2014夏 - [處男親善訪日之旅]7天京阪鴨仔團

大阪城公園佔地超過1平方公里
城池既佔地規模上係日本三大之一
另外兩個就係姫路城同名古屋城
如果去過既都知道真係好撚大
姫路城仲要行暗斜，行左10分鐘都未上到天守
我地係外圍望過去
都剩係睇到大阪城綠色屋頂既一細忽



古代既城池係將軍同大名既根據地
一個就劈慣友，一個就好有錢
所以好多仇口為啖氣或者為財爭住搵佢地
於是佢地住既地方係防衛上都做得好足
除左有護城河同好厚好高既城牆之外
入面既天守係全城最高既建築物
所以可以監察方圓幾十里既地方
有啲個城池直頭起係座山上面
係打仗既時候居高臨下對作戰有優勢

不過係和平時期，黎既人唔係黎打佢老母
而係幕府或者其他國派黎既使節
如果有使節過黎見到你個城cheap既話
分分鐘唱通街俾人笑渣ga
所以有錢既都會將個城整到好靚好有氣派
可以等使節黎到之後宣揚開去等自己威啲
其中一個例子就係起到啲野好大
呢度係大手門，係大阪城既正門
你睇番啲行人就知道呢度超高超闊
城牆亦都好厚，起碼俾個下馬威啲使節
除左show番自己好撚有錢起到咁大之外
亦都等佢地知道就算想打仗你都好難打得入


行過左大手門就黎到多聞櫓
係大阪城既第一道防線
上面啲欄可以放箭開槍射敵軍
如果引到敵軍入黎再關正門
就係正宗既落閘放狗，死路一條

我知好多人黎大阪都係黎行街
呢啲歷史古蹟當係普通景點打下卡就算
但其實日本歷史本身都好有趣
大阪城係當中佔有一個好重要既位置
象徵左一個時代既開始，又代表一個時代既終結
當中既歷史真係重覆又重覆

我去嗰陣正值大坂之陣400周年
大坂之陣就係1614-1615年係大阪打既一系列戰爭
雖然你地未必知發生乜野事
但牽涉既人物你地都一定會聽過
大阪城當年既城主就係鼎鼎大名既豐臣秀吉
佢既主君係戰國時代最大勢力織田信長
係本能寺之變之後信長被其中一個叛變既家臣燒死

係信長死後佢啲仔同家臣就分地盤
秀吉拎到最大份，自然有人唔gur
唔gur就自然call馬隻揪
偏偏秀吉同佢啲𡃁又好打啲
最後統一左天下(只限日本)
豐臣秀吉統治日本既年代正式開始
佢分封其中一個得力助手德川家康去關東
而秀吉自己就係關西建立陣地，於是起左大坂城
當年起得勁大勁靚勁堅固
之前講緊啲大門同城牆起到勁大勁厚
一條護城河唔夠，起夠兩條
瓦片貼哂金箔，日光日白遠一遠都望到

因為長期山高皇帝遠，所以養肥左家康
秀吉死前封左佢6歲既孻仔做家主
搵左5個家臣睇住佢，以家康為首席留係大坂城輔助家主
所以話歷史就係重覆又重覆x2
家康既勢力最大，自然有人唔gur
唔gur就自然call馬隻揪
偏偏家康同佢啲𡃁又好打啲
最後統一左天下(只限日本)
德川家成為日本既實際話事人
之後天皇封佢做將軍
德川幕府統治日本既年代正式開始

家康review番以前秀吉就係太信自己友
之後俾自己友(姐係自己)打番轉頭
而家自己做左坐館，自然想剷除會影響自己地位既勢力
對象正正就係自己既舊老細豐臣家
佢借文字獄做借口打鳩豐臣家
豐臣家就係自己既最強陣地大坂城應戰
所以話歷史就係重覆又重覆x3
豐臣家本身俾自己家臣騎住，一早已經唔gur
唔gur就自然call馬隻揪
偏偏家康同佢啲𡃁又好打啲
最後豐臣家冚家剷
豐臣家既家臣眼見大勢已去
唔想呢個豐臣家根據地落入敵方手上
正所謂寧願射落海都唔撚益你
決定放火燒左大坂城天守
以前既城都係用木做，所以燒得好快
因為當年係超高層建築，火光遠到京都都睇到
而家睇到既大阪城都係之後重建
關於大阪城既野遲啲會再講

