2014夏 - [處男親善訪日之旅]7天京阪鴨仔團

我唔係好記得係咪每一卡都可以企
但係我哋見第5卡冇窗
可以冇遮冇檔咁影相
所以個個衝哂過去

開車！
架火車行一陣就會到保津川
如果你google會睇到啲水應該係好清
但係因為前一日落左好大雨
所以變左黃河
保津川本身都係彎彎曲曲同有高低差
所以有激流玩
但我估玩班人見到黃河咁都冇乜癮


我地企係火車邊邊
地下係穿窿既


如果啲水係清既
呢個景係幾靚既...



小火車雖然係短途，但都有幾個站
呢個係第二站トロッコ保津峡駅
正常係冇乜人上落車
通常都係得行山客先會用


架小火車都會穿過隧道
我地呢一卡係半露天
同隧道壁其實只係相距幾十厘米
當刻我只係覺得好撚嘈


呢度就係第三個站
トロッコ嵐山駅
大部分人都會係度落車行去竹林
呢度唔係總站，下一站先係

我地見個個都係度落
於是都係呢個站行出去
但係要行條好長既樓梯先出到站
呢條小倉山隧道就係山陰本線新線同舊線既分岐點
係トロッコ嵐山駅同另一邊總站トロッコ嵯峨駅之間
嵯峨野小火車同JR係共用呢個路段
所以廣義黎講可以叫做直通運轉




係トロッコ嵐山駅行出黎就會望到一個湖
個湖叫小倉池，隔離就有個神社，叫做御髮神社
日本神社拜既野無奇不有
呢個神社睇個名就知同頭髮有關
佢係日本唯一一個保祐頭髮既神社
係眾多煩惱頭髮問題既人既勝地
所以個湖應該改名做地中海會比較貼切
因為我地仲後生頭髮都好濃密
Professor本身都未去到脫髮既年紀
所以我地就唔入去了 (笑)

第一次聽頭髮神社

之後我地跟番人潮行番轉頭
經過一段好窄既上斜之後就會去到竹林
呢度係京都另一個必去既景點


人就真係非常之多，尤其係呢度 - 竹林小徑入口
我地諗住係度影團體照，都等左10分鐘先冇俾人擋住


啲竹同樹生得勁高，每支起碼都10m
就算而家係中午都唔會曬
仲因為啲竹生得好密，產生屏風效應
啲自然風引哂去中間條步道
所以其實都幾大風幾涼爽
人流如你所見，膊頭掂膊頭
十足單線雙程行車咁，行得都幾辛苦
想停一停低影相都肯定阻到人



作為千年古都同日本文化中心既京都
保育方面由古代到而家都做得好足
嵐山呢一個地區自古以來都係貴族避暑勝地
因為有貴族睇住，自然有錢去種下樹剪下草
久而久之個景咁多年黎都keep到咁靚
到近代呢度規劃做歷史風土特別保存地區
任何關於開發改建拆卸既行為都受到嚴格規管
都係為左呢個靚景可以一直保存落去



行到中間會經過天龍寺
不過要俾入場費，所以不了


再行前啲就係野宮神社
係日本歷史同文化上都佔有一個重要位置
呢度主要供奉既神明係天照大神
被奉為天皇同日本皇室既始祖
加上日本其中一部千年文學巨著源氏物語都有描述呢度
足以證明呢個神社歷史悠久
源氏物語主角係光源氏
光源氏計劃大家聽過未


呢度除左供奉天照大神之外
入面仲有其他神明既神社
例如稲荷，弁財天，大黑天等等
所以求財，求緣，求交通安全都有

說教半個鐘咪仲遲

今次行程d景點好大路
真係初度遊打卡行程既template

2014我都響京阪

紅色線就係我今次行過既路
嵐山地區呢邊既公共交通十分發達
都唔講巴士，剩係講鐵路站已經有5個
頭先我地搭小火車落車嗰度就係トロッコ嵐山駅
小火車總站就係トロッコ嵯峨駅
隔離係JR西日本既嵯峨嵐山駅
可以返京都站轉乘新幹線同其他JR路線
中間條河就係桂川，保津川就係佢既上游
河上面係嵐電嵐山駅
呢條路面電車線可以去到四条大宮駅轉阪急去河原町
河下面就係阪急嵐山駅
可以去到大阪梅田，甚至去到神戶
兩個嵐山駅中間條橋就係好出名既渡月橋
不過今次趕時間冇行到過去


