《回到過去，破我未婚妻個處》

散咗幾日就係ig po新仔 以為我睇唔到
可能係heymandi 識
有前科

扑左好多獲啦啵...

.... 我明了
姐係女主一早破左男主處, 依家係爭結婚
男主就係因為女主焗結婚而要破番女主處

如果真係咁你會唔會逼死左樓主

結合咁多位師兄嘅分析

1. 女主要搵破處既男人，但係一直同緊其他男人一齊

2. 主角未知(1)，以為自己真係咁好，盡全力返過去破處


預計後續發展：

1. 主角之所以回到過去，我發現小曼係最大功臣，開始對佢有feel，但可惜小曼已經唔係處

2. 主角知道左女主既詛咒，男女主配合，教男角溝自己，大家破處結婚後，詛咒解除，各自搵另一半emily+小曼

純ff
求快d出文！

因為小曼已經唔係處 而男主又未發現自己鍾意小曼
以為自己仲想破完女主處 同佢過幸福未來

但係佢回到過去既同時 發現女主好多衰野 慢慢女主都逼住要同佢講自己既詛咒+有外遇

男主最後發現身邊人小曼先係最好
於是同女主達成協議，互破詛咒後，女主搵外遇/男主搵小曼，大團圓結局BBQ

我係咁理解的

文呀！！

文呀仆街

等左陣，好快出

之前我提過，小曼雙親喺佢好細個就離異，佢自細就同嫲嫲相依為命，然而其實大概喺十年前，佢阿嫲就因病去世。

所以，小曼中五就要自己一個人生活，自己照顧自己。

佢就住喺西灣河，沿住電車軌行上去，好快去得到。

我上到佢屋企，對方開門俾我入去。

佢屋企同以前一樣，打掃得好整齊、好乾淨。

以前有段時間佢幫我補英文，我屋企有人唔方便嘅話，我就會上嚟佢屋企，計落自己都有好多年無上過嚟。

「除鞋入嚟坐啦。」

小曼頭髮濕濕地，膊頭搭住一條藍色毛巾，身上著住寬鬆嘅T-shirt同短褲，似係啱啱沖完涼。

「多謝你俾我喺度住一晚。」我坐到客廳嘅梳化。

「搞咩呀，咁大個人俾老豆趕出門口，講出嚟怕唔怕笑大人個口。」

我歎一口氣話：「我老豆知道左我同Veronica結婚嘅事，佢嬲到出煙，仲極度反對，要我中止頭婚事，又話如果我唔肯就以後唔認我做仔，我地嗌霎左幾句，跟住我就俾佢趕左出門口。」

