到達二連後會有好多司機同你招手,點知伏已中,一開始同你講會幫你搵50 蚊嘅蒙古小車,先車你去接駁點,呢度先湯你10 蚊,去到接駁點,原來係佢間旅館,再黎問你拎多10 蚊,彩佢都傻!
關口9 點開,係佢度無無聊聊咁坐左兩粒鐘。差唔多夠鐘就開你80 一個!坐地起價,超好野!
出去問啲大叔,佢地建議我地坐去火車站買飛過札門烏德,因為都係66蚊到。左問右問下搵到個話有50 蚊蒙古小車,等左幾個字都搵唔到個司機,逼住再轉,同行有兩個蒙古女仔帶我地去另一個地方,但議價失敗,都係要收你80,逼於無奈下唯有硬食!
本來50-60 蚊嘅過境費變左90 蚊,再加上北京到二連嘅車費,總共270蚊人仔!相比起由木樨園直達札門烏德貴30-50 蚊人仔,後黎係買飛遇到一個香港人,得知由北京到札門果架車仲包早餐,真係好抵,水貨情況都無我地咁誇張,只係訓就可能差少少,但強烈建議直達!個架車去到二連會停幾個鐘比你換錢、休息等等。
講返架吉普車,6 條友坐果個架車真係逼到爆,去到關口果兩位姐姐走左去坐大巴,之後都無再見過佢地,亦唔知佢地駛唔駛比錢,係關口期後又黎上貨走水貨過關,塞到架車爆為止,後排嘅車門更加鎖唔到,行行下鬆開左,成個過程都幾煩,而且排蒙古關都等左一段時間,過境後有得換蒙古錢不過匯率普通,但點都要換d買火車飛,出關開多幾分鐘就已經係火車站!但全部都唔可以途步過境,一定要有交通工具!札門烏德都幾荒涼,同二連一樣只係屬於一個中轉站!
火車站買飛係二樓,一兩樓都有上網卡賣,平均30-40蚊港紙一張,1GB Data玩30日,好多人推介Mobisim,蒙古只係我嘅中轉站,停留一到兩日到,所以無買卡!
呢度食飯算平,平均2x 港紙,買支野飲都係5 蚊港紙到有交易。我哋係附近嘅一間餐廳食飯兼坐左幾粒鐘(包括埋放貨),因為出面實在太熱,係火車站前果座疑似教堂嘅物體有得存放行李,細件500 大件800 蒙古幣。背包
一日得一班車由札門烏德去首都烏蘭巴托,有得選擇坐或者訓,訓有軟同硬臥,軟35550 蒙古幣,硬21850蒙古幣。之前中伏洗多左,今次要慳返,揀硬臥拉返條數!點知全部被人安排曬上層,仲要尾2 個卡,一格有6 張床,同大陸火車唔同,左右各2 ,頂層或最底床下底可以放野,前面打橫有2,下面個張係兩張椅連枱變床。佢地嘅火車站無一個正式嘅月台,得一條石路,最尾果幾卡仲要連條路都無埋. . . 尾卡27,我地係26,無左條石路做級,拎個大背囊上車都好有難度!
18:05分車,17:30分開始可以上車,架車有洗手間,燒炭嘅熱水機 (咩年代呀仲燒炭),硬臥係無冷氣,聽聞軟嘅有,但無實際查証過!啲人通常都會開窗,窗口個窿大到感覺訓訓下會成個人碌左出去,車上嘅人大部份都係蒙古人,可能由於文化差異加上排華,對於有陌生嘅面孔都唔太友善。而且普遍都係老一輩,英文同普通話都唔多識。行狗屎運,有班岩岩畢業嘅學生哥識講普通話,沿途轉述下啲野比我哋知。沿路都係啲大草原,日照時間都比較長,起碼8 9 點先天黑,入夜晚滿天星星。
18:05分車第二日9:00 去到首都烏蘭巴托。訓上層真係好惡頂,可能人生得高,張床根本唔夠長放直隻腳,坐係到好似攣弓蝦米咁。好灰! 只係想盡快坐完,完全無心機周圍行,車上有野食賣,牛肉漢堡飯19蚊人仔,有勇士試完話難食也!幸好早有準備,係上火車站買左個辛辣麵杯麵版,1800蚊蒙古幣,大約6蚊港紙。
大約11點鐘到會係某個城市停40分鐘,主要比司機係呢個時候休息下,亦都有野食賣!呢個時候緊係要落去影下星星喇,肉眼已經可以睇得好清楚! 時間亦都過得好快,架車突然間旭,今次仆街喇,我哋仲要係尾卡附近,原來呢度開車係唔會有任何提示,話黎就黎,之後就精彩喇。
由於太長所以會分開上下兩個出