[疫情前嘅最後鐵道遊] 2020冬 東北 岩手 青森 秋田 福島

我入哩間
見門口感覺好衝入去

LM

Day 1 東京 --> 岩手 --> 青森

坐左都20分鐘 啲人都開始收收地皮
船家有佢繼續講 啲人有佢地自己繼續食野吹水
成個picture 好似一班上堂自己做自己野 唔理老師嘅廢青



無幾耐 架艇划到入去一個停留點
大概停15-20分鐘俾人影相同行下




船家會帶大家行下去
你鍾意跟就跟
唔鍾意就自己周圍fing



呢到有帳幕 放左啲石仔
100yen可以買5粒嘅機會 都係嗰啲咩扔到就願望成真個類
試下扔入去牆入面嘅窿


其實個窿都好細 兼個距離好遠 你用得力去扔又顧唔到準繩度
嗰個台灣family啲細路係咁扭計話要買 然後叫佢老豆扔
全部人試完都fail嘅時候 佢扔左幾次竟然就成功左！

夠鐘上番架艇
沿路番番出去起點
船家中途仲有個特別環節
會無啦啦唱左隻唔知咩歌
都solo左成2-3分鐘 都唱得幾好聽認真

我覺得1800yen 全程大約1個鐘 都唔算貴
不過有雪景睇會開心啲


行番出頭先落車嘅猊鼻渓駅
沿路經過一間family Mart
以防萬一買定啲糧食做儲備先


大部份人都上番去一ノ関嘅列車走人
順帶一提 有唔少人下站通常會搭巴士去平泉世界遺產 之後再搭東北本線走人
不過嗰日又唔係好覺有人咁做

而我就等再下一架去気仙沼嘅pokemon列車
有jr pass嘅可以免費預約 全車指定席 每日一往復
架車得2卡 一卡係指定席 另一卡係遊戲車廂
最好喺香港出發前上JR EAST reservation 個網book定先

等車無野做嗰陣入左去等候室避寒
日本真係每一個地方都有香港人去


1148-1251
猊鼻渓 - 気仙沼
ポケモントレイン気仙沼号
気仙沼行


架車一黎到 啲細路瘋狂9衝落車
成個站得我一個上車
後尾都發現其實近乎全部人應該都係起點上車


搵到自己個位之後 發現坐喺到全部都係攰到死屍咁嘅老豆老母
啲細路就一係衝曬出去影相 停站就出去個站到蓋印 或者長期都係遊戲車廂到搏鬥

架車有一個陪玩員 專係睇住啲細路玩嗰陣嘅安全 同執番好個場
佢應該發現我係新黎 就俾左份souvenir 我


其實遊戲車卡都幾岩打卡
有車票道具


波波池呀 比卡超耳道具
大比卡超


一堆比卡超公仔


難得啲細路落曬車 終於可以影個全景 左上方仲有個波波池


影下影下其實都好快落車
但係其實都已經過左個幾鐘

某個站補番張靚相先


終於到気仙沼啦！


當啲細路落車又走去影相蓋印嘅時候
我就趕住過對面轉車 搭BRT 気仙沼線 去一個喺311地震嘅一間學校遺跡

1255-1330
気仙沼 - 陸前階上
ＪＲ気仙沼線〔ＢＲＴ:柳津-気仙沼〕
本吉行



BRT嘅出現係因為當時311嘅海嘯嚴重破壞左大平洋沿岸一段嘅大船渡線同気仙沼線



因為復修路段好高成本 JR東日本決定放棄
將原有路軌舖成專有巴士線 （唔俾其他車行）
由於BRT 嘅運作較為flexible
亦都大大增加左班次 某程度上都會吸引多左客源



不過其實以架車黎講同普通巴士真係完全無分別



沿途百廢俱興
電視見就見得多
今次都係第一次見





搭左大約半個鐘 終於到左我落車嘅陸前階上駅
但係其實未到 因為仲要行多30分鐘先到嗰間跡址
去東北旅行如果唔係揸車嘅話真係少啲體力都唔得


沿路就係不斷見到大貨車經過 沙塵滾滾咁
人都無隻 只係中途行過見到2個細路女
行過竟然同我打招呼 可能鄉下人真係無咩戒心



終於到啦
其實自己一個係啲荒蕪嘅地方行都幾驚




下次再講下入面究竟係點
呢排番工都好多野做
呢啲都係番工搭車嗰時打嘅
請各位繼續多多支持

行咁遠有咩睇

其實我唔行到過去都唔知真係咁鄉下
過左咁多年 原來咁多野都仲係有待復原

東北真係好撚正，趁未多人去真係去多幾次

東北D交通唔揸車真係煩
諗緊由青森玩返落去會唔會順路少少
但都係要成日拖住個GIP

留名

仙台牛舌真係唔係講笑, 食過真係返唔到轉頭, 香港有冇好食既牛舌店推介? 食過幾間個感覺都好似午餐肉
小弟兩年前係4月左右去, 風景真係好正, 如果秋天再去睇埋奧入瀨溪流景就perfect

條溪易唔易結冰？

住星野

有兩間唔係燒肉店，但牛舌幾好食。
旺角：申子居酒屋
深水埗：饗車仔麵

食過深水埗間車仔麵，但未試過牛舌
有冇燒肉店推介

今年2月先住過奧入瀨果間
住完真係返唔到轉頭

去奥入瀨係咪最好要自駕？
睇秋景相真係靚到window wallpaper咁

角館花期難夾
武家屋敷比檜木內川堤遲開花
好易失望

咩季節去
佢有埋d tour/接駁車真係好抵玩

我係八戶搭佢地果間shuttle去

咪2月囉
冰天雪地
可以join佢地d tour上山睇冰

真心正

如果嗰日road trip 嘅話
好似day 1 由東京經岩手上青森
同埋 day 4 青森經秋田內陸線落仙台再落會津若松
咁無理由全程拖住個gip行 或者每到地方都鎖一次locker

