2014夏 - [處男親善訪日之旅]7天京阪鴨仔團

當年我有係blogspot寫過個遊記俾fd睇
所以我都係執下相改下啲字眼寫番出黎

等到出文先訓

男女比例如何？

放低完行李就係附近行下
於是就落左地下街
不過因為太早，大部分舖都未開門
但係因為要趕行程，半個鐘頭就要起行
所以大家四散搵野食



有啲去左食築地銀だこ (執左)
我就去左間便當店買便當 (都係執左)
呢餐就食為左我去到日本既處男第一餐
入面有2舊飯團，2舊玉子同2舊炸雞
飯團有2隻味，一個係雞一個係三文魚
睇番我當年既評語，味道係4/10
因為炸雞係又凍又林，而且有啲貴
睇番當年400yen都嫌貴，我實在太年輕了


拿拿聲食完就拿拿聲去搭車
用番頭先換既風神雷神ICOCA拍卡入閘
處男第一個行程就係去伏見稻荷大社
係京都駅搭奈良線普通車去稲荷駅
嗰陣先意識到同一條線唔同車都會有唔同既停站
所以第一印象就係，媽，好亂呀

留名
當年日本仲未呢兩年咁多香港人擁去
好舒服

有左peach開始就俾港豬污染哂

當年uo都唔係有好多班機
不過都已經幾多台灣人
呢幾年就真係唔駛講
所以都係去遠啲少人啲

係京都駅搭2個站就到稲荷駅
一出黎行30秒就係伏見稻荷大社
稻荷就係狐狸，所以門口有個狐狸像


門口有個好大既紅色鳥居


行到拜殿前面通常都會有個水池
作為入神社前潔淨之用
呢度因為係京都必到之處
所以都有個牌教點做
首先拎個水勺倒水去左手，之後倒右手
之後倒啲水去左手啷口
跟住棟起個勺洗個柄，最後擺番去原位
但攞水要係滴滴仔度攞，嗰啲先係生水
池嗰啲係死水，唔好意頭


拜殿裝修好靚好新淨，保養得好好
當年黎到已經好多人
隔左2年去多次，就算落雨都係超多人

留名

行前少少就有得睇連儂繪馬牆
就係買塊板寫低自己心願求神祝褔
日文既大部分都係求合格求升學
當然都有遊客買黎過下癮
通常都係求身體健康，旅程順利
啲人仲摺左勁多紙鶴黎參拜
1紮有100隻，呢度起碼有過萬隻
仲要係有好多種唔同顏色，好靚


之後行去拜殿後面
就要開始行一段段樓梯
然後開始會見到好多鳥居
鳥居左右寫住奉納
其實就係啲大公司或者個人既捐獻
類似香港公司會種樹寫自己名黎積陰德
呢度拜神就會整個鳥居座係度


呢度要講下少少神社既知識
每一個神明都會有一個神社
佢地拜既野都係唔同
例如稻荷神社拜狐狸，專求財富
天滿宮就拜天滿神，專求學業
因為唔同地方都會求神
所以唔同地方都會有相同既神社
但係云云眾多神社都有一間特別叫做"總本社"
總本社意思就係神既根源既所在地
其他神社就叫做分社，係由總本社分出黎
所以全日本幾十萬間神社，都係得幾十間總本社
總本社因為靈力最強，係特別靈既
所以啲人有機會就會去總本社去求
例如真心想求學業順利，要去天滿宮拜神
唔好貪就手而去大阪嗰個
因為天滿宮既總本社係褔岡太宰府嗰個，呢個會靈啲
出面仲有得食特別版一蘭同間間差唔多既梅枝餅

伏見稻荷大社係全日本3萬間稻荷神社既總本社
所以個個都慕名而黎特別出名
而且因為稻荷神社係求財
自然好多公司都想係度留名俾神明睇
所以就會起鳥居做奉納
隨住越黎越多人同公司過黎奉納
鳥居就越黎越多，起到後期唔夠位就攝中間
所以啲鳥居會新舊夾雜咁整到密密麻麻



