〖 PART 4 - 改善方案 〗
針對日前出現嘅問題同未來發展方向，我哋全體員工商討咗以下改善方案。好多細節會因應律師意見同實際運行上再作調整，但都想略略同大家公佈。
1. 為咗培訓手足更進一步，所有部門主管及以上職級（包括BOD）嘅合約為兩年制。如果當刻未有其他手足接棒，咁就要由全體員工投票，過半數同意先可以留任，目標兩年後每個部門都有獨立主管。
2. BOD （無論幾多個）嘅薪金上限為全體員工薪金嘅30%。
現時BOD薪金依據7-9月薪金支出而制訂，並由11月開始會作即時調整，其後將會每半年依據過往半年平均數字調整一次。
3. 全體員工每個月舉行一次例會，管理層需要向員工公開P&L以及內部業務狀況，達互相監察之效。
4. 邀請3-5位第三方人士加入BOD成為非執行董事，例如同光時有bonding嘅人同員工代表等等。因為我哋相信，大家都想光時變好。第三方並無實利，佢哋會幫我哋監察日後管理層有無好好實行所有提出嘅新政策。如果有做漏做錯，希望第三方指出。
5. 一直以嚟，光時都係優先聘請手足，而且所有員工嘅人工都畀市價高少少。嚟緊出獄義士重獲自由後加入光時，頭三個月薪酬會比同職級同事高。全職手足可以選擇頭三個月每月出糧出多10%底薪，或者喺做滿三個月後一次過領取15% x 3個月底薪，而兼職手足嘅頭三個月人工都會比同職級同事高10%，希望可以幫助義士一解燃眉之急。
6. 全體員工每半年進行一次Performance Appraisal，由Department Head review，雙方一齊訂立工作目標，一齊進步。
7. TIPS由全體員工跟據當月工時平分，顧客心意可以直接令團隊所有手足公平受惠。
（以過往三個月數據作參考，全職員工每月將獲得約$2500）
8. 增設年結花紅，如果每個財政年度完結後有盈餘，會跟據Performance Appraisal表現按比例發放畀所有全職員工。
9. 作為員工，無論背後咩身份，工作表現仍然係最重要嘅一環，因為除咗聘請，培訓都係我哋另一個目標。為咗加強溝通同員工積極程度，我哋會設立三個月試用期，如果同事表現參差，Department Head保留裁員嘅權利。
10. 由於我哋架構暫時未齊全，BOD成員需要兼任多個Department Head，喺填補所有Department Head空缺之前，會按照員工及發起人商議所同意比例分發佣金。當月平均每張訂單金額高於$600，每張訂單整個BOD（無論幾多人）可共得$5。
11. 每月對外公開現職員工（分全職/兼職）同管理層數目、每個組別嘅平均薪金、每月訂單量、每月新貨量、TIPS總額，希望公眾一齊見證我哋嘅不斷改變。
〖PART 5 - 總結〗
光時可以撐到宜家，每一個人都有功勞，包括所有前員工、前義工同前管理層。即使意見不一，有散有聚，每個人做過嘅嘢都係功不可沒，值得我哋每位員工嘅衷心感激。喺今次事件入面，有唔少指責都係由佢哋提出。無奈地，事件愈演愈烈，開始演變成有心人利用不實嘅資訊嚟營造惡意攻擊。
我哋深深明白，香港人至係我哋真正嘅老細。光時能夠開業，能夠撐到今時今日，都係多得香港人一直嘅支持。我哋知道香港人希望藉由我哋真正幫到手足，今次我哋喺管理上的確有好多要改善嘅地方，辜負大家對我哋嘅期望。
但我哋始終認為，喺未掌握事實前就先行起底同人身攻擊，對件事係唔會有任何幫助。若果日後有同類事件出現喺相似性質嘅公司，都希望大家畀少少時間佢哋，因為性質敏感，好多嘢真係唔講得。喺滿足香港人對我哋透明度嘅期望同保護手足之間，我哋相信所有同業都會同我哋一樣，選擇保護手足為先，再次希望各位見諒。
嚟緊我哋將會虛心聆聽落力改善，確保做到員工同顧客嘅期望，希望大家繼續監察同見證光時嘅成長，而務實嘅提問同指責都唔可以一刀過以分化二字蒙混過關。今次因為光時嘅問題，令到持唔同意見嘅大家分成兩邊互相指責，絕對唔係我哋想見到嘅事，喺度再次同大家講聲對唔住。
光時將要迎接無數個未知，但我哋必須強調，今次呢個變革係光時全體員工商議嘅結果，行落去會唔會成功真係唔知，但起碼係我哋嘅選擇，條路自己揀，我哋會一齊去承擔。
點都堅持行落去
香港有光 自由有時
光時團隊
2020-11-03