2014夏 - [處男親善訪日之旅]7天京阪鴨仔團

有冇同女同學扑嘢

之前係伏見稻荷大社求學業
結果出左一支「吉凶不分末吉」既籤
查番原來嗰邊既籤唔係話大吉大凶咁分
而係分左17種，如果大大吉係排第1既話
吉凶不分末吉就排名第13
姐係比衰過貼地好少少
今次黎到清水寺我又唔信邪去左求籤
睇下另一個神明點睇我學業
呢度出左名凶籤多，佔總數3成
點知真係港女冇既野，單字一個「凶」
籤文又不遇神仙又意闌珊，大致上黎講係死路一條
結果好既唔靈醜既靈，下一年GPA仆哂街
我以後都冇再去神社同廟求籤了


如果要入正殿就要買入場券
位位400yen，好似書籤咁
入到去好古色古香，成個建築都係用木組成
但其實都係黑蚊蚊，加上人又多，影相好難影
然後我見到個個都行去舞台邊影相我又跟住去影
舞台側邊望出去可以睇到京都市區全景
前幾篇講到京都市區起樓有高度限制
所以係呢度望出去係完全冇野阻檔
今日天色都好清，可以望到10公里外既山
一支針嗰度就係全城最高點京都塔
京都塔左邊一餅野嗰度就係京都站同附近啲商場


舞台正面望出去
上面就係子安塔，一個三重塔建築
下面就係音羽の滝，啲人拎住個勺去水柱度裝水飲
不過做緊工程搞到啲工程車入哂鏡




清水寺其實都幾大同好多條路
而且啲門同堂個樣又係差唔多
好容易會唔知自己行左去邊
呢幅圖都講得幾清楚

日譯中通常好多好笑野

清水寺正殿後面有個神社叫地主神社
大大隻字寫住個緣字就知係求良緣
除左係情侶之外，基本上女多過男



建築風格同清水寺差唔多


呢度擺左2舊石
一舊係著藍色衫個女仔隔離
另一舊離佢10m
相傳2個人閉上眼由一邊石頭走去另一邊石頭
如果成功行到去，戀愛既願望就會實現
不過如大家所見，多人到乜咁
我係度觀察左5pair人冇一pair成功
因為一定撞到人，而撞到人就一定開番眼講すみません
下次要玩就早啲過黎啦


頭先天氣明明幾好
行行下居然落起大雨
但都無阻啲靚女走過黎求緣

攪到我都想出返13年第一次去日本既遊記 但d相都唔知去左邊 個陣去係冇智能電話 得睇住本天書

雖然係落雨但係冇理由唔行架
呢個位就係清水寺正殿
全木造建築，一粒釘都冇用過
啲人落雨冇帶遮去哂嗰度避雨
啲露天地方即刻少左好多人鬆動哂


呢個就係頭先係正殿遠望既子安塔
近睇就好似冇乜特別


之後行番頭先條檔梯落去音羽の滝
好多人落住雨都排隊飲水
呢度有3條水柱
1條代表學業，1條係戀愛，1條係長壽
有個勺俾你，只可以裝其中1條水柱既水
而且只可以飲一啖黎祈願，如果唔係就唔靈
唔存在一次過滿足你3個願望
但係咁大雨，其實都係飲雨水
而且落大雨可能沖哂啲雜質出黎


係入面hea左1個鐘就走了
因為我地仲未行出面啲舖頭
佢地5點就收，得番唔夠1個鐘行


落完雨就聽到好多呀呀呀既雀聲
原本係有好多烏鴉
有啲飛左落地下，原來好撚大隻

我都係14年去伏見稻荷同清水寺

唔知係上天憐憫我成日抽凶籤仲要落雨定點
出現左一個好靚既雨過天晴耶穌光
本身耶穌光出現既條件都十分苛刻
厚雲得黎又要有罅，仲要日出日落時間先見到
所以好多人都專登影相留念