行樓梯最前嗰段就係最出名既千本鳥居
鳥居既密度係最高，人都係最多
神明點樣知道係邊個捐個鳥居？
答案就係背面既樁腳
有標明公司，人名同建成時間


呢度沿路行上山都係成個神社既一部分
都係keep住有鳥居出現
行足一個圈要差唔多4個鐘
因為大家都冇乜點訓，個個都腳部浮浮
所以行完千本鳥居都冇乜體力再上去
之後行番落去求左日本既第一支籤，求學業
結果好似就唔係咁好
而唔好既籤就最好綁係個架上面唔好帶走
寓意將唔好既運留係度等神幫你化解
好既籤就可以攞走，寓意將好運帶走

出入伏見稻荷大社有2條路
除左頭先係大鳥居行入去嗰條參道之外
仲有一條係另一邊，有好多手信舖同餐廳
由伏見稻荷大社側邊一直伸延到伏見稻荷駅
然後十字路口又伸延到稻荷駅，形成個T字位
係人流最多既地方


我地一直沿著T字形既"-"行過去
首先會去到JR路軌既平交道口
呢樣野係香港真係聞所未聞
因為香港既鐵路本身就係封閉式管理
鐵路橫跨道路既話一係就整隧道，一係就起高架
變成同高速公路一樣，條路得佢行又冇燈位要停車
所以香港既鐵路效率好高，可以幾十秒就一班車
平交道成本就低好多，起係平路上面就得
不過就增加左啲人過唔切馬路既意外風險
睇外國啲意外片都睇得多，日本情況都唔少
而且因為中間要預留紅綠燈時間俾車同人過
於是班次密度就受到限制，出意外時可能要全線停駛
咁難得見到就梗係要影下



行過左JR平交道之後
啲女同學見到有貓貓cafe就想去hea番陣

咁當然呢啲野就梗係唔夠Professor講啦
因為佢係我地交流團監督人，最終要同dept負責
最終佢地就咁繼續行番條街
不過影相俾我斷正Professor昅緊和服女女
可以用黎做黑材料


行到最遠嗰度又係另一條平交道
隔離就係京阪電鐵既伏見稻荷駅
係去伏見稻荷大社既另一種鐵道交通
京阪電鐵係地方大手私鐵，唔似JR咁係大範圍服務
同個名一樣係服務京阪地區，同埋滋賀既大津市
京阪之間既鐵路走線完全係對住JR黎打
JR賣點係接通2大交通樞紐大阪駅同京都駅
停站極少既新快速半個鐘內可以由大阪駅去京都駅
但入唔到京都另一個中心地帶河原町
京阪電鐵就勝在係大阪同好多唔同路線既地鐵站有轉乘
可以去到大阪市中心大部分地方
特急可以直達河原町，係大阪淀屋橋駅出發大約50分鐘
去宇治就特別方便，係中書島轉宇治線就到
雖然去唔到京都駅，要轉車先去到
但係往返京阪交通費黎講京阪電鐵平JR好撚多
所以慳錢又唔趕時間既都係搭京阪電鐵抵啲

女冇正面

Many thanks for sharing your itinerary! I would certainly recommend reading "Japan Travel Guide" at your leisure. It's an outstanding guide to Japan written by Avril Deschanel, Zooey Lavigne, Dua DiCaprio, Leonardo Lipa, Margaret Gomez, Selena Ferguson, Joseph da Vinci, Tiera Gordon-Levitt, Chloe Skovbye and Margot Grace Moretz.

混混噩噩咁行到2點幾
我地個個都想訓覺，所以都想返酒店休息
所以走番去JR站等車
住京都方向係對面月台
入左閘要行樓梯上天橋跨過路軌先去到


往奈良方向就可以直接出閘


又係認字特警既時間
行樓梯都俾人歧視


大家約定左7點食飯就散水，有成4個鐘訓
我同另外2個同學住3床房，都幾迫下
Professor有得住單人房
直頭涼都唔沖直接訓著左
收到風啲女仔搭番車去貓貓cafe

訓完起身就去番地下街搵食
我地一行10幾人要係食飯時間一齊食飯
正路應該係訂枱先係
不過當時Plan就冇計到咁多
因為walk-in就唔係咁多間餐廳可以一下子空咁多張枱出黎
除非間野本身係拍烏蠅或者係貴價舖頭
最終係地下街搵左半個鐘先搵到間餐廳食飯
餐牌就唔記得影，不過係食和食既
但係個店員入錯哂啲單，搞到8點先食得
我就叫左個串燒拼盤B
有幾舊炸串，有蝦有魚有菇有茄子
有個充滿蒜蓉既和式點醬俾你點
有個沙律，有飯，有味噌湯
以我當年既評語黎講，都真係幾差
"普通味道，味噌湯好咸，又入錯單，亦唔抵食"
分數係3/10
如果同你講呢個餐當年都要1480yen連稅
你地會唔會同我一樣咁諗


