其實啲表面既分手原因，咩唔夾等等，從來都唔係真正既分手原因。真正既原因係因為大家唔夠感情：大家既感情唔足以去令雙方攜手一齊勇敢面對眼前既問題，唔足以令雙方仍然堅信對方係一個啱既人。
係好得意嫁，只要你夠感情，對方實際上有幾差都好，你都會相信對方係靈魂伴侶。無感情個陣，就算對方有幾好，即使係零缺點，你都會覺得對方係錯既人。你心底裡唔想再堅持同對方行落去了，所以你決定走。
亦都因為咁，係一段關係入面，記得要多啲「愛」對方。好多人都係靠「鍾意」既情感去維繫關係，由情緒主導。好似熱戀期個陣，對方就算有缺點，你都唔會視呢個係咩大問題。但當熱情減退、新鮮感消失後，「鍾意」既情感就會冷卻，大家會由愛侶變得好似親人。呢段時間，無左粉紅色既戀愛泡泡，所有野都會變得清晰可見，包括對方既缺點，大家面對緊既困難。就算之前兩人說話有幾甜蜜，講到同對方不離不棄咁，呢刻先係真正見真章。
係「鍾意」既情感被時間慢慢磨蝕，你對住對方可能已經無乜feel，大家又有咁多問題既情況下，大概若然你心中仲有個種無論如何都想同對方行落去既決心，就叫「愛」—— 你focus係佢既優點，諗下唔係個個異性都有佢呢種優點；你感激對方仲未離開你，諗下其實佢曾經都有放棄你既念頭，但佢最後選擇堅持落去。
「愛」唔似「鍾意」，係感性之餘又帶少少理性，佢比你理性地知道有咩原因值得你去堅持呢段關係，唔好咁快放棄，可以係責任之類。
「愛」提醒你無論如何都要相信對方係一個啱既人，因為只要你開始懷疑對方係錯既人，無論佢事實上已經有幾適合你都好，你眼裡面就只會睇到佢唔夠好個一面。你會不斷去prove大家點解唔適合，但唔會去prove大家點解適合。
「愛」就係學會用完美既眼光去看待個個唔完美既人。
呢啲野聽落好似只係啲呀媽係女人既野，但其實好多人都唔知自己拍拖個陣係做緊乜嫁。佢地感情淡左之後，會心諗，咦我做乜會無曬feel既？對方係咪唔啱自己？然後佢地就會飛左另一半，搵個新既人。講到尾，佢地都不過係搵緊新鮮感。但其實每人既感情都係會慢慢變淡，所有感情關係都不過係輪迴。佢地就係係無限個輪迴入面一味追尋「鍾意」，直到佢地發現到自己只係一直loop緊，又肯停落黎為止。
有啲人又會覺得大家面對既困難太大啦，真係無辦法一齊落去，想搵個夾啲既。其實都合理既，因為的確有啲人係比較夾，有啲比較唔夾。好好好唔夾既情侶，真係要雙方非常有決心、好有感情先行到落去。但如果你係想搵一段完全同對方夾既感情，呢樣野簡直係同奇蹟一樣，唔係無既，極極極極難囉。每一段關係都總係有啲問題發生，有啲情侶既問題會大啲，有啲會細啲，但唔會係完全無問題發生。你諗下，當你對佢已經無感情既時候，佢連呼吸都可以令你厭煩。你的確可以take risk去搵一個同自己再夾啲既人，不過建議唔好盲目追求「同你完全契合既另一半」，我怕你未有咁既運氣，可能你搵既下一個仲衰過你前任添。
好可惜既係，世上好多感情都係經唔起考驗，如果唔係，唔會每日都咁多人分手、離婚。其實兩個人真係要好有緣，先會相知，相識，然後相愛。希望每個人都學識惜緣，把握時間去愛，去珍惜眼前既人，盡量去努力堅持維繫每一段關係。分開了，人一走遠又變吸引嫁啦，唔好等失去左先黎後悔，留下遺憾。錯過左，就真係會咩都無，珍惜對方既話，不妨比啲勇氣自己去愛
維繫感情真係好難嫁。情侶嗌交唔出奇，邊對情侶拍拖唔嗌交呀。但係嗌完交，大家冷靜完之後，雙方仲肯退一步比次機會對方，大家仲願意去堅信對方係一個啱既人，願意同對方繼續一齊生活落去，就係維繫感情既關鍵。路可能會好難行好辛苦，但若兩個人都有心行既話，總有路行到落去。無一段感情關係注定係錯，你以為既搵唔到路，其實係你唔想再搵路。
就快新一年了，係到祝每對情侶幸幸福福、感情美滿～～～
祝願你愛對方之餘，對方都愛你
寫得好雖然長