行完竹林小徑就會去到條大街
中間有唔少餐廳同手信舖
由路軌剷到去過左河既中之島都有
我地轉左行左去睇踏切
呢度係山陰本線既路段
咁啱得咁橋見到小火車



影完之後我地就去左食飯
總行程師揀左Akamanma
位置就係踏切隔離，上面幅地圖都睇到
呢間餐廳已經屹立係度超過40年
算係一間意大利菜既老店
依稀記得價錢唔算太貴
Lunch set好似都係1500yen咁上下


首先上枱既係沙律
就咁睇相都知好新鮮，分數7/10


之後就係粟米濃湯
超級濃超級甜，好似真係食緊條粟米咁
分數8/10


有餐湯當然就有包
呢舊法棍可以話係我食過數一數二好食
首先送上黎既時候係熱辣辣既，好有誠意
聞落有好香既麥味同牛油香味
食落個外皮係脆但煙韌
絕對唔係街邊面包舖硬到可以拎黎打仔嗰種
入面就好鬆軟，食到有麥既味道
而且唔係淡而無味，本身鹹度啱啱好
唔搽牛油同果醬，就咁啪都好好味
搞到我覺個拎黎點湯飲都有啲浪費
亦都絕對唔係街邊嗰種乾到可以當海棉嗰種
分數9/10
第一次從心底裡覺得日本麵包好好食
主菜就係煙鴨胸
你見我影舊包都唔影佢就明啦

除左頭先既沙律，湯，包同主菜
個set仲有甜品同野飲
所以今餐的確係食得勁飽
個cake係芝士提子餅，我覺得甜得滯，分數6/10
紅茶就十分之唔錯
冇落糖咁飲都唔覺有苦澀味
仲有一陣清香，好飲過午後之紅茶，分數9/10

我地個個大部分都第一次去
當然就揀旅遊熱點黎去啦
唔通第一次去大阪唔去心齋橋咩

食飽之後就準備番酒店攞行李
我地就行去嵯峨嵐山駅
行過去都要10分鐘


走去搭車之前就行下トロッコ嵯峨駅
因為就係嵯峨嵐山駅隔離
入面有火車睇
不過啲女同學唔係太like
係屈服於女權既淫威之下我地行左10分鐘就走了



係京都至園部呢段山陰本線叫做嵯峨野線
雖然你見到啲車好似好疏咁
但其實只係因為特急會飛左呢個站咁解
所以日本呢邊啲人係慣左搭快車去最近佢落車既站
之後轉番普通車去番啲細站落車


隔離就係トロッコ嵯峨駅
佢地雖然唔係共用月台
但前面有一段係大家共用路軌
仲有幾個踏切要預時間俾人車過馬路
所以嵯峨野線同小火車本身經過路段既時間都要相當準
日本啲鐵路真係好複雜

上左車之後唔駛20分鐘就返到京都
出左閘拎完行李再入番閘，向大阪進發
我地今晚住心齋橋附近
所以搭JR去到大阪駅轉地鐵
當然我地唔會搭新幹線呢啲咁貴既交通工具
而係搭新快速呢架快到核爆又唔駛加錢坐既車

係香港，每日有幾百萬人由住宅區湧去商業區返工
放工時間又會有幾百萬人搭車返屋企
黨鐵就唔多講，剩係識繁忙時間開密啲
巴士就會係朝早同放工開啲特別車
來往住宅區同中環，太古，觀塘呢啲地方
呢啲車通常都係點對點形式
得好少上車站，然後好快上高速去目的地

日本同香港既情況好似
不過人地就係用鐵路做基本骨幹
京都同大阪自古以黎都係國內既大城市
附近都係高度發展既商業區同住宅區
所以周邊地區任何時間都係好多人來來回回
如果只係靠加密班次但照站站停上落客
一黎車程耐，二黎唔係個個站都有人用
如果架車係前面已經上滿客
後面啲站啲人未落車，就算停站都冇人上到車
如果個站得1個人上落車，停站又似乎唔符合成本效益

於是佢地諗到將其中幾班整做飛站既特快車
剩係停人口密集既住宅區，商業區同大型轉乘站既大站
再係嗰啲大站排好哂時間表
將站站停既普通車同特快車既班次卡啦卡啦咁排
搭普通車既人可以係大站落車轉乘特快車
特快車既人落車又可以轉乘普通車去細站
咁就可以確保每一個停靠站都會有好多人上落車
架車都可以裝多左人，整體載客量會多左
另外停站少左車程都會短左
乘客可以更快到達目的地
而且飛站車可以更快行完全程
所以可以做多幾轉車，火車調度會更加好

