《回到過去，破我未婚妻個處》

阿叔就住喺同一條邨嘅隔籬座。

細細個我成日會去阿叔屋企玩，到大個讀左中學，有左自己嘅朋友圈子後，我同阿叔嘅關係都漸漸疏遠左。

「大佬呀，你係咪得罪你啲咩，點解你死唔斷氣，係都要跟住嚟？」阿叔入lift，按下3字。

我跟住佢入lift：「我煩你都係想你聽我講，阿叔你快快脆飛左Shirley，真心唔可以同佢結婚。」

「都話左我唔會同佢結婚。」

「你依家可能係咁諗，但兩年後話唔定你就會改變主意，所以趁未鑄成大錯前，最好即刻同佢斬攬。」

「得得得，你好煩，我聽日就同佢分手，咁你滿意未？」升降機到達三樓，阿叔快步行出升降機。

「你係真先好講。」

阿叔打開屋企門：「我講真架，咁你走得未？」

「都係唔好，我要見到你講分手先放心，唔好等聽日，家下你就打電話同佢講。」我跟埋對方入屋。

「唉頂，你真係好q煩！你口口聲聲話，兩年後我會同Shirley結婚，而且我仲喺婚禮上噴血死，咁你有無證據？你話我死左，咁『車頭相』都要俾張嚟睇下掛，我先知你講真定講假。」

阿叔放低工具箱，然後攞出打火機，點一口煙。

「車頭相…？呢樣我又無喎…」

「咁你無證據，我好難信你，啱唔啱先？」

阿叔吐出煙圈，拎起一本放喺茶几嘅書，坐到梳化揭開嚟睇。

我以為係波經、馬經之類，睇真啲發現原來係村上春樹嘅《挪威的森林》。

阿叔平時粗人一個，睇開唔係龍虎門就係龍虎豹，幾時變得咁有文學修養，學人睇村上春樹。

「係咪我有證據證明，你就信我先？」我問阿叔。

「你揾到先再講。」

我一心想說服阿叔，無奈手頭上無證據，又確係令人難以信服。

「點呀，有無證據？無你就唔好再阿支阿左。」佢又吐一口煙。

阿叔係一個好硬頸嘅人，我都知要氹掂佢唔係咁容易。

想當日我老豆為左勸佢唔好娶Shirley入門，幾乎打大交反面咁滯。

我老豆講到明如果阿叔堅持結婚嘅話，佢就要同對方斷絕關係，可惜說話講到呢個份上，阿叔都仍然無動於衷，堅持要結婚。

所以佢話同Shirley只係玩玩下，我係唔多信，雖然事實上佢份人又真係幾花fit，換畫快過換鞋，但係事實擺在眼前，兩年後佢呢隻無腳雀仔，真係綁「死」左喺一棵樹上。