「唔係呀嘛，咁大獲？」

「唉，其實我都明老豆點解咁嬲，佢都係唔想步阿叔嘅後塵。」

「咁話時話，你究竟破到Veronica個處未？」

我搖搖頭答：「未，試左四次都唔得。」

「你係咪路架！咁多次都未搞掂？剩返唔係好多次機會，你唔係真係想死呀嘛？」

「下…你話我剩返…」

我說話未講完，小曼就補充解釋話：「我意思係你就嚟結婚，再唔搞掂佢，就無機會。」

「呢層我都知…」

「鈴鈴鈴—鈴鈴鈴—」

小曼嘅電話喺度響。

佢行入房聽電話，一講就左半粒鐘。

「十二點打嚟仲傾咁耐，唔洗問肯定係Eric啦。」

「關你咩事，八卦。」小曼傾完電話行出房。

「你就爽啦，食親都係靚仔。」我講笑咁講。

小曼dum條毛巾過嚟：「夜啦，早啲沖涼訓啦！」

「呢條毛巾你用過架？」我接住毛巾。

「食啦你，新毛巾嚟架，你沖完涼自己熄燈訓，我眼訓要訓先。」小曼打一個喊露。

「咁今晚我訓邊？」

「訓廳囉，唔通訓我間房？」

「都好喎，我訓你間房，你就訓廳。」

「你就想，諗下好啦，費事同你講，我訓先，早抖！」

小曼返入自己房，我就拎住毛巾行入廁所。

一入到去見到個沖涼房，掛左個淺藍色bra同底橫。

非禮勿視，我下意識擰轉面，拿拿聲行去敲門，叫小曼拎返佢啲底衫褲出嚟。

「點呀，你唔係諗住真係入嚟訓下話？」

「唔係啦，你入嚟廁所睇下先。」

佢行入廁所，見到自己啲底衫底褲晾曬出嚟，拿拿臨一手收走曬，場面十分尷尬。

「拿，係你唔記得收，我無心睇到架。」我都有啲唔好意思。

「死變態！」對方兩邊面珠墩紅到好似蘋果咁。

講完呢句，佢就拎住兩件衣物，急急腳返入房。

真係無辜，無啦啦咁樣俾人鬧。

沖完涼都差唔多成點，我求其抹乾個頭，就攤落客廳張梳化度訓教。

「乞嚏！」

夜晚返風，臨訓前唔記得無閂窗，啲風吹埋嚟，凍到我忍唔住縮埋一舊，但我無理繼續訓。

到第二朝訓醒，身上唔知幾時多左一張被。

小曼已經醒左，仲煲左粥。

我伸個懶腰，行到食飯檯，檯面上有粥又有炸兩：「啲粥你自己煲架？」

「無錯，鹹蛋瘦肉粥，快試下我啲手勢。」

我刷完牙洗完臉，坐過去同佢一齊食早餐。

推牙

磨牙

「得喎，又幾好食喎。」我筆一啖粥吹一吹，然後放入口。

「哈哈，估唔到我啲手勢都唔錯呢？」

「我諗十分都有七分嘅。」

「得七分渣，至少都九分啦。」小曼放一舊炸兩入口。

「費事俾咁高分你自滿啦。」

我見到小曼臉上沾左啲甜醬：「你塊面污糟左。」

「嗯？邊度？」佢用紙巾抹幾下，但抹唔啱位。

「咁渣架，咁都抹唔到。」

我拎紙巾諗住幫佢抹，當伸手就嚟抹到落去，佢突然縮後個人。

「唔…唔洗啦，我自己嚟得啦。」

然後，佢行入廁所，對住鏡抹走臉上嘅甜醬。

早餐過後，小曼先搭車返工，我就偷偷地返屋企換衫，兼攞返個銀包先再返工。

因為我驚遲到，所以同公司請左半日假。

琴日我已經拎左一日假影婚紗相，今日又無預先通知嘅情況下，請多左半日。

我上司知道左，因此而非常勞氣。

一返到公司我就俾call入佢房「照肺」。

「搞咩春呀你？無啦啦今朝又請半日假，搞到啲嘢堆曬喺度無人做！」

「Sorry阿頭，我屋企臨時有啲事，所以先焗住要請半日假，我依家即刻返出去，清曬檯面啲文件。」

「咪住！我都未講完，出面啲嘢唔好做住，我另外啲嘢要你做。」

「係咩事？」

上司喺櫃桶拎左一本書出嚟：「下晝四點喺誠品有個簽名會，你幫我攞本書去拎個簽名。」

「下？」

「下咩下？唔滿意呀？唔滿意你今晚就開ot，做曬出面啲嘢先好走！」

「唔係唔係，我去我去。」

我拎本書上手睇一睇，書名叫做《愛與死亡與我最愛的人》。

令我驚訝而又好奇嘅係呢本書嘅作者名。

鍾漢明。

呢個名居然同我阿叔個名撞名。

「阿頭，呢個係香港作家？」

「你平時唔睇書架咩，係一個台灣作家嚟。」

上司望一眼手錶：「都成三點，你快快脆脆過去啦。」

我就聽從上司指示，拎住本書，坐車到銅鑼灣嘅誠品書店。

喺車上我揭開幾頁，望下本書講乜。

原來，呢本係一本半自傳式嘅愛情小說。

估唔到阿頭佢平時咁惡，私底下卻喜歡睇愛情小說。

不過呢個作家嘅文筆的確好好，我睇左幾頁，越睇越入神，而且好有代入感。

因為個男主角同我一樣，身上都係背負毒咒。

至於個女主角就係一個患有腦瘤嘅病人。

題材幾引人入勝，我都睇到差唔記得落車。

嚟到簽名會，已經有好多人排緊隊等拎簽名，睇嚟呢個作家人氣都幾高。

我突然覺得自己都幾孤陋寡聞，台灣有個咁受歡迎嘅作者居然無聽講過，仲要個筆名同我阿叔嘅名一模一樣。

等左約莫四、五個字，終於輪到我攞簽名。

居然唔係男作家，而係一個女人。

我行上前遞本書埋去，佢抬頭望我一眼。

我呆左…

呢個作者...我識得佢…

當日同阿叔一齊步入教堂嘅嗰一個女人。

Shirley。