Day 2 青森 (五能線、弘前)
最近呢個月番工做到隻狗咁 剩番半條人命都無
而家終於有時間可以坐定定 繼續打文
上回講到坐左2個鐘 終於見到日本海啦!
雖然陸地呢邊好多雲 都係望出去個天同個海都 好藍 唔錯!
我自己好鍾意望海
所以唔會怕悶
坐下坐下黎到千畳敷呢個站
列車會停留15分鐘
其實日本有好多千畳敷
之前去和歌山嘅白浜都見過
其實就係一層層沉積岩嗰啲地貌
簡單黎講即係香港嘅東平州
個人覺得白浜嗰個靚啲同震撼啲
影夠就上車啦
上車前發現峭壁結左冰都幾靚
月台回望日本海方向
上番車之後個天開始變啦
呢段真係世界級咁靚......
坐下坐下去到深浦站
啲人又忽然間落車 我又跟住落
因為鄉下地方嘅鐵路通常都係單軌
去到某啲有2個月台嘅會合站 就要停一停俾其中一邊過左先
所以喺呢個站就可以一次過集郵曬2款列車啦
對面呢架去青森方向
順帶一提
白神號愉快列車有4卡 其中一卡係包廂列車
啲位可以較到變床咁攤喺到
成件事勁廢
不過我見全部包廂都FULL曬
所以淨係影左條走廊
坐左3個鐘終於可以落車 到左ウェスパ椿山駅
一落車已經有不老不死溫泉嘅接駁車standby
全部都係跟五能線嘅班次接駁
成架車得幾個人
一落車就係日帰溫泉嘅入口
如果過夜無記錯係對面高啲嗰座
入到去第一件事要除鞋
唔駛自己撳機買飛
可以直接去counter show 頭先坐車過黎張車飛就可以平200yen (原本400yen)
不過我唔記得影counter個樣
其實呢間野都幾舊 不過有接駁車起碼都叫accessible
呢到行出去就係應該要去浸嘅海邊溫泉
可以行出去室外望住日本海浸溫泉 成件事都好wild下
不過我最大嘅concern 係冬天得0度
可以點樣行出去浸溫泉......
你知啦咁鬼凍本身入面著住heat tech 又外套
又要喺入面沖左身 浸完室內嗰個
又要著番衫先再行出去
重要行咁遠先行到出去......
出到去又要除衫搞一大輪
成件事就好似以前細個冬天都要去遊室外池
喺更衣室行出去 明明好短 但係好似行一世都未落到水嘅struggle
男湯嗰邊都係好似平時去浸咁
清一色都係呀叔 正常嘅 平日呢啲日子除左呀叔呀伯都唔會有咩人
搞完一大輪 浸完室內暖左個身
終於鼓起勇氣行出室外
已經有曬心理準備會凍到騰騰震
諗住快步走出去 再9秒9除衫 然後跳落去
點知行到出去 原來無咩風 一啲都唔凍
可能浸左一浸打左個底 仲可以慢慢影完相先再行過去
左邊係混浴 右邊係女湯
(簡單黎講姐係左男 右女 我諗應該都無幾多個女人會肯同男人一齊浸)
行到入去發現正呀 一個人霸曬成個湯
個湯望落去好似打完風嘅城門河咁
變左做私人風呂
可惜個景今日真係好普通 天陰陰咁 無咩睇頭
零度嘅天氣 配埋平時熱到一浸就覺得暈嘅溫泉
感覺變得岩岩好
同平時渡假酒店嘅溫泉唔同嘅係
雖然都係望住個海
但係我唔係喺個建築物入面
我真係喺個海岸嘅岩石上面呀!!
一落左水 溫度唔太熱 浸左落去就唔想起身
又影下相 冥想下 咁就過左一個鐘
當我準備走嘅時候
有幾個呀叔呀伯入黎
然後我先發現未影全個湯嘅相
反面教材黎 記住唔可以咁影相
浸完先12點幾
但係我番青森嗰班五能線係4點幾
4個鐘流流長都唔知點過
唯有搵個地方坐低食下野 即係今朝買嘅飯團嗰啲(其實日日都無正餐食 都係食呢啲....) (而家睇番真係好想食半熟鹽煮蛋!!!!!)
仲可以一路食一路望住頭先浸溫泉嘅景
一浸完就出太陽。。。。
不過我已經換番曬衫 唔想又除又著 真係好煩
食完飯氣攻心 就攤左喺張梳化訓著左
去開chur旅行嘅我 應該係我有史以來最relax嘅一次
證明個溫泉真係好舒服呀
後面都有2個呀叔喺後面攤左喺到訓著左
都幾大鼻鼾聲
大聲到嘈醒左我
今日真係好CHILL 好似唔知做過咩就半日