之後唔同私鐵好似阪急，阪神，京阪加入戰團
都整左唔同既飛站班次，又特急又快速急行咁
搶佔京阪神鐵路交通既皇者地位
所以JR西日本既前身JNR就誕生左新快速呢個班次
新快速係JR西日本其中一條皇牌金蛋路線
路段東至敦賀，西至姫路，總長200幾公里
係除左特急之外優先度最高既列車班次
大部分時間1個鐘有4班車，繁忙時間會再密

私鐵係私人既，樣樣野都要計過條數先會起
去過日本都知啲鐵路離住宅都好近
如果想將全段路線擴闊起多條路軌唔係咁易
因為都未開始鋪路軌，剩係收地都收到你破產
所以大部分路段路軌通常都係得2線就算
最多都係係站度增建月台等慢車駛入
留出軌道俾下一架特急駛過
但JNR係日本國有鐵路，所以錢對佢黎講唔係問題
佢將新快速京阪神路段既軌道增建成4線
其中預留2線作為上下行新快速同特急之用
而且將站數壓縮到最少，仲唔收特急料金
呢幾年整左卡A-seat收番人錢確保你有位坐
係京都駅出發，去大阪駅只係3個站唔駛半個鐘
去神戶市中心三ノ宮駅都係6個站唔駛1個鐘
去姫路11個站都係個半鐘多少少
可想而知呢架車有幾快

睇完我上面段文
新快速已經將我地由京都帶到大阪
大阪駅比起京都駅規模更加龐大
車站大樓又高，人又多，火車又好多



下面個阿叔職員手指指咁唔係鬧緊人
而係做緊指差確認
日本企業好多都使用呢種方式去check野
透過眼望指物同口號確認加強警覺性
從而增加自己對事物既印象，減低意外發生既機會
日本既鐵路職員更加係經常用到
例如車長開車同停車前後
都會講よし咁樣指住個控制板


正常係大阪駅一出就會落地底地鐵站
坐御堂筋線去難波站行過去
我地圍內有人問Professor可唔可以係出面影下相
Professor話OK，於是我地就係度周圍蕩陣
呢度係阪神百貨出面，呢個係舊樣
好似前幾年拆左再起過靚左好多


Osaka Station City
就係大阪駅南翼大樓既大丸
同北翼大樓既LUCUA夾埋一齊既產物
都係百貨公司類既野，我麻麻地

之後我地就搭地鐵御堂筋線去難波
呢條線係全大阪最繁忙既地鐵線
因為佢貫穿大阪市中心最多人既地區
例如心齋橋，梅田同天王寺
亦都同好多路線有轉乘

我地酒店係道頓堀附近
係難波駅行10分鐘就到
當年酒店名叫Hotel Vista Grande
唔知係執左定俾人收購左
間野而家變左Holiday Inn
成日去道頓堀既人應該知係邊
酒店地下有間7仔，夜晚食宵夜朝早買早餐都好方便

本來諗住checkin完就可以自由時間
點知Professor話因為聽日要去第二間大學探訪
所以要我地confirm好哂rundown啲野先放我地
所以就算6點我地就到酒店
結果都要8點先自由時間
之後梗係就食晚飯
我就冇點做過research唔知有乜食
所以都係跟同房啲fd行，佢地話食一蘭


一蘭唔難搵，只要你搵到道頓堀中間條河就見到
如果你Google"道頓堀 食"既話
10個result有10個都會提到食一蘭
但一蘭係連鎖店黎
佢既起源地都唔係大阪而係褔岡
所以我覺得推介既人應該都係唔識食既超級購物狂
因為道頓堀就好似銅鑼灣咁，乜都有得食
係呢度推介食一蘭就等同於叫外國人係銅鑼灣食翠華一樣
冇乜咁特別，因為連鎖店去邊度食都係咁既味
佢地純粹覺得間舖比較就手，因為就係正Donki隔離
而且呢間一蘭係開24既
所以行街排隊退完稅到凌晨都仲開緊
而排隊既人流中，10個有9個都係講中文既
俾著係日本人，佢地應該心諗一蘭有乜咁特別


一蘭排隊係斬開2條
前隊係舖面前面，排緊20人
後隊係欄杆邊排隊既人，又差唔多20人
姐係我地要排40個人先入到
當時無知既我心諗，真係咁好食？


排緊隊冇野做就四圍望下
道頓堀除左固力果個廣告牌出名之外就係條河
因為條河係出名污糟既
反光睇落去好似有層油浮面咁
另外都見到幾多醉酒佬嘔落條河度
夜晚9點已經有人醉酒，我都幾surprise


