2014夏 - [處男親善訪日之旅]7天京阪鴨仔團

樓主食左2餐宵夜 好好胃口

Day 07
因為我地一行人一次book左好多間房
所以酒店回贈左我地每人1張早餐券
於是趁今日用左佢
因為約定左10點集合，所以9點先上去
諗住搵同房早少少起身上去食
專登開大個窗簾諗住嘈醒佢地
不過我啲同房都係咁既死樣


咁好啦，我自己去食
酒店餐廳設係15樓頂樓
算係呢度附近最高建築物
頂樓餐廳自然係sell景，所以開哂大窗
風景好開揚，全部都係樓
大家可能夜晚唔係好覺
道頓堀條河朝早睇係深綠色既


遠處玻璃幕牆就係天王寺既HARUKAS
當年啱啱起好冇耐，係日本最高既建築物
最右邊個塔仔就係通天閣


第一次係日本酒店食早餐就冇乜印象
因為味道好正常，唔係太特別


食完返到房，佢地拉埋個簾繼續訓
跟住唯有拉哂被扯佢地起身
費事到俾Professor屌

第一次去日本係咁上下入門啦
不過你地捱多陣，寫大阪篇會正多少少
東京篇可能你地覺得太普通，所以唔寫了
基本上同杜如風套東京攻略差唔多行程
明明我早過套野播既時候去，係佢抄我

今日去奈良，最大目的就係去撚鹿
奈良市區既鐵路交通俾2間公司壟斷
一間係JR，一間係近鐵
但係JR個奈良站離啲鹿主要聚居地奈良公園有一段距離
所以大部分人都會搭近鐵去近鉄奈良駅，近好多
我地住近日本橋，所以去近鉄日本橋駅搭
呢度又係要分清楚搭邊架車最好
去奈良最快嗰架係快速急行，唔駛40分鐘就到
話就話係第二個站，但奈良都幾多人去
所以過左呢個站都已經坐滿9成位


奈良作為大和民族既發源地
本身係歷史上都有一定地位
亦都做過幾百年日本既首都
所以附近都好多遺跡，例如古墳，平城京等等
不過今次就唔深度遊，剩係撚下鹿就算


一路沿著大路行就開始見到超多鹿
間唔中都見到有幾檔賣鹿餅
但最奇怪既係點解啲鹿剩係搞啲遊客
但係又唔搞鳩啲鹿餅檔
甚至係檔主行開陣啲鹿都係眼望望唔偷


鹿餅都好平，嗰時買150yen就有10塊
唔知而家有冇加過價
我同啲fd夾左每人5塊咁喂
基本上你拎住就會有鹿跟住你


如果係大戶手持大量現貨拋售
無知既散戶(鹿)就會眼金金望實希望接貨
之後啲散戶就會慢慢被吸引湧哂埋黎



鹿同大部分動物一樣
都係要女唔要仔
男既冇鹿餅一律無視
女既冇鹿餅照樣圍實你


啲老鹿就訓係路邊食花生


係奈良呢度，除左鹿多之外鴿都好多
主要係食跌落地既鹿餅碎同食屎

與其話啲鹿唔去搞鹿餅檔
倒不如話佢地係守住個檔
昅實睇下有邊個買就衝埋去


如果你唔俾野食啲鹿而影相
通常佢地都係西口西面


呢度啲鴿都係十分之肥
因為啲鹿餅其實都係天然野，佢地都食得
有啲人俾鹿嚇到跌左幾塊落地下
啲鴿都會走去啄

https://imgur.com/a/fNdvJ0a

行到中間會見到有個好特別既神社
叫做冰室神社
唔係講緊香港茶餐廳嗰啲冰室
而係講裝冰既地方
以前奈良仲係首都既時候
皇室有人專門趁冬天用附近既河水製冰
到夏天拎番出黎俾皇室消暑
所以專登起個神社供奉冰神


係近鉄奈良駅行20分鐘就會到東大寺
呢度係佛教另一個教派華嚴宗既大本營
同時係奈良世界遺產既一部分



呢度係東大寺南大門，有超過800年歷史



最入面就係東大寺，入面有個好大既大佛
不過影佛像好似唔係幾好
影個遠景就算


只要有人既地方就會有鹿出沒

因為呢度都幾多遊客
附近食店又唔係多
所以大家都過左食飯時間先搵野食
本身Professor都希望我地係行程既時候共同行動
但係尋日幫佢慶祝完生日，心情好
所以就話3點前係番近鉄奈良駅等就得
我就跟番同房fd子AB同Professor食飯
揀左呢間わらべ 喜庵，專食蕎麥麵


餐牌好得意，係畫出黎既
當然都好貼心咁有齊中英韓文


我叫左天婦羅蛋花蕎麥麵
蕎麥麵就正常味道，不過浸住熱湯好是林
湯底就比較淡，不過有蛋花所以都好香
天婦羅浸左湯所以唔脆，但係唔厚粉


食完飯就行番去站度
中途見到啲鹿行哂出馬路
所以都好多牌叫啲車小心
不過啲鹿都識得睇車過馬路
啲車讓佢地行都識點頭多謝

3點之後搭番近鐵返日本橋之後就係自由活動
我就跟左其他人去梅田行街
行完放低野去酒店就去番松屋食飯
我都唔記得左呢餐係第幾餐松屋
我叫左蔥鹽燒豚肉飯 + 半熟蛋
但今次呢個飯係我覺得全個trip最好食既一餐
你地可能會問，你都食過一次，今次有乜咁特別
你地睇相就會知，呢張係上一餐