關唔關大坂改名做大阪事？

大阪城有好少見既多重水堀結構
係城入面有兩條護城河
頭先係大手門前面就係行過第一重既護城河
而家呢度就係第二條護城河
過左呢道櫻門之後就係天守閣


櫻門入面係另一個世界
除左前方既天守閣之外
側邊仲有啲商家賣野食賣野飲
因為當時天氣好熱
所以要左杯蜜瓜汽水沙冰雪糕
呢杯野不得了，不得了咁難飲
當年我係第一次接觸蜜瓜汽水呢種飲品
得出既感想就係甜既藥水味糖漿
之後係香港基本上blacklist左呢隻野飲
就算係上面杯雪糕好味都冇用，分數4/10


天守閣側邊唔知點解會有一座舊舊地
好似東京大學安田講堂咁既樣既建築物
係大阪城90年前重建天守既時候順便起埋
當時係用作日本陸軍第四師團司令部
打完仗之後就做左大阪市立博物館
個博物館搬左去新場之後荒廢左10幾年
近年翻新保育做左商場

當年我係第一次接觸蜜瓜汽水呢種飲品
得出既感想就係甜既藥水味糖漿
之後係香港基本上blacklist左呢隻野飲
就算係上面杯雪糕好味都冇用，分數4/10

同沙示汽水一樣，完全係藥水味

大坂改名做大阪就係呢百幾年既事
唔關當年改朝換代事

今晚有文？

講完大阪城周邊既野
而家就講下核心既內圍既核心 - 大阪城天守閣
但講天守閣就要講呢個地點既前身 - 石山本願寺
石山本願寺係日本佛教教派一向宗既大本營
而家改左名叫淨土真宗
都仲係日本佛教其中一個主流教派
築地市場隔離既本願寺都係屬於同一宗派
佢容許僧人結婚生仔......
講宗教有排講，呢度就省略大部分

戰國時代就係群揪大會，四圍都有火頭
講歷史都有排講，呢度就省略大部分
低下階層受制於權力同冇錢，總係被欺壓
例如被強征糧食同稅收，被強制當兵等
自然就要搵啲心靈寄托，搵啲野信下
一向宗融合左傳統「知錯能改，善莫大焉」
同埋宗教神論上「信者得救」既思想
主張惡人都可以得救，信奉門檻極低
除左吸引好多普通人信奉之外
啲士兵同武士可能因為迫不得已為活命而殺人
一向宗既教義令佢地得到救贖，就成為左信徒
久而久之就發展成宗教武裝集團，類似十字軍咁
有啲信眾覺得打敗大名結束戰爭就係一個大善舉
死後就可登西方極樂世界
所以打住替天行道，保家衛國既理想主動出擊起義
係咪覺得好似伊斯蘭教既聖戰？實際上真係
因為信眾本身不乏打過仗既人
所以有幾次真係打得贏大名啲軍隊
成為戰國時代其中一大勢力

石山本願寺係一向宗既大本營，戰略位置優越
佢座落於大阪平原淀川河邊近出海口既山丘上面
基本上控制住大部分西面同南面進出京都既水路同陸路通道
名符其實就係關西既春袋，得春袋者得天下
當時佔據中部同關西既大名就係織田信長
佢一早視石山本願寺係潛在既對手，阻住佢成為霸主
所以一早就想清除呢一個眼中釘

但你精我都唔笨，石山本願寺知道自己本身仇口多
所以起到成個要塞咁，有護城河有土堤有好厚既城牆圍住
仲要因為佢起係大平原上面既高地
敵方軍隊無論經水路定陸路攻過去
只要係寺入面望過去，行緊軍未布陣都已經睇到
啲信眾一早制訂好策略擸定架撐等你過黎打
最後信長打左10年先名義上叫打贏左
實際上係一向宗宗主自己走出黎議和撤退
打完之後信長就放火燒左呢間眼中釘
但始終呢度都係風水寶地
信長原本預定會係呢度起城
但係2年後本能寺之變，信長死左
佢條𡃁豐臣秀吉就係分餅仔遊戲贏左好多地返黎
有成大半個關西地區，當然包括大阪
起城呢件事就由佢接手，於是就起左第一代日本大坂城
上兩篇有講過，呢度就唔多講

大阪最開頭叫大坂其實係關石山本願寺事
係13世紀末有文獻記載呢度叫小坂
坂係日文黎講就係斜坡
因為佢係大阪平原北面既一個山丘，所以得名
但係唔知點解去到15世紀末
石山本願寺既宗主蓮如就係書信中寫呢度係大坂
原本就只係指石山本願寺所在既位置
之後個城起好左，個城好自然就叫做大坂城
之後大坂城附近既市町發展得越黎越大
個個都用呢個地標黎講自己既出身地
所以久而久之成個地區都叫做大坂