另外個同學就叫左個かつどん
其實就係滑蛋吉列豬扒飯
佢俾左少少我食
評語係"隻蛋好香，但係舊豬扒好厚粉"
分數係5/10


食完個餐原來會上甜品
本身以為係牛奶布甸咁就一野啪落口
點知唔試就尤自可，一試就仆街中伏
係杏仁呀
之後一野就嘔番出黎
之後睇番原來呢隻野叫杏仁豆腐
但因為本人聞到或者食到杏仁味係會作嘔既
所以分數係0/10


食左餐唔好食但又唔係平既飯已經想喊出黎
點知想周圍行下既時候附近啲商場都已經收哂皮冇野行
雖然京都係大城市，但就未去到大阪東京嗰啲開到咁夜
除左食店同便利店之外
啲舖頭8點半都已經開始準備關門
9點半都收左超過一半
所以去左便利店買第二日早餐就返酒店

離奇既係居然仲訓得著

當年京都駅中村藤吉樓下有間飯糰好好食
到今時今日都理解唔到點解個個咁鍾意食便利店嗰啲

不過依家執咗，要去新大阪先有

大多人吹奏便利店食物

Day 2
第二朝約左大學9點
所以我地8點就要係酒店lobby集合
我就7點起左身搞掂哂食埋早餐
前一晚買左舊夾心蛋糕
忌廉夾心同蛋糕甜度適中，分數8/10


既然選得做交流團既member
我地當然係fit馬中既fit馬
全部人都早過8點到lobby，之後就行去搭車
準時9點前去到大學門口
大學Professor已經企係嗰度帶我地入去
中間做過乜就唔係度講喇，想知就問我

整整下就食飯時間
Professor帶左我地去大學食堂食飯
環境同叫餐方法同香港大學can都係差唔多
拎個盤去唔同counter叫野，最後先俾錢
餐具，水嗰啲都係自助，食完就自己執番


不過有一個地方我感受到日本嗰種貼心既態度
佢show哂呢度所有買到既食物既詳細資料
例如邊啲有雞牛豬成份，邊啲有大豆成份等等
信教或者有食物敏感既人可以防止自己食錯野
而且又睇到碟野每一個份量既卡路里
脂肪，碳水化合物，蛋白質，鈉含量都寫埋出黎
大食既人可以叫多啲，細食既人叫少啲又平啲
節食既人又可以計到自己食左幾多野


如果我係自己一個黎
我一定每樣野都叫少少黎試擺到成枱都係
不過今次係代表大學過黎就矜持少少
叫左個吉列芝士雞塊，湯烏冬，味噌湯同一盒奶
吉列芝士雞塊 (257yen) 雖然唔係好厚，但好脆
入面一半係雞肉一半係溶溶地既芝士，分數9/10
味噌湯 (32yen)，味道普通，分數6/10
湯烏冬 (172yen)，烏冬彈牙但湯偏鹹，分數7/10
大學生協牛乳 (62yen)，平到笑
味道仲香濃過香港買到嗰隻3.6牛乳，分數9/10
呢度咁多野500幾yen就搞掂，而且都幾好食
好食過上一餐先啦

去完大學之後就係去京都另一個著名景點 - 清水寺
佢起係一個山上面，搭巴士只係去到山腳
我地就係清水坂行上去
條路人多路窄，有時仲有車駛過，都幾危險
行左10分鐘就會到左一個Y字路口
前面會變左石地同突然間多左好多舖頭
係呢度再行多5分鐘就會到清水寺門口
個個都會係呢度留影





但係唔知點解後面有個位整緊
搞到好似唔完美咁
亦促成左我下一次係清水寺整修前黎多一次


呢度既人潮絕對算係京都數一數二
一黎呢度係京都最古老既寺，有超過1200年歷史
係京都世界文化遺產之一，正殿仲係日本國寶
基本上係遊客都會想上黎睇
二黎清水寺前面既表參道有大量店舖
睇完古蹟又有得shopping又有得食野
如果真係慢慢行真係消磨到大半日
當年都已經係咁迫，呢幾年應該都人踩人咁滯