原link:
https://medium.com/@it9gamelog/vpn-is-pointless-against-adversaries-fcfc2fba9352
今日全港都講緊VPN，你諗下VPN係用來做乜嘢先？
VPN可以…將網絡行蹤匿名化？
如果你想隱姓埋名，同時又唔知點樣用VPN，而又睇緊呢篇文，我勸你唔使浪費金錢時間，VPN根本無用。
VPN根本無用。
好啦，你可以Back返去前一頁做你嘅嘢了。
…仲喺度？
應該噉講，VPN的確係最基本嘅一環，但單單使用VPN係冇任何作用。如果有任何確切嘅IT保安需要，請向專業嘅IT從業員咨詢。
一般人如果想窺探電子安全要點樣做，可以望一望呢位仁兄嘅故仔，但裏面嘅技術同具體做法其實因人而異，請你唔好不求甚解就照Set一次然後搵我算帳，我只係想借佢表達 — 僅僅電子安全就可以水蛇春咁長，真係唔好以為VPN就可以安枕無擔憂。
如果閣下為IT從業員，想了解有乜嘢軟件可以用，https://www.privacytools.io/睇來介紹都幾齊全。
參考中國網民嘅經驗，用咗VPN唔代表可以肆意做違法嘅事，包括發表所謂「顛覆國家」嘅言論。萬一「國安法」同「煽動顛覆國家政權罪」聽日就喺香港實施，唔好以為用咗VPN就可以口沒遮攔暢所欲言都能夠全身而退。
噉點解中國網民要VPN？主要只係為咗翻牆，去一啲牆內去唔到嘅網站，僅此而已。重申，如果一個中國人恃住用咗VPN，喺冇其他安全措施之下，就上Twitter發表顛覆國家嘅偉論且引起注意，佢都會死得好快。
VPN可以…翻牆？
得係得，但我唔覺得一年半載之內香港會有GFW。
而且GFW具體要用邊隻VPN先至翻到都有學問。參考中國情況，OpenVPN或PPTP制式嘅VPN早就唔用得，翻牆嘅攻防技術都會不斷提升。
與其而家買一隻唔需要、到時又唔知有冇用嘅嘢，不如真係殺到埋身先算啦。
VPN可以…令App裏面嘅訊息更安全？
簡單來講，No。
Facebook、Whatsapp、IG、Telegram、Gmail等等，甚至你睇緊呢篇嘢嘅Medium，已經係用咗HTTPS/SSL加密技術去傳輸，從數學角度上係連美國FBI都破解唔到。即使香港隔夜就有GFW，港共政權都唔會突然有萬能Key可以竊取哂全香港人嘅網絡通訊。
但問題在於政權要破解你啲訊息，通常唔會走數學途徑。
極權針對高價值人士最快嘅方法係做針對性攻擊 — 上門炒家、強迫手機解鎖、洗頭艇、騷擾親友等等。真正高科技嘅黑客攻擊，通常好少用。
但On9唔好自己申請
如果你用中國App、用中國網站如Wechat、淘宝、抖音、滴滴、Bilibili等等，我敢100%保証裏面嘅資料必然會自動送中，唔使心存僥幸。啲數據根本就係儲存喺中國嘅司法管轄區之下，點會唔係？
公道講句，其實你當用Facebook、Gmail、Uber基本上係會自動送美國一樣……重點就係睇你信邊一個政權。
至於中國製電話如華為、聯想、OnePlus/一加、小米、Oppo、TCL等等，我唔會實牙實齒話佢有後門，但都……好心啦，有Apple、Samsung、LG、Sony、Nokia、Asus、HTC揀，點解咁要冒呢個風險？
最後
請大家唔好痴心妄想或將VPN神化成為靈丹妙藥。
而且重要嘅嘢唔怕講多次，雖然舊年6月講到而家，發夢唔好上網講。
再重申，有確切嘅保安需要請向專業IT人士咨詢，而喺考慮資訊安全同時，更要考慮物理人身安全。
電腦白痴：好混亂