去到明治時期，政府宣佈人人平等，武士階級瓦解
原來既武士原本係高人一等，食政府俸祿
亦都有份促成幕府倒台，推番天皇成為實權者
而家就俾政府當左做condom用完即棄
唔知係咪政府覺得做錯野
佢地認為大坂個坂字拆開係士反
姐係武士會造反，所以就改做大阪

第一代建築石山本願寺既陷落源於織田信長
石山合戰之後就放火燒清光

第二代建築大坂城一代由豐臣秀吉下令原址興建
搵左當年旗下武將兼築城專家黒田官兵衛監督
當時天守閣主色係黑色，配搭大量金箔瓦同裝飾
規模亦比而家大好多
除左現存既雙重城牆護城河結構之外仲有第三重城牆
係第二重城牆(大手門出面)同第三重城牆之間
主要係俾行政機關同武士家臣居住保護個城
因為大坂城係當年號稱最強要塞
亦係當年霸主豐臣家既重點領地之一
所以係戰國時代相對安全既地方
於是好多人就過黎呢度發展，商業活動頻繁
慢慢發展成城下町

但好景不常，大坂之陣既結果係豐臣家冚家剷
佢啲家臣見大勢已去就燒左個城都唔益德川家康
個城只係起左30年就冇左...
最後德川家剩係得番大坂城一代既廢墟
同埋出面打到爛哂既城下町
但係個城位置咁優越，又掌握水路陸路交通要道
冇理由唔起番個城
所以德川家就決定復興番呢個地方
要起就要起得大過舊嗰個
第三代建築大坂城二代就由另一個人負責
就係武將兼大名兼築城專家藤堂高虎
佢將之前豐臣家起落既石牆同遺蹟埋左
然後將平整左既地上面起大坂城二代同天守閣
以前天守閣係大約40m，而家就起到60m
同埋轉左用白色為主調，大致上係而家望到既樣
而且地基升高左差唔多10m，顯得個天守閣特別高
啲人見到大坂城重新起番又走番過黎做生意

但好景不常x2，可能因為起得高得滯
個天守閣起好40年就俾雷劈到燒冧左
之後既200幾年大坂城天守閣二代都係得番個石垣底座
去到1930年先由大阪市民集資左150萬yen重建成個大阪城
計番而家等同700億yen，大約50億港紙
天守閣唔係用番古時既全木結構建築
而係採用最新鋼筋水泥+有電既現代建築
只係沿用舊既石垣同裝飾，外觀望落冇分別

而當時大阪城座落市中心一大片既空地上面
係軍國主義盛行既時期就將空地轉做軍用
其中一塊就係之前講既日本陸軍第四師團司令部
所以係第二次世界大戰俾盟軍空襲當靶黎炸
空軍都唔係亂咁炸，炸錯地方會死好多平民
通常佢只會taget on軍用設施
要判定自己炸得啱唔啱唔止係睇雷達
仲要目測睇下下面有冇城市既地標確定自己位置
類似我地而家睇Google Earth咁
大阪城係大阪市區少有既大空地
仲要正淀川隔離，好容易就俾人炸
但好彩既係，第三代天守閣用鋼筋水泥做
所以都只係炸冧少少而唔係成座燒哂
好快就修復番俾人參觀

講完一大堆歷史係時候講番遊記
因為呢度始終係景點，所以係超多人
天守閣入場票係600yen
中學生以下係唔駛錢



買完飛係側邊樓梯上去就會去到正門
入到去係另一個世界，有升降機，有冷氣
而且大阪城出名就係金
個手信舖賣緊既野都閃閃發光
上面就係關於大阪城既展覽
大部分我都係前面講哂
頂層就係觀景台，好細
可能因為驚人多出意外
所以有個防墮網裝左係四周
影出面既時候一定會影到個網，景色大打折扣
因為多人到基本上冇得停低影相
所以啲相全部鬆郁濛，我就唔擺喇

因為真係太多人，都唔係行得太舒服
所以唔駛1個鐘就行番落黎影番大阪城算數
呢代大阪城大致上同二代大阪城一樣
金色既裝飾同瓦都有跟番文獻咁整
不過見到條電糟就有點兒那個
但因為啲支撐全部都係鋼筋水泥
啲石都係扮下野貼上去，所以放得好齊
如果舊天守啲石真係咁擺，地震就一定震散哂


