今年五月英國各地有大大細細嘅地方選舉。
選民登記會喺4月19號截止,你登記咗未?
喺英格蘭,唔只英國公民有權投票,連 BNO、英聯邦、歐盟各國公民,只要住喺英格蘭,夠18歲,都有權投票。
威爾斯同蘇格蘭仲正,任何滿16歲居民,無論國籍,都有權投票添!
登記做選民唔只可以投票,仲會提高信用評分,同埋有資格做陪審員(相信大家經歷過去幾年,都明白有普選同有陪審制度對社會公義幾咁緊要)。
選民資格示意圖
要投票就記得登記做選民。登記程序好簡單,上 https://gov.uk/register-to-vote 填個表就得;搬咗屋更新選民登記都係用同一個表。
樓主實測,五分鐘唔使就搞掂。
今年選民登記4月19號就截止,大家記得快啲登記!
如果你啱啱到英國,或者讀緊書所以未有 National Insurance Number,程序可能會繁瑣少少,但唔使憂,有流程圖解釋:
選民登記流程圖
今年英國有咩選舉?
由於疫情關係,本來舊年換屆嘅議席逼埋今年一齊選,所以特別多票投!
英格蘭今年有得選:
各級郡、區、市議會 (local councils),類似香港啲區議會,負責處理地區基建、公共服務
郡長、市長 (mayors),主要負責帶領地方政府,制訂區內規劃、經濟政策
警政總長 (police and crime commissioners),係啊,唔滿意個警務處長可以投票換咗佢!
威爾斯今年有得選:
威爾斯議會 (Senedd - Welsh Parliament),好似立法會咁,負責製訂威爾斯境內法律
警政總長 (police and crime commissioners,上面解釋咗)
蘇格蘭今年有得選:
蘇格蘭議會 (Scottish Parliament),議會有立法功能;兩個蘇格蘭獨派政黨仲打算攞呢次選舉做變相公投,測試吓有幾多蘇格蘭人想獨立啊!
今年選舉簡介圖
有咩疑問,歡迎去 D4HK 選民行動公海一齊討論:
https://t.me/UKVoterAction4HK
英國港僑協會(HKB)今個禮拜亦會搞講座,用廣東話解釋今年英國各地有咩票投,詳情呢度:
https://www.hongkongers.org.uk/uk-local-election
請大家善用手上神聖一票,去到邊都要為香港人發聲!