大阪作為商業之都，樣樣野都可以係商品
其中一樣野就係搭船遊覽呢條河
1000yen就可以坐，但我覺得唔抵

雖然排左40人，但其實都幾快
半個鐘就排到
排到咁上下店員會派張紙同筆俾你
張紙就係mark番你叫既拉麵要既口味，麵既硬度等等
本身以為佢係食完先俾，但原來要係店面買食券先
我試最平乜都唔加既普通拉麵加隻半熟蛋
買完食券都仲要等，就係等位
我地3個人，店員叫我地上2樓
嗰度可以睇到個空席資料板
紅燈就係啲人食緊
橙燈就係收左order等麵黎
綠燈就係個客坐定但未收order(張櫈應該有sensor)
冇燈就係個客食完走左
執好個位之後就會多個「空」字



一蘭出名就係好似去左自修室咁
左右都有塊板檔住
如果幾個人一齊黎就可以摺起件板既
前面有杯同水喉可以自己斟水飲
嗰個細細既窗口平時有塊竹簾遮住
當有人禁正前方個掣，店員就會揭開塊簾
捐對手過黎收你張飛同落單，好似隔離咁
咁啱望到對面位原來有一排掣
應該就用黎控制空席資料板啲燈


個fd好鍾意食乜都叫杯啤酒黎飲
我就不了，以水代酒


位後面可以俾你掛衫，拎紙巾同放野


唔駛5分鐘拉麵同蛋就送到
不過有樣野唔慣既就係做乜要自己剝殻


因為係香港食開嗰啲cheap雞日式料理拉麵
麵係好似公仔麵，湯就唔知乜野溝出黎既味精湯
所以當年第一次係日本食拉麵黎講
一蘭既味道算係令我愛上左日本拉麵
一黎豚骨湯底濃得黎又冇豬臭味
二黎個辣味好正，好惹味
三黎個細麵同湯底好夾，好索湯
所以飲哂啲湯

食完一蘭都差唔多9點
於是就行去道頓堀既中心點 - 心齋橋筋
呢度都算係日本撞到最多外國人既地方之一
呢個時間條街都仲係好撚多人



心齋橋筋入口既另一邊就係鼎鼎大名既固力果廣告牌
我去嗰陣佢換緊第六代廣告牌
所以睇到中間代打既綾瀨遙廣告牌
不過佢冇打燈，所以有啲暗


影完之後就陪fd子去SEGA打頭D
打完就返酒店

Day 4
今日又係大學親善探訪
但因為路途遙遠，約左大學10點
但係我地8點半都要出發

我又係全房最早起身嗰個
走落去下面7仔買野返上黎食
呢個練乳味麵包個cream好好味
不過個包太難趙，分數7/10
Lipton檸檬茶就冇乜特別



俾Professor鬧完，今日冇人遲到
今次搭地鐵御堂筋線去千里中央轉單軌電車
但其實御堂筋線都有同其他路線做直通運轉
就係江坂駅至千里中央駅
呢個路段本身屬北大阪急行電鐵
起既時候咁啱駁住地鐵御堂筋線真正總站江坂駅
所以兩邊傾好左大家互派車行對方既路段
呢啲奇怪直通運轉係京阪神地區特別多
一唔覺意隨左搭錯車仲會破財


第一次搭Monorail，感覺麻麻地
因為好慢

好快就去到食飯時間，又係去大學食堂
間野同之前嗰間差唔多，不過好似多啲野食
今次有炸雞，好！就食你


呢度買野都係差唔多
唔同counter有唔同既食物
想食乜就同個食堂姨姨講，佢就會整/夾俾你
最唔同既地方係有個好似超級市場啲櫃
放左唔同既冷盤同野飲可以隨便加料
最後就排隊俾錢


我地同大學啲學生一齊坐
從食物既種類可以睇到大家都係鐘意飲奶


我叫左5樣野，價錢係令人難以置信既600yen(連稅)
柚子醋炸雞，有5大舊，都係300yen有找
仲係熱辣辣同脆，酸甜度適中，分數8/10
味噌湯30yen，冇上次京都咁鹹，分數7/10
大奶奶150yen，冇上次大學生協牛乳咁好飲，分數6/10
於是之後我再買多2包大學生協牛乳