護城既裝置呢代大阪城都有保留到
最下層啲窗咁細係避免敵人爬窗入
入面既士兵又可以放槍放箭射出去
係城角落同中間向下嗰舊野係用黎放落石
防止敵人接近天守


呢個殘念石紀念碑係大阪同小豆島一齊設立
因為當年好多石材來自瀨戶內海地區
運到小豆島經水路運去大坂城
嗰邊都有個大坂城残石記念公園
有好多未運過去既石堆係嗰度冇用到
而呢度都有好多起二代大坂城用剩既廢石
當年德川家開到聲話重建大坂城
主君開到聲，各地大名立即響應
係自己領地搵最靚既石運去大阪
當然啲石都刻左啲記認
希望到時大坂城起好之後見到啲記認
可以同人地哂命話自己有份起之類既鳩話
因為送過黎既石數量太多用唔完，於是就擺左係度
另外啲石經過裁切之後又變左廢石
所以去到大阪城四圍都會見到啲亂石一地都係
有啲就做櫈，有啲做雕塑，有啲放係度就算

行完大阪城我地就唔行回頭路
就行去後面既極樂橋離開核心既內圍
呢度清楚睇到核心城牆同天守閣，影相一流



呢度前面係梅林，係冬天既時候會好靚
因為而家係夏天，所以冇野好睇


係呢個位更加睇到個城牆起得好高
大阪城高高在上咁

行完大阪城我地就搭番地鐵去黑門市場
呢度設計類似縮短版縮窄版既心齋橋筋
街頂有個蓋，所以就算落雨都唔會淋到
日本大部分既商店街都有呢個設計
心齋橋係賣衫，呢度就食野居多
有刺身，有生果，有章魚燒等等
當然仲有啲手信舖，藥妝舖嗰啲
如果專攻生果去木津市場好啲


總行程師話呢度解散放lunch
但呢個時間基本上啲出名舖頭係冇位坐
因為個個都係同我地咁諗過黎食飯
如果真係想行得舒服，最好揀開門時間
因為本人係冇做過任何research
唔知呢度出名食乜，所以都係跟住鳩行
呢度啲舖頭拉客既策略就係門面
燒魚，章魚燒舖頭就係門面整
所以成條街都好香
跟住香味行你就會俾錢間舖
海鮮類佢都係就咁放出黎
河豚佢都有，買完就有師父幫你切片
冇聽過有人中毒，可以放心食
但係本人冇錢食唔起



啲壽司同刺身雖然新鮮，但價位都幾高
有啲比較有錢既同學又食拖羅又食海膽
咁樣食法1個人都差唔多1萬yen
我就同啲比較草根既同學夾一盒拖羅同鰻魚壽司
但其實每人得一舊，食完都唔飽
所以大家一齊是旦搵左間舖頭食野
呢間野已經執左，所以店名就唔講了


呢個鰻魚飯定食雖然得咁細條鰻魚
但已經索價2000yen
不過佢魚質係幾好，唔係急凍鰻魚爛patpat咁
個汁都唔錯，唔會食到腥味，分數7/10

未做交通魔童冇咗種狂氣

第一次去日本係咁上下
字又唔識睇，野又唔識講，剩係識跟人行

既然係解散，當然就各自各行啦
女人堆就去心齋橋shopping
Professor自己走左去，唔跟我地行仲好

作為交流團，我地今次黎既目的除左增進大學間既交流
認識日本文化都係重要既一環
除左科技飲食歷史之外，次文化當然唔可以缺少
尤其係香港咁受日本文化影響，當然要見識下發源地
我地成班年少既男人，對日本既印象黎黎去去都係嗰啲野
動漫野，電子野，女僕Cafe
黑門市場附近就係日本橋電器街
呢一帶係難波次文化集中地，好似秋葉原咁
除左有好多細細間好似肥仔開倉賣啲平既電子配件之外
仲有好多買賣二手電子野音響既舖頭
當然唔少得大量既動漫產品店同女僕cafe
因為競爭都好激烈同埋開係樓上舖
所以好多女僕都會係大街拉客
你睇下啲叔叔踩住單車都要望一望

去完一啲㷫烚烚既地方之後
想知我點解㷫烚烚就要Join會員睇喇
唔知點解食慾就大開，好想食野
於是接落黎夜晚6個鐘我總共食左5餐

第1餐 7pm 松屋
如果有睇過之前既遊記
我有提過係第一次去日本食左松屋既一個飯之後
從此就啟動左我既松屋無限開關
故事就係呢度開始......