當時已經係4點幾
有啲舖已經準備收皮
好多人都準備走


不過落完雨出太陽好熱要食啲凍野
買左支300yen既抹茶雪糕
唔甜得黎都好滑好重茶味，分數7/10
當年以為後面嗰舊係普通餅乾
點知咬落去硬到仆街，牙都斷咁滯
search番原來呢舊野係京都出名最硬既和菓子八橋
跌落地唔碎不特止，疊埋幾塊踩落去都唔斷


其實因為好快就5點，大部分舖都關門
所以都唔係特別多野行
頭先行清水坂上黎
而家就行產寧坂二年坂行番落山
係嗰度我邂逅左日本最愛既調味料
間野叫おちゃのこさいさい
最出名辣油，我一試就愛上
無論食乜(除左甜品)我都會加少少落去，好食好多
搞到我每次去京都都會買一堆擺屋企
我上次同兩老去日本買左10樽番黎
老母問我買咁多做乜，而家睇到我有遠見未
而家存量仲有3樽

而家就睇到第二個天文現象 - 晚霞


不論係乜野年代乜野地方
啲阿叔硬係鐘意擺啲咁既Post


行到落去就諗住等巴士返酒店準備食飯
但因為實在太多人係巴士站等巴士
而巴士黎到呢度已經係尾站，基本上9成滿
等左10架都未上到車
而預想到前一日太多人一齊食飯中大伏
所以Professor話今晚就分開食，而家就解散
我地有人分批上到巴士
我就同另一批人行番京都站
都行左差唔多45分鐘，行到去都天黑

睇錯處男日本叫鴨團

點解唔食埋先返京都站

係囉，自己活動應該食完先返京都站，或者一班男子食完再找下一活動

返到去京都站就去番酒店放低野
我個同房同Professor好熟
話叫埋Professor食飯好唔好
試下屈佢請食飯
我地當然話好啦
咁啱Professor行到房就俾我地截住
啲學生肯同佢食飯就覺得好感動，就應承左我地
以上為內心設計對白

前一日去左地下街搵食
今日就去Yodobashi上面
嗰度有成層都係餐廳，都好多野揀
睇到有放題係男女唔同價
咁肥婆咪好著數


老細Professor想試下大阪燒
於是就去左鶴橋風月
當年既價錢唔算貴


我地This This This完之後就等食
枱上面有塊大鐵板等陣間可以直接整
可能因為我地一睇就知係遊客
所以有專人幫我地整


我地4個人都叫左好多野
2個大既海鮮御好燒，腸，薯仔炒露荀
仲有未上既香辣炒麵
因為有人幫我地炒埋仲叫我地快啲趁熱食
所以無論賣相同火候都掌握得好好
全部都好好食



整御好燒都幾麻煩
將啲漿，菜同海鮮撈埋煎一陣


之後上面加啲麵同木魚花上去
啲木魚花因為熱力會好似海底啲海草飄黎飄去咁



最後就反佢鹵味
搽番啲大阪燒醬同沙律醬上去就食得
當年第一次食，感覺好新奇刺激又好玩
但你問我係咪好好食
我答你我剩係食到大阪燒醬同沙律醬味
所以都係試下就算
係隔離枱見到有人反佢鹵味失敗
同佢同行啲人個個恥笑mode


大家成年人，梗係要啤一啤


大家傾完偈飲飽食醉都成2個鐘
大家都食得好飽，老細Professor真係請我地
埋單都唔駛8000yen，好抵食
不過呢隻桃個樣好有魔性

因為我地個個都驚死唔識返酒店
所以都係返左京都站先再行動

同埋大家搞完大學啲野都好攰
幾日之後仲有一間大學要去
Professor都有俾啲意見希望我地改善下啲野
所以其實冇你地諗到咁得閒
唔係真係旅行團咁100%時間都係玩
我地個個都有拎埋notebook過黎
方便隨時同大學嗰邊溝通同搞powerpoint剪片揀相嗰啲
番到香港過幾日又要出個Presentation講今次個團
食完飯就要抽時間搞呢啲Task

食完又係行街既時候
見到有間舖專賣啲奇怪T-shirt
やらないか佔左多數
如果唔知既朋友你一google就會知
當然仲有啲例如ド変態，香菇派VS竹筍派
唔識日文既外國人以為係普通漫畫印上去既T-shirt就買左落黎
係日本周街著應該係會俾人投以關愛既目光
而家Uniqlo都成日出呢啲動漫合作T-shirt
但9成9都係柒到核爆，最後要掟去特價區賣39蚊清貨



