Day 1 東京 --> 岩手 --> 青森
0604-0836
東北新幹線
東京 - 一ノ関 (やまびこ40号)
第一次用呢張5日東北pass
其實要5日內去曬想去嘅地方再加埋頭尾要番東京都有啲難度
可能你會話你分幾次去每次去一度咪唔洗咁舟車勞頓囉
但係我嘅旅行哲學係睇左咩景點想去 再將呢啲地方連埋一齊
而唔係揀左一個地區 再睇有咩景點岩去 因為唔想徙時間去啲自己唔想去嘅地方
食下野 發下夢
去到宇都宮終於天光
0836 終於到一ノ関啦 原來都幾多人落車
今日行程係
喺一ノ関轉大船渡線去猊鼻渓坐船
再上番大船渡線坐 pokemon 列車
再轉BRT: 気仙沼線 去気仙沼嘅一個地震遺址
沿上面條route出番一ノ関駅 搭新幹線上盛岡
半夜前去到青森嘅酒店
由於尋日朝早已經用宅急便將個gip寄左去青森
出左去新幹線口 將個大背囊放埋入coin locker
咁就可以輕輕鬆鬆玩一日 夜晚再番黎攞番個袋
由於一ノ関可以坐到pokemon resort train 所以就有舊咁嘅野喺到
之後就過番去在來線月台
坐大船渡線去猊鼻渓駅
因為呢到有JR東日本嘅pokemon愉快列車
所以連個站牌都有Pokemon
隔離月台嘅東北本線列車 盛岡行
有時都想去旅行坐多啲普通列車 不過真係太慢 配合唔到我想去咁多地方
可能遲啲搵番次青春18 縱斷日本!
0909-0939
大船渡線
一ノ関 - 猊鼻渓
番番黎我要上嘅大船渡線 開往気仙沼嘅列車
成架車70%都係遊客
估計應該都係今朝仙台同盛岡黎
應該得我先會咁癲一早由東京出發
搭車唔係食就訓 9點幾又開始肚餓啦
話說頭先見到有便當舖 又未試過火車便當
加上我全日都無預時間食lunch 又驚鄉下地方未必有便利店
就買左個牛丼試下 其實都唔平
無野做就開左頭先買個牛丼食
好得意 原來拉開左條繩就會啟動佢個發熱裝置
不過我諗下次買野食都係買番便利店飯團呀熱食嗰啲算啦
晨咁早時間 大船渡線嘅風景
落左車google map都唔洗開
跟住啲人行5分鐘就到
門口買飛 入到去仲有手信舖 又可以涼下暖氣
大概1個鐘會開一架船
我搭嘅1000個班 喺嗰日嘅第二班
要晏嘅話唔好太晏 因為4點到就尾班船
可能時間尚早 都唔算多人 只係得10幾個人
猊鼻渓四季都有唔同嘅景色
冬天嘅船仲有被 屏風同蓋擋風 (雖然我覺得完全係阻住我影相)
不過今年暖冬情況都好嚴重
基本上係完全無雪
好啦 開動啦 咁岩望番轉頭見到開番去一ノ関方向嘅大船渡線列車
坐我對面嘅台灣family 有喺入口買左包鴨糧餵鴨 結果引曬啲鴨過黎
船家會邊划邊講下我地去到邊呀 有咩景色
不過全程日文 一句都聽唔明
我影影下發覺坐喺呢個位咁多野遮住
咩都睇唔到 加咩都影唔到
就行左去船頭到
其實都幾奇怪 通常坐呢啲船都啲人都係鍾意一窩蜂走去船頭霸位影相
不過唔緊要啦 無人同我爭 咁我可以慢慢影
其實係幾靚架 不過睇枯枝又真係無癮少少嘅
同埋佢咁岩呢排有啲維修工程 其實都有啲大煞風景
坐坐下迎頭又另一架艇
呢架就係今朝嘅第一班
人仲少過我地 得幾條友
又要搵番啲相 又要打字 好攰~
打住咁多先~