阿叔合返埋本書，打一個喊露：「我返房恰陣先，你走嗰陣唔該記得閂門。」

「等陣先阿叔，仲有啲嘢請教下你。」

「又咩事？」

既然阿叔係情場浪子，溝女有一手，咁不如就揾佢教下路。

「依家我呢，就溝緊個十幾歲嘅靚妹，已經衰左幾次，想問阿叔平時你有無咩溝女伎倆，不如教兩招嚟？」

「我揸住架『二碌』，由東廊走轉去謝斐道，一落車啲女就自然走過嚟架啦，唔洗溝架喎。」

我阿叔玩開電單車，後生嗰陣去勻港九新界揾人片車，後來先收心養性，無再玩啲危險嘢。

「咁…咁即係點？」我問。

「即係手車夠快就識到女，你識唔識揸電單車？」

「唔識。」

「咁我就幫你唔到。」

睇嚟我問錯人。

我返到自己屋企，咁啱遇著十六歲嘅我出門。

「咦，你去邊？」我問。

「出去食個飯，然後同阿德落網吧打機囉。」

「老豆老母唔返嚟煮飯咩？」

「唔返，佢兩個今晚過澳門。」

照咁講法，上次我開唔到門，響門鈴無人應，真係因為屋企無人。

後尾老豆老母有返嚟，我就喺走廊遇到佢地，當其時隱約聽到佢地講話，唔記得帶身份證，睇嚟係返轉頭攞返。

兩老一得閒就會過澳門揾朋友打麻雀，一唔打就會身痕。

「咁你幾點返嚟？返嗰陣順手買個外賣返嚟。」我話。

「你咁大個人就自己買啦。」

「咁麻煩...算啦，我地一齊食啦，反正我都有啲肚餓。」

「唔係嘛，食飯都跟住嚟。」

「係啦，行啦。」

我同「自己」嚟到附近一間常去嘅冰室。

我地揾個卡位坐低，我頭上正前方掛左一部電視，播緊多啦a夢。

至於坐喺對面嘅「我」，不時探頭望出門口。

電視播緊呢集多啦a夢，講大雄時空穿越返去，撮合佢老豆老母嘅故事，臨尾大雄阿媽同老豆差少少無法如期相遇，導致大雄幾乎消失咁滯。

呢個故事令我諗起《連鎖蝶變》呢套戲，一個微小嘅變化隨時有可能改變整個格局。

我回想返起Kevin同Veronica平安夜前鬧嘅嗰一場交。

Kevin得知自己戴綠帽，本來好嬲，後來Veronica為左復合，出動到𠝹手呢招，Kevin因此而被深深感動，復合之後佢地就感情激增。

倒返轉嚟諗，假設佢地無鬧過交，從來無𠝹過手，咁平安夜嗰一日話唔定唔會上床。

我順住呢個思路喺度諗辦法。

「咦，咁啱嘅？」背後傳來小曼嘅聲音。

我回頭一望，十六歲嘅小曼映入眼簾。

佢一把長度及頸嘅短髮，一身街坊look，鬆身嘅淺黃色T-shirt加短褲踢拖，個樣望落同2021年嘅佢並無太大分別。

「你又嚟呢度食飯？」十六歲嘅我明知故問。

佢根本就知小曼經常幫屋企人，嚟呢間冰室賣外賣，佢啱先猛咁「裝」個門口，就係等小曼出現。

「我幫嫲嫲買外賣渣嘛。」

小曼嘅父母喺佢細細個就離左婚，係佢嫲嫲一手湊大佢。

「呢個係你堂大佬？」小曼望我一眼。

「疏堂嗰隻，唔係好熟。」十六歲嘅我話。

「哦~原來係咁。好啦，咁我唔阻你地食飯。」

小曼坐到另一張檯等外賣。

十六歲嘅我睥埋嚟，眼神中埋怨緊我喺度阻住佢。

食飯嗰陣，佢周不時都偷偷地望過去，眼神閃閃縮縮，又想睇又驚俾對方發現。

呢種忐忑嘅心情，苦得嚟又帶點甜。

我明白呢種心情，因為我都經歷過。

呢一刻，我望住「自己」再經歷一次，心裡又有一番感受。

小曼拎到外賣，行過嚟講再見，十六歲嘅我點點頭，有禮貌咁講bye bye。

我地食飽飯，十六歲嘅我落網吧打機，我就拎條鎖匙返屋企先。

喺屋企樓下，我撞到老豆老母，佢地似係返嚟拎完身份證，趕住搭的士坐船過大海。

我未嚟切上前打招呼，佢地就上車走左。

返到屋企，我沖涼換衫，然後攤喺梳化，繼續諗方法破Veronica個處。

Push

推一推

夜晚十一點。

十六歲嘅我喺出面打完機返嚟。

「哇，你做咩著我啲衫？」

「你啲衫咪即係我啲衫，係啦，我想問你，你有無多一部電話？舊嘅都得。」我問。