所以呢幾日就用黑貓宅急便 早一日寄個gip去下一間酒店

或者plan到盡量一個地方可以訓到幾晚
但係代價係好多地方要即日來回 或者將啲travelling 搬曬去一早或者好夜

2年前咁岩就係奧入瀨
初夏超靚
都係搭JR巴士即日來回
嗰陣仲係學生 唔會有錢住星野

想像下後面d樹開哂漸變色既紅黃綠葉係幾咁靚

Day 1 東京 -> 岩手 -> 青森



上回講到喺気仙沼（正確黎講我而家踏足嘅係宮城縣）轉BRT 再要行30分鐘去到一個地震嘅遺址
呢間『気仙沼市東日本大震災遺構・伝承館 (旧気仙沼向洋高校)』由於鄰近海邊 海嘯當時係食到正咁滯
不過最後外型大致保持完整 就將佢改裝成一個地震遺址博物館
時間永遠停留喺2011年3月11號

其實咁山旮旯嘅地方真係唔會有幾多人黎
買完飛就會帶你去睇一段video 唔準影相
都預左係嗰啲密集式重播東北幾縣當時地震同海嘯侵襲嘅片
好多都係居民逃難嘅時候影嘅 當中會聽到唔少嚎哭同尖叫聲
如果親身喺現場 睇見所有野就化為烏有
都真係好崩潰

之後會通過一條展覽嘅通道 都係唔俾睇相
行到盡頭會有道自動門
我深一深呼吸 因為一開門就會見到當年經過海嘯洗禮後嘅廢墟

準備好先好碌落去
。
。
。
。





當然你唔好expect 100% 原貌
因為佢都要執番乾淨俾條路你行
又要裝番啲燈
但係見到咁除左有啲無奈同不安 都唔知講咩
同埋一個人行呢啲地方就想快啲行完 因為都有少少淆底




可以上去天台 望曬附近成個環境





走之前又會經過另一個theatre 係播另一條片
主要係圍繞住唔同parties 如何面對災後嘅生離死別

其中一段係講気仙沼一間初中嘅畢業生原本3月12號會行畢業禮
好唔好彩 就係爭左一日 佢地從此陰陽相隔
畢業禮因為大地震延期舉行
因為人同地都面目全非 畢業生代表都要將成篇講辭由頭再寫過
有邊個諗到只係一瞬間 身邊嘅野會完全無曬？

當個畢業生代表出黎講野已經feel到佢好想喊要扮堅強
其實好心噏 望住佢講講下情緒都好激動
我自己都眼紅紅 然後見到隔離啲呀嬸都喺到抹緊眼淚

（癡線我而家打打下都開始喊）

希望東北人可以堅強落去 努力重建
311雖然當時對我黎講又真係無咩感覺 嗰陣又細個 講起日本淨係識東京 大阪
咩福島 宮城 岩手 茨城 全部都完全無概念
但係當你去過東北親身體驗過 呢啲唔係過度商業化嘅淨土
令到我好想下次又番黎東北
想去大船渡嘅奇跡之一本松（當年海嘯浸襲底下一棵竟然無倒塌嘅松樹 JR其中一個BRT站仲以佢黎命名）
想去更多當年沿岸嘅地方 好似宮古 久慈嗰啲睇下



走嗰陣又要沿路快行加跑出去
因為趕唔切架BRT我就無得車駁車

可能你會問其實BRT都係巴士
路面情況好難控制 咁係咪會誤點？
其實都係 因為而家唔係100%路段都係BRT專用 可能會有少少同其他車爭路嘅情況
所以如果BRT係會出現遲左到某個站嘅情況
相反如果早左 會停喺嗰個站直到夠鐘先開車





原本気仙沼線嘅路軌同月台 仲有站牌 又係另一個受到當年洗禮嘅證據

1522-1558 陸前階上 - 気仙沼
JＲ気仙沼線〔ＢＴ:柳津-気仙沼〕
気仙沼行

番番黎気仙沼


之黎就係坐曬成條大船渡線嘅路軌段出一ノ関
坐成1.5個鐘
普通列車咁慢 攞黎補眠就最岩
因為真係好眼訓

1615-1738
気仙沼 - 一ノ関
ＪＲ大船渡線
一ノ関行



番到去一ノ関已經天黑
原本計劃喺到食埋飯
諗諗下其實去盛岡食埋仲可以行陣喎 還店我都未行過 留條腳毛都好
就改早左新幹線車飛上盛岡先


1814-1854 一ノ関 - 盛岡
ＪＲ東北新幹線
やまびこ67号
盛岡行



次次都係經過或者轉車
今次終於出閘啦
同埋終於有人發現我張pass未蓋今日個 day chop
無得呃多日添

盛岡喺東北黎講都算係個幾大嘅城市
個車站商場俾我想像中有規模
相反青森真係好鄉下

搭車黎嗰時上facebook嗰啲台灣人開嘅旅遊group 睇下有咩好食
見到有人去左盛岡食soba放題
張相係幾疊碗疊埋 話食左50幾碗
雖然無幾耐之前食左個飯團
但係好奇結果就走左去試



下次再講呢間野係咩料
本身諗住打到第一日完
但係太多字要分2次打

lm