話說我地堆男人行完天堂之後就行電器舖
同房fd A (係梅田Yodobashi買相機買到破產嗰個)當然就唔行啦
佢同上次一樣問我去唔去食個靚飯
我都係跟左佢去食，結果又係食松屋
我已經食左兩次牛肉飯唔想再食，諗緊揀第二樣
然後佢就用周星馳既口吻同我講
：「魔童，你知唔知松屋最好食既笨唔係牛肉飯」
：「咁係乜」
：「等我教精你，跟我，蔥鹽燒豚肉飯」
：「試下先」
如果食物既評分係10分滿分
呢個飯既分數大約係12分
刷新左我對好食既評分上限
鹽燒豚肉舖滿飯面，唔係純瘦肉而係半肥瘦
而且有一定厚度，所以香口得黎又唔柴
味道上因為佢係鹽燒，就咁食鹹左啲
但正因為鹹左啲所以送飯一流
上面仲有大量蔥絲同淋左麻油
呢隻蔥唔同香港食嗰啲
食落係爽脆同有蔥味，但絕對唔係草青味
個飯本身熱辣辣，加埋麻油就香噴噴，簡直色香味俱全
肉+蔥+麻油+飯呢個組合簡直無敵

第2餐 8:30pm 吉野家
食完松屋就同fd A一齊行左陣
其實大部分時間都係去左SEGA打機
行翻去道頓堀撞到幾個同學
佢地話未食飯一唔一齊
咁就連埋佢地4個人join埋搵野食
雖然呢度真係好多野食，但伏店都幾多
但因為人流實在太多，多人到食垃圾都會排長龍
例如出哂名係同胞開既假金龍
如果唔想中伏唔想排隊但又想搵到位
當中既清泉就係快餐店
因為有一定質素之餘啲人食完好快走
今次就去左食吉野家


松屋點餐就係去食券機買食券
之後搵位坐低等店員收飛等食
所以係毒撚至愛，因為全程唔駛出聲
吉野家就係坐低左先睇menu
叫餐就要搵店員落單
呢度係遊客區當然有外語menu
但只有最基本既餐，期間限定/邊爐就冇寫係度


因為頭先食左野，而家唔食太多
叫左碗普通牛肉飯就算
就憑幅相都足以睇得出日本同香港嗰間既分別
日本呢度啲牛肉係遮到碗飯，有調味過
唔似得香港嗰啲少得可憐，牛肉勁淡色
松屋啲牛肉薄啲碎啲但濃啲
吉野家啲牛肉就厚啲大塊啲，冇咁濃
個人口味上鐘意松屋

咁快吞兩個丼飯

第3餐 9:30pm 大阪王將
食完飯就返左酒店hea左陣
當我正想沖涼既時候同房B就返黎
問我食唔食大阪王將
本身食左2個飯正常都應該飽
但唔知係因為呢度太多野食
定前幾日完全冇啖好食
我居然仲想食野，就跟左佢行

間野就係Forever21隔離，好易搵
本身就咁諗住食一碟餃子就算
所以就唔上樓，就咁係地下立食
但係呢個fd太鐘意飲啤酒
係京都同professor食飯，食松屋同一蘭都要飲
叫我唔好咁掃興飲番杯
咁好啦


日本啲餃同香港好唔同
佢啲皮薄好多，餡都少啲
不過因為佢即場煎完放入盒
所以熱辣辣，個皮煎到好脆
至於味道...你去Donki買番黎煎係一樣味既

第4餐 12:00am PABLO
原來班女仔記得Professor生日
於是諗住俾個驚喜佢，買左個PABLO撻當生日蛋糕
因為驚Professor出左街/訓左唔開門
就叫左我地班男仔扮哂野上Professor搵佢傾偈
過左12點之後裡應內合開佢門


本身以為佢係放大版蛋撻，但其實係芝士撻
個餡唔係平時芝士登糕實的的咁，而係有啲流心
食落好滑好濃芝士味，係幾好食
之後去大阪臨走前我都會專登去PABLO買撻
不過因為個餡超易震散，拎到返香港散哂
之後就自私買返酒店當早餐食幾日
btw果然女仔搵食同搞啲心思野係好過男仔好多

第5餐 1:00am 松屋
去完同Professor慶祝生日之後
有人問有冇興趣趁夜晚少人啲去Donki行
最後又係得班男人出去
一行出酒店就即刻俾啲無料案內所啲人煩
而且開始見到啲醉酒佬訓係街邊
但係有樣野我比較好奇就係牛郎店
個個都飛輪海頭，啲名又中二病


行完Donki唔知點解都仲係想食野
今次又係去松屋
見到佢出左個泡菜炒豚肉定食
做緊promo送沙律
我見自己咁耐都冇食過菜
今次就試下佢啦


呢個餐最好食反而係個沙律
因為啲椰菜好好食
泡菜炒豚肉鹹得滯，不過送飯都OK既

留名跟進
睇慣樓主啲日本深度遊, 突然睇返入門級ge遊記, 好唔慣

CLS 一晚食三次飯