「舊電話？你要嚟做咩？」

「我喺2021年帶返嚟嘅電話，喺呢度用唔到，所以問你借部電話用。」

「好似有部3310，我陣間揾下有無。」

佢沖完涼後，喺櫃桶揾左部Nokia舊款手機。

「用完記得還！」佢一手揸住毛巾，擦乾頭髮，一手遞部電話俾我。

「得啦，用完一定還。」我開著電話，check下啲功能正唔正常。

「話時話，你係咪破到個Ver咩ca個處之後，就會返翻2021年？」

「應該係掛，我諗佢個處一破，我就會被送返2021。」

「咁你走之前，快啲講下今年年會考每科考咩題目，等我提前準備下都好。」

「會考題目？過左咁耐嘅嘢，我考完早就唔記得曬啦喎。」

「有無搞錯，少少都唔記得？」

「大大話話都過左十幾年，真係無乜印象。」

「咁我會考最後拎幾分？」

我諗左一陣答：「十五分，之後考A-Level都考得麻麻，符符碌碌咁入左OU，所以我睇你要努力過我，俾多啲心機溫書先得，最好考到個二十分。」

「……」

十六歲嘅我掛住㩒電話，無理我。

「我同你講緊嘢，你唔好掛住同小曼sms。」

「嗯？你又知？」

「都話我就係你，你做過咩，諗緊咩我全部都知。」

「偏偏會考出咩題你就唔知。」佢歎一口氣，「唔同你講咁多，我返入房先，你自己熄燈。」

「你入房訓，咁我訓邊？」

「訓廳又得，訓老豆老母間房又得。」佢返入間房，並閂埋房門。

最後我揀左訓廳。

收好部Nokia電話，較定八點半鬧鐘，我攤落客廳張梳化度。

訓就訓得唔多慣，不過同Kevin鬥完波都無好好抖過，身心疲倦嘅我合埋眼一陣就訓著左。

第二日朝早唔夠八點，十六歲嘅我就嘈醒我。

「喂喂喂！唔好訓！快啲起身！」

我睜開睡眼，望一望客廳個鐘：「都未夠八點半，俾我訓多陣先啦。」

「訓你個死人頭咩！快啲起身啦！」對方夾硬扯我起身。

「搞咩呀你，想訓多陣都唔得。」

「陣間有人上嚟，你快啲閃人，唔好又好似琴日咁阻住曬。」

「邊個咁一大早上嚟？」我揉揉睡眼問。

「你唔好問咁多，快讓個位嚟…」

「叮噹！叮噹！叮噹！」

門鐘響起。

「拿，我依家去開門，你刷完牙好快啲閃人！」

我俾「自己」推入廁所。

洗完個臉，個人清醒左啲先諗起，上嚟嗰個應該係小曼。

佢嚟同我補英文。

中學嗰陣我啲英文好差，小曼義務幫我補習，作為交換條件，我就幫佢諗辦法追阿德。

我咬住牙刷，行出廁所望下。

十六歲嘅我摷亂自己個頭，打開度門：「乜係你？神咁早響人門鐘嘈住曬，咩事呀？」

「你唔係呀嘛，仲未起身？琴日咪講左八點上嚟同你補習囉。」

十六歲嘅我伸伸懶腰，打一個喊露，扮曬嘢咁話：「係喎，唔記得約左你添，但你都唔洗響咁多次鈴架，想嘈死人咩…」

「邊個叫你咁耐都唔開門。」

小曼入屋見到我，點頭對我打一聲招呼，我亦點點頭講左聲早晨。

佢地兩個坐喺廳度補英文。

「早幾日我俾你嗰份past paper，你有無拎嚟做？」

「有，不過reading有啲難，做左幾題就放棄左。」

「篇嘢唔係好多生字，應該唔難架，你分明係懶先唔做。」

「你識就梗係唔難，我唔識咪覺得難…」十六歲嘅我漫不經心咁反駁。

此情此景勾起左我好多埋藏喺心底嘅回憶。

眼前呢個我擺出一副懶係唔專心嘅樣，實際不知幾留心對方嘅每一言，每一語。

雖然知道小曼唔鐘意自己，但能夠有機會同對方獨處，心入面已經好開心。

十六嘅我望過嚟，做口型叫我走，而我亦無謂做「電燈膽」，刷完牙就離開住所。

對我嚟講，十六歲嘅事已成過去，做人要向前望，依家嘅我有更重要嘅任務。

磨牙磨牙！

訓前一推

新讀者 lm 劇情好正

而家大約出左幾多到？

進度大概去到一半

無
存貨出完，呢兩日都係即寫即出

綠日子乜撚

呢到都有阿狗

可能Veronica 係要同自己扑過嘅第三個人結婚，同主角相反

文呢，主角醒d呀唔該