半熟蛋好嫩，夾起黎蛋白彈下彈下
浸嗰個汁唔係醬油而係鰹魚汁
所以唔會好鹹


半熟蛋就梗係篤爆佢撈飯食
個飯唔係就咁白飯，係鮭魚碎飯
啲海苔碎同鮭魚碎加埋好香
本身有少少調味鹹鹹地，已經好好食
加埋隻半熟蛋，未食已經知好食
蛋黃呈鮮橙色，而且好thick好濃
佢唔係因為熟得滯所以冇蛋汁
而係因為蛋黃本身杰到冇乜水份流出黎
而且好重蛋香味，加埋飯食真係超正

因為呢日親善探訪開始得比較遲
呢度啲學生比較active同
所以大家都好好傾，搞到4點幾先離開大學
Professor今日心情好，離開大學之後就自由時間
我地一致決定去梅田
女既行百貨公司，男既去Yodobashi
Yodobashi主要就係電子產品集中地
但都會有配件，模型嗰啲買
不過男人行街好快就行完，錢都好快用完
我呢啲無欲無求既就陪人行陪人睇，自己冇買野
拎左幾萬yen買相機既同房fd子話自己已經山窮水盡
問有冇人join佢食松屋
有啲比較富有既同行就唔去
我就冇乜所謂，於是跟左佢去食


松屋係日本三大牛丼連鎖店
另外兩間就係而家香港都有既吉野家
同今年先有既Sukiya
咁黎得牛丼連鎖店梗係要食牛肉飯
另外再加隻半熟蛋
呢個飯令到當時既我意識到香港吉野家係垃撚圾
味道上松屋啲牛肉本身已經夠味
唔似吉野家要叫嘔牛汁先有味
而且佢啲牛偏向厚厚地一塊塊而唔係薄碎
所以食落有牛肉既韌度
不過洋蔥就差少少，唔夠林
但都足以令我俾到8/10分

樓主就係依度開始愛上松屋？

食完松屋就搭車返酒店
因為當年剩係係鴨記買左張7日1GB卡
所以都驚出街成日google同睇地圖會唔夠數據
所以都係返酒店拎番部電腦用wifi
睇下有乜手信買有乜野好行咁
另一個同房既fd B話不如去睇下動漫野
因為佢偷聽到啲女同學去Animate買BL漫
同房fd A(姐係買相機買到破產嗰個)就話不了
所以就得我陪佢行
最近我地既分店係南海電鐵難波站隔離
行行下我終於明白點解佢要搵埋我去
首先我地酒店附近既宗右衛門町係出左名既紅燈區
夜晚好多無料案內所搵人出黎拉客
有啲請埋啲黑人大漢，男人行過都有啲驚
二黎我地跟Google Map咁行係行小路
夜晚行過去都幾驚俾人打劫
行左20分鐘終於見到眼前一片光明
係Animate呀
當年都未太識日文
所以剩係買本Jump作留念之用
不過到而家睇番我都仲未好睇得明


買完野行番酒店，個fd話不如去食宵夜
但佢同我一樣都係冇乜點做過功課
佢問我食乜既時候
我：咁...松屋
佢：好呀
於是我今日第二次食松屋
今次就食個並盛既，因為都唔駛300yen
仲有凍水任飲


佢同上次一樣，叫左支啤酒飲
順便叫左個秋葵烏冬，佢話好好食

松屋個開關ON唔係因為個牛肉飯
而係之後嗰日食左其中一個飯之後

香蔥牛丼？

好勤力update得咁快

Day 5
今日雖然約10點出發
但係我都係好似啲阿伯咁8點幾就醒左
於是我都斯斯然9點行下出面睇下有乜早餐食
但不得要領，所以都係去番7仔買
左邊係蛋包飯團，出面係蛋皮
入面係西炒飯，有啲蕃茄碎，真材實料
酸酸甜甜咁幾好味，分數7/10
右邊係燒雞飯團，好撚鹹，分數4/10



前一日係大學買番黎之前飲過既大學生協牛乳
味道同明治おいしい牛乳匹敵但平過佢




因為啲事故搞到11點先出發去大阪城公園
搭鐵既話有3個站可以最近去到
一個係西南面既地鐵谷町四丁目駅
一個係東南面既地鐵同JR大阪環狀線既森ノ宮駅
一個係西北面既JR大阪環狀線既大阪城公園駅
我地係難波呢邊搭地鐵方便啲
所以搭去谷町四丁目駅行過去
唔好俾個地圖陰到，幅圖個北面係向西架
因為個案內圖係向住大阪城方向


成個城周圍都好多指示牌
所以都唔怕會行錯路


啲花生得好靚