頭先開餐既Yodobashi京都店
係京都站行過去5分鐘唔駛就到


夜晚眼光光又未訓覺
於是走左去買甜品食
咁啱見呢隻明治プリン超BIG布甸
仲要係增量版，性價比超高
而家香港Donki都有得買


本身以為佢會勁甜，但又唔會
食落都唔會一pat pat，好滑，分數8/10

Day 3
今日得1個行程，就係去嵐山
之後就轉酒店去大阪
前一晚收到我地團既總行程師話第二朝9點半係lobby集合
咁我冇乜點買野，自然都唔駛點執喼
食完個布甸刷埋牙睇陣電視就訓左
我本身就比較醒訓，一醒就唔會懶床
9點半集合我8點就醒左
但間房另外嗰2個男人好似唔願醒咁
咁算啦，橫掂仲有成粒鐘
我自己落去買早餐返上房食



上次去便利店有人陪住買就冇咁驚
今次自己一個去，真心驚死左唔知點算
因為當刻真係完全唔熟悉日文
而家去左咁多次，聽慣左某啲句子我都識回應既
但好彩大部分日本人買野都係cool cool地唔講野
只要應付到店員問你乜就搞掂
同埋突破左個心理關口，其實又真係唔難既
以下係我自己既心得：

1. 繁忙時間啲便利店係好多人排隊等俾錢
買野唔好計好數先慢慢拎錢出黎
如果你想用散紙就自己計好數拎定錢出黎
一係就拎定大紙俾佢找散拿拿聲走

2. 正常程序do好哂啲野就會叫你俾錢
當店員講#$%yen，你聽到個"yen"字就姐係要俾錢
唔止便利店，其他舖頭計好哂啲錢佢會講番個銀碼出黎
聽唔明唔緊要，收銀機有show到銀碼既
就算部收銀機冇銀碼顯示，佢都會印張單出黎俾你睇

3. 日本大部分零售同食店既Cashier側邊都會有個淺淺地既兜
其實個兜係用黎收錢，你俾既錢放上去就得
如果冇嗰個兜，個店員都會自動隊隻手過黎接錢
千祈就唔好直接放枱面，咁樣唔係幾好

4. 當店員do完野唔係即刻講個價錢出黎而係講左啲野
又或者俾完錢之後又同你講左啲野既時候
咁黎黎去去都係額外既service問題
店員通常會講@#$@$#@ "ですか？" (desuka?)
如果你買左便當類/炸雞/杯麵
通常佢會問你駛唔駛叮同埋要唔要餐具
如果你買雪糕/布甸，通常佢會問你駛唔駛羹
近來就煩啲，有啲地方收膠袋稅就問你要唔要袋
而呢啲問題既最終答案就係 - 閪
はい(hai1)唔係講緊粗口，日文意思解係，是的既意思
你答はい就點都會俾多左野你冇蝕底既
如果你懶醒答左いいえ既話
到時食雪糕冇羹你就慢慢奶
如果佢係用否定語法問你係咪唔要乜乜乜，佢肯定係玩鳩你

首先係蜜瓜包，味道正常
脆皮又唔算甜，分數7/10


銅鑼燒，甜到想嘔，分數4/10


而壓軸就係奶
小心睇清楚側邊個種類別
如果佢剩係寫"牛乳"就係真奶
姐係係牛揸出黎經消毒就出黎
如果牛乳前面多左幾隻字"OOO牛乳"
就係解原味真奶加工
例如脫左脂或者濃縮左
其他都係溝左其他野，假架啲奶
例如朱古力奶士多啤梨奶就係乳飲料
Lawson呢隻奶味都唔錯
雖然大家都係3.6牛乳
但係大學飲嗰隻大學生協牛乳係明顯地好飲啲

