55 Eur 嘅 Uber !

呢邊住宿好抵 HKD 6x / night ! 同Old Town 相差只係15 分鐘頭程，入房後發現旁邊床果個人嘅行李箱有盒外露嘅 清熱酷、仲有支寫住繁體字嘅Colgate嘅牙膏，斷估呢個應該係香港人，再睇下佢張床有個dji 火牛同幾個usb插頭，90% 係香港人，沿途見啲人都係一相機一電話好少會好似我咁一大堆野要叉！







連續坐左兩程夜巴，大家明顯疲態盡現，需要叉叉電再上路，沿路最好就係日照時間長，7、8點出去都唔會覺得天黑無野睇。



Lithuania 呢個old town 聞說係全歐洲最大，應該大過Estonia 果個幾倍有多，係市區遊走時遇上左一家香港人，佢哋介紹左啲景點比我哋，不過天氣報告話會聽日落足成雨，都係睇運做人！









一預所料真係香港人，佢已經留左係度5日，聽日會坐火車去白俄羅斯，不過因為簽証問題而可能入唔到境！

大家閒話家常個陣，再出現左另一個香港人，佢去左做6星期義教，再沿路玩上Estonia 返香港，同我哋走相反路線，講下講下我哋餐晚餐攪到十二點先開始煮黎食！

真係無諗過一日內可以遇到咁多講流利廣東話嘅人。

我哋係呢度留一晚便會坐車直落Warsaw ，無意中發現呢間巴士公司join member (Free) 拎左個Pin No. 可以享有15% off discount ，成件事即刻抵左好多，呢程夜車21 歐 折左 17歐。頭兩程 20 + 34 歐 唔知道有呢樣野蝕大本。

玩航拍機玩到去差館

終於有機會享用下車上嘅娛樂，22:30 車睇完一套戲都已經成點，啲戲都幾新添。不過選擇錯位完全無覺好訓。

落車發現普遍住宿都唔平，起碼100蚊晚一個床位，尋晚60蚊真係好抵！最後落戶係一間係Ibis 入面嘅改建做劏房嘅hostel，接近0 facilities，只係得個微波爐。
普遍Check-in 時間都要12-14:00，三條友身無分文，愈住大街行去Old Town！





去到Old Town 影都無隻，導遊哥拎出佢嘅航拍機拍低附近嘅風景！正當收機Pack野之際，突然有架警車停左係我哋面前，警察落車話要檢查我哋Passport！查左一輪，話要比佢上級睇條片，要帶機主返警署，不過佢上級唔識講英文，問導遊哥要中定英嘅Translator， 我同旗扞哥當場釋放！













導遊哥多番要求，個警察都唔比我哋跟車陪佢去，攪左輪開始發惡要佢盡快上車，而且只係留左個警署地址叫我哋行過去，Google map顯示路程步行需時3x分鐘，突如期來嘅情況令我哋有啲措手不夠，一心諗住檢查下Passport 就放行。導遊哥去到後Send 左個location 同in jail 嘅圖片黎，之後完全失聯。







我哋沿路行落去順便提埋錢，波蘭雖然係歐盟區，但係用自己嘅貨幣，大約係Zl x 2 = 港幣，物價可能係歐盟區比較平嘅一個，食飯價錢同香港差唔多甚至更平，超市買野肯定平同多過香港！





好彩我妹之前去完波蘭留左幾蚊散字黎，唔係應該餓死都未行到去警署，去到警署人又唔比見，只係叫我哋等，等左成個鐘都無任何動靜，途中有問過人借電話打去大使館，點知打左兩次都無人聽電話！

過多無耐叫我哋聽電話，以為係導遊哥，點知係一個講普通話嘅鬼佬，佢話係警察個邊嘅Translator依家趕緊黎，點解會攪左成3 個鐘先黎緊，唔係一早話黎幫手㗎咩！

再等左半粒鐘到，終於見到個Translator！佢話導遊哥犯左法，依家比人拉左，可能今日出唔到黎要聽日或者後日... 放隻飛機姐駛唔駛咁誇張呀！係Hostel 出發前，個負責人明明上波蘭政府官網睇過係可以！

個translator 入去了解左之後話過多幾個鐘就會放人，叫我哋周圍行下食個飯再返黎，据左個扒連野飲都係26 zl。



附近有個景點係個好大嘅公園，兩條友各自霸左張長（鄧），一訓就訓左成個鐘。夠曬鐘放人，都未有導遊哥嘅消息，大約5分鐘後收到導遊哥已經出返黎嘅消息，總算放下心頭大石！ 如果唔係真係要去大使館求助🤦🏻‍♂



Warsaw old town 同 new town 只係一街之隔嘅距離。呢度都幾興Dumping，係用芝士或肉做餡料，暫時未有機會嘗試。返Hostel 路經一個超大型嘅Shopping Mall 順便醫下肚！叫左個即炒嘅泰式炒飯，都唔知有幾耐無食過炒飯！

波蘭 有無d歷史野睇下？

波蘭 有無d歷史野睇下？

集中營一定要去 下篇會講

lm. support!