呢張係呢一餐
個分別就係，今次啲豚肉係燶啲既
所以特別香口，啲邊位仲脆脆地
但係松屋又唔可以要求個店員整燶啲，好可惜


加埋隻登落去，再加啲燒肉汁同七味粉
之後撈埋一齊
嘩！人間美味


同場影番低松屋部食券機
以前係逐個制咁禁
不過我見陸續換左做touch screen
仲可以揀語言方便遊客

食完飯返酒店執喼
執到咁上下見個喼都仲有位剩
所以都係走左去Donki補買手信
以前香港都仲未開咁多賣日本野既舖頭
手信都仲可以係Donki執黎塞住老母同親戚把口
例如買下特別版kitkat，百力滋嗰啲
而家連香港都開左咁多間Donki
要買啲香港買唔到既手信越黎越難

買買下野撞到同房fd A同Professor
佢地未食飯，問我一唔一齊
講到食我點會唔join埋一份
但係買完野排隊退稅都要成個鐘
搞搞下都11點
fd A唔知係邊度搵到間居酒屋
於是我地3個男人係唔識日文既情況下就入左去

我地坐卡位，有道拉門隔住走廊
所以私癮度好高
佢啲menu係釘哂上牆
想落單就拉開道門叫店員過黎
係用Google Translate + 瘋狂手指指This This This既情況下
總算冇落錯單叫啲奇怪野



fd A每次食飯都要叫酒
今次佢就話試下日本酒
呢度細細支都要950yen，都幾貴
我就唔係好識飲，但因為佢係熱酒
所以飲落去全身都熱
不過佢送酒黎既時候都附上下酒菜
係麻油撈蔬菜絲+海帶+粉絲，鹹鹹地都幾好送酒
fd A同Professor冇食飯打底
一陣就上哂頭臉都紅哂



我地叫左啲前菜
上而下就係泡菜，豆腐，味噌牛筋
特別係牛筋超好食，佢雖然係凍
但係牛筋好彈牙又唔韌，味噌又唔係好鹹
送酒黎講一流


主菜就係呢3盤炸串，樣樣都有啲
有菇有茄子有蛋有四季豆有蝦有蟹柳
你問我好唔好食，我會覺得啲前菜好食啲
炸串熱辣辣，但係油左少少
如果啲野真係新鮮既就唔會炸啦，係咪先



吹完水食完野都1點幾
當然就屈到Professor請我地啦
之後就返酒店
同房AB瘋狂係度執喼執到3點
我就一早執好哂一早訓左

Day 08
今日就Last Day冇行程
Checkout左就直接去機場
係呢度去機場最直接應該係去難波站搭南海電鐵
不過因為我地買左張HARUKA來回券
買既時候已經俾哂來回車程自由席
所以唯有去番最近既站上車
呢度最近應該係去天王寺站，但係實冇位坐
所以專登搭地鐵去新大阪站



排隊checkin個counter長到不得了
不過15分鐘就搞掂哂


唔怪得咁多人啦，又係坐747...



飛機餐係咖哩雞飯，好撚難食


話咁快就返到香港，好唔捨得
第二朝上堂返早，屌


[處男親善訪日之旅]7天京阪鴨仔團，完。

後記
今次因為第一次去日本，人生路不熟
而且行程唔係我plan，變左全程都係跟人行
所以其實唔知自己去左邊，更加唔知自己想去邊
於是之後就想自己去一次，全部都係自己想去自己想食
所以就自己開定個excel自己定行程同食野
我而家手上都plan緊北海道，東北，九州
但應該有排未去到
不過事前當然要練好啲日文同做好啲research啦
之前剩係睇動漫，而家就開始睇多啲日本綜藝
除左學日常用語同聽力測試之外
順便睇埋啲隱世地方同食店方便下次去

下一篇 - [毒撚日本自由行]兩個小生遊日本7天團(京阪奈篇)
揀完相就會出

一次追哂，係咪松屋贊助

支持

睇完之後好想去日本食蔥鹽燒豚肉飯

松屋係諗唔到食乜既情況下簡直係恩物
一黎周圍都有，二黎又抵食
三黎基本上唔會中伏
除左上次去山陰有啲棘手之外其實都幾好
倒不如話山陰真係鬼影都冇隻

記住係蔥鹽燒豚肉飯+半熟蛋

終於又追完樓主既第1次遊記
留名等睇下次食左幾多次松屋

仲有冇遊記

好似同professor幾friend

唔駛驚喎，都仲有貨既
手上仲有3個，而家可以順住寫落去
希望可以捱到日本通關再寫落去

所以之後Professor成日介紹啲好路數俾我地幾個

係第一次去唔知食乜先食咁多松屋姐
之後開始識少少日文同識搵野食
所以夠膽入其他舖頭
除非食早餐/嗰頭美食沙漠啦
如果唔係都試下其他

[紅葉。基友。京阪奈]兩個小生去日本7天團
https://lihkg.com/thread/2232918

各位可以過黎呢度

想問下間飯團叫咩名