見到個閪字笑左
去咁多次便利店最尷尬都係買熱食
日文我唔識講 佢地又唔係好聽得明英文
次次都係用手指

晚晚要睇埋先瞓得著

布甸專登倒出黎食咁有閒情

買炸雞嗰啲手指指係最好既
同埋日文好多外來字都係直接拼英文
好似spicy, cheese嗰啲，所以都唔驚既

倒出黎先睇到布甸個樣

食完個飽飽既早餐就開電視睇
成功嘈醒同房起身
你班仆街唔好遲到呀
雖然話約9點半，但係都有人遲到
Professor當然唔係好滿意
同我地說教左半個鐘，結果10點先出發

今日我地去嵐山，坐小火車去
首先係京都駅搭嵯峨野線去馬堀駅
千祈唔好搭快速，會飛站
係搭車既25分鐘時間
我同fd子係度瘋狂談論呢個好穩重既伯伯
點解咁講呢？
因為佢訓覺既時候條腰都係挺直
而且佢有時醒左會慢慢擘大眼
但意識到未到，佢就會慢慢合番埋眼繼續訓


馬堀駅同京都市區隔左一個山
基本上已經係另一個世界，去左鄉下咁



一行出站，除左田野之外，都係田野


係馬堀駅出站行10分鐘
可以去到搭小火車既火車站
就係遠方嗰個建築
因為本身小火車都幾多人識
呢個站落車既人9成都係觀光客去搭小火車
所以唔識路跟人潮行就得，唔驚係田野盪失路


站隔離係稻田，睇個勢都差唔多收成
所以顏色好靚，好金黃
我地個個都係度影左5分鐘

熊本熊作為日本國民級吉祥物
因為其痴漢形象深入民心
一早就已經跳出左熊本進軍世界
但係呢幾隻DIY好似有啲劣


係火車站門口話有馬車坐
行過去望下，真係有隻馬



行到黎呢度已經差唔多11點
遊客都開始多
經斜路行上去就去到車站大堂


我地冇預約買飛要即場買
當然搵總行程師做，因為佢識講日文
雖然啱啱走左架車，但都仲係超多人排隊買飛
咁我地就行下大堂入面啲手信店hea陣嘆冷氣
不過啲手信麻麻地，冇乜野好行
過左20分鐘終於買好飛
我地成功買到下一班車，不過係立席票
咁車程都係20分鐘，可接受
如果話要再下一班車先有飛
我地搭1個站去嵯峨嵐山行過去算
因為架小火車係1個鐘1班

月台出面有好多福狸
但第一次睇我係係度諗點解咁大袋



認字特警第二發 - 邊度有5架車
聽講而家好似都仲未轉呢個牌

嵯峨野小火車本身有段古
佢行駛既路段係介乎嵯峨嵐山駅至馬堀駅附近
本來係屬於JR山陰本線，建於1899年
以當時既技術黎起當然係比較差
郊外鐵路單線就唔在講
佢依住保津川峽谷邊而建，所以都係彎彎曲曲咁
但由於沿途人口增加，需要電化同複線化增加班次
一黎路段貼住峽谷邊黎起，要加闊路基複線化唔係咁易
二黎彎曲線路火車都唔開得快
而且火車同路軌都增加損耗
所以JR西日本索性成段砍掉重練
重新掘過條比較直隧道直接穿過座山
呢條新線比原路段縮短左1.6公里
所以1989年條新線起好左，舊線就廢左線

當時嵯峨野小火車個社長覺得好浪費
因為條線可以睇到保津峽既自然風光
佢覺得做觀光火車有得做
所以就修葺左條廢線重新包裝，係1991年開幕

呢度係トロッコ亀岡駅
係小火車其中一邊總站
前少少就係新線同舊線既分叉點
所以係月台會見到山陰本線新線路段
真係有火車行緊架


架火車到了


成架火車有5卡，唯獨第5卡係冇窗既
我地行左嗰度上車
呢度啲位全部mark哂座位編號
唔好諗住可以是旦坐
而且我地買得立席姐係座席已經滿哂先買到
立席數量都係有限制，係會滿座
實際睇番成車人上哂都唔算太迫既



隻馬仲係下面俾人撚緊

企係邊?想去日本了

You'll need a visa.